“Son günlər ərzində mənə çoxlu təbrik məktubları gəlir, təbriklər gəlir, həm xaricdən həmkarlarımdan, müxtəlif ölkələrin dövlət və hökumət başçılarından, xaricdə yaşayan azərbaycanlılardan, təbii ki, ölkə vətəndaşlarından. Mən bütün insanlara - mənə xoş sözlər ünvanlayan, təbrik edən insanlara öz təşəkkürümü bildirmək istəyirəm”.

AZƏRTAC xəbər verir ki, bu fikirləri Azərbaycan Prezidenti İlham Əliyev Şuşanın məşhur Cıdır düzündə çıxışında deyib.

“Xüsusilə Azərbaycan xalqına öz təşəkkürümü bildirmək istəyirəm, həm təbriklərə görə, həm də mənə göstərilən dəstəyə görə. Mən bu dəstəyi 2003-cü ildən - Prezident vəzifəsinə ilk dəfə seçiləndən bu günə qədər hiss edirəm. Bu dəstək mənə güc verir. Bu dəstək iradəmi möhkəmləndirir. Bu dəstək nəticəsində biz hamımız – bütün Azərbaycan xalqı böyük tarixi uğurlara imza atmışıq”, - İlham Əliyev vurğulayıb.

Bütöv.az

Rusiya Prezidenti Vladimir Putinin təşəbbüsü ilə dekabrın 28-də Sankt-Peterburq şəhərində Müstəqil Dövlətlər Birliyinə üzv ölkələrin dövlət başçılarının ənənəvi qeyri-formal görüşü keçiriləcək.

Bu barədə Kremlin rəsmi saytı məlumat yayıb.

Tədbirdə Azərbaycan Respublikasının Prezidenti İlham Əliyev, Ermənistan Respublikasının baş naziri Nikol Paşinyan, Belarus Respublikasının Prezidenti Aleksandr Lukaşenko, Qazaxıstan Respublikasının Prezidenti Qasım-Jomart Tokayev, Qazaxıstanın birinci Prezidenti Nursultan Nazarbayev, Qırğız Respublikasının Prezidenti Sadır Japarov, Tacikistan Respublikasının Prezidenti Emoməli Rəhmon, Türkmənistan Prezidenti Qurbanqulu Berdiməhəmmədov və Özbəkistan Respublikasının Prezidenti Şavkat Mirziyoyev iştirak edəcək.

Bütöv.az

İqtisadiyyat nazirinə yeni müavinlər təyin edilib.

Bütöv.az xəbər verir ki, bu barədə Prezident İlham Əliyev müvafiq sərəncamlar imzalayıb.
Sərəncama əsasən, Rövşən Çingiz oğlu Nəcəf nazirin birinci müavini, Sahib Əli oğlu Məmmədov müavin təyin edilib.
Qeyd edək ki, R. Nəcəf bu təyinata qədər iqtisadiyyat nazirinin müavini idi.

İşğaldan azad edilən ərazilərin “yaşıl enerji” zonasına çevrilməsi, sözügedən rayonların ən qısa vaxtda Azərbaycanın ümumi enerji sisteminə qoşulması ilə bağlı Prezidentin enerji strategiyasına uyğun olaraq 2021-ci ildə kompleks işlər həyata keçirilib.

Prezident İlham Əliyevin iştirakıyla azad edilmiş ərazilərdə istismara verilən enerji obyektləriylə bağlı “Azərenerji” tərəfindən videoçarx hazırlanıb.

Qeyd edək ki, bu günədək Qarabağ və Şərqi Zəngəzurda “Güləbird”, “Suqovuşan-1” və “Suqovuşan-2” kiçik su elektrik stansiyaları yenidən qurularaq Prezidentin iştirakı ilə istismara verilib. “Kəlbəcər-1” Kiçik Su Elektrik Stansiyasında isə yenidənqurma işləri tamamlanıb. Bu 4 elektrik stansiyasının ümumi gücü 20 meqavatdan artıqdır.

2021-ci ildə Qarabağ və Şərqi Zəngəzurda 110/35/10 kV-luq 9 rəqəmsal yarımstansiya tikilib. Mayın 12-də “Şuşa”, iyunun 14-də “Füzuli” və “Şükürbəyli”, avqustun 16-da “Kəlbəcər”, oktyabrın 4-də “Cəbrayıl”, oktyabrın 20-də “Zəngilan”, oktyabrın 25-də isə “Qubadlı” yarımstansiyalarının Prezidentin iştirakı ilə açılışı olub.

Ağdam rayonunda inşa edilən 110/35/10 kV-luq “Ağdam-1”, “Ağdam-2” yarımstansiyalarının, o cümlədən “Qarabağ” Regional Rəqmsal İdarəetmə Mərkəzinin tikintisi yekunlaşıb.

“Şükürbəyli” yarımstansiyasına Beyləqandan 51 km məsafədə 110 kV-luq yeni xətt çəkilib. Ən əsası Şükürbəylidən Şuşaya 75 km, eyni zamanda “Cəbrayıl” və “Qubadlı” yarımstansiyalarına giriş-çıxış olmaqla “Zəngilan” yarımstansiyasına qədər 110 km məsafədə ikidövrəli olmaqla 110 kV-luq ötürmə xətti çəkilib. Həmçinin “Qubadlı” yarımstansiyasından “Güləbird” SES-ə 19 km məsafədə 110 kV-luq xətt inşa edilib. Bundan əlavə “Daşkəsən” yarımstansiyasından Murov dağını keçməklə yeni tikilən “Kəlbəcər” yarımstansiyasına 70 km məsafədə ikidövrəli olmaqla 110 kV-luq ötürmə xətti gətirilib. Həmçinin “Xındırıstan” yarımstansiyasından minalanmış əraziləri keçməklə yeni tikilən “Ağdam-1” və “Ağdam-2” yarımstansiyalarına 35 km məsafədə ikidövrəli olmaqla 110 kV-luq ötürmə xətti çəkilib.

Qarabağ və Şərqi Zəngəzurda tikilən 9 yarımstansiyanın hamısı Azərbaycanın ümumi enerji sisteminə qoşulmaqla yanaşı, tam rəqəmsallaşdırılıb. Belə ki, dördüncü Sənaye inqilabına uyğun olaraq intellektual enerjisistem konsepsiyası həyata keçirilərək müasir, dayanıqlı, rəqəmsallaşdırılmış yarımstansiyalar modeli formalaşdırılıb. İstismara verilən rəqəmsal yarımstansiyalarda aktivlərin, proseslərin, resursların idarə edilməsi, açılıb qoşulma əməliyyatları, tədarük və paylanma zəncirlərinin təkmilləşdirilməsi, qüsurların vaxtında aradan qaldırılması, problemlərin tez həlli proqram təminatı vasitəsi ilə avtomatik həyata keçirilir.



Bütöv.az

Milli Məclisin iclasında deputat Elşad Mirbəşir Prezident İlham Əliyevi 60 illik yubileyi münasibətilə təbrik edib.

Bütöv.az xəbər verir ki, deputat İlham Əliyevin regional sülh və təhlükəsizliyin təmin olunması istiqamətindəki addımlarını sadalayıb.

O təklif edib ki, İlham Əliyev Nobel sülh mükafatına namizəd kimi irəli sürülməlidir.

“Biz bu prosedurları həll edib cənab Prezidentin namizədliyini Nobel sülh mükafatına təqdim etməliyik”, - deyə o əlavə edib.

Azərbaycan Prezidenti İlham Əliyev dünyanın siyasi arenasında böyük nüfuza sahib, dövlətinin maraqlarını böyük əzm və qətiyyətlə müdafiə edən, eyni zamanda qlobal problemlərin həlli istiqamətində mühüm təşəbbüslərlə çıxış edən lider kimi tanınır.

Prezident İlham Əliyevin rəhbərliyində qazanılmış bu uğurlar isə uzun illər ərzində yaradılmış parlaq daxili-xarici siyasi xəttin böyük məharətlə icrasına əsaslanır.

Dövlət başçısı hər il olduğu kimi 2021-ci ildə də müxtəlif müstəvilərdə ölkəmizin maraqlarını layiqincə təmsil edib, bütün aspektlər üzrə gərgin iş qrafikinə sahib olub.

Vətən savaşı ilə 30 illik işğala son qoyaraq tarixi ədaləti bərpa edən Azərbaycan dövlətinin lideri döyüş meydanında qazanılmış parlaq zəfəri siyasi arenada da davam etdirib.

Moskva görüşü

Cari ilin yanvarın 11-də Azərbaycan Prezidenti İlham Əliyev Rusiya Prezidenti Vladimir Putinin dəvəti ilə Moskvaya işgüzar səfər edib. Səfər çərçivəsində Azərbaycan lideri İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan arasında üçtərəfli görüş baş tutub.

İlham Əliyev rəhbərliyi ilə Moskvada Azərbaycan növbəti şərtlərini Ermənistan tərəfinə diktə edib və xüsusən 10 noyabr tarixli üçtərəfli bəyanatın nəqliyyat və kommunikasiyaların açılması ilə bağlı müddəalarının icrası baxımından olduqca mühüm məqamlar üzrə razılıqlar əldə olunub. Bu görüşdə əldə edilmiş razılaşmalar sonrakı proseslərdə Bakının əlini qüvvətləndirməklə bərabər eyni zamanda regionun inkişafı mexanizmlərinin Bakı tərəfindən təsvir olunan mənzərəsinə tamamilə uyğun olub.

Daxili siyasətdə prioritet

Azərbaycan dövlətinin daxili siyasət sahəsində əsas prioriteti də postmünaqişə dövrünün reallıqlarına əsaslanıb. Belə ki, 2021-ci ildə Azərbaycan dövlətinin qarşısında dayanan prioritetlərdən başlıcası işğaldan azad edilmiş ərazilərin yenidənqurma və bərpası işləri olub. Bu məqsədlə Azərbaycan dövləti bu il 1,3 milyard dollar vəsait ayırıb.

Azərbaycanla bağlı bütün məsələlərdə olduğu kimi dövlət başçısı işğaldan azad edilmiş ərazilərin bərpası prosesini də şəxsən nəzarətində saxlayır. Dövlət başçısının öndərliyində aparılan yenidənqurma və bərpa prosesi həmçinin Azərbaycanın beynəlxalq müstəvidə maraqlarına inteqrasiya olunur. Çünki Azərbaycan dövlətinin gördüyü işlərin miqyası həm də Ermənistanın təcavüzkar siyasətinin nəticələri ilə düz mütənasiblik təşkil edir. Başqa sözlə, dağıntıların miqyası nə qədər böyükdürsə, Azərbaycan dövlətinin quruculuq və yenidənqurma təşəbbüsləri də bir o qədər böyük miqyasda həyata keçirilir. Bununla Azərbaycan bütün dünyaya iki dövlətin regiondakı mövcudluğunun və rəhbər tutduqları siyasətin nəticələrini əyani şəkildə göstərmiş olur. Ermənistan təcavüzkar və talançı kimi ifşa olunduğu halda, Azərbaycan regionumuzda dinc həyatın, sülh şəraitində inkişafın və tərəqqinin bayraqdarına çevrilir.

Azərbaycan dövləti Prezident İlham Əliyevin başçılığı altında həmçinin Qarabağ həqiqətlərinin dünyaya çatdırılması istiqamətində də çoxşaxəli iş aparılır. Dövlət başçısının işğaldan azad edilmiş ərazilərə səfərləri, erməni vandalizminin nümayişi, beynəlxalq təşkilatların nümayəndələri və diplomatların reallıqları öz gözləri ilə görməsi üçün regiona çoxsaylı ziyarətlərinin təşkili və s. bütün bunlar beynəlxalq ictimaiyyətdə Qarabağla bağlı konstruktiv yanaşmanın formalaşması prosesinə təkan verib.

Şuşa ilə dünyaya verilən mesaj

İşğaldan azad edilmiş ərazilərin bütün nöqtələrini özündə ehtiva edən yenidənqurma və bərpa işlərindən bəhs edərkən ilk növbədə Şuşa şəhəri ilə bağlı məqamları qeyd etmək lazımdır. İlham Əliyevin Azərbaycan mədəniyyətinin paytaxtı statusu verdiyi şəhərə də dövlətimiz tərəfindən məhz mədəniyyətimizə verilən sonsuz dəyər qədər ehtiram göstərilir.

Elə bu prosesin özündə də İlham Əliyevin siyasi xəttinin əsas çalarlarını sezmək mümkündür. Yuxarıda göstərilən nümunədə olduğu kimi Azərbaycan dövləti Şuşanı bərpa edir, ilk növbədə şəhərin milli və tarixi kimliyinin özünə qaytarılması üçün işlərə start verilib. Bu isə yenidən bütün dünya üçün mesaj xarakteri daşıyan bir yanaşmadan xəbər verir. Erməni işğalında öz şanlı tarixinə yaraşmayan bir yanaşmaya məruz qalan Şuşa Azərbaycanın tərkibində yenidən Qafqazın incisinə çevrilir.

Üstəlik Azərbaycan lideri tərəfindən bu misilsiz diqqət və qayğı təkcə işğaldan azad edilmiş ərazilərə şamil olunmayıb. Mütəmadi olaraq Azərbaycanın bütün regionlarına səfərlər edən İlham Əliyev xalqın bütün problemlərini diqqətdə saxlayır, sözügedən problemlərin həlli ilə bağlı müvafiq göstərişlər verir.

Azərbaycan-Türkiyə

İlham Əliyevin öndərliyində Azərbaycan dövlətinin xarici siyasətində qardaş Türkiyə ilə münasibətlər mühüm yer tutur. Bu baxımdan 2021-ci ili dövlətlərarası münasibətlərin inkişafı baxımından xüsusi qeyd etmək gərəklidir. Belə ki, il ərzində Azərbaycan və Türkiyə liderləri çoxsaylı görüşlər keçiriblər. Bu görüşlərdə bütün dünyaya əyani şəkildə Türkiyə-Azərbaycan əməkdaşlığın regionumuz üçün önəmi göstərilib. Belə ki, işğaldan azad edilmiş ərazilərin bərpası ilə bağlı istənilən mühüm təşəbbüs və nailiyyətdə Türkiyə Azərbaycanın yanında yer alıb.

Türkiyə Prezidenti Rəcəb Tayyib Ərdoğan isə Prezident İlham Əliyev tərəfindən Qarabağda qarşılanan ilk dünya lideri kimi tarixə düşüb. İki lider həmçinin Şuşa şəhərində dövlətlərimizin tarixində böyük önəmə sahib olan bir sənədi imzalayıblar.

2021-ci il iyunun 15-də Şuşada Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğanın Şuşa şəhərində imzalandığı bəyannamə ilə dövlətlərarası münasibətlərimiz özünün ən yüksək səviyyəsində təsdiq olunub. Həmin tarixdən başlayaraq Bakı və Ankara hərbi-siyasi, iqtisadi sahələrdə müttəfiqliklərini rəsmi şəkildə elan ediblər. Bəyannamədə diqqəti çəkən ən vacib məqamlardan biri isə hərbi sahədə əməkdaşlıq və müttəfiqliklə bağlıdır. Burada qeyd edilir ki, iki dövlətin ərazi bütövlüyünə, suverenliyinə üçüncü dövlət və ya dövlətlər tərəfindən təhdid və ya təcavüz edildiyi təqdirdə, bir-birini qoruyacaqlar. Şuşa bəyannaməsi ilə Azərbaycan-Türkiyə münasibətləri tarixində keyfiyyətcə yeni mərhələnin başlanğıcı qoyulub.

Azərbaycan və Türkiyə liderləri həmçinin regionumuzun gələcəyi üçün də səylərini əsirgəməyib. Belə ki, 3+3 platforması məhz regionda dinc inkişafa yönəlmiş təşəbbüs kimi məhz dövlət başçıları İlham Əliyev və Rəcəb Tayyib Ərdoğan tərəfindən irəli sürülüb. Qeyd etmək lazımdır ki, hazırda liderlərin bu təşəbbüsünün işlək mexanizmə çevrilməsi üçün də bir sıra addımların atılmasına başlanılıb.

Zəngəzur dəhlizi – Türk dünyası birləşir

Azərbaycan liderinin siyasi məharəti və səyləri eyni zamanda həm regionumuz, həm də bütün Türk dünyası üçün böyük əhəmiyyətə malik Zəngəzur dəhlizinin yaradılmasını mümkün edib. Hələ 2021-ci ilin martın 31-də Prezident İlham Əliyev Türkdilli Dövlətlərin Əməkdaşlıq Şurasının videokonfrans formatında qeyri-formal Zirvə görüşündə çıxışı zamanı açılımlarda əsas əngəl yaradan “kor düyün”ün – Zəngəzur dəhlizinin işə düşməsi istiqamətində Azərbaycanın təşəbbüslərindən söz açıb.

“Biz artıq Zəngəzur dəhlizi üzərində çox fəal çalışırıq. Naxçıvanda keçirilmiş Zirvə görüşündə mən demişdim ki, vaxtilə Zəngəzuru Azərbaycandan alıb Ermənistana birləşdirmək Türk dünyasının coğrafi parçalanması idi. Çünki əgər xəritəyə baxsaq, görərik ki, sanki bizim bədənimizə xəncər saplanmışdır, türk dünyası parçalanıb” - deyən İlham Əliyev Zəngəzur faktorunun türk dünyasının birləşdiricisi rolunu oynayacağını da əlavə edib.

Azərbaycan lideri öz siyasi manevr və həmlələri ilə eyni zamanda Türk dünyasını yenidən birləşdirən Zəngəzur dəhlizinin əsasını qoyub. Bu dəhlizin yaradılması isə sadəcə təkcə iqtisadi deyil, eyni zamanda böyük siyasi əhəmiyyət daşıyan hadisədir. Bununla Azərbaycan Prezidenti İlham Əliyev türkdilli dövlətlərin arasında coğrafi bağlılığın bərpa edilməsinə nail olub, eyni zamanda Türk dünyasının birlik, bərabərlik arzusunun reallığa çevrilməsinə misilsiz töhfə verən Lider kimi ön plana çıxıb.

Azərbaycan liderinin Türk dünyası qarşısında xidmətləri təkcə bundan ibarət deyil. Azərbaycan İlham Əliyevin rəhbərliyi ilə Türk Şurasına 2019-2021-ci illərdə uğurla sədrlik edib. Prezident İlham Əliyevin öndərliyində Azərbaycan təşkilatın fəaliyyətinin gücləndirilməsi, türkdilli ölkələr və xalqlar arasında dostluq, qardaşlıq münasibətlərinin, qarşılıqlı əməkdaşlığın möhkəmləndirilməsi istiqamətində öz üzərinə götürdüyü vəzifələri layiqincə yerinə yetirib.

Azərbaycanın rəhbərliyi dövründə qurumun digər mötəbər beynəlxalq təşkilatlarla, o cümlədən BMT, İslam Əməkdaşlıq Təşkilatı, ATƏT, İqtisadi Əməkdaşlıq Təşkilatı ilə səmərəli əməkdaşlıq münasibətləri davam etdirilib, Ümumdünya Səhiyyə Təşkilatı ilə faydalı əməkdaşlıq çərçivəsi qurulub.

Azərbaycan Prezidentinin bu xidmətləri təşkilat tərəfindən də yüksək qiymətləndirilib. Belə ki, Türkdilli ölkələrin Dövlət Başçıları Şurasının Qərarı ilə Azərbaycan Respublikasının Prezidenti İlham Əliyev “Türk Dünyasının Ali Ordeni” ilə təltif edilib. Ali Orden dövlət başçısına noyabrın 12-də İstanbulda keçirilən Türkdilli Dövlətlərin Əməkdaşlıq Şurasının VIII Zirvə Görüşündə Türkiyə Respublikasının Prezidenti Rəcəb Tayyib Ərdoğan tərəfindən təqdim edilib.

Postmünaqişə dövrü üçün təşəbbüslər

Prezidenti İlham Əliyevin təşəbbüsü ilə regionumuzda postmünaqişə dövründə inkişaf və əməkdaşlıq yolları da beynəlxalq səviyyədə müzakirə olunub. Bununla bağlı ADA Universitetində 10-13 aprel tarixində “Cənubi Qafqaza yeni baxış: münaqişədən sonra inkişaf və əməkdaşlıq” adlı konfrans keçirilib. Həmçinin mayın 20-də Azərbaycan Respublikasının Prezidenti İlham Əliyevin iştirakı ilə Nizami Gəncəvi Beynəlxalq Mərkəzinin “Cənubi Qafqaz: Regional inkişaf və əməkdaşlıq perspektivləri” adlı videoformatda müzakirələri keçirilib.

Azərbaycan qlobal güc mərkəzlərinin diqqətində

İlham Əliyevin rəhbərliyi ilə Cənubi Qafqazda yaranan yeni geosiyasi konfiqurasiya qlobal güc mərkəzlərinin diqqətini çəkib. Qərb və Rusiyanın rəqibi, alternativ qlobal güc Çin də prosesdən kənarda qalmaq istəməyib. İyunun 2-də Azərbaycan Respublikasının Prezidenti İlham Əliyev ilə Çin Xalq Respublikasının Sədri Si Cinpin arasında telefon danışığı baş tutub.

Liderlər müzakirələr zamanı Azərbaycan və Çin siyasi, iqtisadi və nəqliyyat-logistika sahələrində əməkdaşlığın uğurla davam etdirilməsini bildiriblər. Çin liderinin Azərbaycanın “Bir kəmər, bir yol” təşəbbüsünün reallaşdırılması istiqamətində vacib tərəfdaş olduğunu xatırlatması isə postmünaqişə dövrü prosesləri fonunda özündə əhəmiyyətli mesajları ehtiva edib.

Qoşulmama Hərəkatında qazanılan uğur

“Qısa müddət ərzində Azərbaycan Qoşulmama Hərəkatında olduqca böyük nüfuz və etimad qazandı”.

Dövlət başçısı İlham Əliyevin bu sözlərindən çıxış edərək Azərbaycan dövləti üçün Qoşulmama Hərəkatı çərçivəsində əməkdaşlıq məsələlərinin olduqca mühüm əhəmiyyətə sahib olduğunu deyə bilərik.

Təşkilata sədrliyi dövründə Azərbaycan dövləti dünyanı bürüyən koronavirus pandemiyasının səbəb olduğu yeni reallıqlar və yaranan çətinliklərlə mübarizə üçün müvafiq yolların tapılması baxımından mühüm təşəbbüslərlə çıxış edib.

Ümumən 2019-cu ilin oktyabrından Qoşulmama Hərəkatına sədrlik Azərbaycana keçdikdən sonra təşkilatın fəaliyyətində canlanma müşahidə edilir desək, yanılmarıq. Təşkilat eyni zamanda Azərbaycanın qlobal miqyasda bir çox problemlərin həll yollarının tapılması üçün çağırışlarının tribunasına da çevrilib.

Avropa-Azərbaycan arasında səmimi atmosfer

2021-ci il həmçinin Azərbaycanın Avropa İttifaqı münasibətlərindəki müsbət əhval-ruhiyyə baxımından yaddaqalan oldu. Belə ki, 17-18 iyul tarixlərində Azərbaycanda səfərdə olan Avropa İttifaqı Şurasının Prezidenti Şarl Mişel Bakıda yüksək səviyyədə qarşılandı.

Prezident İlham Əliyev Şarl Mişellə müzakirələri birgə işçi nahar süfrəsi arxasında apardı, bunu müzakirələrin səmimi atmosferdə keçməsi və tərəflərin öz maraqlarını səmimi şəkildə ifadə etməsi kimi xarakterizə etmək olar. Sözügedən səmimi atmosferin nəticələri isə ilin sonunda Brüsseldə keçirilən görüşlər zamanı daha aydın şəkildə ortaya çıxdı.

Rusiya və Avropa Azərbaycanın mövqeyini qəbul edir

İlin sonuna doğru aktivləşən Ermənistanla danışıqlar prosesində İlham Əliyev öz siyasi məharətini növbəti dəfə ortaya qoydu. Belə ki, əvvəlcə noyabrın 26-da Soçidə Azərbaycan Respublikasının Prezidenti İlham Əliyev, Rusiya Federasiyasının Prezidenti Vladimir Putin və Ermənistan Respublikasının baş naziri Nikol Paşinyan arasında üçtərəfli görüş keçirildi.

Görüş zamanı Azərbaycan və Ermənistan arasında sərhədlərin demarkasiya və delimitasiyası, regionda vəziyyətin sabitləşməsi və təhlükəsizliyin təmin edilməsi, bütün iqtisadi və nəqliyyat əlaqələrinin bərpası kimi məsələlər müzakirə edildi. Daha əvvəl bir çox platformalarda münaqişənin başa çatdığını və Qarabağda heç bir statusdan söhbət belə gedə bilməyəcəyini vurğulayan dövlət başçısı Soçidəki görüş zamanı “münaqişə” və “status” kimi ifadələrə yer verilməməsinə nail oldu. Bu isə öz növbəsində yeni reallıqların və Bakının mövqeyinin qəbul edildiyini təsdiqləyən fakta çevrildi. Soçidə həmçinin Zəngəzur dəhlizi ilə bağlı da Moskvanın Azərbaycanla ortaq maraqları bölüşdüyü bəlli oldu. Belə ki, mətbuat konfransında çıxışı zamanı Rusiya lideri V.Putin dəhliz ifadəsini dəfələrlə işlətməklə bir növ dəhliz layihəsinin dəstəkləndiyini göstərdi.

Azərbaycan liderinin Ermənistan baş naziri ilə növbəti görüşünə isə Avropa ev sahibliyi etdi. Dekabrın 14-də Avropa İttifaqı Şurasının Prezidenti Şarl Mişelin təşəbbüsü ilə Azərbaycan Prezidenti İlham Əliyev və Ermənistanın baş naziri Nikol Paşinyan arasında Brüsseldə görüş keçirildi. Sözügedən görüş artıq Azərbaycanın mövqeyinə Avropada da ciddi dəstək olduğunu ortaya qoydu. Azərbaycan Prezidenti bir daha Avropadan bütün dünyaya elan etdi ki, milli məsələdə, Azərbaycanın təhlükəsizliyi mövzusunda heç bir güzəştdən söhbət gedə bilməz.

Bundan başqa Prezident İlham Əliyevin NATO Baş katibi Yens Stoltenberqlə görüşü də alyansla Bakı arasındakı münasibətlərin yüksələn xətlə inkişafını ortaya qoydu. Brüsseldə həmçinin Fransa Prezidenti Emmanuel Makronun vasitəçiliyi ilə də görüş baş tutdu. Bu dəfə də İlham Əliyev öz xalqının maraqlarının yorulmadan müdafiə edən lider kimi ön planda dayandı. Brüsseldə keçirilən görüşlərdən sonra Ermənistan liderinin verdiyi açıqlamalar isə Zəngəzur dəhlizinin işə düşməsi prosesini bir qədər də yaxınlaşdırdı deyə bilərik.

Ümumən İlham Əliyevin liderliyində Azərbaycan dövləti 2021-ci ildə böyük uğurlara sahib oldu. Dövlətimiz həm Türk dünyasında, həm Qərb, həm də Şərqdə öz nüfuzunu artırdı. Azərbaycan lideri Türk dünyası birləşdirən lider olmaqla bərabər, eyni zamanda Qərbin və Şərqin yüksək etimadına sahib çıxan siyasətçi kimi adından bəhs etdirdi.

Bütöv.az

Azərbaycan Avtomobil Yolları Dövlət Agentliyi İdarə Heyətinin sədri Saleh Məmmədovun barəsində dövrü mətbuatda və sosial şəbəkələrdə kifayət qədər yazılıb. Onun müavinləri Əvəz Qocayev və Hüsnü Quliyevin bu sistemdə çalışmağa başladıqdan sonra əldə etdikləri var dövlət barədə də dövri mətbuatda az yazılmayıb.

Bütöv.az bildirir ki, bu barədə Aktualinfo.org saytı məlumat yayıb.

Daha sonra sayt yazır:
Agentliyin tabeliyində olub, yerlərdə fəaliyyət göstərən MMC-lərin direktorları, onların yollara ayrılan pullar hesablaranı topladıqları var-dövlət barədə də elektron kütləvi informasiya vasitələrində kifayət qədər məlumatlar var. Şirvan şəhər sakini Yaşar Əliyevin redaksiyamızın elektron poçtuna ünvanladığı şikayət də Saleh Məmmədovun yerlərdəki kadrlarının özbaşınalığından bəhs edir. Aktualinfo.org vətəndaşın heç bir qurumun baxmadığı şikayətini olduğu kimi təqdim edir.

Hörmətli redaksiya şikayətim 2016-cı ildən mühəndis işlədiyim AAYDA-nın 33 nömrəli Yol İstısmarı MMC-də baş verən özbaşınalıq, ayrı seçkilik, dövlət vəsaitinin və əmlakının təyinatı üzrə xərclənməməsi, göyə sovrulması, diktatura rejimi, idarənin xüsusi mülkiyyət kimi idarə edilməsi barədədir. Bu qanunsuzluqlar barədə AAYDA-nın qaynar xəttinə məlimat verdiyimə görə, məndə hər hansı bir nöqsan tapa bilmədiyi üçün, guya işə gəlməməyimi irad tutaraq, qeyri qanuni olaraq, davamiyyət jurnalına imza etsəm də, imzalarımın üstündən xətt çəkilərək, eyni gündə, ayrı-ayrı tarixlərə qeydiyyata alınmaqla, xəbərdarlıq olmadan töhmət və şiddətli töhmət verilmiş və işdən çıxarılmaqla hədələnmişdm. Mən də bu qanunsuzluqlar barədə Avtombill Nəqliyyatı və Yol təsərrüfatı İşçilərinin Həmkarlar İttifaqı Komitəsinə, Dövlət Əmək Müfəttişliyi Xidmətinə, Azərbaycanın İnsan Hüquqları üzrə Müvəkkilinə məlumat verəndən sonra 02.dekabr 2021-ci il tarixdə ştatımın ixtisara düşməsi barədə məktubla tanış edildim. Halbuki idarədə məndən başqa birini yaşı 66, digərinin yaşı 78-i keçmiş 2 təqaudçü mühəndis var. Bu idarə demək olar ki, təqaüdçülər parkıdır. Nəmkarlar İttifaqları Haqqında Azərbaycan Respublikası Qanununun 11, 12,13,15 və 18 maddələri kobud surətdə pozulsa da, işçinin yox, nədənsə işə götürənin hüquqları qorundu. Eyni zamanda Dövlət Əmək Müfəttişliyi Haqqında Əsasnamənin 3.1.1, 3.1.2, 3.1.9, 3.1.10 və 4.1.2 maddələriii pozulsa da, faktlar, sənədlər təqdim etsəm də nədənsə yenə də işə götürənin maraqları qorundu. Məlumat üçün qeyd edirəm ki, bu idarə vərəsəliklə qaynatadan yeznəyə keçib. Bu idarə dövlət içində dövlət kimi fəaliyyət göstərir. Özünün daxili və xarici siyasəti var, 5-ci kolona xidmət edir.. Cənab Prezidentə, 1-ci Vitse Prezidentə, Ombudsmana ünvanladıgım şıkayətlər Agentliyin Huquq Şöbəsində qohumları tərəfindən gizlədilir, heç bir araşdırma, heç bir cavab verilmir. Sədrin qəbulunda olmaq istəyimi köməkçisi Çingiz adlı şəxs müxtəlif bəhanələrlə qeyd etdiyim şikayətlərin üzə çıxmasını mümkünsüz edir. Onu da qeyd edim ki, yeni ilin gəlməsi ilə əlaqədar, Agentliyin köməkçisi və şöbə müdirlərinə pay göndərmək məqsədilə Şirvanda qoyun qətliamına start veriləcək.

Aktualinfo.org xatırladır ki, 33 nömrəli Yol İstısmarı MMC vaxtı ilə Əli Bayramlı şəhər 34 saylı Yol-İstismar İdarəsi kimi fəaliyyət göstərib. Hələ Azərbaycan SSR dönəmindən idarəyə Şıxverdi Məmmədov rəhbərlik edib. Sözügedən şəxsin adının heç yerdə hallanmamasına baxmayaraq bu gün Azərbaycanın avtomobil yolları sisteminə gəlib, getmiş ən imkanlı şəxslərdən biridir. Şıxverdi Məmmədov son 30 ildə Azərbaycan avtomobil yolları sisteminə rəhbərlik etmiş bir çox insanlarla çalışa bilib. Yəni hamı ilə dil tapıb və artıq neçə ildir ki, Saleh Məmmədova sığınmağı bacarıb. Bu gün yaşı 80-ni haqlasa da idarəyə qeyri rəsmi olaraq rəhbərlik edir. İdarənin hazırki rəsmi rəisi isə Şıxverdi Məmmədovun kürəkəni Mirtağı Abbasovdur.

Fövqəladə Hallar Nazirliyinin Xüsusi Riskli Xilasetmə Xidmətnin əməkdaşı prezident İlham Əliyevə müraciət edib.

Bütöv.az yazır ki, Criminal.az-a göndərilən müraciətdə bildirilir ki, əvvəlki müraciətlərindən sonra kirayə və ezamiyyət pullarını vermək əvəzinə onlara hədə-qorxu gəlirlər:

"Hərbi hissəyə çagirib xidmət rəisi, general mayor Şahmar Paşayev hədələyici tonda danışır. Deyirlər ki, mətbuata niyə deyirsiz? Mətbaut sizə pul verəndir? Bizə halal pulumuz vermirlər. Pulun ilin sonunda veriləcəyini vəd edirlər. Bizlər çətin vəziyyətdə kirayədə yaşayırıq. Mağazalarq çoxlu borcumuz var. Boğularaq övladlarımızın üzünə baxa bilmirik. Biz dərdimizi kimə deyək? Rəisimiz Şahmar Paşayevi aylarla görmürük. Çox zaman özünün şəxsi biznesi ilə məşğul olur, göydələnlər tikdirir. Olduqca çıxılmaz vəziyyətdəyik. Şahmar Paşayevin yanında alay komandiri polkovnik Xəlilli Məmməd, qərargah rəisi mayor Seyidəhməd Nurayev də bizi mətbuata şikayət ünvanladığımız üçün hədələyirlər. Hərbi hissədə bizləri toplayıb məlumati paylaşanı müəyyən edəcəkləri və işdən çıxaracaqlar ilə hədələyirlər.

"Biz onu tapıb sındıracağıq, xidmətdən qovacağıq” deyirlər. Polkovnik Mustafa Rəcəbov, kadrlar şöbəsinin rəisi Elxan Həmidov, polkovnik leytenant Çingiz Hüseynov xidmət rəisi kimi bizləri hədələyirlər. Bizə ildə iki dəfə olmaqla geyim verilməlidir. Amma xidmətin təhcizat şöbəsinin rəisi mayor Elyazov Rəşad formaları vermir.
Xidmət rəisinin göstərişi ilə formalar bizə satılır. Etiraz bildirəndə Elyazov bildirir ki, 500 manat maaş alırsız, dövlət sizə maaş verir, gedin formanı alın, mənim üstümə gəlməyin! Deyir göstərişi Şahmar Paşayev verib. Xidmət rəisinə söz deyəni də işdən çıxarır, təqib edirlər. Elyazov Rəşad xidmət rəisinin yaxın adamıdır. Zabit və gizirlərin kirayə qaldığı evlərə zorla soxulmaqdan belə çəkinmir. Bu adamlara dur deyən yoxdu.

Şəxsi heyətə qarşı kobudluq edənlərdən biri də mayor Axudlu Intiqamdır. Şəxsi heyətlə söyüşlə danışır, təhqir edir. Etiraz edəni də aşağılayır. Zabit və gizirləri istirahət günləri belə idarəyə çağırıb zabitə, gizirə yaraşmayan işləri gördürürlər. Bir sözlə xidmət çox bərbad gündədir. Cənab prezident, ümidimuz sizə qalib. Bizim kirayə, ezamiyyət pullarımızı vermirlər. Vəziyyət çox pisdir, dolana bilmirik. Halal haqqımızı ala bilmirik”.

Şikayətçilər problemlərinin həlli üçün fövqalədə hallar naziri Kəmaləddin Heydərovu məhkəməyə verəcəklər.

Bu gün Azərbaycan Respublikası Prezidenti İlham Əliyevin doğum günüdür.

Dövlət başçısının 60 yaşı tamam olur.

İlham Heydər oğlu Əliyev 1961-ci il dekabrın 24-də Bakı şəhərində anadan olub.

1967-1977-ci illərdə Bakı şəhərində 6 saylı orta məktəbdə təhsil alıb.

1977-1982-ci illərdə Moskva Dövlət Beynəlxalq Münasibətlər İnstitutunda (MDBMİ) təhsil alıb. MDBMİ-ni bitirdikdən sonra, 1982-ci ildə həmin institutun aspiranturasına daxil olub.

1985-ci ildə dissertasiya müdafiə edərək tarix elmləri namizədi elmi dərəcəsini alıb və 1985-1990-cı illərdə Moskva Dövlət Beynəlxalq Münasibətlər İnstitutunun müəllimi olub.

1991-1994-cü illər ərzində özəl biznes sahəsində çalışıb və bir sıra istehsal-kommersiya müəssisələrinə rəhbərlik edib.

1994-cü ildən 2003-cü ilin avqust ayınadək Azərbaycan Respublikası Dövlət Neft Şirkətinin əvvəlcə vitse-prezidenti, sonra isə birinci vitse-prezidenti olub. Ümummilli lider Heydər Əliyevin neft strategiyasının həyata keçirilməsində fəal iştirak edib.

1995-ci və 2000-ci illərdə Azərbaycan Respublikasının Milli Məclisinə üzv seçilib.

1997-ci ildən Azərbaycan Milli Olimpiya Komitəsinin Prezidentidir.

1999-cu ildə Yeni Azərbaycan Partiyası sədrinin müavini, 2001-ci ildə sədrin birinci müavini, 2005-ci ildə isə partiyanın sədri seçilib.

2001-2003-cü illərdə Avropa Şurası Parlament Assambleyasında (AŞPA) Azərbaycan Respublikası Milli Məclisinin nümayəndə heyətinin rəhbəri olub. 2003-cü ilin yanvar ayında isə Avropa Şurası Parlament Assambleyası sədrinin müavini, AŞPA-nın Büro üzvü seçilib.

2003-cü il avqustun 4-də Milli Məclisdə təsdiq edildikdən sonra Azərbaycan Respublikasının Baş naziri təyin olunub. Bununla əlaqədar deputat səlahiyyətlərinə xitam verilib.

İlham Əliyev 2003-cü il oktyabrın 15-də Azərbaycan Respublikasının Prezidenti seçilib. Prezident seçkilərində seçicilərin 76 faizindən çoxu İlham Əliyevin lehinə səs verib.

2004-cü ildə Avropa Şurası Parlament Assambleyasının fəxri üzvü diplomu və medalı ilə təltif edilib.

2008-ci il oktyabrın 15-də keçirilən seçkilərdə seçicilərin 88,73 faiz səsini qazanan İlham Əliyev ikinci dəfə Azərbaycan Respublikasının Prezidenti seçilib.

2013-cü il oktyabrın 9-da keçirilən seçkilərdə isə seçicilərin 84,54 faiz səsini qazanan İlham Əliyev növbəti dəfə Azərbaycan Respublikasının Prezidenti seçilib.

2018-ci il aprelin 11-də keçirilən seçkilərdə də İlham Əliyev seçicilərin 86,02 faiz səsini qazanaraq yenidən Azərbaycan Respublikasının Prezidenti seçilib.

Azərbaycan, rus, ingilis, fransız və türk dillərini bilir.

Evlidir. Üç övladı, beş nəvəsi var.

Təltiflər və fəxri adların siyahısı:

Ordenlər

Rumıniyanın “Rumıniya Ulduzu” ordeni (11 oktyabr 2004-cü il)

Səudiyyə Ərəbistanı Krallığının “Kral Əbdüləziz” ordeni (8 mart 2005-ci il)

Rusiya Federasiyasının Təhlükəsizlik, Müdafiə və Hüquq Qaydası Problemləri Akademiyasının I dərəcəli Aleksandr Nevski ordeni (11 aprel 2005-ci il)

Azərbaycan Respublikasının “Heydər Əliyev” ordeni (28 aprel 2005-ci il)

Rus Pravoslav Kilsəsinin I dərəcəli Müqəddəs Serqi Radonejski ordeni (14 sentyabr 2005-ci il)

Qafqaz Müsəlmanları İdarəsinin “Şeyxülislam” ordeni (22 dekabr 2005-ci il)

Fransa Respublikasının “Fəxri Legionun Böyük Xaç Komandoru” ordeni (29 yanvar 2007-ci il)

Polşa Respublikasının “Xidmətlərə görə” Böyük Xaç ordeni (26 fevral 2008-ci il)

Ukraynanın 1 dərəcəli “Knyaz Yaroslav Mudrı” ordeni (22 may 2008-ci il)

Küveyt Dövlətinin “Mübarək əl-Kəbir” ordeni (10 fevral 2009-cu il)

Latviya Respublikasının “Üç Ulduz” ordeninin “Böyük Xaç Kavaleri” dərəcəsi (10 avqust 2009-cu il)

Rus Pravoslav Kilsəsinin “I dərəcəli Şöhrət və Şərəf” ordeni (24 aprel 2010-cu il)

Rumıniyanın “Sadiq Xidmət” milli ordeninin Böyük Xaç ranqı (18 aprel 2011-ci il)

Rumıniyanın “Sadiq Xidmət” milli ordeni (18 aprel 2011-ci il)

Bolqarıstan Respublikasının “Stara Planina” ordeni (14 noyabr 2011-ci il)

Tacikistan Respublikasının “İsmoili Somoni” ordeni (12 iyul 2012-ci il)

Belarusun “Xalqlar dostluğu” ordeni (28 avqust 2012-ci il)

“Serbiya Respublikasının lentli Ordeni” (22 fevral 2013-cü il)

Türkiyə Respublikasının “Dövlət nişanı” ordeni (12 noyabr 2013-cü il)

Ukraynanın “Azadlıq” ordeni (18 noyabr 2013-cü il)

Türk Dünyasının Ali Ordeni (12 noyabr 2021-ci il)

Fəxri elmi adlar

Moskva Dövlət Beynəlxalq Münasibətlər İnstitutunun fəxri doktoru (7 fevral 2004-cü il)

Lev Qumilyov adına Qazaxıstan Dövlət Avrasiya Universitetinin fəxri professoru və “Qızıl döyüşçü” medalı (1 mart 2004-cü il)

Türkiyənin Qırıqqala Universitetinin fəxri doktoru (25 mart 2004-cü il)

Türkiyənin Bilkənd Universitetinin fəxri doktoru və İhsan Doğramacı adına Dünya Sülh Mükafatı (14 aprel 2004-cü il)

Rumıniyanın Ployeşti Neft-Qaz Universitetinin fəxri doktoru (12 oktyabr 2004-cü il)

Bolqarıstan Milli və Dünya Təsərrüfatı Universitetinin fəxri professoru (23 sentyabr 2005-ci il)

Koreya Respublikasının Kyunq He Universitetinin fəxri doktoru (24 aprel 2007-ci il)

İordaniya Universitetinin fəxri doktoru (29 iyul 2007-ci il)

Macarıstanın Korvinus Universitetinin fəxri doktoru (18 fevral 2008-ci il)

Moskva Dövlət Universitetinin fəxri professoru (21 fevral 2008-ci il)

Taras Şevçenko adına Kiyev Milli Universitetinin fəxri doktoru (22 may 2008-ci il)

Məxdumqulu adına Türkmənistan Dövlət Universitetinin fəxri professoru (28 noyabr 2008-ci il)

Bakı Dövlət Universitetinin fəxri doktoru (2 noyabr 2009-cu il)

Belarus Dövlət Universitetinin fəxri professoru (12 noyabr 2009-cu il)

Tacikistan Milli Universitetinin fəxri doktoru (16 oktyabr 2014-cü il)

Çinin Renmin Universitetinin “Tarix üzrə fəxri professor” diplomu (11 dekabr 2015-ci il)

İdman təşkilatlarının mükafatları

Dünya Taekvondo Federasiyasının 6-cı Dan Qara kəməri və sertifikatı (10 oktyabr 2003-cü il)

Beynəlxalq Güləş Federasiyasının (FİLA) xüsusi mükafatı (3 aprel 2004-cü il)

Beynəlxalq Olimpiya Komitəsinin “Olimpiya” ordeni (19 aprel 2004-cü il)

Avropa Həvəskar Boks Assosiasiyasının xüsusi mükafatı (1 may 2004-cü il)

Beynəlxalq Hərbi İdman Şurasının “Böyük Kordon” Şərəf ordeni (27 may 2005-ci il)

MDB Ölkələri İdman Təşkilatlarının Beynəlxalq Konfederasiyasının Fərqlənmə nişanı (26 sentyabr 2005-ci il)

Beynəlxalq Güləş Federasiyasının (FİLA) “İdman əfsanəsi” medalı (17 sentyabr 2007-ci il)

Belarus Milli Olimpiya Komitəsinin ali mükafatı (26 oktyabr 2007-ci il)

Azərbaycan Milli Olimpiya Komitəsinin “Olimpiya” ordeni (27 dekabr 2007-ci il)

Ümumdünya Karate Federasiyasının Fəxri 9-cu Dan dərəcəsinin diplomu (20 mart 2008-ci il)

Avropa Ədalətli Oyunlar Hərəkatının “Şərəf” nişanı (15 may 2009-cu il)

Beynəlxalq Paralimpiya Komitəsinin ali paralimpiya mükafatı (26 iyun 2015-ci il).

Müzəffər Ali Baş Komandan İlham Əliyev öz adını Azərbaycan tarixinə qalib sərkərdə kimi yazdırıb. 2020-ci ilin sentyabrın 27-də başlanan Vətən müharibəsi ilə Azərbaycan torpaqlarını Ermənistanın işğalından azad edib.

Torpaqlarımızın işğaldan azad edilməsində İlham Əliyevin güclü siyasi iradəsi və qətiyyəti, xalqın Ali Baş Komandana və orduya dəstəyi böyük rol oynayıb.

İlham Əliyevin illərlə apardığı siyasətin və strategiyanın bəhrəsi bizə öz torpaqlarımızı azad etmək xoşbəxtliyini bəxş etdi.

Ali Baş Komandan postmünaqişə dövründə də erməni revanşizminin alovlanmaması üçün prinsipial mövqe nümayiş etdirir, Ermənistanı sülhjə məcbur etmə taktikasını yeridir.

Azərbaycan öz qətiyyətli mövqeyini beynəlxalq təşkilatlarda, digər ölkə rəhbərləri ilə görüşlərdə nümayiş etdirir.

Prezidentin qətiyyəti, iradəsi, strategiyası elə mükəmməl kombinasiya təşkil edir ki, buna görə Azərbaycanla hesablaşırlar.

Bütöv.az saytının bütün kollektivi adından cənab Prezidenti doğum günü münasibəti ilə səmimi qəlbdən təbrik edir, ölkəmizin parlaq gələcəyi uğrunda yorulmaz fəaliyyətində uğurlar arzu edirik!

Prezident İlham Əliyev Məmməd Aslan oğlu Abbasbəylinin Azərbaycan Respublikasının İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi təyin edilməsi haqqında sərəncam imzalayıb.

Bununla bağlı Prezident.az məlumat yayıb.



Bütöv.az