15-06-2025, 00:03
Azərbaycanda Milli Qurtuluş Günüdür
Bu gün Azərbaycanda Milli Qurtuluş Günü qeyd olunur.
32 il əvvəl - Milli Məclisin 1993-cü il iyunun 15-də keçirilən iclasındakı çıxışında Ulu Öndər Heydər Əliyev Azərbaycan dövlətçiliyinin gələcək inkişaf strategiyasını elan edib və bu gün Azərbaycan tarixinə Milli Qurtuluş Günü kimi daxil olub, Azərbaycan dövlətçiliyi yox olmaq təhlükəsindən qurtulub.
Həmin gün Azərbaycan xalqının tələbi ilə ikinci dəfə hakimiyyətə qayıdan Heydər Əliyev Ali Sovetin sədri seçilib. Bununla da uzun müddət davam edən gərginlik və qarşıdurma səngiyib və ölkə vətəndaş müharibəsi və parçalanma təhlükəsindən xilas olub. Milli qurtuluş fəlsəfəsi sözün geniş mənasında Azərbaycanın mövcudluğunu, onun ən böyük tarixi nailiyyəti olan müstəqilliyini təmin edir.
Əgər müstəqilliyi qazanmaq ilkin şərt idisə, ikinci vacib məsələ suverenliyi qoruyub inkişaf etdirmək idi və bu, Ümummilli Liderin iradəsi sayəsində reallığa çevrildi. O, milli Azərbaycan dövlətçiliyi konsepsiyasını yaratdı. Bütün maneələrə baxmayaraq, ən qısa müddətdə ölkədə ictimai-siyasi sabitlik bərpa olundu.
Heydər Əliyev 1993-cü il iyunun 20-də Azərbaycan həqiqətlərinin dünya ictimaiyyətinə çatdırılması üçün yerli və xarici jurnalistlər üçün brifinq keçirib, iyunun 21-də isə bir sıra ölkələrin diplomatları ilə görüşüb. Bu sahədə yürüdülən siyasət respublikanı informasiya blokadasından çıxartdı. Dünyada Azərbaycanla bağlı formalaşan fikri müsbət yöndə dəyişdi. Məhz belə bir mürəkkəb siyasi şəraitdə Heydər Əliyevin böyük potensialı Azərbaycanın müstəqilliyinin qarantına çevrildi. Ümummilli Liderin şəxsiyyəti, onun özünəməxsus siyasi idarəetmə qabiliyyəti, qətiyyəti və xarizması siyasi böhrana son qoydu və Azərbaycanın dünya birliyinə inteqrasiyası başlandı.
1997-ci ildə Milli Məclisin deputatları 15 iyun tarixinin təqvimə Azərbaycan Respublikasının Milli Qurtuluş Günü kimi salınması təklifi ilə çıxış ediblər və parlament bu təklifi bəyənib. Həmin vaxtdan Heydər Əliyevin yenidən hakimiyyətə qayıdışı Milli Qurtuluş Günü kimi qeyd edilir.
14-06-2025, 23:23
Ərdoğan Trampla İsrail-İranı müzakirə etdi
Türkiyə Prezidenti Rəcəb Tayyib Ərdoğanla amerikalı həmkarı Donald Tramp arasında telefon danışığı olub.
Lliderlər İsrailin İrana hücumunu müzakirə ediblər.
Ərdoğan bildirib ki, Türkiyə gərginliyi yaxından izləyir.
Onun fikrincə, nüvə sazişi ilə bağlı müzakirələr problemin həlli üçün yeganə yoldur.
Türkiyə lideri əlavə edib ki, ölkəsi nəzarətdən çıxa biləcək bir gərginliyin qarşısının alınması üçün əlindən gələni etməyə hazırdır.
Dövlət başçıları həmçinin regional və qlobal məsələlər barədə danışıblar.
14-06-2025, 22:45
İran mövqeyini dəyişməyəcək - Prezident bəyan etdi
İran nüvə məsələsi ilə bağlı mövqeyini dəyişməyəcək və İsrailin hücumları davam etdikcə danışıqlar aparmayacaq.
Bunu İran Prezidenti Məsud Pezeşkian fransalı həmkarı Emmanuel Makronla telefon danışığı zamanı deyib.
O, ABŞ-ni İsrailin hücumlarını əlaqələndirməkdə ittiham edib.
"Amerikalılar danışıqlar zamanı həmişə vurğulayıblar ki, İsrail onların koordinasiyası və icazəsi olmadan heç bir aqressiv addım atmayacaq. Ona görə də indiki hücumların bu hərəkətləri təsdiqləyən ABŞ-nin koordinasiyası ilə həyata keçirildiyi açıq-aydın görünür", - Pezeşkian qeyd edib.
İran lideri daha əvvəl Pakistanın Baş naziri Şahbaz Şəriflə söhbətində qeyd edib ki, İsrailin zərbələrinin ABŞ ilə əlaqələndirilməsi Vaşinqtonun etibarsızlığını göstərir.
14-06-2025, 22:24
Ərdoğan Pezeşkianla danışıqlar apardı
Türkiyə Prezidenti Rəcəb Tayyib Ərdoğan İran Prezidenti Məsud Pezeşkianla telefon danışığı aparıb.
Bu barədə “Anadolu” agentliyi məlumat yayıb.
Bildirilib ki, telefon danışığında İsrail və İran arasındakı münaqişə, regional və qlobal məsələlər müzakirə edilib.
Ərdoğan İsrailin İrana qarşı hücumlarını qınadığını, həlak olanlara görə İran xalqına başsağlığı verdiyini bildirib.
14-06-2025, 21:18
İranın qaz yatağı vuruldu
İsrail pilotsuz təyyarələri Cənubi Pars qaz yatağına hücum edib.
Bu barədə "Tasnim" məlumat yayıb.
Ölkənin qaz sektorunda iki partlayış baş verib ki, ilkin araşdırmalara görə, bu partlayış pilotsuz təyyarələrin hücumu nəticəsində olub.
Hücumlar Fəcr Cam neft emalı zavodunu hədəf alıb. Cənubi Pars Faza 6 və 8-də hasil edilən qazın bir hissəsi, o cümlədən “Nar” və “Kənqan” yataqlarında hasil edilən qazın bir hissəsi təmizlənmək üçün NEZ-ə göndərilir.
14-cü mərhələ neft emalı zavodunda baş verən yanğının söndürülməsi istiqamətində görülən çevik tədbirlər alovun digər ərazilərə keçməsinin qarşısı alınıb.
Bildirilib ki, dörd Cənubi Pars blokundan birində baş verən yanğın 14 saylı platformadan 12 milyon kubmetr qaz hasilatını bərpa olunana qədər müvəqqəti olaraq dayandırıb.
14-06-2025, 21:17
Bakı klubu baş məşqçisi ilə yollarını ayırdı
"Sabah" futbol klubu baş məşqçisi Vasili Berezutski ilə yollarını ayırıb.
Klubdan verilən məlumata görə, müqaviləyə ailəvi səbəblərlə əlaqədar olaraq qarşılıqlı razılıq əsasında xitam verilib.
Qeyd edək ki, “Sabah” klubu tərəfindən mütəxəssisin ailəsinə ən xoş arzular çatdırılıb, həyat yoldaşına tezliklə sağalmağı və möhkəm can sağlığı arzulanıb.
14-06-2025, 20:23
Ərdoğan İlham Əliyevə zəng etdi
İyunun 14-də Türkiyə Respublikasının Prezidenti Rəcəb Tayyib Ərdoğan Azərbaycan Respublikasının Prezidenti İlham Əliyevə zəng edib.
Bu barədə Azərbaycan Prezidentinin Mətbuat Xidməti məlumat yayıb.
Telefon söhbəti zamanı İran İslam Respublikası və İsrail Dövləti arasında vəziyyətin gərginləşməsi ilə bağlı narahatlıq ifadə olunub. Dövlət başçıları gərginliyin tezliklə aradan qaldırılmasının vacibliyini qeyd edərək, məsələlərin danışıqlar yolu ilə həllinin önəmi vurğulayıblar.
Azərbaycan və Türkiyə prezidentləri ölkələrimiz arasında qardaşlıq və strateji müttəfiqlik münasibətlərinin gündəliyinə dair məsələlər barədə fikir mübadiləsi aparıblar.
Telefon danışığı əsnasında dövlət başçıları gələcək təmaslarla bağlı məsələlərə də toxunublar.
14-06-2025, 20:04
Təyyarələrimiz tezliklə İran səmasında olacaq - Netanyahu
"İsrail Hərbi Hava Qüvvələrinin (HHQ) təyyarələri tezliklə Tehran səmasında peyda olacaq və İrandakı rejimin hər bir obyektinə və hədəfinə zərbə endirəcək".
Bu barədə Baş nazir Benyamin Netanyahu videomüraciət zamanı bildirib.
O əlavə edib ki, İsrailin endirdiyi zərbələr Tehranın nüvə proqramını "bir neçə il dala atıb".
14-06-2025, 20:03
Cəlal YADİGARLI,
Tiflis Dövlət Universitetinin tələbəsi
Borçalıdan gələn səs
Cəlal Yadigarlı 18 may 2003-cü ildə Gürcüstanda, Dmanisi(Başkeçid) rayonunun Yırğançay kəndində anadan olub. Orta məktəbi Yırğançayda bitirdikdən sonra, 2021-ci ildə İvane Cavaxişvili adına Tiflis Dövlət Universitetinə qəbul olub. Tarix ixtisası üzrə təhsil alır. Hələ uşaqlıq yaşlarından ədəbiyyata və tarixə böyük marağı var. Dediyiniə görə, sazla yatıb, sazla qalxarmış. Sazı uşaqlıq oyuncağı hesab edir. Tiflisə gələndən sonra M.F.Axundov adına Azərbaycan mədəniyyət muzeyində saz kurslarına getməyə və klassik havaları öyrənməyə başlayıb. Şeir yazmaq ilhamını da elə sazdan alır. Barmaqları pərdələrə toxunanda misralar qəlbimə düzülür. Kiçik yaşlarından Türk mədəniyyətinin və tarixinin təbliğini qarşısına hədəf qoyub və bu yolda addımlayır. Bir çox tarixi-mədəni tədbirdə iştirak edib, Borçalı türkləri və türk milləti haqqında məqalələr yazıb. Bu gün onun bir neçə şeirini oxucularımıza təqdim edirk:
OĞLUYAM
Soyum aşikardı cümlə aləmə
Oğuz adlı bəyin, xanın oğluyam.
Çağ örtüb, çağ açan sultan Fatihin,
İstanbul fəth olan danın oğluyam.
Atam Çağrı bəydi Xorasan şahı,
Anam Ağca xatun göylərin mahı,
Haqq bilib, Haqq sayan uca Allahı
İslama adanan canın oğluyam.
Dirçəliş cənginin sərazəriyəm,
Nə tatar, nə monqol, nə azəriyəm,
Səlcuqlu mülkünün göy Xəzəriyəm
Şərəfin, şöhrətin, şanın oğluyam.
Altay torpağından yoğrulub mayam,
Özüm bir orduyam, ləşkərə tayam,
Nə alban, nə əcəm, nə də ki hayam,
Kürşadda çağlayan qanın oğluyam.
Sultan Alparslanın şah zəfəriyəm,
Avşaram, Qacaram, həm Səfəviyəm,
Altaydan Tunaya bir səfəriyəm,
Aralın, Göyçənin, Vanın oğluyam.
Nəsli tükənməyib Çini aşanın,
Dəryatək çağlayıb, coşub, daşanın,
Bir vəsiyyəti var Ənvər Paşanın
Turanı gözləyən anın oğluyam.
Osmanoğulları gələcək geri,
Düşəcək Asyada zalimin səri,
Məşriqdən Məğribə dolansan yeri,
Türk qoxan hər səmtin, yanın oğluyam
Mən Yadigarlıyam, Borçalı yurdum,
Bircə himə bənddi Təbrizdə ordum,
Musulda, Kərkükdə dirilir qurdum,
Orhunda gövhəri-kanın oğluyam.
SAZIM
Sinəm üstə dillən sazım, din sazım,
Qoy telində Şərqin qəmi dillənsin.
Məclislər qur ocaqların başında,
Türkün nəsli obalansın, ellənsin.
Bəmə enmə bu fəryadı zilə çək,
Mizraba çək, pərdəyə çək, telə çək,
Al ruhumu ulu ərşə elə çək,
Gözüm yaşı dərya kimi sellənsin.
Ruhani çal dədələrin dilindən
İsyan qaldır Çağrı bəyin elindən
Əsli, soyu Oğuz xanın belindən
Olan oğul nişanından bəllənsin.
Barmaqlardan süzüləndə bal sazım,
Əllərimdə xəyallara dal sazım,
Hər dərdimi pərdə-pərdə çal sazım,
Qəlbim başı tel-tel olsun tellənsin.
Yadigarlı, yolunu get Kürşadın,
Quran olsun Haqq yolunda ərşadın,
Sazlı-sözlü bir ozanın, dilşadın
Qapısında gülün bitsin güllənsin.
YAXŞIDI
İnsanoğlu üç-beş günlük dünyada,
Halal süddən maya tutsa yaxşıdı.
Dara düşsə namərd əli tutmaqdan,
Bir arxalı qaya tutsa yaxşıdı.
Haqq duyula söhbətində, sözündə,
Dünya malı sər olmaya gözündə,
Ömrü boyu bir üz ola üzündə,
Xislətini saya tutsa yaxşıdı.
Yadigarlı Haqdan bulur dayağı
Oğul yaşar atasının sayağı
Ədəb ola hər insanın mayağı
El içində haya tutsa yaxşıd.
ATA OCAĞI
Gözüm yox dünyanın saraylarında,
Dünyamın gözüdü ata ocağı.
Dizimin taqəti, dilimin andı,
Sinəmin közüdü ata ocağı.
Bu qərib könlümün vətəni, eli,
Anamın zəhmətdən qabaran əli,
Atamın kəm qalan həftəsi, ili
Ömrün sərt üzüdü ata ocağı.
Sözün qüdrətindən olmuşam əmin,
Qəmlər oylağıdı üstü sinəmin,
Doxsanı ötürən qarı nənəmin,
Vəsiyyət sözüdü ata ocağı.
Yadigarlı, Haqqı belə bilmişəm,
Düşmüşəm dəryaya selə bilmişəm,
Atasız qalandan elə bilmişəm,
Atamın özüdü ata ocağı.
QALACAQ
Bir gün yağış məzarımı döyəndə,
Nə bu sevinc, nə bu həvəs qalacaq.
Sovrulacaq köksümdəki duyğular,
Torpaq altda bir don nəfəs qalacaq.
Ayaz nə vaxt göynədərsə əlləri,
Bəyaz geyir Başkeçidin elləri,
Şaxta vursa qəbrim üstə gülləri,
İntizarım yenə əbəs qalacaq.
Yadigarlı, çək gəmini dəryadan,
Ölüm Haqdır yetişəcək şər ya dan,
Son günündə qalsa sənə dünyadan,
Bir arşın ağ, bir dar qəfəs qalacaq.
14-06-2025, 18:53
Birgə hərbi təlimlər başlayır
Azərbaycan və Qazaxıstan respublikalarının Müdafiə nazirlikləri arasında 2025-ci il üçün imzalanmış birgə fəaliyyət planına əsasən, hər iki ölkənin Hərbi Dəniz Qüvvələrinin (HDQ) gəmilərinin və hərbi qulluqçularının iştirakı ilə keçiriləcək "Xəzri-2025" birgə taktiki təlimi üçün Azərbaycan HDQ-nin gəmiləri və şəxsi heyəti Bakıdan yola düşüb.
Bu barədə Azərbaycanın Müdafiə Nazirliyindən bildirilib.
Qeyd edək ki, Xəzər dənizinin Qazaxıstan Respublikasına məxsus ərazi sektorunda keçiriləcək birgə taktiki təlimin məqsədi Azərbaycan və Qazaxıstan hərbi dənizçilərinin peşəkarlıqlarının daha da artırılması və qarşılıqlı təcrübə mübadiləsinin aparılmasıdır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!