20-08-2025, 18:20
Azərbaycan xalqına davamlı sülh və rifah arzulayıram - Mirziyoyev
Özbəkistan Respublikasının Prezidenti Şavkat Mirziyoyev Prezident İlham Əliyevə məktub ünvanlayıb.
Məktubda deyilir:
"Hörmətli İlham Heydər oğlu, dəyərli Qardaşım,
Sizin Ermənistan Respublikasının Baş naziri Nikol Paşinyanla Amerika Birləşmiş Ştatlarının Prezidenti Donald Trampın iştirakı ilə Vaşinqton şəhərində imzaladığınız Birgə Bəyannamə barədə xəbəri böyük məmnuniyyətlə qarşıladım.
Bu sənədi, ilk növbədə, Azərbaycan Respublikasının ərazi bütövlüyünün və suverenliyinin bərpası, Cənubi Qafqaz regionunda davamlı sülhün və dayanıqlı inkişafın təmin olunması istiqamətində Sizin uzun illər ərzində yorulmaz səylərinizin, qətiyyətli siyasi iradənizin, eləcə də cəsarətli və ədalətli təşəbbüslərinizin aydın nəticəsi kimi qiymətləndirirəm.
Sizin rəhbərliyiniz altında son illərdə Azərbaycan və Ermənistan arasında Sülh Sazişinin imzalanması yolunda əldə olunmuş əhəmiyyətli irəliləyiş xüsusi təqdirə layiqdir.
Bizim üçün həqiqətən qardaş olan Azərbaycan xalqının ciddi sınaqlar və sürətli dəyişikliklər dövründə belə yüksək nailiyyətlər əldə etməsindən sonsuz qürur duyuruq.
Hörmətli İlham Heydər oğlu,
Sizin müdrik və uzaqgörən siyasətiniz təkcə qardaş Azərbaycan xalqının uzun illərdən bəri bəslədiyi ümidlərin tam gerçəkləşməsinə, beynəlxalq arenada nüfuz və hörmətinin artmasına deyil, həm də regionda davamlı sülhün və tərəqqinin möhkəmlənməsinə etibarlı əsas yaradır.
Fürsətdən istifadə edərək, Sizi bu tarixi uğur münasibətilə bir daha səmimi-qəlbdən təbrik edir, Sizə möhkəm cansağlığı, ailə səadəti, məsuliyyətli dövlət fəaliyyətinizdə yeni uğurlar, dost Azərbaycan xalqına isə davamlı sülh və rifah arzulayıram".
20-08-2025, 17:44
Daha iki ünvanda minib-düşmə yeri yaradıldı
Azərbaycan Yerüstü Nəqliyyat Agentliyi (AYNA) tərəfindən avtobus zolaqlarında minik avtomobillərinin sərnişinləri rahat şəkildə mindirib-düşürməsini təmin etmək üçün xüsusi yerlərin yaradılması davam etdirilir.
AYNA-dan bildirilib ki, növbəti belə yerlər Cəfər Cabbarlı və Bəsti Bağırova küçələrinin (“Caspian Plaza”nın qarşısı), eləcə də 8 Noyabr prospekti ilə Xəqani Rüstəmov küçəsinin kəsişməsində (2 saylı “ASAN xidmət” mərkəzinin yaxınlığı) təşkil edilib. Hər iki ünvanda müvafiq lövhələr yerləşdirilib.
Minib-düşmə yerlərinin yaradılmasında məqsəd avtobus zolaqlarında ictimai nəqliyyatın hərəkətinə mane olmadan sərnişinlərin minib-düşməsinə imkan yaratmaqdır.
Minib-düşmə yerlərindən istifadə zamanı ictimai nəqliyyatın hərəkətinə şərait yaradılmalı, minib-düşmələr ən qısa vaxtda yerinə yetirilməli, təhlükəsizlik və manevretmə qaydalarına əməl edilməlidir.
20-08-2025, 17:31
İranın eks-prezidenti xəstəxanaya yerləşdirildi
İranın keçmiş prezidenti Məhəmməd Hatəmi ürək xəstəliyi ilə əlaqədar xəstəxanaya yerləşdirilib.
Bu barədə “Mehr” agentliyinin məlumatında bildirilib.
Sabiq prezidentin qardaşı Rza Hatəmi "Cənab Məhəmməd Hatəminin səhhəti yaxşıdır və hazırda həkimlərin nəzarəti altında müalicə olunur" deyib.
Məhəmməd Hatəmi 1943-cü ildə anadan olub. O, 1997-2005-ci illərdə İran İslam Respublikasının 5-ci prezidenti vəzifəsini tutub.
20-08-2025, 17:10
Prezident və birinci xanım Gəncə stadionunda - FOTO
Azərbaycan Respublikasının Prezidenti İlham Əliyev və birinci xanım Mehriban Əliyeva avqustun 20-də Gəncə şəhər stadionunda aparılan tikinti işlərinin gedişi ilə tanış olublar.
Gənclər və idman naziri Fərid Qayıbov dövlətimizin başçısına və birinci xanıma görülən işlər barədə məlumat verib.
Bildirilib ki, 1959-1963-cü illərdə inşa edilən Gəncə şəhər stadionu 1964-cü ildə istismara verilib. Son illərdə stadionun tamaşaçı tribunaları yararsız vəziyyətə düşdüyündən və texniki cəhətdən istismarı mümkün olmadığından bu idman qurğusunun fəaliyyəti qismən həyata keçirilirdi.
Prezident İlham Əliyevin 2023-cü ildə imzaladığı Sərəncama əsasən, Gəncə şəhər stadionunun yenidənqurma işlərinin layihələndirilməsi və həyata keçirilməsi üçün Prezidentin ehtiyat fondundan ilkin olaraq bir milyon manat ayrılıb.
Ötən il aprelin 9-da dövlətimizin başçısı stadionun təməlini qoyub.
Qeyd edək ki, bu il sentyabrın 28-dən oktyabrın 8-dək Azərbaycan növbəti böyük idman yarışına - III MDB Oyunlarına ev sahibliyi edəcək. Bunun üçün bir neçə şəhər və rayon seçilsə də, MDB Oyunlarının açılış və bağlanış mərasimləri, həmçinin əsas oyunlar Gəncədə keçiriləcək. Bütün bunlar nəzərə alınaraq şəhər stadionunun tikintisində işlər sürətləndirilib. Stadionun ərazisində köməkçi məşq meydançaları və Futbol Akademiyası binası tikilib. Yeni layihəyə görə stadionun ərazisi genişləndirilərək 10,4 hektara çatdırılıb. Nəqliyyat vasitələrinin təhlükəsiz giriş-çıxışı və parklanması ilə birlikdə idman arenasının ümumi sahəsi 12 hektardan çoxdur.
UEFA-nın 4-cü kateqoriya standartlarına uyğun inşa edilən stadionun tamaşaçı tutumu layihə üzrə 15 min 343 yerlikdir. Stadionda fiziki imkanları məhdud tamaşaçılar üçün müvafiq sayda oturacaqlar, media və VIP zonalar mövcud olacaq. Burada, həmçinin futbolçular üçün soyunub-geyinmə, konfrans, tibb, hakimlər, texniki heyət üçün otaqlar və digər zəruri sahələr də müasir səviyyədə qurulur. Stadionun daxilində bilet satışı, müxtəlif ictimai iaşə obyektləri, avtodayanacaqlar və nəzarət-buraxılış məntəqələri yaradılacaq. Stadion UEFA tələblərinə uyğun işıqlandırma, səs, yayım, internet, havalandırma, təhlükəsizlik və digər zəruri sistemlər ilə təchiz olunur. İdman qurğusunun ərazisində də geniş abadlıq və yaşıllaşdırma işləri həyata keçirilir.
Müxtəlif idman yarışlarının keçiriləcəyi Gəncə şəhər stadionunun inşası, ilk növbədə, uşaqlar və yeniyetmələr arasında futbola olan marağı daha da artıracaq, futbolla məşğul olmaq istəyənlərə geniş imkanlar yaradacaq. Bölgələrimizdə yeni idman komplekslərinin yaradılması, köhnələrinin əvəzinə müasir idman qurğularının inşası ümumilikdə ölkəmizdə idmanın kütləviliyini təmin etməklə yanaşı, gənc nəslin sağlam yetişməsi baxımından da böyük rol oynayır. Bu layihə, eyni zamanda, ölkəmizin III MDB Oyunlarının yüksək səviyyədə keçirilməsi üçün gördüyü işlərdən biridir.
20-08-2025, 16:54
Overçuk Paşinyanla danışıq üçün İrəvandadır
Rusiya hökuməti sədrinin müavini Aleksey Overçuk Ermənistana gedib.
Ermənistanın baş naziri Nikol Paşinyan Aleksey Overçuku qəbul edib.
Nazirlər Kabinetinin mətbuat xidmətindən verilən məlumata görə, görüş zamanı Ermənistan və Rusiyanın ikitərəfli gündəliyinə dair məsələlər müzakirə olunub. Həmsöhbətlər Avrasiya İqtisadi İttifaqı çərçivəsində əməkdaşlığın aktual mövzularına toxunublar.
Tərəflər ticarət dövriyyəsinin dinamikasını, eləcə də birgə proqramların icrasının gedişatını müzakirə ediblər.
19-08-2025, 21:53
Putin-Zelenski görüşü hansı şəhərdə keçiriləcək?
ABŞ Prezidenti Donald Trampın Vaşinqtonda Volodimir Zelenski və Avropa liderləri ilə görüşündən sonra Rusiya və Ukrayna prezidentlərinin birbaşa dialoqu gündəmə gəlib.
Tramp bu görüşün təşkilinə hazır olduğunu bildirib. Bundan dərhal sonra siyasətçilər və media müxtəlif məkan variantlarını irəli sürüblər.
Moskva
Qərb mətbuatı Kreml mənbələrinə istinadən bildirir ki, Vladimir Putin görüşün Moskvada keçirilməsini təklif edib. Lakin Zelenski bu variantı dərhal rədd edib.
Roma
İtaliyanın Baş naziri Meloni Romanı üçtərəfli sammit üçün meydança kimi irəli sürüb. Tramp və Zelenski bu təklifə müsbət yanaşıblar. Lakin bəzi diplomatlar bu ehtimalı zəif sayırlar.
Cenevrə
Fransa Prezidenti Emmanuel Makron görüşün Cenevrədə təşkil olunmasını təklif edib. Məlumata görə, Putin də bu variantı üstün tutur. İsveçrə rəsmiləri Putinə diplomatik toxunulmazlıq veriləcəyini bəyan ediblər. Qeyd edek ki, Beynəlxalq Cinayət Məhkəməsi (BCM) onun barəsində həbs orderi çıxarıb.
Budapeşt
"Reuters" və "Sky News" nəşrlərinin məlumatına görə, ABŞ administrasiyasındakı yüksək vəzifəli mənbələr görüş üçün Budapeştin də müzakirə olunduğunu bildiriblər.
İstanbul
Türkiyə Prezidenti Rəcəb Tayyib Ərdoğan Zelenski ilə son danışıqlarda İstanbulun təcrübəsini əsas gətirərək yenidən bu şəhəri təklif edib. Ankara bu təşəbbüsün hələ də qüvvədə olduğunu vurğulayıb.
Minsk
Belarus Prezidenti Aleksandr Lukaşenko da görüşə ev sahibliyi etməyə hazır olduğunu açıqlayıb. O, “sülh naminə” belə bir toplantını dəstəklədiyini deyib, lakin Zelenskinin Minska gələcəyinə şübhə ilə yanaşıb.
Digər variantlar
Bəzi KİV-lər Helsinki və Yaxın Şərq ölkələrini də mümkün mərkəzlər sırasında göstərirlər.
Hazırda yekun qərar yoxdur. Görüşün yeri yaxın həftələrdə müəyyən ediləcəyi gözlənilir.
19-08-2025, 21:40
Gəncədə 15 yaşlı oğlan bıçaqlandı - Vəziyyəti ağırdır
Gəncədə bıçaqlanma hadisəsi baş verib.
Hadisə şəhər ərazisində qeydə alınıb.
2010-cu il təvəllüdlü Tunar Məmmədov bıçaq yarası ilə xəstəxanaya çatdırılıb.
Əməliyyat edilən T.Məmmədovun vəziyyəti ağırdır.
Faktla bağlı araşdırma başlanılıb.
19-08-2025, 21:25
30 ukraynalı uşaq Azərbaycana əmanət edildi
Ukraynalı uşaqlardan ibarət növbəti qrup reabilitasiya üçün Kiyevdən Bakıya yola salınıb.
Yolasalma mərasimində Azərbaycanın Ukraynadakı səfiri Seymur Mərdəliyev, diplomatlar, uşaqların valideynləri iştirak ediblər.
Səfir Seymur Mərdəliyev bildirib ki, növbəti dəfə 30 ukraynalı uşaq reabilitasiya üçün Azərbaycana yola salınır. Üç ildən çoxdur Azərbaycan müharibədən zərər çəkmiş ukraynalı uşaqları qəbul edərək onlara qayğı, istirahət, müalicə və mənəvi dəstək bəxş edir.
Səfirin sözlərinə görə, qrupa Ukraynanın bir sıra bölgələrindən, o cümlədən Xarkov, Odessa, Vinnitsa, Kiyev vilayətlərindən uşaqlar daxildir. Müxtəlif yaş qrupundan olan ukraynalı uşaqlar reabilitasiya və psixoloji bərpa məqsədilə ölkəmizdə müvafiq proqramlarda iştirak edəcəklər. Bundan sonra da ukraynalı uşaqların reabilitasiya məqsədilə Azərbaycana göndərilməsi planlaşdırılır.
Qeyd edək ki, indiyədək 400-ə yaxın ukraynalı uşaq Azərbaycanda reabilitasiya kursu keçib.
19-08-2025, 20:54
Saray körpüsü yaxınlığındakı obyektlər sökülür
Sumqayıt şəhərini Saray qəsəbəsi ilə birləşdirən avtomobil körpüsünün yaxınlığında yerləşən obyektlərin sökülməsinə başlanılıb.
Proses yolun genişləndirilməsi ilə əlaqədar həyata keçirilir.
Hazırda işlər Sumqayıtdan-Bakı istiqamətində yolun sağ tərəfində aparılır.
Qeyd edək ki, hərəkətə məhdudiyyət tətbiq olunmayıb.
19-08-2025, 20:42
Ərdoğan məqalə yazdı: Qəzzadan Suriyaya, Afrikadan Asiyaya qədər...
Türkiyə Prezidenti Rəcəb Tayyib Ərdoğan 19 avqust – Dünya Humanitar Yardım Günü münasibətilə İspaniyanın nüfuzlu "El Pais" qəzeti üçün məqalə yazıb.
“Sərhədləri Aşan Mərhəmət: Sivilizasiyalar İttifaqı və Humanitar Diplomatiya” adlı məqalədə o, humanitar yardımın siyasətdən kənar, vicdan məsələsi olduğunu vurğulayıb.
Ərdoğan qeyd edib ki, Türkiyə ilə İspaniya ortaq dəyərlərə sahib iki ölkə olaraq Avropa-Aralıq dənizi regionunun sabitliyi üçün mühüm əməkdaşlıq edir.
Prezident vurğulayıb ki, Türkiyə tarixi ənənələrindən qaynaqlanan yardım missiyasını Qəzzadan Suriyaya, Afrikadan Asiyaya qədər geniş coğrafiyada davam etdirir. O, İspaniyanın da bu humanitar fəaliyyətlərdə önəmli tərəfdaş olduğunu, xüsusilə 6 fevral zəlzələsindən sonra həkim və xilasedicilərin göstərdiyi dəstəyi minnətdarlıqla xatırladığını bildirib.
Ərdoğan əlavə edib ki, Türkiyə BMT-nin Dünya Humanitar Zirvəsinə ev sahibliyi etməsi, AFAD, TİKA və Qızıl Aypara Cəmiyyətinin fəaliyyəti, eləcə də COVID-19 dövründə 160-dan çox ölkəyə yardım göstərməsi ilə beynəlxalq aləmdə seçilir. Qəzzaya 101 min tondan artıq yardım çatdırıldığını vurğulayan dövlət başçısı, “birinin yaşadığı ağrı hamının vicdanında əks-səda doğurur” prinsipi ilə hər bölgədə fəaliyyətlərini davam etdirəcəklərini bəyan edib.
Məqalənin sonunda isə Ərdoğan Türkiyə və İspaniyanın ortaq məqsədlər əsasında daha ədalətli bir dünya qurmaq üçün birgə çalışacağına inam ifadə edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!