15-12-2021, 11:18
Dünya bazarında neftin qiyməti ucuzlaşıb.
Bütöv.az xəbər verir ki, bu saata olan göstəricilərə görə, ICE London qitələrarası birjasında keçirilən ticarət əməliyyatlarının gedişində Brent neftinin ixracına dair 2022-ci ilin fevral müqaviləsinin dəyəri 1,13% azalaraq 1 barelə görə 72,87 dollar təşkil edib.
Nyu-Yorkun NYMEX əmtəə birjasında bu ilin yanvarında ixrac etməklə WTI markalı neftin 1 barelinin qiyməti 1,30% azalaraq 69,81dollar təşkil edib.
15-12-2021, 10:59
Azərbaycan Prezidenti İlham Əliyev Brüsseldə vacib görüşlərdən əvvəl İspaniyanın “El Pais” nəşrinə müsahibə verib.
Bütöv.az həmin müsahibənin mətnini təqdim edir:
- Ermənistanla vəziyyət hansı mərhələdir? Təqribən bir ay öncə sərhəddə ölümlə nəticələnən qarşıdurma baş verib.
- Vəziyyət nisbətən stabildir. Qarabağda Rusiya sülhməramlı qüvvələrinin məsuliyyəti zonasında vəziyyət Azərbaycan-Ermənistan sərhədində olduğundan daha stabildir. Təəssüf ki, Ermənistan revanş cəhdlərindən əl çəkmir. Onlar üçün 44 günlük müharibədə məğlubiyyət çox ağrılı idi; ideoloji əsaslarına və demək olar ki, “30 il ərzində məğlubedilməz ordudan, əsgər və komandirlərinin gücündən, şücaətindən” danışan təbliğatlarına görə tamamilə dağıdıcı oldu. 44 günlük müharibə zamanı Ermənistan ordusu tamamilə məhv edildi.
- Brüsseldəki görüşünüzdən nə gözləyə bilərik?
- Bunu demək çətindir, çünki bu gün daha sonra planlaşdırılan görüşün nəticəsinin necə olacağını görməliyik. Azərbaycanın mövqeyi açıq və aydındır. Biz sülh istəyirik, müharibə yox. Müharibədə zəfər çalmışıq, qalibik və bu reallıq nəzərə alınmalıdır. Həmçinin Qarabağ münaqişəsi həll olunub, Qarabağın statusu və ya buna bənzər hər hansı bir müzakirəyə qayıtmaq olmaz. Bunu özümüz güc və siyasi yolla həll etmişik. Biz BMT Təhlükəsizlik Şurasının Dağlıq Qarabağ münaqişəsi ilə bağlı qəbul etdiyi qətnamələri 27 ildən sonra birtərəfli qaydada icra etdik.
- Ermənistandan nə gözləyirsiniz?
- Ermənistan hər cür düşmənçilik hərəkətlərindən və ərazi iddialarından çəkinməlidir. Sülh müqaviləsi üzərində çalışsınlar və artıq 21-ci əsrdə normal davranışa riayət etsinlər. Hər halda, biz qonşuyuq və heç birimiz başqa planetə köçmək fikrində deyilik. Yanaşı yaşamağı öyrənməli və yavaş-yavaş münasibətlərin, o cümlədən insanlar arasında təmasların normallaşması üçün zəmin hazırlamalıyıq. Biz açıq şəkildə dedik ki, buna hazırıq. Amma indiyədək heç bir müsbət siqnal almamışıq. Mənə elə gəlir ki, Ermənistanda daxili vəziyyət, onların cəmiyyətində şişirdilmiş gözləntilər və hərbi-siyasi vəziyyətin qeyri-real qiymətləndirilməsi səbəbindən müharibədə uduzduqdan sonra yaranmış məyusluq və ümidsizlik onlarda bir növ psixoloji travma yaradıb.
- Hazırkı qaz böhranını necə təhlil edirsiniz və sizcə, Aİ və region bu problemi necə həll edə bilər?
- Hazırkı qaz qiyməti böhranının, əgər belə demək mümkünsə, səbəbini, bilmirəm. Açığı, mənə maraqlı deyil. Biz üzərimizə düşənlə məşğul olmuşuq: neft-qaz sektoruna milyonlarla dollarlıq investisiyalar cəlb etmişik, həmçinin XXI əsrin əsas infrastruktur layihələrindən biri olan Cənub Qaz Dəhlizi üzərində işləyirik və bu layihə ötən ilin son günündə başa çatıb. O vaxtdan Avropaya ixracımız başladı. Bizim böyük təbii qaz yataqlarımız var və Avropaya ənənəvi təbii qaz tədarükü ilə müqayisədə daha qısa nəql marşrutumuz var. Bizim qazımız Avropa bazarları üçün yenidir, çünki dediyiniz kimi, Aİ-də və Aİ-nin üzvü olmayan bəzi Avropa ölkələrində hasilat azalır. Hamımız bilirik ki, bəzi ölkələrin enerji strategiyası ilə bağlı qəbul etdikləri bəzi qərarlar səbəbindən Avropada təbii qaza tələbat artacaq. Burada da Azərbaycan özünü etibarlı tərəfdaş, Avropanın dostu və bütün infrastruktur işlərini artıq başa vurmuş bir ölkə kimi təqdim edir - təsəvvür edin, Bakıdan İtaliyaya 3500 kilometrlik qaz kəməri, onun bir hissəsi dənizin dibindədir. Hər şey hazırdır və qaz nəql olunur. Bizə ancaq Avropa Komissiyası və üzv dövlətlərlə, bizdən daha çox qaz almaq istəyənlərlə və ya bizdən yeni qaz almaq istəyənlərlə sıx əməkdaşlıq edib danışıqlara başlamaq qalır.
- Rusiya Prezidenti Vladimir Putinlə söhbətinizdə o, Sizə yeni dəhlizin Rusiya qazına alternativ olması ilə bağlı narahatlığını ifadə edibmi?
- Açığı, sizə deyə bilərəm ki, biz bu məsələni heç vaxt müzakirə etməmişik. İldə bir neçə dəfə mütəmadi olaraq görüşür və davamlı olaraq telefonla danışırıq, amma o, heç vaxt bu məsələni qaldırmayıb. Bu rəqabət məsələsi çox şişirdilib və heç bir əsas olmadan siyasiləşdirilib. Bizim qaz təchizatımız Rusiya ilə heç bir şəkildə rəqabət apara bilməz.
15-12-2021, 10:31
Oktyabrın 10-da Astara rayonunun Ərçivan qəsəbə sakini Elnarə Əliyevanın “dərman zəhərlənməsi” diaqnozu ilə Astara rayon mərkəzi xəstəxanasında daxil olması və ertəsi gün orada ölməsi barədə rayon prokurorluğuna məlumat daxil olub.
Astara Rayon Prokurorluğundan Modern.az-a verilən məlumata görə, aparılmış araşdırmalarla Elnarə Əliyevaya göstərilmiş tibbi yardımların tam həcmdə və vaxtında icra olunmaması, vəziyyətinin düzgün qiymətləndirilməməsi nəticəsində ölümün baş verməsi müəyyən edilib.
Faktla bağlı Astara rayon prokurorluğunda Cinayət Məcəlləsinin 314.2-ci (səhlənkarlıq ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə cinayət işi başlanıb.
Hazırda iş üzrə istintaq davam etdirilir.
Bütöv.az
15-12-2021, 10:24
Zəngəzur dəhlizi boyunca dəmir yolu xətti çəkiləcək.
Bütöv.az-ın məlumatına əsasən, bu barədə Avropa İttifaqı Şurasının Prezidenti Şarl Mişelin bəyanatında bildirilir.
Qeyd olunub ki, qarşılıqlı prinsip əsasında sərhəd və gömrük nəzarəti üçün müvafiq tədbirlər görülməklə, dəmir yolu xətlərinin bərpasına davam etmək razılaşdırılıb.
Xatırladaq ki, Brüsseldə Şarl Mişelin vasitəçiliyi ilə Azərbaycan Prezidenti İlham Əliyevlə Ermənistanın baş naziri Nikol Paşinyan arasında görüş keçirilib.
15-12-2021, 10:17
Brüsseldə Azərbaycan Prezidenti İlham Əliyev və Ermənistanın Baş naziri Nikol Paşinyan arasında təkbətək görüş keçirilib.
Bütöv.az-ın məlumatına görə, sözügedən görüş Azərbaycan Prezidenti İlham Əliyev, Avropa İttifaqı Şurası Prezidenti Şarl Mişel və Ermənistanın Baş naziri Nikol Paşinyan arasındakı nahar əsnasında baş tutmuş üçtərəfli görüşdən sonra olub.
İkitərəfli görüşün sonunda Şarl Mişel yenidən müzakirələrə qoşulub.
Qeyd edək ki, bu, 44 günlük Vətən müharibəsindən sonra iki ölkə rəhbərləri arasında ilk təkbətək görüşdür.
14-12-2021, 20:01
Azərbaycanda son sutkada koronavirus (COVID-19) əleyhinə 34 799 vaksin vurulub
Bu barədə Nazirlər Kabineti yanında Operativ Qərargah məlumat yayıb.
Gün ərzində birinci mərhələ üzrə vaksinasiya olunanların sayı 4 359, ikinci mərhələ üzrə vaksinasiya olunanların sayı 5 153 nəfər təşkil edib.
Ölkədə buster doza vaksinlərin sayına gəlincə, bu göstərici 25 287 olub.
Azərbaycanda bu günə qədər vurulan vaksinlərin ümumi sayı 10 928 879, birinci mərhələ üzrə peyvənd olunanların ümumi sayı 5 124 934, ikinci mərhələ üzrə vaksinasiya edilənlərin sayı 4 622 381 nəfər təşkil edir.
Ümumilikdə isə 1 181 564 buster doza vurulub.
Bütöv.az
14-12-2021, 19:59
Suraxanı Rayon Polis İdarəsinin Dövlət Yol Polisi Şöbəsinin əməkdaşlarının həyata keçirdikləri tədbir zamanı narkotik vasitələrin təsiri altında taksi fəaliyyəti ilə məşğul olan sürücü müəyyən edilib.
Bu barədə Daxili İşlər Nazirliyi məlumat yayıb.
Hövsan qəsəbəsində yaşayan Araz Səfərəliyev idarə etdiyi VAZ-2115 markalı avtomobilin sükanı arxasında olan zaman nəzarət-yoxlama qaydasında saxlanılıb. İlkin sorğu zamanı sürücü avtomobili psixotrop maddə olan metamfetamin qəbul edərək idarə etdiyini etiraf edib. Təyin olunan ekspertiza zamanı Araz Səfərəliyevin sükan arxasında psixotrop maddələrin təsiri altında olduğu sübuta yetirilib. Sürücü barəsində İnzibati Xətalar Məcəlləsinin müvafiq maddəsi ilə protokol tərtib olunub. Araz Səfərəliyevin törətdiyi qanun pozuntusuna hüquqi qiymət verilməsi üçün toplanmış materiallar məhkəməyə göndərilib.
Qeyd edək ki, polis əməkdaşları tərəfindən ötən gün keçirilən analoji tədbirlər zamanı qeyd edilən qanun pozuntusuna yol verən səkkiz belə sürücü aşkar edilib. Onların əməlinə də qanunla nəzərdə tutulan qaydada hüquqi qiymət verilib. Bu istiqamətdə polis əməkdaşları tərəfindən tədbirlər davam etdirilir.
Bütöv.az
14-12-2021, 19:43
Brüsseldə Azərbaycan Prezidenti İlham Əliyevlə NATO baş katibi Yens Stoltenberq arasında görüş baş tutub.
Bütöv.az xəbər verir ki, görüşdən sonra İlham Əliyev və Yens Stoltenberq birgə mətbuat konfransı keçirir.
Həmin görüntüləri təqdim edirik:
14-12-2021, 15:30
Braziliyada Amazonas ştatının Bobra şəhərinin bələdiyyə sədri 39 yaşlı Simao Peksoto ilə 45 yaşlı keçmiş deputat Erineu Alvas Da Silva rinqə çıxıb.
Bütöv.az xəbər verir ki, 3 raund davam edən döyüşün qalibi bələdiyyə sədri olub.
Yerli BNC agentliyi bildirib ki, tərəflər arasında siyasi gərginlik ötən aydan başlayıb. Keçmiş deputat bələdiyyə sədrini “küçə döyüşçüsü” adlandıraraq, rinqə dəvət edib. Bələdiyyə sədri Peksoto isə dəvəti qəbul edib.
14-12-2021, 15:26
Britaniya diyetoloqlar assosiasiyası ürəyi möhkəmləndirən və xəstəliklərdən qoruyan 5 növ qida təqdim ediblər.
Bütöv.az saglamolun.az-a istinadən bu qidaların siyahısını təqdim edir:
1. Tamdənli bitkilər (qəhvəyi düyü, yulaf yarması, çovdar çorəyi, tamdənli undan hazırlanmış makaron)
Mütəxəssislər bu məhsulları hər gün qidalanmaya daxil etməyi tövsiyə edirlər. Bu məhsullar ürək əzələsini daha sağlam və möhkəm edir.
2. Paxlalı bitkilər (lobya, mərci, noxud)
Bu bitkilər orqanizmdə xolesterinin səviyyəsini aşağı salır. Xolesterinin orqanimzdə yüksək səviyyədə olması aterosklrozun əsas səbəblərindən biridir. Ateroskleroz zamanı xolesterin damarların daxilində yığılır, damarları daraldır, zəif və kövrək edir ki, bunun nəticəsində ürək xəstəlikləri və infarktın riski artır.
3. Meyvə və tərəvəzlər
Kaliumla zəngin olan meyvə və tərəvəzlər (banan, ərik, kivi, əncir, sitrus meyvələri, avokado, kartof, pomidor, kələm, ispanaq, balqabaq və s.) ürəyin sağlamlığına çox müsbət təsir edir.
4. Balıq
Mütəxəssislər sübut edir ki, balığın müntəzəm olaraq istehlakı ürək xəstəlikləri və infarktın riskini xeyli azaldır. Bunun səbəbi balığın omeqa-3 yağlı turşular, B6 və B12 vitaminlərlə zəngin olmasıdır.
5. Qoz-fındıq
Bu məhsullar ürəyin ritmini tənzimləyir, aritmiyanın qarşısını alır. Aritmiya infarkt və ürək çatışmazlığının riskini artırır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!