4-06-2025, 19:46
Hikmət Hacıyev bu ölkələrin nümayəndələri ilə görüşdü
Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Şimali və Baltikyanı ölkələrin (Şimali Baltik Səkkizliyi ölkələri, NB8) nümayəndələri ilə görüşüb.
O, bu barədə "X" hesabında paylaşım edib.
"Bizim qlobal və regional məsələlər, eləcə də ikitərəfli gündəm üzrə çox səmərəli dialoqumuz oldu. Müxtəlif sahələrdə əməkdaşlığımızı inkişaf etdirmək üçün geniş imkanlar və qarşılıqlı maraq var", - o bildirib.
4-06-2025, 18:00
Pensiya alanlara şad xəbər
Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu iyunun 5-də Bakı və Sumqayıt şəhərləri, eləcə də Abşeron rayonu üzrə bu ayın pensiyalarının qrafikdən əvvəl ödənilməsini nəzərdə tutub.
Bu barədə fond məlumat yayıb.
Qeyd olunub ki, Naxçıvan Muxtar Respublikasının Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu tərəfindən də muxtar respublika üzrə bu ayın pensiya ödənişinin vaxtından əvvəl həyata keçirilməsi planlaşdırılır.
Qeyd edək ki, güzəştli şərtlərlə pensiya hüququna malik şəxslərin pensiyaları bu ay da qrafik üzrə ödəniləcək.
4-06-2025, 17:46
Xamenei ABŞ-ın təklifini rədd edib
İranın ali lideri Ayətullah Əli Xamenei ABŞ-ın nüvə təklifini rədd edib.
İranın ali rəhbəri ABŞ-ın təklifini milli suverenliyə təhlükə adlandırıb və İranın uranı zənginləşdirməyə davam edəcəyini vurğulayıb.
"ABŞ-nin birinci tələbi odur ki, İranın nüvə sənayesi olmasın. Amerikanın absurd iddialarına cavabımız aydındır: onlar bununla bağlı heç nə edə bilməzlər. Nüvə sənayesi bizim ana sənayemizdir. Atom sənayesi bir çox elmi sahələrə təsir göstərir. Uran zənginləşdirilməsi nüvə məsələsinin açarıdır və düşmənlərin diqqəti zənginləşdirməyə yönəlib".
ABŞ prezidenti Donald Tramp bəyan edib ki, Vaşinqtonun İranla mümkün razılaşması heç bir şəkildə uranın zənginləşdirilməsini nəzərdə tutmur. ABŞ prezidenti belə bir bəyanatla Vaşinqtonun təklifinin Tehrana məhdud zənginləşdirmə aparmasına imkan verdiyi barədə geniş yayılmış xəbərlərdən sonra çıxış edib.
Xatırladaq ki, İran və ABŞ Omanın vasitəçiliyi ilə İranın nüvə problemi ilə bağlı beş raund danışıqlar aparıb. Sonuncu mayın 23-də Romada baş tutub. Danışıqlardan sonra xarici işlər naziri Abbas Arakçi bəyan edib ki, Omanın təklif etdiyi mexanizmlər danışıqlarda irəliləyişə maneələrin aradan qaldırılmasına kömək edə bilər.
Eyni zamanda, beşinci raunddan əvvəl tərəflər arasında ziddiyyətlər daha da kəskinləşmişdi. Danışıqlardan əvvəl ABŞ İrandan uranın zənginləşdirilməsindən imtina etməsini tələb etmişdi, lakin İran tərəfi bu tələbi rədd edərək bildirmişdi ki, ABŞ Tehranın zənginləşdirmə texnologiyasından imtinasında israr etsə, tərəflər razılığa gələ bilməyəcək.
4-06-2025, 17:27
Bakıda iki nəfər 10 kq narkotiklə tutuldu
Daxili İşlər Nazirliyi Baş Narkotiklərlə Mübarizə İdarəsinin əməkdaşlarının keçirdiyi əməliyyat tədbirləri ilə narkotiklərin ölkə daxilində yayılmasının qarşısı alınıb.
Qaradağ və Nərimanov rayonlarında keçirilmiş əməliyyat zamanı əvvəllər məhkum olunmuş Orxan Kazımov (32 yaş) və Sadıq Musayev (31 yaş) saxlanılıb. Onlardan 10 kiloqrama yaxın tiryək, marixuana və metamfetamin aşkarlanaraq götürülüb.
Araşdırmalar zamanı müəyyən edilib ki, saxlanılanlar narkotik vasitələri sosial şəbəkələr üzərindən əlaqə saxladıqları İran vətəndaşlarının göstərişi ilə Astara və Lənkərandan paytaxta gətiriblər.
Fakt üzrə cinayət işi başlanılıb, hər iki şəxs barəsində məhkəmə qərarı ilə həbs qətimkan tədbiri seçilib.
Əməliyyatlar davam etdirilir.
4-06-2025, 17:20
Ərdoğan Pezeşkianla danışdı
Türkiyə Prezidenti Rəcəb Tayyib Ərdoğan İran Prezidenti Məsud Pezeşkian ilə telefon danışığı aparıb.
Bu barədə Türkiyə Prezidenti Administrasiyasının məlumatında bildirilib.
Liderlər Türkiyə ilə İran arasında ikitərəfli əlaqələr, regional və qlobal məsələlər müzakirə edilib.
Prezident Ərdoğan qarşıdakı dövrdə Türkiyə-İran əlaqələrinin institusional çərçivəsini gücləndirəcək addımlar üzərində işləməyə davam etdiklərini bildirib.
Ərdoğan Pezeşkianı Qurban bayramı münasibətilə təbrik etdi.
4-06-2025, 17:14
DTX əməliyyat keçirdi - Qanunsuz dini yığıncaq təşkil edənlər ölkədən çıxarıldı
Dövlət Təhlükəsizliyi Xidməti və Dövlət Miqrasiya Xidməti birgə məlumat yayıb.
Birgə məlumatda deyilir ki, qanunsuz dini təbliğat fəaliyyətini təşkil edən əcnəbilər barədə hüquqi tədbirlər görülüb.
Xarici ölkə vətəndaşlarının Azərbaycan Respublikası ərazisində qanunvericiliyin tələblərini pozaraq dini təbliğat işi aparmaları ilə bağlı daxil olmuş məlumatlar əsasında Dövlət Təhlükəsizliyi Xidməti və Dövlət Miqrasiya Xidmətinin birgə həyata keçirdikləri tədbirlər nəticəsində başqa dövlətin ərazisində yerləşən dini mərkəzin üzvləri olan əcnəbilər - 1968-ci il təvəllüdlü Şeyx Məhəmməd Hənif (Shaikh Muhammad Hanif), 1981-ci il təvəllüdlü Kərim Bux (Kareem Bux) və 1968-ci il təvəllüdlü Çanna Tac Məhəmmədin (Channa Taj Muhammad) Azərbaycanda qeyri-ənənəvi dini cərəyana aid ideyaların təbliği istiqamətində fəaliyyət göstərmələri, qanunsuz qapalı dini yığıncaqlar və dini ayinlərin icrasını təşkil etmələri təsbit olunub.
Toplanmış materiallar əsasında, adları qeyd olunan xarici ölkə vətəndaşlarının “Dini etiqad azadlığı haqqında” Azərbaycan Respublikasının Qanununun tələblərinə zidd fəaliyyət göstərmələri müəyyənləşdirilərək onların bu əməllərinin qarşısı alınıb və həmin şəxslər AR Miqrasiya Məcəlləsinin 79.1.2 maddəsinə əsasən ölkə hüdudlarından kənara çıxarılıb.
4-06-2025, 17:09
13 nəfər Suriyadan Azərbaycana gətirilib
Azərbaycan Respublikasının hökuməti tərəfindən görülmüş mərhələli və koordinasiyalı tədbirlər nəticəsində 3 iyun 2025-ci il tarixində Suriya Ərəb Respublikasında olan 13 nəfər Azərbaycan Respublikası vətəndaşının ölkəmizə repatriasiyası həyata keçirilib.
Bu barədə Xarici İşlər Nazirliyindən məlumat verilib.
Bildirilib ki, ilk növbədə repatriantların yeri, şəxsiyyəti və Azərbaycan Respublikası vətəndaşlığına mənsubiyyəti müəyyən edilib.
İraq və Suriyadan Azərbaycan vətəndaşlarının repatriasiyasına məsul olan müvafiq dövlət qurumlarının nümayəndələri Türkiyə Respublikasına ezam edilib, repatriantların ilkin tibbi və psixoloji müayinəsi həyata keçirilib.
Azərbaycan Respublikasının Türkiyə Respublikasındakı Səfirliyi tərəfindən müvafiq əlaqələndirmə işi aparılmaqla vətəndaşlarımız Azərbaycan Respublikasına qayıdış şəhadətnamələri və təyyarə bileti ilə təmin olunub.
Repatriantların sosial reabilitasiyası və cəmiyyətə reinteqrasiyası istiqamətində müvafiq tədbirlərin həyata keçirilməsi nəzərdə tutulur.
Azərbaycan Respublikasının hökuməti tərəfindən xarici ölkələrin ərazisində silahlı münaqişənin qurbanına çevrilmiş Azərbaycan Respublikası vətəndaşlarının repatriasiyası üçün zəruri tədbirlərin görülməsi davam etdiriləcəkdir.
4-06-2025, 17:00
General Ermənistan-Azərbaycan sərhədindəki vəziyyətdən danışdı
Ermənistan-Azərbaycan sərhədində vəziyyət nisbətən sabitdir.
Bunu Ermənistan Silahlı Qüvvələrinin Baş Qərargah rəisi, general-leytenant Edvard Asryan parlamentdə jurnalistlərə açıqlamasında deyib.
Asryanın sözlərinə görə, Ermənistan Silahlı Qüvvələri ona verilən tapşırıqları, o cümlədən kəşfiyyat işlərini yerinə yetirməkdə davam edir.
"Sərhəd zonasında başqa təxribat xarakterli fəaliyyət müşahidə olunmayıb", - Ermənistan Silahlı Qüvvələrinin Baş Qərargah rəisi bildirib.
Edvard Asryan iyunun 4-də jurnalistlərlə söhbətində baş nazir Nikol Paşinyanın "müharibə yox, sülh olacaq" bəyanatını şərh edərkən deyib.
"Ermənistanın baş naziri Ali Baş Komandandır, nə deyirsə, onun kifayət qədər əsasları var".
4-06-2025, 16:50
ABŞ Senatı Rusiyaya qarşı yeni sanksiyalara hazırlaşır
ABŞ Senatı Rusiyaya qarşı yeni sanksiyaların tətbiqi ilə bağlı qanun layihəsini qəbul etməyə hazırdır.
Bunu "Fox News" telekanalına müsahibəsində ABŞ prezidentinin xüsusi nümayəndəsi Keyt Kelloq deyib.
Xüsusi nümayəndənin sözlərinə görə, o, ötən həftə senator Lindsi Qremlə bu məsələni müzakirə edib. Onun fikrincə, senatorlar hərəkət etməyə hazırdırlar.
Kelloq əlavə edib ki, bu sanksiyalar olduqca ağır olacaq.
ABŞ lideri Tramp Moskvaya qarşı sanksiyaların tətbiqini istisna etməsə də, hələ ehtiyatlı olduğunu və Ukrayna məsələsi üzrə səmərəli danışıqların və sülhün bərqərar olmasının bu sanksiyaların tətbiqini istisna edəcəyinə ümid etdiyini bildirib.
4-06-2025, 16:13
Nazirlik gücləndirilmiş iş rejiminə keçdi
Qurban bayramı günlərində əhalinin nəqliyyat, poçt, telekommunikasiya, o cümlədən internet, mobil rabitə xidmətləri və radio-televiziya yayımı ilə keyfiyyətli və davamlı şəkildə təmin edilməsi üçün müvafiq tədbirlər həyata keçirilib.
Bununla bağlı Rəqəmsal İnkişaf və Nəqliyyat Nazirliyinin qurumlarına, eləcə də mobil və telekommunikasiya operatorlarına, internet xidmət provayderlərinə təlimat göndərilib.
Qeyd edilib ki, nazirliyin müvafiq struktur bölmələri xidmətlər üzrə baş verə biləcək problemlərin aradan qaldırılması məqsədilə tam hazır vəziyyətə gətirilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!