Napoleon 1812-ci ildə Rusiyaya hücum etməzdən əvvəl coğrafşünaslarına tapşırmışdı ki, geniş manevr üçün xəritə ilə yanaşı, Moskvanın da xüsusi rəsmini hazırlasınlar.

O, bütün döyüşlər ərzində bundan faydalanmağa və ruhi gücünü artırmağa çalışarmış.

Böyük imperatorun xəyalında qurduğu Fransanın gerçək sərhədlərini təyin etmək çox çətindir.

Tarixçilər dünyanı fəth edən korsikalı sərkərdənin nəinki bütün Avropanı, eləcə də üç qitəni əhatə etməyə çalışdığını, yüzminlik ordularını buna hazırladığını yazıırlar.

Onun üçün simvolların nə demək olduğunu təyin etmək iki əsrdən sonra elə də asan deyil, lakin son sözlərində üzünü xalqına tutaraq “heyif ki, fransızlar mənim qurmaq istədiyim böyük imperiyaya layiq olmadılar” söyləmiş və sürgün həyatına yola düşmüşdü.

Biz Pyotrun isti dənizlərə çıxışından, Hind okeanında çəkmələrini yuyan rus əsgərlərinin təsvirindən danışmırıq.

“Böyük Ermənistan” xülyasını dənizdən-dənizə xəritələndirən erməni milli məfkurə sistemindən də bəhs etmirik.

Azərbaycan insanının qədim torpaqlarımız haqda keçmişdən gələn xəyal-real obrazları var. Bunu hər kəs ictimai diskussiyalarda ifadə edir, kitablarda dəqiq sərhədlərlə təsvirini verirlər.

Lakin gerçək həyat millətin bütün zümrələrinin təfəkküründə yer edən simvollardan və obrazlardan keçib gedərək formalaşır.

Döyüşən ordulara və sadə xalqa qurmaq istədiyi gələcəyin xəritəsi bax bu olardı.

Azərbaycanın bir əsrdə itirdiyi iki böyük məkanın beyinlərdən və sözlərdən real təsvirlərə daşınması gərəkdir.

Siyasi rəssamlarımızın QARABAĞDA ÇIXIB, İRƏVANDA BATAN GÜNƏŞİN təsvirini yaratması insanlarımızın fərdi dünyasına həyatın başlanğıcı və sonu kimi bir fəlsəfə verərdi. Ordular sadə rəmzlərdən və əsərlərdən dünyanı fəth edirlər!

Kətan köynəklər üzərindəki rəsm Qarabağı və İrəvanı biləşdirəcək!

Zahid Oruc
Millət vəkili