15-12-2021, 13:13
Artıq xəbər verildiyi kimi, ötən gün Brüsseldə Azərbaycan Prezidenti İlham Əliyev, Avropa Şurasının sədri Şarl Mişel və Ermənistanın baş naziri Nikol Paşinyan arasında üçtərəfli görüşü olub.
Bu görüş müddət baxımından Prezident İlham Əliyevin Ermənistanın baş naziri ilə bütün keçmiş görüşlərini geridə qoyaraq beş saata yaxın davam edib.
Daha sonra Şarl Mişel üçtərəfli görüşün yekunlarına dair bəyanatla çıxış edib.
Bəyanat Avropa diplomatiyasının ən yaxşı ənənələrinə uyğun kifayət qədər əhatəli, təmkinli, maksimum korrekt tərtib edilib.
Amma necə deyərlər, şeytan detallarda gizlənir ki, onu da oxucularımızın diqqətinə çatdırmaq istəyirik.
Məsələn, əsas detal ondan ibarətdir ki, Avropa Şurası rəhbərinin bəyanatında ATƏT-in Minsk qrupunun adı çəkilməyib.
Biz artıq dəfələrlə demişik və yazmışıq ki, bu format tarixin zibilliyinə göndərilib və Şarl Mişel yuxarıda qeyd olunan təşkilatın adını bircə dəfə də olsa çəkməməklə bunu təsdiqlədi.
Şarl Mişelin “münaqişənin aradan qalxması” (overcoming the conflict) çağırışı da diqqətimizi çəkdi.
Əgər əvvəllər avropalılar münaqişənin “həll etmək” zərurəti haqqında danışırdılarsa, indi artıq konfliktin “aradan qalxmasından” danışırlar.
Beləliklə, avropalı siyasətçi həzm oluna bilən diplomatik tərzdə, bu gün danışıqlar masası arxasında söhbətin yalnız Qarabağ münaqişəsinin nəticələrinin aradan qaldırılmasından getdiyini vurğuladı. Belə ki, münaqişənin həll olunduğu hər üç iştirakçıya çox yaxşı məlumdur.
Ş. Mişelin ümumi mesajı ondan ibarətdir ki, Qarabağ münaqişəsi keçmişdə qalıb və indi tərəflər gələcəyə baxmalıdırlar.
Və Avropa İttifaqı Şurasının rəhbərinin bu mesajı İlham Əliyevin baxışı ilə tam üst-üstə düşür.
Ermənistanla Azərbaycan arasında sülh müqaviləsinin bağlanması üçün ciddi çağırışın edilməsi də az əhəmiyyət kəsb etməyən məqamdır.
Beləliklə, Avropa İttifaqı Bakının daha bir istəyi olan hərtərəfli sülh müqaviləsinin bağlamasını dəstəklədi.
Daha sonra Şarl Mişel tərəfləri 2020-ci il 10 noyabr, 2021-ci il 12 yanvar və 26 noyabr tarixli üçtərəfli bəyanatlarına əməl etməyə çağırıb ki, bu da Azərbaycanın maraqlarına uyğundur.
Görünür, Brüssel artıq başa düşüb ki, danışıqlar prosesini başqa məcraya yönəltmək mümkün olmayacaq və bundan sonra onun Qafqaz diplomatiyasının başlanğıc nöqtəsi 10 noyabr 2020-ci il razılaşmasıdır.
Artıq İrəvan hətta Avropanın köməyi də olsa noyabr razılaşmaları çərçivəsindən çıxa bilməyəcək, Minsk qrupu isə yuxarıda qeyd etdiyimiz kimi tarixin zibilliyinə atılıb.
Şarl Mişel Qarabağın minalardan təmizlənməsi istiqamətində də dəstəyini ifadə edib.
Bu, Avropa İttifaqının Azərbaycan ərazilərinin minalardan təmizlənməsi prosesinə real addımlarla dəstək verəcəyini gözləməyə əsas verən müsbət mesajdır.
Avropa İttifaqının ilk dəfə olaraq itkin düşmüş şəxslərin taleyinə aydınlıq gətirilməsinin vacibliyini vurğulayaraq onu gündəmə gətirməsi çox mühümdür.
Xatırladaq ki, Birinci Qarabağ müharibəsi zamanı taleyi bu günə qədər naməlum olan 4 min azərbaycanlı itkin düşüb.
Rəsmi Bakı dəfələrlə Ermənistan tərəfindən bu şəxslərin taleyinə aydınlıq gətirməyi tələb edib. İndi bu tələbə avropalılar da qoşulub.
Nəhayət, bəyanatda Aİ-nin iqtisadi və investisiya dəstəyi də daxil olmaqla, bölgədə kommunikasiya infrastrukturunun yaradılmasını da dəstəkləməyə hazır olduğu ifadə edilir. Bu isə Zəngəzur dəhlizini tez bir zamanda açılmasına nail olmağa çalışan Azərbaycanın maraqlarına tam cavab verir.
Üstəlik, gömrük və sərhəd prosedurlarına qarşılıqlı əsaslarda əməl olunmasının zəruriliyi ayrıca qeyd olunur.
Bu isə İlham Əliyevin “Əgər Ermənistan yük və insanlara nəzarət etmək üçün öz gömrük qurumlarından istifadədə israr etsə, onda biz də Laçın dəhlizində eynisində israr edəcəyik” tələbinə tam uyğun gəlir.
Şarl Mişelin İlham Əliyevin bu tələbinə qoşulması isə bir şeyi aydın göstərir: Brüsseldə keçirilən üçtərəfli danışıqlarda Azərbaycan tərəfi bu prinsipial məsələ ilə bağlı öz gündəmini diktə edə bilib.
Bütöv.az
15-12-2021, 10:28
Media haqqında” Qanunun qəbul olunması kifayət qədər yaxşı hadisədir. Çünki bu qanun layihəsi media subyektlərinin bazar münasibətlərində iştirak payını artıracaq, media subyektlərinin daha çox yeni baxışa uyğun formalaşmasına kömək edəcək".
Bütöv.az "Yeni Müsavat"a istindən xəbər verir ki, bu sözləri APA Holdinqin rəhbəri Vüsalə Mahirqızı hazırda müzakirəsi gedən “Media haqqında” qanun layihəsinə münasibət bildirərkən deyib. Onun sözlərinə görə, bu qanunun müəyyən müddəaları da buna imkan verir: “Medianın dövlətdən asılılığının artacağına gəlincə, buna iki tipdə yanaşmaq lazımdır. Bu qanun layihəsi də ona yönəlib ki, artıq medianın ideoloji silah və təbliğat silahı olması dövrü başa çatıb. Media subyekti bir sahibkarlıq subyektidir və mütləq bazarda maraqlı bir oyunçu olmalıdır, fərqlənməlidir. Sahibkarlıq subyekti ortaq maraqları ehtiva edir. Burada məsələnin mahiyyəti bundan ibarətdir ki, sahibkarın konkret maraqları var və sahibkar konkret maraqlar çərçivəsində fəaliyyət göstərir, pul qazanmaq marağı var. Bu baxımdan artıq sahibkarlıq subyekti olan bir müəssisənin necə işlətməsi təbii ki, dövlətin qanunvericilik bazasına və qanunauyğun olacaq. Bu qanuna əməl etmək şərtilə sahibkarlıq subyektini öz maraqları çərçivəsində işlətmək artıq sahibkarın şəxsi işidir. Ona görə belə bir yanaşma olanda asılılıq məsələsi ortadan qalxır, yəni konkret olaraq sponsor var və onun maraqları var. Media quruluşu da, sahibkarlıq subyekti də sponsorun, təsisçinin maraqlarına cavab verməlidir. Əlbəttə, söhbət qanuna əsaslanmaqla fəaliyyətdən gedir”.
Vüsalə Mahirqızı vurğulayıb ki, bu qanun hüquqi bazadır və bu bazaya əsaslanmaqla, bu qanunu pozmamaq şərtilə hər kəs öz maraqları çərçivəsində işini görür: “Bizdə hamı mediadan və bütün media orqanlarından fədakarlıq istəyir, hər şeyi öz istədiyi kimi oxumaq və görmək istəyir. Amma baxış dəyişəndə bu, sahibkarlıq subyekti olanda, artıq ixtisaslaşma gedir. Mənim nə yazacağıma və ya nə yazmayacağıma dövlətin qanununu pozmamaq şərtilə mən və mənim redaksiyam qərar verir. Bizim bütün şikayətçilərin məktubunu dərc eləmək kimi bir öhdəliyimiz də yoxdur və olmamalıdır. Bunun qanunda bu formada qoyulması son dərəcə normaldır. Bu bir biznes subyekti olanda asılılıq məsələsi aradan götürülür. Biz indi heç bir formada düşünmürük ki, hansısa özəl şirkət, hansı tikinti şirkəti, hansısa iaşə müəssisəsi dövlətdən asılıdır. Çünki özəldir, özü bilər. O tikinti şirkəti hansı layihə ilə binanı necə tikir, nəyin əsasında tikir, bunu özü bilər. Əsas odur ki, tikinti haqqında qanunu, tikinti təhlükəsizliyi qaydalarını, şəhərin vahid arxitekturasını pozmur. Sahibkar qanunlar əsasında şirkəti işlədir. İndi jurnalistikaya da həmin baxış gəlməlidir. Mediada hamıdan eyni şeyi tələb etmək olmaz. Dünyada nüfuzlu beynəlxalq media qurumlarına da verilmiş bir rol var və hamı öz rolunu oynayır. Onların da özlərinin maraqları var. Təsisçilərinin və sahibkarlarının maraqları var, onlar da maraqları çərçivəsindən kənara çıxmırlar. Məsələ ondadır ki, həmin qurumun fəlsəfəsi və yaranması hansı səbəblə bağlıdır. Bazar münasibətlərində maraqlar iştirak edir, maraqlar olanda asılılıq anlayışı sıradan çıxır. Hesab edirəm ki, ”media dövlətdən", “media məmurlardan” asılıdır və sair kimi ifadələr artıq medianın ideoloji və təbliğat ruporu olması ifadələri ilə təxminən eyni idi. Artıq bu ifadələr zaman-zaman sıradan çıxmalıdır".
Media eksperti Qulu Məhərrəmli isə vurğulayıb ki, bu gün təklif olunmuş “Media haqqında” qanun layihəsinin cəmiyyətdə rezonans doğurması, fikir müxtəlifliyi yaratması təbiidir: “Bu elə bir qanundur ki, təkcə mediaya deyil, cəmiyyətin bütün qatlarına aiddir. Bütövlükdə cəmiyyətə aiddir, informasiya istehlakçılarının hamısına aiddir. Şübhəsiz ki, qanunun müsbət tərəfləri də var ki, o, günün reallıqlarını ifadə eləməyə çalışır. Amma mübahisə doğuran məqamlar da var. Bunlar ilk növbədə hökumətin statusu, hökumət-media münasibətləridir. Bir də internetin media profilinin tənzimlənməsi ilə bağlı olan məsələlərdir. Sual yaranır ki, bu maddələrin qanunda olması jurnalistlərin fəaliyyətinə maneə yarada bilərmi? Birbaşa maneələrdən söhbət getmir, amma strateji baxımdan gələcəkdə jurnalistlərin sərbəstliyi, onların informasiyanı azad əldə etmək, yaymaq, müstəqil hərəkət eləmək, xüsusən də müstəqil media ilə bağlı müəyyən problemlər çıxa bilər. Digər məsələ internet televiziyalarının, Youtube kanallarının tənzimlənməsi ilə bağlıdır. Yəni bir qrup haqlı olaraq belə hesab edir ki, indiki halda yerüstü kanallardan fərqli olaraq internet televiziyaların tənzimlənməsinə ehtiyac yoxdur”.
Q.Məhərrəmli qeyd etdi ki, dünyanın heç yerində internet televiziyaları tənzimlənmir: “Ona görə ki, yerüstü kanallar, onların yayımlandığı tezliklər dövlət resurslarıdır, onların sayı məhduddur. Həm radioda, həm televiziya kanallarında elektromaqnit dalğalarının sferası məhdudiyyətlərə bağlıdır. Amma internet hüdudsuz, məhdudiyyəti olmayan bir resursdur. Ona görə burada nəyisə tənzimləmək məntiqə uyğun deyil. Digər tərəfdən, jurnalistlərin bu və başqa məsələləri işıqlandırması ilə bağlı məzmuna müdaxilə əlamətləri görünür. Xüsusi hallarda rəsmi qurumların verdiyi materialları olduğu həcmdə vermək tələb olunur. Ola bilər ki, mənim hansısa nazirliyin verdiyi bir səhifəlik məlumatı olduğu kimi yerləşdirmək imkanım yoxdur, həm də onu məqsədəuyğun hesab etmirəm. Amma onun verdiyi məlumatın məğzini təhrif eləmədən o yanaşmanı təqdim edim. Bu cür məzmuna müdaxilələr əlbəttə ki, müəyyən asılılıq yarada bilər. Hələlik qanun müzakirə və işlənmə mərhələsindədir”.
Media eksperti hesab edir ki, bir neçə gün öncə ictimaiyyətə təqdim olunmuş layihəni heç də ictimai müzakirədən keçmiş adlandırmaq olmaz: “O, sadəcə, layihənin təqdimatı idi ki, parlamentə daxil olub və müvafiq komissiyalarda müzakirəsi başlayacaq. Yəni indiki halda qanunda bir çox tələsiklik yaradan məqamlar var. Media hüququ mütəxəssislərinin bu qanuna baxması çox önəmlidir. Ən vacib məqam konstitusiyamızın 50-ci maddəsinin və beynəlxalq qanunlara, konvensiyalara istinad edən 71-ci maddənin tələblərinin gözlənilməsidir. Elə qanun qəbul eləməliyik ki, onu 2-3 ildən sonra yenidən dəyişdirməyə məcbur qalmayaq. Bunun üçün də qanun çox diqqətlə işlənməlidir. Həm media reallıqları, həm cəmiyyətin maraqları nəzərə almalıdır. Əlbəttə, həm də dövlətin maraqları və heç şübhəsiz ki, milli təhlükəsizlik məsələləri nəzərə alınmadır. Heç bir halda indi mövcud olan keçici bir ildəki naqislikləri aradan qaldırmaq üçün qanuna maddə salmağa ehtiyac yoxdur. Onları müəyyən prosedurlarla, mexanizmlərlə həll eləmək olar. Qanun ümumi normaları verməlidir, belə strateji məzmun və mahiyyət daşıyan bir qanunda hər şey diqqətlə ölçülüb-biçilməlidir”.
15-12-2021, 10:17
Brüsseldə Azərbaycan Prezidenti İlham Əliyev və Ermənistanın Baş naziri Nikol Paşinyan arasında təkbətək görüş keçirilib.
Bütöv.az-ın məlumatına görə, sözügedən görüş Azərbaycan Prezidenti İlham Əliyev, Avropa İttifaqı Şurası Prezidenti Şarl Mişel və Ermənistanın Baş naziri Nikol Paşinyan arasındakı nahar əsnasında baş tutmuş üçtərəfli görüşdən sonra olub.
İkitərəfli görüşün sonunda Şarl Mişel yenidən müzakirələrə qoşulub.
Qeyd edək ki, bu, 44 günlük Vətən müharibəsindən sonra iki ölkə rəhbərləri arasında ilk təkbətək görüşdür.
14-12-2021, 19:43
Brüsseldə Azərbaycan Prezidenti İlham Əliyevlə NATO baş katibi Yens Stoltenberq arasında görüş baş tutub.
Bütöv.az xəbər verir ki, görüşdən sonra İlham Əliyev və Yens Stoltenberq birgə mətbuat konfransı keçirir.
Həmin görüntüləri təqdim edirik:
14-12-2021, 15:06
Magistral su kəmərlərinin mühafizə zonasının icarəyə verilməsinin arxasındakı maraqlar
Dekabrın 14-də Nizami Rayon Məhkəməsində hakim Həqiqət Əhmədovanın sədrliyi ilə Nizami rayonu, Çobanzadə küçəsi 45 ünvanında yerləşən və xüsusi dövlət mülkiyyəti olan, Bakı şəhərinin şərq hissəsini içməli su ilə təmin edən, diametri 1200-1400 mm olan yüksək təzyiqli magistral su kəmərlərinin sanitar mühafizə zonasının qanunsuz olaraq icarəyə verilməsindən iddiaya baxılacaq.
İddiaçı Bahadur Əli qanunsuz bağlanmış müqavilənin ləğvini tələb edir. Bildirir ki, əslində müqavilə formal olaraq ruhi xəstə ilə bağlanıb. Torpaq sahəsi Cəlal Həmidovun adına rəsmiləşdirilsə də, faktiki olaraq vaxtilə Bakı Şəhər İcra Hakimiyyətində mühasib işləmiş, ağbirçək yaşında xuliqanlığa görə məhkum olunmuş Tamara Əliyevna Həmidovanın istifadəsindədir.
İddiaçı Bakı Şəhər İcra Hakimiyyətinin keçmiş başçısı Hacıbala Abutalıbovdan alınan sənədlərin çox ciddi şəkildə araşdırılmasına ehtiyac olmasını vurğulayır: “Hacıbala Abutalıbov işdən çıxarılan gün - 2018-ci il aprelin 20-də Tamara Həmidovanın maraqlarına uyğun bir sənəd imzalayıb. Bu gün də bəlli deyil ki, Hacıbala Abutalıbovun həmin sənəddəki imzadan xəbəri olub və ya əksinə, olmayıb.
Məsələnin mahiyyəti budur ki, Tamara Həmidova qəyyumu olduğu qardaşı Cəlal Əli oğlu ilə Həmidovla Bakı Şəhər İcra Hakimiyyəti arasında torpaq sahəsinin icarəyə verilməsinə dair 20 avqust 2010-cu il tarixli, 0912 saylı icarə müqaviləsi bağlanıb. İcarəyə verilən həmin torpaq vətəndaş Bahadur Əlinin Çobanzadə küçəsi 45A ünvanında yerləşən torpaq sahəsinə bitişik ərazidə yerləşir. İcarəyə verilmiş torpaq sahəsinin dönmə nöqtələrini yerə köçürərkən aydın olub ki, Tamara Həmidovanın qəyyumu olduğu qardaşına icarəyə verilən torpağın bir hissəsi Bahadur Əlinin torpaq sahəsini zəbt edir. Qalan hissəsi isə Bakı şəhərinin şərq hissəsini içməli su ilə təmin edən, diametri 1200-1400 mm olan yüksək təzyiqli magistral su kəmərlərinin sanitar mühafizə zonasına düşür".
Buna görə də Bahadur Əli Bakı Şəhər İcra Hakimiyyətinə və Cəlal Həmidova verilən icarə müqaviləsinin və onun əsasında daşınmaz əmlakın dövlət reyestrində aparılmış qeydin ləğv edilməsi, Cəlal Həmidovun həmin torpaq sahəsindən çıxarılmasına dair iddia ilə məhkəməyə müraciət edib. Nizami Rayon Məhkəməsində ekspertiza rəyi və toplanmış başqa sübutlarla icarə müqaviləsinin əsasında ayrılmış torpağın Bahadur Əliyə məxsus torpaq sahəsinin zəbt etməsi tam təsdiq olunub. Məhkəmədə Tamara Həmidovanın qardaşı ilə bağlanan icarə müqaviləsinin ləğv edilməsi və iş üzrə xüsusi qərardadın çıxarılması qaçılmaz olub.
Vəziyyətdən çıxış yolu kimi növbəti, cinayətə bərabər ağlasığmaz qanunsuzluq baş verib!
Tamara Həmidova məhkəməyə qardaşı ilə BŞİH-in 20 avqust 2010-cu il tarixli, 0912 saylı icarə müqaviləsinin ləğv edilməsi barədə 20 aprel 2018-ci il tarixli, 7-183/10q saylı bildirişi təqdim edib.
Məhkəmə icarə müqaviləsinin ləğv edilməsini əsas götürərək Bahadur Əlinin iddiasını həmin hissədə təmin etməyib. Bahadur Əli ağbirçək qonşusunun məhkəmədə bu cür geri çəkilməsindən şübhələnib. Ortada yeni bir hiylə və cinayətin ola biləcəyini ehtimal edib. Yanılmayıb, məlum olub ki, Tamara Həmidova qəyyumu olduğu qardaşı Cəlal Həmidovun adına verilmiş 20 avqust 2010-cu il tarixli, 0912 saylı icarə müqaviləsinin ləğv etdiyi gün elə həmin torpaq sahəsinə Hacıbala Abutalıbovun imzası ilə yeni - 1460 nömrəli, 20 aprel 2018-ci il tarixli icarə müqaviləsi alıb.
Bahadur Əli Nizami rayonu, Çobanzadə küçəsi, 45 ünvanında yerləşən torpaq sahəsinin icarəyə verilməsinə dair Bakı Şəhər İcra Hakimiyyəti ilə Cəlal Əli oğlu Həmidovun qanuni nümayəndəsi Tamara Əliyevna (Əli qızı) Həmidova arasında bağlanmış 20 aprel 2018-ci il tarixli, 1460 saylı icarə müqaviləsinin etibarsız hesab edilməsi və Cəlal Əli oğlu Həmidovun həmin torpaq sahəsindən çıxarılması tələb edir.
Elşən MƏMMƏDƏLİYEV,
“Yeni Müsavat”
Bütöv.az
14-12-2021, 13:09
“Bakı-Tbilisi-Qars dəmir yolu xətti üç ölkə üçün mühüm əhəmiyyət kəsb edir. Bununla yanaşı, Zəngəzur dəhlizi də logistika və ticarətdə yeni alternativ olacaq”.
Ordum.az xəbər verir ki, bunu Bakıda keçirilən Azərbaycan-Türkiyə-Gürcüstan biznes forumunda Türkiyənin Xarici İqtisadi Əlaqələr Şurasının prezidenti Nail Olpak deyib.
Onun sözlərinə görə, üç ölkə arasında iqtisadi əlaqələri inkişaf etdirmək üçün imkanlar genişdir: “Məsələn, bu il Azərbaycanla Türkiyə arasında ticarət dövriyyəsinin dəyəri 2 milyard ABŞ dolları təşkil edib. İki ölkənin bütün sahələrdə, o cümlədən müdafiə sənayesi sahəsində əməkdaşlığı genişlənir. İşğaldan azad edilmiş ərazilərdə böyük layihələrin icrasında birlikdə ola bilərik”.
Bütöv.az
14-12-2021, 13:04
Çox təəssüf ki, parlament layiq olmadığı haqsız təpkilərlə üzləşir. Dövlət Gömrük Komitəsinin sədri Səfər Mehdiyevin müsahibəsindən sonra da bu təpkilər artıb.
Bütöv.az xəbər verir ki, bunu Milli Məclisin iclasında millət vəkili Elşən Musayev deyib. O, S.Mehdiyevin fikirlərinin təhrif olunması ehtimalını bildirərək, buna aydınlıq gətirilməsini istəyib.
Spiker Sahibə Qafarova isə E.Musayevə bu məsələni qaldırdığına görə təşəkkür edib:
"Mən əslində bu haqda komitə sədrlərinə demişdim. İndi sizin də nəzərinə çatdırım. Dövlət Gömrük Komitəsinin sədri Səfər Mehdiyevin bir neçə saytda müsahibəsi gedib. Həmin müsahibənin bir hissəsində deputatlar qanunsuz fəaliyyətdə və fırıldaqçılıqda günahlandırılıb".
Sahibə Qafarova əlavə edib ki, komitə sədri Səfər Mehdiyev ona telefon açıb:
“Komitə sədri qeyd etdi ki, həmin müsahibədə fikirləri düzgün ifadə edilməyib. Əslində o deputatları deyil, məmurları nəzərdə tutub”.
Qeyd edək ki, S.Mehdiyev bəzi deputatları qanunsuz biznesdə suçlamış, elektron alınmalarda limitin 300 dollara endirilməsinə qarşı çıxan deputatların fırıldaqçılıqla məşğul olduğunu bildirmişdi.
14-12-2021, 12:59
Milli Məclisin iclasında “Əqli mülkiyyətin hüquqi qorunması və mühafizəsi sahəsində əməkdaşlıq və əqli mülkiyyətin hüquqi qorunması və mühafizəsi məsələlərinə dair Dövlətlərarası Şuranın yaradılması haqqında” Sazişə və “2010-cu il 19 noyabr tarixli “Əqli mülkiyyətin hüquqi qorunması və mühafizəsi sahəsində əməkdaşlıq və əqli mülkiyyətin hüquqi qorunması və mühafizəsi məsələlərinə dair Dövlətlərarası Şuranın yaradılması haqqında Saziş”ə dəyişikliklər edilməsi haqqında” Protokola qoşulmaq barədə və “Əqli mülkiyyət sahəsində hüquq pozuntularının qarşısının alınması sahəsində əməkdaşlıq haqqında Sazişin xüsusi rəylə təsdiq edilməsi barədə” qanunun ləğv edilməsi haqqında” qanun layihəsi müzakirəyə çıxarılıb.
Bütöv.az xəbər verir ki, layihə səsə qoyularaq qəbul edilib.
Qeyd edək ki, sənəddə sahə əməkdaşlıq orqanının yaradılması nəzərdə tutulub. Sazişə görə, tərəflər əqli mülkiyyətin hüquqi qorunması və mühafizəsi məsələlərinə dair Dövlətlərarası Şura yaradırlar və Şura öz fəaliyyətini bu sazişin ayrılmaz hissəsi olan müvafiq Əsasnamə əsasında həyata keçirir. Azərbaycan tərəfi sənədə müəyyən qeyd-şərtlə qoşulur.
Hazırda təqdim olunan qeyd-şərtin ərazi bütövlüyü məsələsi ilə deyil, Azərbaycanla Ermənistan arasında münasibətlərin normallaşması ilə bağlı olacaq.
Azərbaycanın qeyd-şərtinə görə bu sazişin müddəaları münaqişənin nəticələri tam aradan qaldırılana və Ermənistanla Azərbaycan arasında münasibətlər normallaşana qədər Azərbaycan Respublikası tərəfindən Ermənistan Respublikasına münasibətdə tətbiq edilməyəcək.
14-12-2021, 10:52
Azərbaycan Prezidenti İlham Əliyev Brüsselə səfəri çərçivəsində dekabrın 14-də NATO-nun baş katibi Yens Stoltenberqlə görüşəcək.
Azərbaycanın 44 günlük müharibədə Ermənistan üzərində qələbə qazanması regionun siyasi xəritəsini yenidən şəkilləndirməyi aktuallaşdırıb.
Bakı postmünaqişə dövründə proseslərdə əsas yönləndirici amilə çevrilir, Ankaradan gələn güclü siyasi dəstək, hər addımda Azərbaycanın maraqlarının müdafiəsi Bakıya əlavə imkanlar yaradır.
Azərbaycan indi NATO-ya münasibətdəki siyasətini şaxələndirməyi hədəfləyir.
NATO Azərbaycan üçün vacib tərəfdaşdır, məsələnin bu yerə çatmasının kökləri var.
Onları xatırlatmaq yerinə düşər.
Azərbaycanın NATO ilə əməkdaşlığı 1994-cü ildə mərhum eks-prezident Heydər Əliyev tərəfindən Brüsseldə “Sülh naminə Tərəfdaşlıq” çərçivə sənədinin imzalanması ilə başlayıb.
Prezident İlham Əliyev NATO-nun mənzil qərargahına 6 dəfə, NATO-nun baş katibləri isə Azərbaycana 3 dəfə səfər edib.
Prezident İlham Əliyev NATO-nun 7 Zirvə görüşündə iştirak edib (İstanbul 2004, Buxarest 2008, Lissabon 2010, Çikaqo 2012, Kardiff 2014, Varşava 2016, Brüssel 2018).
NATO daim Azərbaycanın suverenliyinə və ərazi bütövlüyünə dəstək verib.
Bu dəstək NATO-nun 9 Zirvə görüşündə öz əksini tapıb. Zirvə görüşlərinin yekun sənədlərində Azərbaycanın müstəqilliyinə, suverenliyinə və ərazi bütövlüyünə dəstək ifadə olunub. Bu sənədlərdə Cənubi Qafqazdakı münaqişələrin, o cümlədən keçmiş Ermənistan-Azərbaycan münaqişəsinin beynəlxalq hüququn norma və prinsipləri əsasında həllinin vacibliyi vurğulanırdı.
Vətən müharibəsi dövründə də NATO Azərbaycan və Ermənistanı atəşkəsə və danışıqlara çağırırdı.
Azərbaycanın Vətən müharibəsində əldə etdiyi tarixi zəfəri nəticəsində yaranmış yeni reallıq NATO tərəfindən də qəbul edildi və NATO-nun bu ilin iyun ayında Brüsseldə keçirilmiş Zirvə görüşünün yekun mətnindən keçmiş Ermənistan-Azərbaycan münaqişəsinə istinad edən bənd çıxarıldı.
Azərbaycan və NATO arasında praktiki əməkdaşlığın əsas istiqamətlərini müdafiə və təhlükəsizlik sektorunda islahatlar, beynəlxalq əməliyyatlarda iştirak, fövqəladə hallara hazırlıq, təhlükəsizlik ilə əlaqəli olan elmi və ekoloji məsələlər və ictimai diplomatiya təşkil edir.
Azərbaycan öz Silahlı Qüvvələrinin NATO standartlarına uyğunlaşdırılması istiqamətində ciddi addımlar atıb. Şimali Atlantika Alyansının üzvü olan Türkiyə modelli ordu quruculuğunu da NATO istiqamətinə yön alan müsbət siyasi gediş kimi qiymətləndirmək olar.
2002-ci ildən etibarən 30-dan çox Azərbaycan zabiti NATO-nun mənzil qərargahında və qurumlarında xidmət aparıb.
Azərbaycan və NATO arasında mina və partlamamış silah-sursatların təmizlənməsinə dair “Saloğlu” və “Ceyrançöl” layihələri kimi praktiki layihələr uğurla həyata keçirilib.
2002-ci ildən Azərbaycan NATO-nun Əfqanıstandakı missiyalarında fəal iştirak edib.
2015-ci ildən 2021-ci ilin avqustuna qədər Azərbaycan NATO-nun Əfqanıstanda “Qətiyyətli Dəstək” missiyasında iştirak edib. 120 Azərbaycan hərbçisi Kabilin beynəlxalq hava limanında xidmət edirdi.
Əfqanıstanda baş vermiş son hadisələr zamanı Azərbaycan hərbçiləri hava limanında təhlükəsizliyin təmin olunmasına və əhalinin təhlükəsiz təxliyəsinin təşkil edilməsinə böyük töhfə verib.
NATO-nun baş katibi Yens Stoltenberq bu ilin avqust ayında hava limanında təhlükəsizliyin təmin edilməsindəki xidmətlərinə görə Azərbaycana təşəkkürünü ifadə edib.
2017-2020-ci illərdə Azərbaycan NATO-Rusiya və ABŞ-Rusiya arasında yüksək vəzifəli hərbçilərin 7 görüşünə ev sahibliyi edib.
Görünən odur ki, Azərbaycan-NATO əməkdaşlığı bundan sonra daha da dərinləşəcək. Münasibətlərin perspektivi tərəflər üçün faydaları artıracaq.
Bütöv.az
13-12-2021, 21:53
Avropa İttifaqı Şurasının rəhbəri Şarl Mişel dekabrın 14-də Belçikanın paytaxtı Brüsseldə Azərbaycan Prezidenti İlham Əliyev və Ermənistan baş naziri Nikol Paşinyanla üçtərəfli görüş keçirəcək.
Bu barədə dekabrın 15-də Avropanın paytaxtında keçiriləcək “Şərq Tərəfdaşlığı” sammiti ərəfəsində Aİ-nin yüksək səviyyəli nümayəndəsi Brüsseldə jurnalistlərə bildirib.
Avropa Şurasının sədri sabah ilk olaraq Azərbaycanın Prezidenti İlham Əliyevlə, daha sonra Ermənistanın baş naziri Nikol Paşinyanla ikitərəfli görüşlər keçirəcək.
Sabah axşam isə üçtərəfli görüş keçirəcək.
Mənbə: TASS
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!