Sanki kimsə bizim topluma “Sizi ağsaqqalsız qalasınız”, deyə qarğış edib. Həmin qarğış da deyəsən babatca tutub. Əgər belə olmasaydı, Eldar Quliyev kimi “dahi ictimai xadim” Azərbaycan Ağsaqqallar Şurasının sədri olmazdı...

“Vətəndaşlar bəzən lazım olmadığı halda 2-3 çörək alır, amma istifadə etmirlər. Yəqin ki, hər kəs şahidi olub: səhərlər qapılardan yarım və yaxud da bütöv dünəndən, srağagündən qalmış çörək qurusu asılır. Yəni ehtiyac olan qədər çörək almaq lazımdır, israfçılıqdan qaçmalıyıq. Dünya o dünya deyil, sudan da ehtiyatla istifadə edilməlidir. Atmosfer dəyişir, kənd təsərrüfatı həm də iqlimdən, təbiətdən asılıdır. Ona görə də təbiəti qorumaq, ehtiyatlı istifadəyə meyillənmək lazımdır. Gəlin çörəkdən, qidadan artıq alıb sonra xarab olduğu üçün heyvanlara verməyək”.

Bu deyilənlərdə həqiqət payı var. Ancaq görəsən, Eldar Quliyev nədən bu məsləhətini un, çörək bahalaşmadan öncə vermirdi?...

Bəlkə də bunu özü ortabab dolanan, tez-tez üzdə də olsa camaatın halına yanan, kasıb-kusubu müdafiə edən, xalqın sayıb-seçdiyi birisi çıxıb desəydi, camaatda bu qədər kəskin reaksiya, qəzəb doğurmazdı. Ancaq bu “məsləhəti” “bir əli yağda, bir əli balda” yaşayan, 5 dəfə(!) deputat “seçilən”, eyni zamanda da Azərbaycan Kooperasiya Universiteti başda olmaqla, xeyli “obyektin”, mülklərin, var-dövlətin sahibi olan, özü uzun illərdir bəlkə də “zavod çörəyi”ni bəyənmədiyindən yaxına da buraxmayan, onun qiymətini belə bilməyən birisi verəndə, kasıb əhalinin bunu ağsaqqal məsləhəti yox, az qala söyüş kimi qəbul etməsi təbiidir...

Xatırladaq ki, Azərbaycan ağsaqqallarının rəsmi “lideri” olan bu şəxs dördcə ay əvvəl benzin bahalaşanda da öz “ağsaqqal məsləhəti”ni xalqdan əsirgəməmişdi: "Şanlı Azərbaycan kifayət qədər iqtisadi gücə malikdir, amma bizim ABŞ-da olduğu qədər milyardlarımız yoxdur. Nəzərə almaq lazımdır ki, 15 qəpiklə heç kim kasıblamaz..."

Məntiqlə indi də durub deməliydi ki, “unun kisəsi 10 manat, çörək isə 15 qəpik bahalaşmaqla, kimsə kasıblamaz”.

Ancaq görünür, keçən dəfəki “şedevr” fikrindən sonra ünvanına yağan “minnətdarlıq mesajları” bu dəfə onu bir qədər fərqli danışmağa vadar edib...

Onu da qeyd edək ki, son fikirlərilə xalqı təkcə israfçılıqda yox, həm də acgözlükdə, görməmişlikdə günahlandırmış olan bu şəxsin açıqlamaları erməni mətbuatında da tirajlanmaqda, ələ salınmaqdadır. Özünü də lağ obyektinə çevirib, bizi də - düşmən sevindirən “el ağsaqqalı”!...

Xatırladaq ki, elə də uzaq olmayan keçmişdə Fransa fahişəxanasındakı qadınla söhbətlərindən sitat gətirməsilə tanınan həmin bu deputatımız(!) həm də iqtisad elmləri doktoru və professordur. Və Norveç Nobel Komitəsinin böyük haqsızlıq edərək unutduğu və hələ də ödülləndirmədiyi bu “misilsiz” iqtisadçı-alimin az qala unun qiymətinin qalxmasını əhalinin "çörək israfçılığı", vəziyyətdən çıxış yolunu isə çörəyə qənaətdə görməsi də başqa bir aləmdir...

Söhbət Fransadan düşmüşkən, orta əsrlərdə xalqdan, onun dolanışığından, real həyatından uzaq düşmüş Fransa kraliçası Mariya Antuanetta ilə bağlı bir rəvayət var. Ona xalqın yeməyə çörək tapmadığını deyəndə, “Çörək tapa bilmirlərsə, tort yesinlər” deyibmiş.

Eldar Quliyev kimi kefinə kef çatmayanların kasıb camaata çörəklə bağlı məsləhət verməsi də buna bənzəyir.

Doğrudur, Mariya Antuanetta ağbirçək yaşına çatmamış həyatla vidalaşmalı olmuşdu, onu edam etmişdilər. Ancaq yaradanın bizə “lütfüdür” ki, Eldar müəllim kimi ağsaqqalımız yaşayır, yaşayacaq və öz “ağsaqqal məsləhətləri”ni hələ uzun müddət bizdən əsirgəməyəcək...

(“AzPolitika.info”)

Bütöv.az

Sabiq deputat Nəriman Əliyev özünə məxsus “Ştutqart” MMC-nin anbarının yaxınlığında yerləşən 37 ədəd ağacı kəsməkdə, 64 işçinin 76 min manat maaşını verməməkdə ittiham olunur. N.Əliyev isə bu iddianı irəli sürən şəxsləri və bacısı oğlu Əfqan Abdullayevi 25 milyonluq yeyintidə günahlandırır.

“Qafqazinfo”ya müraciət edən həmin şirkətin keçmiş əməkdaşı Abutalıb Ağayev iddia edib ki, N.Əliyev paytaxtın Nərimanov rayonu, Ələsgər Qayıbov küçəsi “10 C” ünvanında yerləşən boş ərazini özəlləşdirərək öz adına rəsmiləşdirib: “Orada 941.5 kvadratlıq iki mərtəbədən ibarət anbar, 132.2 kvadratlıq iki mərtəbədən ibarət ofis binası inşa edib. Bundan sonra, 2020-ci ilin aprel ayında geridə qalan boş sahəni hündür hasara almaqla bu hissədə yerləşən 37 ədəd bir neçə illik, böyük ağacları kəsərək tikinti aparmaq üçün hazır vəziyyətə gətirib. Bununla bağlı müraciətimizdən sonra mütəxəssislər əraziyə gələrək baxış keçirib”.

A.Ağayevin sözlərinə görə, N.Əliyev ağacları kəsdikdən sonra “burada ağaclar olduğu unudulan kimi tikintiyə başlayacağıq” deyib: “Ağaclar kəsilib, Hövsanda boş torpaq sahəsinə yığılıb. 37 ədəd ağacı kəsməklə ekologiyaya vurduğu ziyana görə Nəriman Əliyev cinayət məsuliyyətinə cəlb olunmalıdır”.
Keçmiş deputat Nəriman Əliyev isə “Qafqazinfo”ya açıqlamasında ağac kəsdirməsi iddialarını qəbul etməyib: “O obyekt 2004-cü ildə tikilib və mənə məxsusdur, düz 16 il qabaq da onun üçün çıxarış alınıb. Bu şəxslər Ekologiya Nazirliyinə və Bakı Şəhər İcra Hakimiyyətinə müraciət ediblər. Hər iki qurumdan da həmin əraziyə baxış keçirilib və deyilib ki, onların iddiaları əsassızdır. Orada ağac kəsilməyib, kol-kos olub və onlar da təmizlənib”.

Ekologiya və Təbii Sərvətlər Nazirliyinin Dövlət Ekoloji Təhlükəsiz xidmətinin rəisi Hikmət Əlizadə sorğumuza cavab olaraq bildirdi ki, sözügedən məsələ ilə bağlı hazırda araşdırma aparılır.

Keçmiş deputat Nəriman Əliyev əlavə edib ki, bacısı oğlu Əfqan Abdullayev və onun işçisi Abutalıb Ağayevdən polisə şikayət etdiyi üçün həmin şəxslər onu ağac kəsilməsi iddiası ilə şantaj edirlər: “Əgər belə bir hadisə olubsa, bu barədə niyə indi məlumat verirlər? Onların işi Daxili İşlər Nazirliyində İstintaq İdarəsində araşdırılır. Mən “Ştutqart” MMC-nin təsisçisiyəm və bacım oğlu Əfqan Abdullayevi də direktor təyin etmişdim. Abutalıb Ağayev də şirkətin əməkdaşı olub. Onlar birlikdə şirkətin 10 milyon manatdan çox pulunu mənimsəyiblər. Bura özəlləşəndən sonra biz şirkətə dəyən ziyan haqda məlumat almışıq və DİN-ə müraciət etmişik. Həmin işdə də bu şəxslər ittiham olunurlar. İndi buna görə də onlar məni bu yolla şantaj edirlər”.
N.Əliyevin bacısı oğlu Əfqan Abdullayev isə saytımıza açıqlamasında bildirib ki, 2020-ci il sentyabrın 8-də dayısı Nəriman Əliyevlə yollarını ayırıb: “Biz hamımız oturub Nəriman Əliyevlə hesabat etmişik. “Ştutqart” MMC-nin paylarının 33 faizi mənim olub. Qalan 67 faiz isə Nəriman Əliyevdə olub.

2004-cü ildə mənim atam “Karkaz” şirkətini yaradıb və keçmiş milli təhlükəsizlik naziri Eldar Mahmudovla şərik olub. Daha sonra Nəriman Əliyev də gəlib pul yatıraraq bu işə qoşulub. Biz kasıb adamlar idik, Nərimanın isə pulu var idi. Eldar Mahmudovun obyektlərinə biz baxırdıq. 2015-ci ildə MTN-də baş verən hadisələrdən sonra Eldar Mahmudovla olan şərikliyə son qoyduq.

Daha sonra da “Ştutqart MMC”ni yaratdıq. 2021-ci ilin sentyabrında da Nəriman Əliyev bizim səhmləri alaraq pulumuzu verdi və onunla ayrılmışıq. Biz halallaşdıq, təhvil-təslim işlərini etdik. İndi oturub orada işi idarə edə bilmir deyə deyir ki, Əfqanın açdığı “Avtodetal” şəbəkəsi bizə zərər verir. Buna görə də bizə şər-böhtan atır. Guya biz oradan 25 milyon manat pul "yemişik". Qanun-qayda var, DİN-ə məktub yazdı və mən də gedib izahat verdim. Hazırda onun işçisi olan Orxan adlı şəxs də gəlib Nəriman Əliyevin verdiyi izahatları təkzib etdi.

Heç bir cinayət işi də açılmayıb. “Ştutqart”dan kim çıxıbsa, hər birinin adına 300-500 min məbləğ yazıb. Guya ki, bu qədər pul mənimsənilib. Ən çox da mənim adıma yazılıb - 15 milyon manat. Orada anbar müdiri olan Elşənin adı siyahıda yoxdur, amma onun fəhlələri yeyintidə ittiham olunur. Əgər bu pulları fəhlə “yemişdisə”, niyə anbar müdiri olan və Nəriman Əliyevin sinif yoldaşı olan Elşən vaxtında bu barədə məlumat verməyib?”

Abutalıb Ağayev qeyd edib ki, sentyabr ayında “Ştutqart” MMC-dən çıxan 64 nəfər maaşlarını ala bilmədikləri üçün dövlət qurumlarına müraciət ediblər: “Biz 64 nəfər eyni vaxtda işdən çıxıb “Avtodetal” şirkətində Əfqan Abdullayevlə işləməyə başladıq. Nəriman Əliyev isə oradan çıxanların maaşını vermədi. Ümumilikdə bizə 76 min manat maaş verməlidir. Orada biz maaşı tam rəsmi almırdıq. Məsələn, mənim maaşın 1500 manat idi, rəsmi olaraq 226 manat alırdım, qalan pulu isə şəxsən Nəriman Əliyev özü “paket”də verirdi”.

Bütöv.az

Tovuz SSİ-nin əməkdaşları sadə sakinləri suvarma suyu ilə “imtahana çəkirlər”

Məlumdur ki, ölkəmizdə su təsərrüfatı əsas strateji sahələrdən biri hesab olunur və belə bir səbəbdən də, son illər bu sahəni daha da inkişaf etdirmək, əmələ gələn problemləri aradan qaldırmaq qarşımızda duran əsas vəzifələrdən birinə çevrilib. Faktdır ki, yaşadığımız ictimai həyatın bir sahəsi olan su təsərrüfatını inkişaf etdirmədən nə ərzaq bolluğuna nail ola bilərik, nə də ki, həlli vacib olan problemləri aradan qaldıra bilərik. O halın varlığına diqqət yetirək ki, 2019-2024-cü illəri əhatə edən regionların sosial-iqtisadi inkişafı “Dövlət Proqramı”nda əsas prioritet vəzifələrdən biri də, məhz ölkəmizdə su təsərrüfatını inkişaf etdirmək, hər kəsin su ilə təminatını dolğun şəkildə ödəməkdən ibarətdir. Xüsusilə də, regionlarda bu məsələnin həlli daha aktuallıq kəsb etdiyindən, dövlət-hakimiyyət orqanlarının əsas nəzər-diqqəti də, məhz bu sahənin inkişafına yönəldilir.

Ümumiyyətlə, su insan həyatında əvəzolunmaz nemət olmaqla bərabər, həm də ictimai həyatımızın davamlı inkişafının təmin olunmsında əsas faktorlardan biridir. Bir sözlə, su təsərrüfatının inkişafı ictimai əhəmiyyət kəsb etdiyindən ayrı-ayrı rayonlarda fəaliyyət göstərən suvarma sistemləri və melioservis idarələrinin, həmçinin bu sahə üzrə fəaliyyət göstərən digər qurumların iş fəaliyyətləri haqda lazımi məlumatları əldə etməyi hər zaman özümüz üçün borc bilmişik. Hətta elə hallar olub ki, respublikamızın bəzi şəhər və rayonlarında olmuşuq, mövcud vəziyyət haqda doğru-dürüst məlumatları əldə etməyə də çalışmışıq. Bugünlərdə Dəryaz qəzetinin əməkdaşları Tovuz rayonunda olarkən, bir neçə nəfər yerli sakinlərin haqlı narazılıqları ilə üz-üzə qaldıq. Elə ki, problemin mahiyyəti ilə yaxından maraqlandıq, o halda bəlli oldu ki, Nəsrəddin Aslanovun rəhbərlik etdiyi Tovuz Suvarma Sistemləri İdarəsinin əməkdaşları Tovuz rayonu, Qovlar şəhəri, Xəqani küçəsi, ev-13 ünvanında yaşayan Əsgərov Şahin Kərəm oğlunu suvarma suyu ilə “imtahana çəkirlər”. Çünki, adı çəkilən bu şəxs redaksiyamıza çatdırdığı video-müraciətində qeyd edir: “Bizim ailə üzvlərinin 1ha.78 sot torpaq sahəsi var və həmin torpaq sahəsinə yonca əkmişik. Yay aylarından indiyə kimi Nəsrəddin Aslanovun rəisi olduğu Tovuz SSİ-nin əməkdaşları bizi suvarma suyuna həsrət qoyublar. Elə ki, yonca əkdiyimiz və hal-hazırda istifadəmizdə olan torpaq sahəsini suvarmaq üçün bu idarənin rəhbər şəxslərinə müraciət edirik, o halda onlar “Hələ sizə su verə bilmərik” deyə cavab verirlər. Bəli, həqiqətən də bu belə olur. Çünki, suvarma suyunun verilməsinə cavabdehlik daşıyan şəxslər idarə rəisinin verdiyi tapşırıqlar əsasında hərəkət edirlər. Yəni, kim daha çox pul verirsə, suvarma suyunu həmin şəxslərə verirlər. Bir sözlə, Nəsrəddin Aslanovun rəhbərlik etdiyi Tovuz SSİ-nin əməkdaşlarını imkansız ailələrin, o cümlədən bizim ailənin taleyi düşündürmür, onları daha çox pul əldə etməyin yolları düşündürür. Qeyd edim ki, bizə məxsus yonca sahəsinin sağ və sol hissələrində ayrı-ayrı şəxslərə məxsus taxıl sahələri var. SSİ-nin rəhbər şəxsləri qeyd olunan taxıl sahələrinin suvarılması zamanı heç bir problem yaratmırlar. Elə ki, biz də yonca sahəmizi suvarmaq istəyirik, o halda bu qurumun əməkdaşları “Hələ taxıl sahələri suvarılmalıdır, növbəniz çatanda sizə də su verərik” deməklə, bir növ bizi “fırlatmaqla” məşğul olurlar. Yəni, yay aylarından indiyə kimi suvarma suyuna həsrət qaldığımızdan, heç cür yonca sahəmizi suvara bilmirik. O halda sual oluna bilər ki, Tovuz SSİ-nin əməkdaşlarının belə bir ayrıseçkiliyə yol vermələrinin kökündə nələr durur? Məgər, biz də bu ölkənin vətəndaşları deyilikmi? Bizim suvarma suyundan istifadə etmək hüququmuz qadağanmı olunub? Olunubsa bunu kim edib?”

Qeyd edək ki, ölkə Prezidentinin 27 iyul 2020-ci il tarixli “Su ehtiyatlarından səmərəli istifadənin təmin edilməsi ilə bağlı əlavə tədbirlər haqqında” Sərəncamında, həmçinin müxtəlif tədbirlər zamanı əhalinin su ilə təminolunmalarının yaxşılaşdırılması və bu yolda əmələ gələn problemlərin aradan qaldırılması ilə bağlı möhtərəm Prezident tərəfindən lazımi tapşırıqlar verilsə də, hələ də Tovuz SSİ-nin əməkdaşları verilmiş tapşırıqları qulaqardına vurmaqda davam edirlər. Çünki, Şahin Əsgərovgilin ötən 4-5 ay ərzində suvarma suyuna həsrət qalmaları, birbaşa ölkə rəhbərinin verdiyi tapşırıqların əleyhinə getməkdir, yürüdülən dövlət siyasətinə qarşı çıxmaqdadır. Sözsüz ki, belə bir yanaşmanın kökündə xəyanət amili əsas rol oynayır ki, bu da son anda sadə sakinlərin dövlət qurumlarına olan inamının heçə enməsinə səbəb olur. O halda sual oluna bilər ki, hal-hazırda Tovuz SSİ-nə rəhbərlik edən və hər ayın daha çox hissəsini iş başında tapılmayan Nəsrəddin Aslanov, görəsən belə bir idarəçiliyi ilə hara qədər getmək istəyir? Axı, bu şəxsin etibar etdiyi vəzifə sahibləri suvarma suyu ilə rayon ərazisində “bazar açırlar”, imkansız şəxsləri olmazın məşəqqətlərə düçar edirlər? Qarşı tərəfində mövqeyini dinləyə bilərik.

Mövzuya qayıdacağıq.(Deryaz.az)



Bütöv.az

Azərbaycanda unun və çörəyin qiyməti bahalaşıb. Dekabrın 4-də ölkənin iri un və çörək istehsalçıları çörəyin qiymət artımı ilə bağlı yaydıqları müraciətdə bildiriblər ki, tədarükçülərə subsidiyaların ayrılması mexanizminin müddəti 2021-ci il dekabr ayının sonunda bitib: “Hazırda buğda idxalının və un istehsalçılarının fəaliyyətinin davam etdirilməsi, ərzaq məhsulu ilə etibarlı təminatı, eləcə də qıtlığın yaranması təhlükəsinin qarşısının alınması məqsədilə unun qiymətinin ərzaqlıq buğdanın cari qiyməti ilə uyğunlaşdırılması zərurəti yaranıb”.

Açıqlamada o da qeyd olunub ki, Azərbaycana buğda idxalı əsasən Rusiyadan olur: “Oradakı qiymət artımı da bizə təsir edir”.

DİA.AZ xəbər verir ki, mövzu ilə bağlı AYNA-nın suallarını cavablandıran iqtisadçı ekspert Elmir Səfərlinin sözlərinə görə, qiymət artımın səbəbi həm idxaldan asılı olmağımız, həm də dünya bazarında baş verən qiymət dəyişikliyi ilə bağlıdır: “Bildiyiniz kimi, taxılın həm yerli səviyyədə istehsalı, həm də idxalı fərqli-fərqli sahibkarlar üzərindən həyata keçirilir. Bu kimi ticari və istehsal prosesləri birbaşa olaraq bazar tərəfindən tənzimləndiyi üçün unun qiymətində baş verə biləcək dəyişikliklər qaçılmazdır. Belə ki, dünya bazarlarında taxılın qiyməti əvvəlki dövrlərə nisbətdə 30-40% həcmində artım göstərib. Hətta ölkələr üzrə taxılın qiyməti və eləcə də, unun qiymətinin artması BMT-nin Ərzaq və Kənd Təsərrüfatı Təşkilatının (FAO) illik hesabatında da qeyd olunub”.

“Təbii ki, Azərbaycanda istehsal olunan taxıl və unun həcmi yerli tələbatı ödəmədiyi üçün biz həm də idxal edirik. Bu zaman idxala bağlı olduğumuz üçün, dünya bazarında baş verən qiymət dəyişiklikləri birbaşa olaraq respublikada taxılın və unun qiymətinin dəyişməsinə təsir edir. İkinci əsas səbəb ondan ibarətdir ki, biz taxılı əsasən Rusiyadan idxal edirik. Və keçən il ərzində, Rusiyada taxılın ixracı ilə bağlı ixrac rüsumlarının dəyişdirilməsi birbaşa olaraq qiymətə təsir etdi”, - deyə həmsöhbətimiz bildirib.

İqtisadçı deyib ki, taxıl strateji məhsul hesab edildiyindən Azərbaycan dövləti qiymətlərin tənzimlənməsində həmişə maraqlı olub: “Artıq 2020-ci ilin martından etibarən buğda idxalı, eləcə də unun və çörəyin istehsalı ilə məşğul olan sahibkarlar birbaşa olaraq ƏDV-dən azad olunublar. Hətta sonradan bu müddət 2024-cü ilə qədər uzadılıb. Buna paralel olaraq, ərzaq buğdası təchizatçılarına dövlət xüsusi subsidiyalar ayırır. Təbii ki, ərzaq buğdasının qiymətində baş verən artımlar, öz növbəsində çörək, un və un məmulatlarının qiymətinin artmasına səbəb olacaq”.

Səfərli hesab edir ki, aidiyyəti dövlət qurumları hər zaman olduğu kimi, baş verə biləcək süni qiymət artımlarının qarşısını alacaq, hətta təbii artımlar dövründə də qiymətlərin tənzimlənməsi üçün ticarətçilərə və istehsalçılara xüsusi güzəştlər tətbiq edəcək: “Bu kimi proseslər hər zaman olub, olacaq da. Burada əsas məsələ ondan ibarətdir ki, ölkədə taxıl ehtiyatının balansda saxlanılması üçün dövlət xüsusi addımlar atmalı və idxaldan asılılığı minimum, hətta sıfıra endirməyə çalışmalıdır. Bu zaman ölkə daxilində taxılın, unun qiymətinin tənzimlənməsi daha idarə olunabiləcək səviyyədə həyata keçiriləcək”.

Milli Məclisin sabiq üzvü, iqtisadçı alim Nazim Bəydəmirli AYNA-ya şərhində söyləyib ki, bu istiqamətdə mövcud problemin kökündə duran səbəb kənd və su təsərrüfatlarında idarəçiliyin yaxşı olmamasıdır: “Azərbaycan subyektlərinin Rusiyadan, Qazaxıstandan taxılın, əsasda da ərzaq buğdasının alınması ilə bağlı illərdir davam edən münasibətləri var. Çox təəssüf ki, kənd təsərrüfatına illərdir subsidiyalar ayrılmasına baxmayaraq, Meliorasiya və Su Təsərrüfatı Açıq Səhmdar Cəmiyyəti münbit torpaqların sıradan çıxmasına, şoranlaşmasına və eroziyaya uğramasına şərait yaradıb. Bugünkü problemin də kökündə duran səbəb kənd və su təsərrüfatlarında normal idarəçiliyin olmamasıdır”.

“Əgər ölkə özü-özünü təmin etmirsə, həmin məhsulların ölkəyə gəlişi daha da asanlaşdırılır ki, mal qıtlığı yaranmasın, qiymətlər bahalaşmasın. Bu, dünyanın hər yerində belədir, sadəcə bu istiqamətdə düzgün siyasət müəyyənləşdirmək lazım idi. Faktiki olaraq keçən ildən bilinirdi ki, Rusiya taxıl məhsullarına aksiz vergisi tətbiq edir və bu, aybaay artmaqda davam edir. Rusiyadan gələn unu vergilərdən azad etmək lazım idi. Bu zaman Azərbaycan bazarında qıtlıq yaranmazdı. Həmçinin bir neçə şirkəti ayaqda tutmaq üçün dövlət büdcəsindən bu qədər vəsait ayrılmaz, bu da büdcəyə yük olmazdı”, - deyə ekspert vurğulayıb.

Müsahibimiz hökumətin ərzaq buğdasının tamamını xaricdən alanlara subsidiyalar verməsini əsassız hesab edir: “Subsidiyaların verilməsi effekt vermir. Mənimsəmələrə yol açır. İstehsalın doğru qurulmasına, rəqabət mühitinin yaxşılaşdırılmasına imkan vermir. Bu baxımdan mən hesab edirəm ki, iqtisadi rəqabəti artırmaq, məmur sahibkarlığını ləğv etmək və real sahibkarlığa dəstək vermək lazımdır. Regionlarda yaşayan fermerlərə və digərlərinə ucuz maliyyə resurslarına çıxışı asanlaşdırmaq lazımdır. Heç bir ölkə subsidiyalaşma ilə öz daxili istehsalını təmin edə, qiymətləri qoruya bilmir. Bu baxımdan qiymətlərin artmasını təbii hesab edirəm. Çünki subsidayalaşma hədəfinə çatmadı və hesab edirəm ki, idxal unundan bütün gömrük rüsumlarını və vergiləri götürmək lazımdır ki, Azərbaycan sahibkarları ölkəni müxtəlif ölkələrdən gələn məhsullarla təmin etsinlər”.

“İdxalı minimuma endirmək hansı hallarda mümkündür?” sualını cavablandıran Bəydəmirli bildirib ki, bunun yolu sahibkarlığa münbit şərait yaratmaqdan keçir: “Əgər su qıtlığı varsa, illərdir davam edirsə, bunu həll etmək lazımdır. Ölkə başçısı özü çıxışında bildirmişdi ki, müxtəlif rayonlarda su qıtlığı var. Bəzi məmurların sahələrinə su verilir, ancaq fermerlər bu problemlə baş-başa qalırlar. Torpağı əkib-becərənlər bolluq yaratmaqda daha maraqlıdırlar. Onlara dəstək vermək lazımdır. İdxalı azaltmağın yolu ölkədə daxili istehsalı stimullaşdırmaq, məhsul bolluğu yaratmaqdan keçir. Bu da hər kəsin hüquq və vəzifə bərabərliyi olduğunda mümkündür. Məmur sahibkarlığı ayaqda saxlandıqca bizim problemlərimiz daha da qabaracaq, qiymət artımı olacaq”.

“Taxıl nədir ki, biz onu istehsal edə bilmirik?! İllərdir subsidiyalaşma proqramı keçirilib, milyardarla vəsait ayrılıb, amma müxtəlif maliyyə mexanizmləri ilə silinib. Çünki elan edirlər ki, filan qədər torpaq sahəmiz var, ancaq faktiki olaraq o torpaq əkilib-becərilmir, kağız üstündə belə göstərilir. Bu statistika doğru aparılmır. Bunu təkcə biz demirik. Ölkə başçısı bir neçə dəfə çıxışlarında bunu ifadə edib”, - deyə sabiq deputat fikrini yekunlaşdırıb.

Kənd Təsərrüfatı Nazirliyinin mətbuat xidmətindən AYNA-nın sorğusuna cavab olaraq bildirilib ki, hazırda Azərbaycanda buğda ilə özünü təminat səviyyəsi 59-60% təşkil edir: “Azərbaycanda 1 milyon hektar sahədə taxıl əkini aparılır. Bunun 650 min hektarı buğda sahələridir. Buğda üzrə orta məhsuldarlıq 31 sentnerdən yuxarıdır, ölkədə ildə 2 milyon tona yaxın buğda istehsal olunur. Azərbaycanın buğdaya cəmi tələbatı 3,2-3,3 milyon tondur”.

Sorğuya cavabda o da qeyd olunub ki, taxılçılığın inkişafı dövət tərəfindən subsidiyalaşdırılır: “Aqrar Subsidiya Şurasının qərarına əsasən, 2021/2022-ci il payızlıq taxıl əkinləri üçün fermerlərə əkin aparılan sahənin hər hektarına 210 manat subsidiya veriləcək. Subsidiyalar kənd təsərrüfatı məhsulları istehsalçılarının “Fermer kart”ına köçürülür. Fermerlər subsidiya məbləğinin 25 faizini bankomatlar vasitəsilə nağdlaşdıra, qalan 75 faizini isə nağdsız əməliyyatlarla toxum, gübrə, pestisid, herbisid və s. almaq üçün istifadə edə bilərlər. Payızlıq əkinlərin Elektron Kənd Təsərrüfatı İnformasiya Sistemində bəyanı prosesi dekabrın 30-da başa çatıb və fermerlərin subsidiya almaq üçün elektron müraciətləri formalaşıb. Monitorinqlər başa çatdıqdan sonra subsidiya vəsaitləri torpaq sənədləri və bəyan məlumatları təsdiqlənən fermerlərin kartına köçürüləcək”.

Bu gün İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti unun və çörəyin qiyməti ilə bağlı açıqlama yayıb. Açıqlamada qeyd olunub ki, ölkədə unun və çörəyin qiymətlərinə nəzarəti gücləndirib: “Bu ildən daxili bazarda sahibkarlıq subyektləri idxal ərzaqlıq taxıldan istehsal olunan unun qiymətini dünya bazarında olan ərzaqlıq buğdanın mövcud qiymətinə uyğunlaşdırıb. Nəticədə un və ənənəvi (dairəvi) çörəyin qiymətlərində dəyişikliyin baş verməsi müşahidə olunur. Bununla əlaqədar nəzarət tədbirləri daha da gücləndirilib. Bu istiqamətdə preventiv tədbirlər çərçivəsində taxıl idxalçıları, həmçinin un və çörək istehsalçıları ilə görüşlər təşkil edilərək vəziyyətdən sui-istifadə hallarının qətiyyən yolverilməzliyi barədə xəbərdarlıq edilib".

Dövlət Xidməti bildirib ki, un və ənənəvi (dairəvi) çörəyin qiymətində və çəkisində əsassız dəyişikliyin qarşısının alınması və keyfiyyət parametrlərinə nəzarətin həyata keçirilməsi məqsədilə istehlak bazarında mütəmadi monitorinq aparılır, antiinhisar qanunvericiliyinə riayət olunmasına dair zəruri tədbirlər görülür: "Monitorinq zamanı qanunvericiliyinin pozulması halları aşkar olduğu təqdirdə ciddi tədbirlər görüləcək".

Bütöv.az

Məlumdur ki, ölkəmizdə iqtisadiyyatın sürətli inkişafı, əhalinin sosial-mədəni həyat səviyyəsinin yaxşılaşdırılması, təbii ehtiyatlardan səmərəli şəkildə istifadə olunma, ekoloji tarazlığın qorunub saxlanılması və s. kimi məsələ və problemlərin həlli, daim dövlətimizin diqqət mərkəzində saxladığı məsələlərdəndir.

Ona görə də son illər ekologiyaya, təbiəti mühafizəyə və təbii ehtiyatlardan səmərəli şəkildə istifadəyə dair bir sıra normativ hüquqi aktlar qəbul olunmuş, təbiətin qorunması və sağlamlaşdırılması istiqamətində mühüm praktiki addımlar da atılmışdır. Bütün bunlara baxmayaraq, Gundemxeber.az-ın redaksiyasına daxil olan məlumatlara görə, hal-hazırda olmazın biabırçı olaylar Gədəbəy rayonu, Qala kəndinin yuxarı hissəsində, bir qədər də dəqiq desək Şəmkir çayının orta hissəsində Nazim adlı şəxsin rəhbərliyi altında yaşanmaqdadır.

Qeyd edək ki, bu şəxsin həyata keçirdiyi tikinti işləri ilə bağlı heç bir hüquqi əsas olmasa da, fakt bu gün tikinti işləri davam etdirilir. Bir xatırlamanı yada salaq ki, Gədəbəy RİH-nin sabiq başçısı İbrahim Mustafayev, qeyd olunan yerdə inşa olunan obyektin sökülməsi ilə bağlı FHN-nin verdiyi qərarı və 2 saylı Regional Ekologiya və Təbii Sərvətlər İdarəsi rəsmlərinin məhkəməyə müraciət etmələrini əsas tutaraq, məhz zamanında tikinti işlərinin dayandırılması haqda lazımi tapşırığını vermişdir. Sabiq başçının vəzifəsi dəyişdirildikdən sonra, hansısa “gözəgörünməz güclər” Nazim adlı şəxsə “yaşıl işıq” yandırır ki, o, bu gün də oxşar əməllərini davam etdirməkdədir.

Başqa bir faktı qeyd edək ki, bir müddət bundan öncə Gundemxeber.az-ın redaksiyasına daxil olan məlumatlar və təqdim olunan foto-şəkillər əsasında, 05 noyabr 2021-ci il tarixdə “Gədəbəydəki ekoloji problem hər kəsi şoka salır – VİDEO/FAKT” başlıqlı məqalə yayımlayıb, hər kəsi baş verənlərlə bağlı məlumatlandırmağa nail olmuşduq. Hətta, bu azmış kimi aidiyyatı dövlət qurumlarına rəsmi qaydada məktub ünvanlayıb, inşaası həyata keçirilmiş qanunsuz tikinti işləri ilə bağlı lazımi araşdırmalların araşdırılmasını və aparılmış araşdırmaların nəticəsi ilə bağlı redaksiyamızın da məlumatlandırılmasını xahiş etsək də, hələ də hec bir cavab yoxdur. Qeyd edək ki, bugünə kimi redaksiyamıza aidiyyatı dövlət qurumlarından heç bir cavab verilməsə də, hal-hazırda Nazim adlı şəxsin inşasını həyata keçirtdirdiyi işlərdən əməlli-başlıca xəbər var. Yəni, bu şəxs heç bir normativ hüquqi tələbə, verilmiş tapşırığa və s. məhəl qoymadan, məhz qanunsuz tikinti işlərini davam etdirməkdədir. Bu da o deməkdir ki, obyekt sahibi “Ağa nəzərəm, belə gəzərəm” prinsipini əsas tutub, bir kimsəni “priznavat etmir”, mövcud qanunvericiliyin tələblərini saya salmır.
Bu yöndə araşdırmamız davam edəcək! Mövzuya qayıdacağıq.
(GundemXeber.Az)



Bütöv.az

Marketdə çay içən reklam firmasının xanım nümayəndəsinin fəqərə sütunu qırıldı…

Baş verən hadisənin kamera görüntüləri niyə gizlədilir ?

Xeyli müddətdir ki, “Gündəlik-Bakı” olaraq “Veysəloğlu” Şirkətlər Qrupunun fəaliyyəti barədə yazırıq və şirkətin rəhbəri Veysəlinoğlu Aydın Talıbova xəbərdarlıq edirik ki, bizim səninlə şəxsi müstəvidə zərrə qədər problemimiz yoxdur.
Adam, sən vergidən yayınma, vaxtı keçmiş məhsulların satışı, qara mühasibatlıq, işçilərin istismarı, digər neqativ hallara son qoy, biz sənin şirkətinlə bağlı yazlarımızı bitirək.
Bu adam yazılanlardan nəticə çıxartmaq əvəzinə, bizə hədə-qorxu gəlməyə, təhdid etməyə başlayır, bizi məhkəmə ilə hədələyir, hətta dostları vasitəsilə bizə ənam da göndərmək istəyir.
Veysəlinoğlu, axı biz sənə xəbərdarlıq etmişdik.
Atalar demişkən, “Su sənəyi suda sınar”, yaxud “ Quş dimdiyindən tələyə düşər”…
Həə, indi cəmiyyət sənin kim olduğunu görəcək, dimdiyin ilişdi…
Bəli, deməli, “Veysəloğlu” Şirkətlər Qrupuna aid olan və Tbilisi prospektində yerləşən Qızıl Araz marketində baş verənlər bir daha yazdıqlarımızı təsdiq etdi.
Belə ki, Araz marketdə reklam firmasının nümayəndəsi olan xanım marketdə əyləşib çay içdiyi zaman tavan uçaraq onun üzərinə tökülüb.
Nəticədə firma nümayəndəsinin üzü kəsilib, üz-gözü dəhşətli vəziyyətə düşüb, hətta zərbənin ağırlığından xanımın fəqərə sütunu sınıb…
Hadisə yerinə Təcili yardım gələndə Araz marketin nümayəndələri onların yardım göstərməsinə icazə verməyiblər ki, öz həkimlərimiz gələcək…
Hətta xanımın vəziyyətini görən Təcili yardımın həkimləri əsəb keçiriblər. Sonda xanım xəstəxanaya götürülüb.
Gündəlik-Bakıya daxil olan məlumatdan o da bəlli olur ki, hazırda Araz marketin müdiriyyətindən baş verənlərlə bağlı kamera görüntüləri tələb olunsa da, müdiryyət deyir ki, tavan uçanda kamera sınıb, heç bir görüntü yoxdur.
Hətta marketin mühafizəçilərinin də ağızlarını yumublar ki, deyin kamera qırılıb.
Hazırda zərərçəkən xanım xəstəxana şəraitində müalicə olunur. İndiyədək Araz marketin bir nümayəndəsi onunla maraqlanmayıb.
Zərərçəkən xanım Araz marketin müdiriyyətindən baş verən hadisənin kamera görüntülərini tələb edir.
İndi növbə sənindir, cənab Aydın Talıbov.
Sənin “krışan” niyə uçdu ?

Bütöv.az

Yeni il yeni sınaqlarla, yeni böhran anonslarıyla gəldi.

Adət və tətbiq etdiyimiz dəyərlər keyfiyyət etibarilə dəyişib. Məsələn, ənənəvi enerjini alternativ enerji əvəz edir. Proses ləng getsə də. Elə öyrəşdiyimiz ənənəvi silahların da mahiyyəti dəyişir. Belə demək olarsa, yeni kütləvi qırğın silahları istismara verilir. Bu, nüvə bombası deyil, atom bombası deyil. Məsələn, mavi qazdır.

Bu gün Avropa bu silahın təhdidi və tətiyi altında əziyyət çəkir. Azərbaycan energetika sferasında inhisarçılığın əleyhinədir və alternativ olaraq şaxələndirmə təklif edir. Bu yolda da irələliləyir.

Yaxud başqa bir kütləvi qırğın silahı: İmkanlı dövlətlərin kasıb dövlətlərə qarşı tətbiq etdiyi vaksin millətçiliyidir. Azərbaycanın Prezidenti İlham Əliyev iki ildir ki, BMT-nin tribunasından bu mənəviyyatsızlığı ifşa edir, belə yanaşmaların bəd aqibət vəd etdiyi barədə xəbərdarlıq edir.

İndi isə başqa bir qlobal təhdidlə üz-üzəyik. Yer kürəsi-Ümumdünya Səhiyyə Təşkilatının ötən ilin dekabr ayında verdiyi “2022-nin pandemiyanın son ili olacağına əminik!” bəyanatına yenicə sevinməyə, buzlu şüşənin acığına nəfəsi dərindən almağa hazırlaşırdı ki, bəşəriyyətə - sarı qılçıq rəngində xəbərdarlıq kartı göstərdilər: Elan edildi ki, bu dəfə imtahan çörəkdən, taxıldan, undan olacaq! Qaz kimi, taxıl da potensial qırğın silahına çevriləcək.

Artıq bilirik ki, Amerika Birləşmuiş Ştatları başda olmaqla, Qərbin özünəməxsus sanksiya metodu var: Rusiya və Çin, bu dövlətlərin tərəfdaşları belə sanksiyaların əsas hədəfləridir. Amma tutalım, Rusiya və Çinin də özünəməxsus müqavimət tədbirləri, kontrsanksiyaları var. Hətta belə bir xof da var ki, Çin Xalq Respublikası dünyanın bütün ərzaq ehtiyatlarının böyük hissəsini satın alıb. Düzdür, məlumat Çinin əsas rəqibi olan Birləşmiş Ştatların Kənd Təsərrüfatı Nazirliyinə istinadla yayılıb. Amma mənbənin nüfuzlu “Nikkei Asiya” nəşrinin olması xəbəri dezinformasiyalıqdan çıxarır. “Nikkei Asiya” yazır ki, Çinin anbarlarında dünyanın təkcə elə buğda ehtiyatlarının 50 faizi saxlanır. Deməli, mavi qızıl-qaz ehtiyatı ilə silahlanmaq kimi, vaksin ehtiyatıyla silahlanmaq kimi, taxıl, buğda, un ehtiyatlarını da ələ keçirib silah-sursat tədarükü görmək olarmış. Onu da nəzərə alaq ki, Amerika Birləşmiş Ştatları da qara günə tədarük görməkdə və öz vətəndaşının boğazını müstəqil saxlamaqda israrlıdır. Rusiya da, Qazaxıstan da, Kanada da…

Ümumiyyətlə, hər bir dövlət öz ərzaq təhlükəsizliyinin qayğısına qalır. Kimsə bunu normal ehtiyac, kimsə normal ehtiyat, kimsə də uzaqmənzilli hədəf kimi görür.

Azərbaycan belə aqibətlə bağlı müxtəlif vaxtlarda müxtəlif addımlar atıb. Məsələn, 2001-ci ildə Prezident Heydər Əliyev “Azərbaycan Respublikasının ərzaq təhlükəsizliyi Proqramı”nın təsdiq edilməsi haqqında Sərəncam imzalamışdı.

Prezident İlham Əliyevinsə hələ 2012-ci ilin mart ayında BMT-nin Ərzaq və Kənd Təsərrüfatı Təşkilatının Avropa üzrə 28-ci regional konfransının Bakıda keçirilməsinə nail olması uzaqgörənlik nümunəsi idi.

Bütün bunlar ərazi bütövlüyümüzün bərpa olunmadığı dövrdə baş vermişdi. Dövlət torpaqlar işğaldan azad ediləndən sonrakı günlər üçün də müəyyən planlara malik idi. Və əslində bugün planetdə qeydə alınan ərzaq, xüsusilə taxıl böhranı yalnız ərzaq və yalnız taxılla bağlı deyil. Altqatda çoxlu səbəblər var: qlobal istiləşmə, onun kütləvi meşə yanğınları kimi fəsadları, eko-qəzalar nəticəsində sıradan çıxan flora və fauna... Yəni bu gün bəşəriyyətin üzərinə gələn taxıl böhranı o bəlalarla bağlıdır. İndi anlaşırmı niyə Prezident aqroparklarla bağlı nəhəng layihələrə diqqət yetirirdi.

Goranboy. 2018-ci ilin yayı, Azərbaycan Respublikasının Prezidenti İlham Əliyev: “Beləliklə, ölkə qarşısında duran əsas vəzifələrdən biri — ərzaq təhlükəsizliyi məsələsi öz həllini tapacaq və biz idxaldan asılılığımızı daha da azaldacağıq. Mənə məlumat verilib ki, məhsuldarlıq da çox yüksəkdir. Arpada hektardan məhsuldarlıq 50 sentnerdir, hesab edirəm ki, buğda da ən azı bu qədər olmalıdır. Yəni, burada ən müasir texnologiyalar tətbiq olunur, o cümlədən müasir suvarma texnologiyaları, pivot suvarma sistemləri quraşdırılır. Bu sistemlərin tətbiqi Azərbaycanda geniş vüsət alacaq. Bu məqsədlə artıq bu sistemlərin istehsalı ölkəmizdə təşkil edilibdir ki, xaricdən asılılıq azalsın və xaricə valyuta getməsin. Beləliklə, aqroparkların yaradılması və fəaliyyəti nəticəsində ərzaq təhlükəsizliyi məsələləri öz həllini tapacaq".

Və ya ölkənin su ehtiyatları ilə bağlı keçirilən müşavirə. Yəqin yadınızdadır. Sosial şəbəkələrin, bəzi məsuliyyətsiz internet TV-lərin provakativ müşayiəti ilə ölkədə az qala su qiyamı hazırlananda İlham Əliyev belə bir toplantı keçirmişdi. Əliyev ona verilən məlumatdan sonra narahatlığını gizlətməmiş, su probleminin yedək bəlalara yol açacağına diqqəti cəlb etmişdi.

2020-ci ilin iyul ayı idi...

Azərbaycan Respublikasının Prezidenti İlham Əliyev: “Amma təkcə suyun çatışmazlığı görün bizə nə qədər böyük ziyan vurur. Taxılçılıqda məhsuldarlıq daha yüksək olmalı idi, pambıqçılıqda da həmçinin. Bu il biz birinci dəfə təkrar əkinlə bağlı təcrübədən istifadə etdik. Mənə ilk verilən məlumat o idi ki, biz 100 min hektarda qarğıdalı əkək. Sonra suyun çatışmazlığı ilə əlaqədar bunun 50 min hektarını ixtisar etdik. Amma heç 50 min hektarda da əkə bilmədik. Misal üçün, biz 100 min hektarda bunu əkə bilsək, bu, bizə nə qədər xeyir verəcək, yem bazamız nə qədər genişlənəcək və idxaldan asılılıq azalacaq, valyuta xaricə getməyəcək. Ona görə bütün bu məsələlər çox ciddi təhlil edilməlidir və edilir. Eyni zamanda, veriləcək tapşırıqlar və qəbul ediləcək proqram hərtərəfli olmalıdır. Biz nə mümkündürsə, bu il etməliyik. Əsas işləri, əlbəttə ki, gələn ilin əkin mövsümünə hazırlıq məqsədilə etməliyik”.

Bu misalları niyə çəkirəm? Ona görə ki, dünyanın bu gün üzərinə gələn ərzaq, xüsusilə taxıl problemini qarşılamaqdan ötrü Azərbaycanda xeyli iş görülüb və bu gün respublika kifayət qədər etibarlı ərzaq təhlükəsizliyi yastığına malikdir. İşğaldan azad edilmiş ərazilərin də tərkibi əkinə, xüsusilə də ərzaq təyinatlı məhsullarıın əkininə yararlı torpaqlarla zəngindir. Böyük Savaş Azərbaycan torpaqlarını geri qaytardı. Böyük Qayıdış isə insanlarımızı torpağa qaytarır. Qlobal istiləşmənin ağır fəsadlarını maksimum təhlükəsiz həddə salaraq keçirmək və eyni zamanda işğaldan azad edilmiş ərazilərimizdə başlanan bərpa-quruculuq işlərini də davam etdirmək qalib ölkənin vətəndaşlarından, dövlətin informasiya-təbliğat maşınından hər bir ciddi prosesə xüsusi məsuliyyət və bacarıq tələb edir. Ötən ilin sonuna yaxın hiss edilirdi ki, taxıl, buğda, unun qiymətində dəyişiklik baş verəcək. Bu gün həm qlobal istiləşmənin fəsadları nəticəsində yaranan obyektiv, həm də bu reallıqdan rəqiblərini zəiflətmək məqsədilə istifadə etmək istəyən qüdrətli dövlətlərin sayəsində formalaşan subyektiv şərait ilk növbədə vətəndaşdan soyuqqanlı olmağı, əsassız panikaya düşməməyi tələb edir. Yadınızdasa, biz pandemiya yenicə vüsət alanda da intizamlı olmağın, dövlətə inanmağın faydalarından bəhs etmişdik. Taxılla vəziyyət təxminən eynidir. Panikaya düşməmək! Dövlətə inanmaq! Süni bahalaşdırmadan çəkinmək. Azərbaycanda un problemi yoxdur. Çörək problemi yoxdur. Taxıl problemi yoxdur. Taxılın və çörəyin qiymətini bazarın ixtiyarına buraxmaq dünyanın bütün ölkələrinin öz vətəndaşını və bazarını qorumaq, həm də bir nömrəli qida məhsulu vasitəsilə ərzaq təhlükəsizliyini, eləcə də milli təhlükəsizliyi qorumaq məqsədi kimi Azərbaycanın da hədəfidir. Azərbaycanda buna bənzər situasiyaları tariximizin son 30 ilində dəfələrlə görmüşük.

Yadınızdadırsa, benzin çox ucuz olanda onu kanistrlərə doldurub qonşu respublikalara daha baha qiymətə satmağa aparırdılar. Elə biz özümüz: İran İslam Respublikasında benzinin qiymətinin ucuz olması səbəbindən nə qədər riskə gedib gizli yolla o ölkəyə getmişik?! Ona görə də taxıl və taxıl məhsulları, un və un məmulatları, hətta düyü, şəkər və s. kimi qida nümunələrinin qiymətini qonşu respublikalardan ucuz etmək olmaz! Daxili bazarı qorumaq məqsədilə! Ümumiyyətlə, dövlət təhlükəsizliyi yalnız bir-iki qurumun işi deyil. Xüsusilə sosial şəbəkələrin yaratdığı asan əlçatanlığın hesabına məsuliyyətsizlik püskürən daşıyıcıların zərərli fəaliyyətini nəzərə alsaq…(axar.az)

Bütöv.az

Ekologiya və Təbii Sərvətlər Nazirliyində meşələrin məhv olunması üçün yeni təşkil olunan mütəşəkkil dəstənin qanunsuz əməlləri bitib tükənmək bilmir.

Bütöv.az-ın yazdığına görə, AzToday.az xəbər verir ki, nazirliyin rəhbər şəxslərin regional meşə təsərrüfatı mərkəzlərinə yerləşdirdiyi adamlar meşələrin qırılmasına birbaşa nəzarət edirlər. Bununla bağlı mediada çox saylı faktlar əksini tapıb.

Belə kadrlardan biri də Lənkəran Regional Meşə Təsərrüfatı Mərkəzində çalışan və ixtisas təhsili olmayan Sərraf Quliyev adlı şəxsdir. Məlumatlara görə, Sərraf Quliyevi nazir müavini Vüqar Kərimov himayə etdiyindən regional idarənin baş mühafizə mühəndisi vəzifəsi də ona tapşırılıb. Bu baxımdan Sərraf Quliyevin rəsmi işi Haftoni meşəbəyliyində meşəbəyi köməkçisi getsədə, regional idarədə əsas söz sahibidir.

Yeri gəlmişkən qeyd edək ki, yola saldığımız 2021-ci ilin iyun ayında “Beta” şirkətinə satılan 40 hektar meşə sahəsinə yaşanan qalmaqal zamanı nazir Muxtar Babayev tərəfindən regional mərkəzin direktoru və Sərraf Quliyev işdən qovulmuşdu. Amma Sərraf Quliyev güclü himayəçisinin sayəsində işində qaldı. Ona idarənin baş mühafizə mühəndisi vəzifəsinin həvalə olunması tapşırığı da Bakıdan verilib. İddialara görə, regional idarənin “qara kassası”sı da Sərraf Quliyevə tapşırılıb. Hətta işçilərə Vüqar Kərimovun adından hədə-qorxu gəldiyi də yayılan məlumatlar sırasındadır. Sərraf Quliyevin istəklərini yerinə yetirməyənlərin (gözətçi, meşəbəyi və s.) nəzarət etdiyi meşə sahələrində yoxlama təşkil edilir və aparılan yoxlamaların nəticələri(nəticələr ürəkaçan olmadıqda isə onlar şişirdilir – red.) hüquq-mühafizə orqanlarına göndərilir.

Uzun müddət Lənkəranda meşə təsərrüfatında çalışan Sərraf Quliyevin meşə işçiləri arasında maraqlı təxəllüsü də var – Ağcaqayın Sərraf. Bu təxəllüs ona ağcaqayın ağaclarına qənim kəsildiyinə görə verilib. Məlumatlara görə, hazırda Lənkəran meşələrində ağcaqayın ağaclarına nadir hallarda rast gəlmək olub, səbəb isə işbazlar tərəfindən kəsilib satılmasıdır. Bu səbəbdən hazırda Astara və Lerik meşələri işbazların daha çox hədəfinə çevrilib.

Yerli sakinlər ekologiya və təbii sərvətlər naziri Muxtar Babayevdən meşələrin qanunsuz məhv edilməsinin araşdırılmasını və günahkarların cəzalandırılmasını istəyirlər.

AzToday.az Astaranın Əsxənəkəran meşəbəyliyinin 2 və 3 saylı meşə dolayları və Lerikin Razvondaband meşəbəyliyinin 16 saylı meşə dolayında agacların material üçün məhv edilməsinin görüntülərin bir hissəsini təqdim edir:

"Həyat" fondunun rəhbəri, aparıcı Hacı Nuran Hüseynova vəzifə verilib.

Bütöv.az xəbər verir ki, O, Azərbaycan Alpaqut Federasiyasının İctimai məsələlər üzrə vitse-prezidenti seçilib. Bu barədə Hüseynov instaqram hesabında məlumat yayıb. Aparıcı qeyd edib ki, Federasiyasının İdarə Heyətinin qərarı ilə qərar qüvvəyə minib.

Balakəndə əkinə yararlı və kənd təsərrüfatı təyinatlı torpaqların məhv edilməsi ilə bağlı redaksiyamıza videogörüntülər təqdim edilib.

Videogörüntülərdə rayonun Hənifə kəndi ərazisinə məxsus əkin sahələrinin Kərpic zavodunun tullantıları ilə məhv edildiyi əks olunub.

Bütöv.az xəbər verir ki, Bizim.Media-ya bu barədə müraciət edən şikayətçilərin iddiasına görə sözügedən əkin sahələri Milli Məclisin deputatı Nəsib Məhəməliyevin qardaşı Yusif Məhəməliyev tərəfindən zəbt edilib.

Onlara məxsus Kərpic zavodu 2019-cu ildən istifadəyə veriləndən əkinə yararlı torpaqlar ekoloji terrora məruz qalaraq məhv edilir. Belə ki, kərpic istehsalı ücün həmin ərazidən torpaq götürülərək yerinə zavodun tullantıları doldurulur. Üstəlik ərazidə aparılan işlər dövlətə hec bir rüsüm ödənilmədən, qanunsuz olaraq həyata keçirilir.

Şikayətçi qeyd edib ki, sözügedən ərazi həm çirkləndirilir, həm də karyer kimi istifadə olunur:

“Zavod fiziki şəxs Yusif Məhəməliyevin adına rəsmiləşdirilib. O, isə milllət vəkili Nəsib Məhəməliyevin qardaşıdır. Əvvəlcə kərpic istehsalı üçün torpağı götürürlər, sonra isə kərpic tullantıları gətirirlər və torpaq götürdükləri yerdən çalaları doldururlar. Əslində yerin quruluşu da pozulur. Faciə isə odur ki, kərpic tulantıları torpaqda cürümür, əksinə əkin sahələrini yararsiz vəziyyətə gətirir.

Belə davam edərsə, yaxin 3 ildə Məhəməliyevlər Balakəndə əkinə yararli səhələri iflic edəcəklər. Bu isə cənab Prezidentin ekoloji mühitə olan diqqətinə və kaygısına tam zildir. Belə çıxır ki, iqtidaryönümlü deputatın qardaşı bu gün Azərbaycanda aparılan işlərə qarşı çıxır”.

Şikayətçi onu da əlavə edib ki, məsələ ilə bağlı Balakən Rayon İcra Hakimiyyətinə, Ekologiya və Təbii Sərvətlər Nazirliyinə, Fövqəladə Hallar Nazirliyinə, eləcə də Dövlət Əmlak Xidmətinə müraciətlər olunub. Amma adlarıçəkilən qurumlar məsələ ilə bağlı hərəkətə keçmir.

Yazıda adıkeçən qurumların da mövqeyini dərc etməyə hazırıq.

Mövzunu diqqətdə saxlayacağıq.