"Azərbaycan Xalq Cümhuriyyəti yaradıcılarının xatirəsinin əbədiləşdirilməsi yönündə demək olar ki, heç bir iş görülməyib. Yalnız Elmlər Akademiyası Rəyasət Heyətinin binası yanında müstəqilliyimizə imza atmış şəxslərin siyahısı olan bircə xatirə lövhəsi – abidə qoyulub." Bunu Modern.az-a açıqlamasında tarix elmləri namizədi, araşdırmacı Nəsiman Yaqublu bildirib.
“İlk növbədə onların heykəlləri qoyulmalıdır. İkincisi, müxtəlif ölkələrdən vətənə məzarları gətirilib azadlığı uğrunda mübarizə apardıqları Azərbaycan torpağında dəfn olunmalıdır. Əksəriyyətinin məzarları müxtəlif ölkələrdədir. Məhəmməd Əmin Rəsulzadənin məzarı Türkiyədə, Fətəli xan Xoyskinin Gürcüstanda, Əlimərdan bəy Topçubaşovun məzarı isə Fransandadır. Bunların nəşi gətirilib öz vətənlərində dəfn edilməlidir. Digər tərəfdən, bizə qoyub getdikləri ideoloji irs yığılmalı və çap olunmalıdır. Bu insanlar haqqında orta və ali məktəb dərsliklərində geniş informasiyalar verilməlidir. Bizim media bu cür şəxsiyyətlərə ciddi diqqət yetirməlidir. Yalnız onların ad günündə beş-altı cümlə ilə doğum gününü yada salıb təbrik etməklə məhdudlaşmalı deyillər. Onlar barədə televiziya kanalları verilişlər hazırlamalı, saytlar arxivlərdə olan fotolarını təqdim etməli, barələrində maraqlı yazılar yerləşdirməlidirlər. Fəaliyyətləri həmin saytlarda ciddi şəkildə araşdırılmalıdır ki, insanlar oxuyub maariflənsin. Təəssüf ki, bu işlər yetərin qədər görülmür. Başqa tərəfdən isə Azərbaycanda İstiqlal muzeyi, “Cümhuriyyət qurucuları” adı altında normal bir muzey yaradılmalıdır“.