26-04-2025, 12:03
Sabah 29 dərəcə isti olacaq
Azərbaycanda aprelin 27-də 29 dərəcə isti olacaq.
Bu barədə Milli Hidrometeorologiya Xidmətindən məlumat verilib.
Bildirilib ki, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gecəyə doğru bəzi yerlərdə arabir yağış yağacağı ehtimalı var, səhər bəzi yerlərdə arabir duman olacaq. Şimal-şərq küləyi axşama doğru arabir güclənən şimal-qərb küləyi ilə əvəz olunacaq.
Havanın temperaturu gecə 12-14° isti, gündüz 22-27° isti olacaq. Atmosfer təzyiqi 754 mm civə sütunundan 760 mm civə sütununa yüksələcək. Nisbi rütubət gecə 70-80 %, gündüz 50-55 % olacaq.
Azərbaycanın rayonlarında bəzi yerlərdə arabir yağıntılı olacağı, şimşək çaxacağı gözlənilir. Ayrı-ayrı yerlərdə leysan xarakterli olacağı, dolu düşəcəyi ehtimalı var. Bəzi yerlərdə arabir duman olacaq. Qərb küləyi bəzi yerlərdə arabir güclənəcək.
Havanın temperaturu gecə 12-16° isti, gündüz 24-29° isti, dağlarda gecə 5-10° isti, gündüz 13-18° isti olacaq.
26-04-2025, 11:45
Piyadanı döyən "BakuBus" sürücüsü işdən çıxarıldı
Bakıda avtobus sürücüsü piyadanı döyüb. "BakuBus" MMC-yə məxsus 11 saylı "90 JY 786" dövlət nömrə nişanlı avtobusun sürücüsü piyada ilə mübahisəyə başlayıb.
Ardınca mübahisə böyüyərək əlbəyaxa davaya çevrilib. Sürücü piyadanın üzünə yumruqla vuraraq qaşını partladıb. Əraziyə polis əməkdaşları cəlb olunublar.
Məlumata görə, mübahisəyə səbəb isə avtobus sürücüsünün piyada zolağında olan sərnişinə yol verməməsi olub.
Hadisə ilə bağlı “Bakubus” MMC-dən bildirilib ki, ötən gün, saat 19:30 radələrində BakuBus MMC-nin istismarında olan 11 nömrəli müntəzəm marşrut xətti üzrə hərəkət edən 90-JY-786 dövlət qeydiyyat nişanlı avtobusda sürücü ilə piyada arasında insident baş verib.
Qeyd edilib ki, video müşahidə kameralarının görüntülərinin təhlili nəticəsində müəyyən olunub ki, avtobus sürücüsü Əsgərov Babək piyada keçidində piyadanın keçidinə üstünlük verməyərək yol hərəkəti qaydalarını kobud şəkildə pozmuş,piyadanın irad bildirməsi zamanı isə aralarında xoşagəlməz insident yaşanıb:
“BakuBus MMC xidmət keyfiyyətini və sərnişin məmnuniyyətini fəaliyyətinin əsas prioriteti hesab edir və bu kimi hallarda mövqeyi birmənalıdır. Belə hadisələr zamanı dərhal müdaxilə edilir və zəruri tədbirlər görülür. Sözügedən hadisə ilə bağlı sürücü Əsgərov Babəkin əmək fəaliyyətinə Əmək Məcəlləsinin tələblərinə uyğun olaraq xitam verilməsi barədə qərar qəbul edilib.”.
26-04-2025, 11:14
Hidayət Heydərov Avropanın ən yaxşısı seçildi - FOTO
Azərbaycanın olimpiya çempionu Hidayət Heydərov və cüdo millisinin baş məşqçisi Riçard Trautman Monteneqroda mükafatlandırılıb.
Hidayət Heydərov 2024-cü ilin ən yaxşı kişi cüdoçusu adına layiq görülüb.
Ona mükafatı Avropa Cüdo İttifaqının (EJU) prezidenti Laslo Tot təqdim edib.
EJU-nun rəsmi saytında bu barədə yazılır:
"Bu idmançı yeniyetmə və gənc yaşlarında Avropa, dünya çempionu titullarını qazanaraq adından söz etdirmişdi. Zamanla öz potensialını reallaşdırmaqda qətiyyət göstərdi. 2024-cü ildə dördüncü dəfə Avropa çempionu oldu, ardınca dünya və Olimpiya çempionluqlarını qazandı. Bir ildə bu qədər böyük uğura imza atmaq nadir hadisədir. Bu möhtəşəm nailiyyətin sahibi isə Azərbaycan təmsilçisi Hidayət Heydərovdur".
Avropada ilin ən yaxşı kişi məşqçisi isə Azərbaycan millisinin baş məşqçisi və performans direktoru Riçard Trautman seçilib. Ona mükafatı Avropa Cüdo Birliyinin idman direktoru Aqron Kuka təqdim edib.
EJU-nun saytında Trautmann haqqında bunlar qeyd edilib:
"2024-cü ildə bu məşqçi iki Avropa, iki dünya və iki Olimpiya çempionluğu qazandıraraq hər xalq üçün böyük uğur sayılan bir nəticəyə imza atdı. Azərbaycan komandasının lideri həm rəhbərlik etdiyi idmançıların möhtəşəm nailiyyətləri, həm də Olimpiya ilində qazandığı şəxsi uğurlarına görə qürur duya bilər".
Qeyd edək ki, bu ilin fevralında Parisdə keçirilən tədbirdə həm Hidayət Heydərov, həm də Riçard Trautman dünya üzrə də ilin ən yaxşıları seçilmişdilər.
26-04-2025, 10:49
Pezeşkian futbol oynadı - FOTO
İranın veteran futbol komandası ilə əmək komandası arasında futbol matçı keçirilib.
İran Prezidenti Məsud Pezeşkian da matçda iştirak edib.
O, matç boyunca hər iki komandanın heyətində oynayıb.
Pezeşkian 14 nömrəli formanı geyinib.
26-04-2025, 10:38
“İmamoğlu işi”ndə növbəti əməliyyat: 47 nəfər tutuldu
İstanbul Böyükşəhər Bələdiyyəsinə (İBB) qarşı aparılan korrupsiya istintaqı çərçivəsində ikinci dalğa əməliyyat keçirilib.
İstanbul, Ankara və Tekirdağda keçirilən əməliyyat nəticəsində nəticəsində aralarında Şafak Başa və Murat Ongunun həyat yoldaşı Gözdem Ongunun da olduğu 47 nəfər saxlanılıb.
Əməliyyat İstanbul Respublika Baş Prokurorluğunun Ekrem İmamoğluna qarşı başladığı istintaq çərçivəsində aparılıb. İmamoğlu və digər şübhəlilər barəsində “cinayətkar təşkilat qurmaq və idarə etmək”, “rüşvət”, “dələduzluq” və “müsabiqəyə müdaxilə” kimi maddələrlə araşdırma davam edir.
Saxlanılanlar arasında İBB-nin yüksək vəzifəli şəxsləri və İmamoğlunun yaxın çevrəsindən olan şəxslər də var. Məlum olub ki, şübhəlilərin toplantı keçirdiyi hoteldə təhlükəsizlik kameraları qəsdən bağlanıb.
İBB-yə qarşı ilk əməliyyat mart ayında keçirilmiş və 94 nəfər saxlanılmışdı, onlardan 54-ü həbs olunmuşdu. Saxlanılan 47 nəfər ifadə üçün İstanbul Mali Cinayətlər İdarəsinə aparılıb. 6 nəfərin isə axtarışları davam edir.
26-04-2025, 10:33
Dünən bulvarda ölən şəxs vəkil imiş - FOTO
Dünən Bakı bulvarında ölüm hadisəsi baş verib.
Aprelin 25-i saat 16 radələrində Neftçilər prospektində Vəkillər Kollegiyasının üzvü, 1975-ci il təvəllüdlü vəkil Kənan Saleh oğlu Əliyev qəfil vəfat edib.
Dənizkənarı Milli Parkda gəzinti zamanı dünyasını dəyişən vəkilin ölümünə ürək çatışmazlığının səbəb olduğu bildirilib.
Faktla bağlı Səbail Rayon Prokurorluğunda araşdırma aparılır.
26-04-2025, 10:28
Faciənin 39-cu ili: Azərbaycandakı Çernobıl əlillərinin sayı
Bu gün Çernobıl Atom-Elektrik Stansiyasında (AES) qəza baş verməsindən 39 il ötür.1986-cı il aprelin 26-da Ukraynanın paytaxtı Kiyev şəhəri yaxınlığında yerləşən Çernobıl atom elektrik stansiyasının 4-cü enerji blokunda yanğın baş verib. XX əsrin faciəsi adlandırılan bu hadisə ən böyük texnogen fəlakət olub.
AES-in dördüncü enerji blokunda baş verən partlayış nəticəsində ətraf mühitə çoxlu miqdarda radioaktiv maddə yayılıb. Partlayışın gücü vaxtilə Xirosimaya atılmış bombanın 500 misli qədərində olub. Fəlakətin ilk günlərində partlayış, yanğın və kəskin şüalanmadan 50 nəfər ölüb. Hadisə nəticəsində 7 minə yaxın insan həyatını dəyişib, 25 min nəfər güclü radiasiya nəticəsində ömürlük şikəst olub, on minlərlə insan isə sonsuz qalıb.
Bu dəhşətli qəzanın nəticələrinin aradan qaldırılmasında Azərbaycandan da xeyli sayda insan iştirak edib.
Ümummilli Lider Heydər Əliyevin təşəbbüsü ilə hələ 1993-cü ildə “Çernobıl qəzasının ləğvində iştirak etmiş və həmin qəza nəticəsində zərər çəkmiş vətəndaşların statusu və sosial müdafiəsi haqqında” Qanun qəbul edilib, bu kateqoriyadan olan vətəndaşların sosial müdafiəsi sahəsində mühüm addımların atılmasına başlanıb. Prezident İlham Əliyevin əlilliyi olan şəxslərə xüsusi diqqət və qayğısı Çernobıl hadisələri ilə əlaqədar əlilliyi olan şəxslərin sosial təminatının da ildən-ilə güclənməsinə imkan verib.
Əmək və Əhalinin Sosial Müdafiəsi Nazirliyindən bildirilib ki, hazırda Azərbaycanda Çernobıl qəzası ilə əlaqədar əlilliyi olan 3 min 800 şəxs var.
Qeyd olunub ki, Çernobıl qəzası ilə əlaqədar əlilliyi olanlar iki qrupa bölünür:
Çernobıl AES-də hərbi xidmət vəzifələrini yerinə yetirməklə əlaqədar əlilliyi olan şəxslər (2 mindən çox şəxs);
Çernobıl AES-də qəzanın ləğvi ilə əlaqədar əlilliyi olan şəxslər (1800-dək şəxs).
Əmək və Əhalinin Sosial Müdafiəsi Nazirliyi tərəfindən:
Çernobıl AES-də hərbi xidmətlə əlaqədar əlilliyi olan şəxslər mənzil və avtomobillə təmin olunur;
Çernobıl AES-də hərbi xidmətlə əlaqədar əlilliyi olan şəxslərə Prezidentin aylıq təqaüdü (orqanizmin funksiyalarının 81-100 faiz pozulmasına görə (I dərəcə) 500 manat, 61-80 faiz pozulmasına görə (II dərəcə) 400 manat, 31-60 faiz pozulmasına görə (III dərəcə) 330 manat) ödənilir;
Çernobıl AES-də qəzanın ləğvi ilə əlaqədar I dərəcə əlilliyi olan şəxslər də Prezidentin aylıq təqaüdü (200 manat, I dərəcə gözdən əlilliyi olanlar 300 manat) ilə təmin edilir;
Hər iki qrupa aid əlilliyi olan şəxslərə əlilliyə görə aylıq pensiya və ya aylıq müavinət (əlillik dərəcələri üzrə müavinət hazırda müvafiq olaraq 270 manat, 220 manat, 150 manatdır) ödənilir;
Bütün I dərəcə əlilliyi olan şəxslərə qulluq edənlər Prezidentin aylıq təqaüdü (100 manat) ilə təmin olunur;
Həmçinin hər iki qrupa aid əlilliyi olanların müalicəsi üçün hər il onlar birdəfəlik müavinətlə və Çernobıl qəzası nəticəsində I və II dərəcə əlilliyi müəyyən edilmiş, yaxud vəfat etmiş valideynlərin uşaqları, Çernobıl qəzasının nəticələrinin aradan qaldırılmasında iştirak edən şəxslərin dispanser qeydiyyatında olan uşaqları aylıq müavinətlə təmin edilir.
25-04-2025, 23:22
Qəzada yaralanan uşaq 3 gün sonra öldü
Şəkidə 3 gün öncə yol qəzasında xəsarət alan 9 yaşlı uşaq xəstəxanada ölüb.
Aprelin 22-də gecə saatlarında baş verən yol qəzasında xəsarət alan 9 yaşlı Kənan Şirəlizadə xəstəxanada dünyasını dəyişib.
Xatırladaq ki, 1981-ci il təvəllüdlü Təvəkkül Şiralıyevin idarə etdiyi “Mercedes” markalı avtomobil Qaraməryəm-İsmayıllı-Şəki avtomobil yolunun Şəki rayonunun ərazisindən keçən hissəsində yolun kənarındakı ağaca çırpılıb. Hadisə nəticəsində sürücü xəstəxanada ölüb, 2016-cı il təvəllüdlü oğlu K.Şirəlizadə isə xəsarət alıb.
DİN-in Mətbuat Xidmətinin Şəki regional qrupundan bildirilib ki, faktla bağlı cinayət işi başlanılıb, istintaq aparılır.
25-04-2025, 22:35
Bayramovla Sinirlioğlunun müzakirə etdiyi mövzular
Azərbaycan Respublikasının xarici işlər naziri Ceyhun Bayramov ölkəmizə səfəri çərçivəsində ATƏT-in baş katibi Feridun Sinirlioğlunun rəhbərlik etdiyi nümayəndə heyətini qəbul edib.
C.Bayramov və F.Sinirlioğlu arasında təkbətək müzakirələrdən sonra, hər iki tərəfin nümayəndə heyətlərinin iştirakı ilə geniş tərkibdə görüş keçirilib.
Geniştərkibli görüş zamanı Azərbaycan-ATƏT ikitərəfli əməkdaşlığının hazırkı durumu və perspektivləri, regional inkişaflar və çağırışlar, postmünaqişə dövründə vəziyyət, Azərbaycan-Ermənistan normallaşma prosesi kimi bir neçə əsas istiqamət üzrə ətraflı müzakirələr aparılıb.
ATƏT məkanında təhlükəsizlik mühitinin gərgin və mürəkkəb olaraq qaldığı hazırkı vəziyyətdə Təşkilatın yeni şərtlərə çevik adaptasiya olunmasının, çoxtərəfli platforma kimi öz aktuallığını qoruyub saxlaması və öhdəliklərini yerinə yetirməsinin tələb olunduğu vurğulanıb.
Ölkəmizin müstəqilliyinin ilk illərindən etibarən ATƏT-in aktiv üzvlərindən biri olduğu diqqətə çatdırılıb, xüsusilə hazırkı postmünaqişə dövründə əməkdaşlığın daha da genişləndirilməsi üçün imkanların mövcudluğu diqqətə çatdırılıb.
C.Bayramov postmünaqişə dövründə bölgəmizdəki son inkişaflar, işğaldan azad olunmuş ərazilərdə aparılan genişmiqyaslı bərpa və quruculuq işləri, məcburi köçkünlərin yurdlarına qayıdışı, buna əngəl törədən mina təhdidi ilə mübarizə sahəsində görülən işlər barədə tərəf müqabilinə məlumat verib.
Postmünaqişə dövründə ATƏT-in Azərbaycanın işğaldan azad edilmiş ərazilərinin minalardan və partlamamış sursatlardan təmizlənməsi, həmin ərazilərdə ətraf mühit vəziyyətinin qiymətləndirilməsi kimi istiqamətlər üzrə müvafiq dəstək layihələri vasitəsilə bərpa və yenidənqurma fəaliyyətlərində rol ala biləcəyi ifadə olunub.
Azərbaycan-Ermənistan normallaşma prosesinə toxunularaq tərəflər arasında sülh və dövlətlərarası münasibətlərin qurulması haqqında saziş layihəsi üzrə danışıqların yekunlaşmasından sonrakı vəziyyət barədə fikir mübadiləsi aparılıb.
Sülh sazişinin imzalanması üçün əsas şərtlər qismində Ermənistan konstitusiyasında hələ də Azərbaycana qarşı qüvvədə qalan ərazi iddialarının aradan qaldırılması və eləcə də münaqişənin bitməsi nəticəsində tarixə qovuşmuş, öz əhəmiyyətini itirmiş Minsk Qrupu, Fəaliyyətdə olan sədrin xüsusi nümayəndəsi, Yüksək Səviyyəli Planlaşdırma Qrupu kimi ATƏT təsisatlarının ləğv edilməsinin vacibliyi vurğulanıb.
Görüş zamanı, həmçinin qarşılıqlı maraq doğuran digər regional və beynəlxalq təhlükəsizlik məsələləri müzakirə olunub.
C.Bayramov və F.Sinirlioğlu daha sonra mətbuat brifinqində apardıqları müzakirələrin nəticələrinə dair bəyanatlarla çıxış edib, jurnalistlərin suallarını cavablandırıblar.
25-04-2025, 22:27
Zelenski Trampa cavab verdi
“Ukrayna qanuni olaraq heç bir müvəqqəti işğal olunmuş əraziləri Rusiyanın ərazisi kimi tanımayacaq və bu mövqe dəyişməz olaraq qalır. Ölkənin NATO-ya daxil olması isə Alyansın bütün üzvlərinin dəstəyindən asılıdır”.
Bunu Ukrayna Prezidenti Volodimir Zelenski jurnalistlərə açıqlamasında deyib.
“ABŞ Prezidentinin bəyanatını ətraflı şərh etmək istəməzdim. Bizim mövqeyimiz dəyişməzdir - hansı ərazilərin Ukraynaya aid olduğuna yalnız Ukrayna xalqının qərar vermək hüququ var. Ukrayna Konstitusiyasında isə deyilir ki, bütün müvəqqəti işğal olunmuş ərazilər müvəqqəti işğal olunub, onların hamısı Ukraynaya məxsusdur”, - deyə Zelenski bildirib.
Prezidentin fikrincə bu, tamamilə ədalətli mövqedir və beynəlxalq hüquq baxımından qanunidir.
“Dünya bu işdə bizi dəstəkləyir. Hətta bizimlə Rusiya arasında daim balans saxlayan ölkələr belə Ukraynanın, o cümlədən Krım yarımadasının ərazi bütövlüyünü və suverenliyini tanıyırlar”, - deyə Prezident qeyd edib.
Zelenski əlavə edib ki, Ukrayna komandası avropalı həmkarları ilə birlikdə Londonda öz mövqelərini ifadə edib.
“Mənə elə gəlir ki, bizim NATO ilə bağlı mövqeyimiz balanslaşdırılmış və aydındır. Təəssüf ki, bu, müttəfiqlərin dəstəyindən asılıdır. Əgər bütün NATO üzvlərindən dəstək olarsa, o zaman tərəfdaşların razılaşdığı və ya razılaşmadığı addıma keçə bilərik”, - deyə Zelenski bildirib.
Prezidentin sözlərinə görə, bu gün biz praqmatik olmalı və başa düşməliyik ki, Ukraynaya lazım olan təhlükəsizlik zəmanətləri var.
Zelenski bildirib ki, Londonda ABŞ-ın təhlükəsizlik zəmanətləri ilə bağlı müzakirə olunan məsələlər var.
Xatırladaq ki, bu gün ABŞ Prezidenti Donald Tramp Rusiya ilə Ukrayna arasında imzalanan sülh sazişi çərçivəsində Krımın Rusiya kimi tanınacağını açıqlamışdı. Onun sözlərinə görə, Prezident Volodimir Zelenski bunu başa düşür.
Tramp Ukraynanın NATO-ya üzv olmaq istəyindən də danışıb.
“Düşünürəm ki, Ukrayna nə vaxtsa NATO-ya üzv ola biləcək. Məncə, müharibə Ukrayna NATO-ya daxil olmaq haqqında müzakirə aparanda başladı”, - deyə Tramp vurğulayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!