20-09-2025, 16:39
Köç Kəlbəcərə çatdı - Açarlar sakinlərə verildi - YENİLƏNİB
Yola salınan növbəti köç karvanı Kəlbəcər şəhərinə çatıb. Budəfəki köç 29 ailəni əhatə edib.
Kəlbəcər şəhərinə çatan ailələrə mənzillərin açarları təqdim edilib.
Açarların təqdim olunması mərasimində Azərbaycan Respublikası Prezidentinin xüsusi nümayəndəliyi, "Kəlbəcər rayonunda Bərpa, Tikinti və İdarəetmə Xidməti" və Qaçqınların və Məcburi Köçkünlərin İşləri üzrə Dövlət Komitəsinin nümayəndələri iştirak edib.
***
Kəlbəcər şəhərinə növbəti köç karvanı yola salınıb.
Bu mərhələdə Kəlbəcər şəhərinə 29 ailə (115 nəfər) köçürülür.
Kəlbəcərə köç edənlər ölkənin müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələrdir.
Bu köçlə Kəlbəcərə qayıdan ailələrin sayı 81-ə (337 nəfər) çatacaq.
20-09-2025, 16:16
Adnan Əhmədzadəyə dair daha bir iddia: “Rusiyanın adamıdır”
Tanınmış iş adamı Adnan Əhmədzadə həbs edilib. Bakı şəhəri Səbail Rayon Məhkəməsi onun barəsində 4 aylıq həbs qətimkan tədbiri seçib.
Məlumata görə, Dövlət Təhlükəsizliyi Xidmətində aparılan cinayət işi üzrə Adnan Əhmədzadə iqtisadi təhlükəsizliyə qarşı təxribat və xüsusilə külli miqdarda mənimsəmə əməllərində ittiham olunur.
Adnan Əhmədzadə uzun illər SOCAR-ın rəhbər vəzifələrində çalışıb, həm ölkə daxilində, həm də xaricdə böyük biznes şəbəkəsi ilə tanınıb. O, SOCAR-ın İnvestisiya departamentinin sabiq rəhbər müavinidir.
Bəzi ekspertlərin sosial şəbəkədəki iddiasına görə, Adnan Əhmədzadənin saxlanılması həm də onun “Rusiyanın adamı” olmasıyla bağlı formalaşan güclü şübhələrlə də bağlıdır. İddialara görə, SOCAR daxil olmaqla, ölkənin bir çox administrativ qolunda bu və ya digər formada yerləşmiş 5-ci kolona bağlı yaxud təsiri altında olan ünsürlər hələ də qalmaqdadır.
A.Əhmədzadənin həbsi ölkə qanunlarını kobud şəkildə pozaraq “Azeri Light” markalı nefti digər xam neft məhsulları ilə qarışdırmaqda ittiham olunması ilə əlaqələndirilir. Bu əməl Azərbaycanın neft sənayesinin etibarlılığına və bazar şəffaflığına ciddi zərbə kimi qiymətləndirilir.
20-09-2025, 15:53
Abşeronda Dövlət Suverenliyi Günü qeyd edilib və antiterror əməliyyatı şəhidləri anılıb
Abşeron rayonunda Dövlət Suverenliyi Günü qeyd edilib və Antiterror əməliyyatı şəhidləri anılıb. Abşeron Rayon İcra Hakimiyyətinin təşkilatçılığı ilə keçirilən tədbirdə RİH başçısı Abdin Fərzəliyev, Abşeron RİH yanında İctimai Şuranın sədri, şəhid Elçin Həsənlinin anası Xatirə İsmayılova, Abşeron Ağsaqqallar Şurasının sədri, şəhid Rauf İbadovun atası Məhərrəm İbadov, YAP Abşeron rayon təşkilatının sədri, hüquq-mühafizə orqanlarının rəhbərləri, təhsil, səhiyə nümayəndələri, şəhid ailələri, müharibə iştirakçıları və rayon ictimaiyyəti iştirak edib.
İşçtirakçılar əvvəlcə Dövlət Suverenliyi Günü ilə əlaqədar Ümummilli Lider Heydər Əliyevin abidəsini ziyarət edib, önünə gül dəstələri qoyaraq xatirəsini dərin ehtiramla yad ediblər.
Daha sonra 2023-cü ilin 19-20 sentyabr tarixlərində Qarabağda həyata keçirilən və məğrur ordumuzun qələbəsi ilə başa çatan antiterror tədbirləri zamanı şəhidlik zirvəsinə yüksələn qəhrəmanlarımızı anmaq üçün Xırdalan şəhərində şəhidlərin Xatirə Kompleksi ziyarət olunub. Burada abşeronlu şəhidlərin xatirəsinə güllər düzülərək vətənimizin bütövlüyü uğrunda canından keçmiş qəhrəmanlarımız anılıb, xatirələri yad edilib.
Şəhid ailələri və müharibə iştirakçıları ilə görüşən RİH başçısı Abdin Fərzəliyev onların qayğıları ilə maraqlanıb. Ölkəmizin hər yerində olduğu kimi, Abşeron rayonunda da şəhid ailələrinə böyük diqqət və qayğının göstərildiyini qeyd edən RİH başçısı bu diqqətin bundan sonra da davam etdiriləcəyini qeyd edib. Azərbaycan Respublikasının Prezidenti, Müzəffər Ali Baş Komandan cənab İlham Əliyevin uzaqgörən siyasəti, iradəsi, şəhidlərimizin qəhrəmanlığı və xalqımızın birliyi sayəsində vətənimizin ərazi bütövlüyünün və dövlət süverinliyinin tam bərqərar olduğunu qeyd edən A.Fərzəliyev artıq Qarabağda soydaşlarımızın azad, təhlükəsiz və firavan yaşadığını söyləyib.
Sonra RİH başçısı şəhid ailələri ilə birgə Xırdalan şəhərindəki Şəhidlər Xiyabanına, o cümlədən Novxanı və Mehdiabad qəsəbəsindəki şəhidlərimizin məzarlarını ziyarət edərək, gül dəstələri düzüb və xatirələrini anıb.
Görüş və ziyarətlərdə şəhid ailələri onlara göstərilən diqqət və qayğıya görə Azərbaycan Respublikasının Prezidenti, Müzəffər Ali Baş Komandan cənab İlham Əliyevə və Birinci Vitse-Prezident Mehriban xanım Əliyevaya minnətdarlıqlarını bildiriblər.
20-09-2025, 15:36
Prezidentlərin geniş tərkibdə görüşü olub - YENİLƏNİB
Sentyabrın 20-də Azərbaycan Respublikasının Prezidenti İlham Əliyevin Ruanda Respublikasının Prezidenti Pol Kaqame ilə nahar əsnasında geniş tərkibdə görüşü olub.
Görüşdə dövlət başçıları Azərbaycan ilə Ruanda arasında siyasi əlaqələrin yüksək səviyyədə olduğunu qeyd etdilər, ölkələrimizin iqtisadi-ticari, mədəni, humanitar sahələrdə də əməkdaşlığının buna uyğun surətdə inkişaf etdirilməsinin zəruriliyini vurğuladılar. Bu xüsusda ölkələr arasında energetika, kənd təsərrüfatı, turizm, tələbə mübadiləsi və “ASAN xidmət” təcrübəsinin Ruandada tətbiq olunması məsələlərinə dair fikir mübadiləsi aparıldı.
Söhbət zamanı, həmçinin Azərbaycanla Ruanda arasında ikitərəfli hüquq-müqavilə bazasının genişləndirilməsi məsələsinə toxunuldu.
20-09-2025, 15:23
Formula 1-in müddəti uzadıldı - 2030-dək Bakıda keçirləcək
Formula 1 üzrə Azərbaycan Qran Prisinin müddəti daha 4 il uzadılıb.
Yarışlar 2030-cu ilədək Bakıda keçiriləcək. Bu barədə Bakı Şəhər Halqasından bildirilib.
Qeyd edək ki, Formula 1 yarışı ilk dəfə 2017-ci ildə Bakıda keçirilib.
Formula 1 yarışı üçün tikilən Bakı trasının 20 döngəsi var. Azadlıq meydanından başlayan trek Hökumət Evinin ətrafı ilə fırlanaraq Qız qalasına çatmaq üçün İçərişəhər ətrafında 2,2 kilometr dairə edir və Neftçilər prospektinə çıxaraq başlanğıc yerində başa çatır. 51 dövrədən ibarət trekin ən geniş yeri 13, ən dar hissəsi trekin İçərişəhər ətrafında olan bölmələrində, o cümlədən 7-ci və 8-ci döngələrdə 7,6 metr təşkil edir. Saat əqrəbi istiqamətinin əksinə hərəkət edən trek məşhur almaniyalı memar Hermann Tilke tərəfindən hazırlanıb.
Yarışın start və finiş xətləri Azadlıq meydanında olur. Burada, həmçinin “Paddok klub”, komandaların boksları və pit-leyn qurulub.
20-09-2025, 15:21
Paşinyan 4-cü Ermənistan Respublikasını elan etdi: referendum anonsu verdi
Hakim “Mülki Müqavilə” partiyası Dördüncü Ermənistan Respublikasının yaradılmasını öz məqsədi kimi elan edir.
Bunu “Mülki Müqavilə” Partiyasının İdarə Heyətinin sədri, Ermənistanın Baş naziri Nikol Paşinyan qurultayda çıxışı zamanı deyib.
O, yeni “strategiyasının” doqquz bəndini qeyd edib.
Baş nazirin sözlərinə görə, seçkilərdə xalqın etimadını qazandıqdan sonra partiya yeni Konstitusiya üzrə referendumun keçirilməsi üçün ümummilli prosesə start verəcək.
Hökumət öz səylərini Ermənistanın 1991-ci il Alma-Ata sazişi ilə müəyyən edilmiş, 29 743 kvadrat kilometr ərazini əhatə edən beynəlxalq səviyyədə tanınmış sərhədlərinin toxunulmazlığına əsaslandıracaq.
Respublika bu prosesi regionallaşma səyləri və ya balanslaşdırılmış xarici siyasət yürüdülməsi ilə qarşı-qarşıya qoymadan, Avropa Birliyinə daxil olmaq üçün fəaliyyətini gücləndirəcək. Hakimiyyət bir-birinin ərazi bütövlüyünə və suverenliyinə hörmət əsasında sülhü institusionallaşdıraraq bütün qonşularla sülh və mehriban münasibətlər qurmaq üçün “xalqın iradəsini həyata keçirməyə” davam edəcək.
Hökumət “qanunsuz əmlakın müsadirəsini, dövlət maraqlarının müdafiəsini təşviq edəcək, korrupsiyaya qarşı mübarizəni dərinləşdirəcək”.
“Müstəqil məhkəmə sisteminin qurulması” davam edəcək. Əmək, təhsil və iqtisadi rəqabət vasitəsilə firavanlığa can atmaq həvəsləndiriləcək. “Sülh yollarının kəsişməsi” təşəbbüsü də daxil olmaqla kommunikasiyaların blokdan çıxarılması prosesi davam edəcək.
Sonda Paşinyan səhnədə müharibədə həlak olanların xatirəsini yad edərək, onların xatirəsini əbədiləşdirməyin ən təsirli yolu kimi Dördüncü Respublikanın qurulmasını adlandırıb.
1991-ci il sentyabrın 21-də Ermənistanda referendum keçirilib və əhalinin 94%-i müstəqil respublikanın yaradılmasına səs verib. 1991-ci il sentyabrın 23-də Ermənistan Ali Soveti Ermənistan Respublikasının müstəqilliyini elan edib.
20-09-2025, 14:59
Ruslar Ukraynada daha iki kəndi işğal etdilər
Rusiyanın Ordusunun “Şərq” güc qruplaşması Ukraynada Dnepropetrovsk vilayətinin Berezove kəndini nəzarətə götürüb.
Bu barədə Rusiya Müdafiə Nazirliyi məlumat yayıb.
Digər məlumata görə, şənbə gününə keçən gecə Rusiya qüvvələri Sapsan əməliyyat-taktiki kompleksini inkişaf etdirən, çoxməqsədli zərbə və kəşfiyyat PUA-ları, PUA-lar və pilotsuz uçuş aparatları istehsal edən Ukrayna hərbi-sənaye kompleksinin obyektlərinə dronlardan istifadə etməklə kütləvi zərbə endirib.
"Zərbənin məqsədlərinə nail olunub. Bütün təyin olunmuş hədəflər vurulub", - Rusiya Müdafiə Nazirliyi qeyd edib.
Bundan əvvəl Rusiya Müdafiə Nazirliyi rus qoşunlarının Zaporojye vilayətinin Olqovskoye kəndini tutduğunu açıqlamışdı.
20-09-2025, 14:48
Paşinyan II Qaregini hədələdi: getməlidir!
Ermənistanın baş naziri Nikol Paşinyan sentyabr və ya oktyabrda Eçmiədzində bütün ermənilərin katolikosu II Qareginə qarşı mitinqin keçiriləcəyini bildirib və belə bir təşəbbüsün kilsəyə qarşı deyil, daha çox onun təmizlənməsinə yönəldiyini vurğulayıb.
Paşinyan bu barədə jurnalistlərə açıqlamasında deyib.
"Mən kilsəyə qarşı nəsə etmək istədiyimiz barədə qərəzli fikirdən irəli gələn sualları qəbuledilməz hesab edirəm. Mən həmişə demişəm: Erməni Apostol Kilsəsi mənim ziyarətgahımdır, ailəmin ziyarətgahıdır, şəxsi ziyarətgahımdır. Mən müqəddəs yerimə qarşı gedə bilmərəm. Etməyi planlaşdırdığımız hər şey kilsənin adınadır", - o qeyd edib.
Paşinyan katolikosu (adını çəkmədən) kəskin tənqid edib.
"Ruhani həyata heç bir aidiyyatı olmayan və dindar olmayan şəxsin Erməni Apostol Kilsəsinə rəhbərlik etməsi qəbuledilməzdir. Bu, mümkün deyil. Bu faktı qeydə almaq qalır".
O, II Qareginin Erməni Apostol Kilsəsinin rəhbərliyindən getməli olduğunu vurğulayıb.
Yeni Konstitusiyada kilsə ilə bağlı müddəanın dəyişdirilməsinin mümkünlüyünü şərh edən baş nazir əlavə edib ki, ideya kilsənin dövlətə tabe olması deyil:
“Mən kilsənin Rəbbimiz və peyğəmbərimiz İsa Məsihə tabe olmasını istəyirəm, çünki bu, Məsihin kilsəsidir”.
O, həmçinin qeyd edib ki, kilsə ilə bağlı konstitusiya müddəaları hələ müzakirə olunmayıb, müvafiq nəzəri və ya siyasi müzakirələr hələ də aparılmayıb.
20-09-2025, 14:43
Dərnəgül bazarı söküləcək
Tikinti materiallarının satışının həyata keçirildiyi Dərnəgül bazarı söküləcək.
Bu barədə bazarda fəaliyyət göstərən sahibkarlar məlumat veriblər.
Onlara bildirilib ki, tezliklə bazar söküləcək. Bazarın hara köçürüləcəyi barədə məlumat yoxdur.
Qeyd edək ki, bir neçə gün öncə Baş nazir Əli Əsədov Bakı şəhərinin sosial-iqtisadi inkişafı istiqamətində strateji əhəmiyyətli şəhərsalma təşəbbüslərinin dəstəklənməsi üzrə İşçi qrupun yaradılması barədə sərəncam imzalayıb. Sərəncama əsasən, baş nazirin müavini Samir Şərifov işçi qrupun rəhbəri, iqtisadiyyat naziri Mikayıl Cabbarov, Dövlət Şəhərsalma və Arxitektura Komitəsinin sədri Anar Quliyev isə İşçi qrupun rəhbərinin müavinləri təyin olunublar.
Eyni zamanda ilkin olaraq Bakı şəhərinin Böyükşor gölü ətrafında, Heydər Əliyev və Ziya Bünyadov prospektləri arasında yerləşən ərazilərinin, Heydər Əliyev adına Neft Emalı Zavodu ətrafında olan ərazilərinin dövlət-özəl tərəfdaşlığı modeli çərçivəsində razılaşdırılmış konseptual layihələr əsasında yenidən qurulmasının həyata keçirilməsi üçün investisiya qoyuluşuna zəruri şərait yaradılmasını, həmin layihələr üzrə investisiya müqavilələrinin şərtlərinin razılaşdırılmasını və digər zəruri tədbirlərin görülməsini təmin etmək də İşçi qrupuna həvalə edilib. Dərnəgül bazarının da məhz bu proses çərçivəsində söküləcəyi deyilir.
20-09-2025, 14:07
Məhkəmə Adnan Əhmədzadə barəsində həbs qərarı verdi
SOCAR-ın İnvestisiya Departamentinin sabiq rəhbər müavini Adnan Əhmədzadə həbs olunub.
Səbail rayon məhkəməsində Adnan Əhmədzadə barədə 4 aylıq həbs qətimkan tədbiri seçilib.
Dövlət Təhlükəsizliyi Xidmətində aparılan cinayət işi üzrə Adnan Əhmədzadə iqtisadi təhlükəsizliyə qarşı təxribat və xüsusilə külli miqdarda mənimsəmə əməllərində ittiham olunur.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!