Xəbər lenti » Səhifə 1037

28-04-2024, 17:13

Sədərək rayonunda partlayış - 2 nəfər öldü

Sədərək rayonunda sursat partlayışı nəticəsində 2 nəfər həlak olub.
Bu barədə Baş Prokurorluq, Daxili İşlər Nazirliyi və Minatəmizləmə Agentliyinin (ANAMA) birgə məlumatında deyilir.
Belə ki, Naxçıvan Muxtar Respublikasının Sədərək rayonunun Qaraağac kəndi ərazisində Ermənistan tərəfindən vaxtilə atılmış hərbi sursatın partlaması nəticəsində 1951-ci il təvəllüdlü Rzayev Vilayət Həsən oğlu və 1970-ci il təvəllüdlü Əliyev Adəm Həsən oğlu həlak olub.
Prokurorluq əməkdaşları tərəfindən hadisə yerinə baxış keçirilib, müvafiq ekspertizalar təyin olunmaqla zəruri prosessual hərəkətlər icra olunub.
Faktla bağlı Sədərək rayon prokurorluğunda araşdırma aparılır.

Sədərək rayonunda partlayış - 2 nəfər öldü

28-04-2024, 16:55

Tailandın xarici işlər naziri istefa verdi

Tailandın xarici işlər naziri Panpri Phitthanukon hökumətdəki dəyişikliklər fonunda istefa verib.
Phitthanukonun sözlərinə görə, onun istefa qərarı hökumətin kadr dəyişikliyi ilə bağlı deyil.
“Hesab edirəm ki, baş nazirin müavini vəzifəsindən uzaqlaşdırılmağımın heç bir nailiyyətimin olmaması ilə əlaqəsi yoxdur. Ümid edirəm ki, Nazirlər Kabinetində bu dəyişikliklər ölkənin idarəçiliyini təkmilləşdirməyə, milli maraqların qorunmasında səmərəliliyi və şəffaflığı artırmağa kömək edəcək, mənə bu hökumətlə işləmək imkanı verdiyinə görə Baş nazirə təşəkkür etmək istərdim”, - istefa ərizəsində deyilir.
O, 2023-cü il sentyabrın 2-dən Tailand Xarici İşlər Nazirliyinə rəhbərlik edib.

Tailandın xarici işlər naziri istefa verdi

28-04-2024, 16:26

Zelenskinin legitimliyi tezliklə şübhə altına düşəcək - Peskov

Ukrayna Prezidenti Vladimir Zelenskinin legitimliyi tezliklə şübhə altına düşəcək.
Bunu Kremlin mətbuat katibi Dmitri Peskov bildirib.
O, Zelenskinin prezident kimi legitimliyinin Ukraynada da şübhə altına düşəcəyini söyləyib.
“Mənə elə gəlir ki, Zelenskinin taleyi aydın şəkildə əvvəlcədən müəyyən edilib və çox yaxında elə bir məqam gələcək ki, bir çoxları, o cümlədən Ukraynada onun legitimliyini şübhə altına alacaqlar. İstənilən halda hətta hüquqi baxımdan belə bunu etmək lazım gələcək. O, özünə necəsə haqq qazandırmalı olacaq”, - deyə Kremlin rəsmi nümayəndəsi vurğulayıb.

Zelenskinin legitimliyi tezliklə şübhə altına düşəcək - Peskov

28-04-2024, 15:37

Muxtar Babayev G7 nazirlər toplantısında iştirak etdi

Azərbaycanın ekologiya və təbii sərvətlər naziri, Birləşmiş Millətlər Təşkilatının (BMT) İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) prezidenti Muxtar Babayev G7-nin İtaliyanın Turin şəhərində keçirilən İqlim, Enerji və Ətraf Mühit Nazirlər Toplantısında iştirak edir.
Bu barədə COP29 məlumat yayıb.
“COP29 Turində G7-nin İqlim, Enerji və Ətraf Mühit üzrə Nazirlər Toplantısında iştirak edir”, – məlumatda bildirilib.
COP29-un yaydığı şəkillərə əsasən, Muxtar Babayev tədbirdə çıxış edib, italiyalı həmkarı Cilberto Piketto-Fratinlə görüşüb.

Muxtar Babayev G7 nazirlər toplantısında iştirak etdi

28-04-2024, 15:15

Azərbaycana dəstəyinə görə minnətdarıq - Ukraynanın yeni səfiri

Ukraynanın Azərbaycandakı səfiri Yuri Husyev ölkəsinin yenidən qurulmasında Azərbaycanın göstərdiyi dəstəyə görə minnətdarlığını bildirib.
Bu barədə diplomat sosial şəbəkədə yazıb.
“Bu gün [akademik] Zərifə Əliyevanın doğum günündə İrpin Azərbaycan Mədəniyyəti Gününü qeyd edir. Ukraynanın yenidən qurulmasında, xəstəxananın, məktəbin və s. bərpasında Azərbaycanın dəstəyinə görə minnətdarıq. Azərbaycan və Ukrayna arasında dostluğun möhkəmlənməsində əməyi olan hər kəsə təşəkkür edirik!”, – o yazıb.

Azərbaycana dəstəyinə görə minnətdarıq - Ukraynanın yeni səfiri

28-04-2024, 14:19

Qəzzada ölənlərin sayı açıqlandı

İsrail qüvvələrinin Qəzza zolağında keçirdiyi hərbi əməliyyatlar nəticəsində həlak olan fələstinlilərin sayı 34,5 minə yaxınlaşır.
Bu rəqəmləri Qəzzanın Səhiyyə Nazirliyi teleqramda bildirib.
“İsrailin təcavüzü nəticəsində oktyabrın 7-dən bəri 34 454 nəfər şəhid olub, daha 77 575 nəfər yaralı var”, – məlumatda deyilib.
Qeyd olunub ki, son sutkada anklavda 66 nəfər ölüb, 138 nəfər yaralanıb.

Qəzzada ölənlərin sayı açıqlandı

28-04-2024, 13:38

Türkiyə ilə sərhəd məntəqəsi istismara hazırdır - Ermənistan XİN

Ermənistan tezliklə Türkiyəyə iki ölkə arasındakı sərhəddə yerləşən Ani körpüsünün bərpası məsələsində öz yanaşmalarını çatdıracaq.
Bu barədə ölkənin Xarici İşlər Nazirliyi bildirib.
Məlumata görə, Türkiyə Ani körpüsünün bərpasına dair protokolu Ermənistana təhvil verib. Hazırda sənəd üzərində iş yekunlaşmaq üzrədir və yaxın vaxtlarda Türkiyə tərəfinə göndəriləcək.
Marqara-Əlican keçid məntəqəsinə gəlincə, orada təmir işləri yekunlaşıb. Sərhəd məntəqəsi istismara hazır vəziyyətdədir.

Türkiyə ilə sərhəd məntəqəsi istismara hazırdır - Ermənistan XİN

28-04-2024, 13:20

Stokholmda yenə Quran yandırdılar

İsveçli fəal Ceyd Sandberq Stokholmda növbəti Quran yandırma aksiyası keçirib.
Aksiya İsveç polisinin müşahidəsi altında keçirilib.
Aprelin 26-da Quran yandırma aksiyası Stokholmun rayonlarının birində olub. Ceyd Sandberq mayın 3-də Malmödə anoloji aksiya keçirəcəyini bildirib.

Stokholmda yenə Quran yandırdılar

28-04-2024, 12:41

Mikayıl Cabbarov “Saudi Aramco” prezidenti ilə görüşdü

İqtisadiyyat naziri Mikayıl Cabbarov Səudiyyə Ərəbistanına səfəri çərçivəsində krallığın “Saudi Aramco” şirkətinin prezidenti və baş icraçı direktoru Amin Nasserlə görüşündə enerji sahəsində birgə fəaliyyət imkanlarını nəzərdən keçirib.
Bu barədə nazir sosial şəbəkədə bildirib.
“Səudiyyə Ərəbistanı Krallığına səfərimiz çərçivəsində "Saudi Aramco" şirkətinin prezidenti və baş icraçı direktoru Amin H. Nasser ilə görüşdə ölkəmizdə xarici sərmayədarlar üçün yaradılmış şərait, energetika sektorunda birgə fəaliyyət imkanları və hasilat layihələri üzrə əməkdaşlıq potensialı barədə müzakirələr apardıq.”, – iqtisadiyyat naziri qeyd edib.
Xatırladaq ki, daha əvvəl iqtisadiyyat naziri Mikayıl Cabbarov Səudiyyə Ərəbistanında keçirilən Dünya İqtisadi Forumunun “Qlobal əməkdaşlıq, artım və enerji inkişafı” tədbirində iştirak edəcəyini bildirmişdi.

Mikayıl Cabbarov “Saudi Aramco” prezidenti ilə görüşdü

28-04-2024, 12:22

Sabahın havası - 30 dərəcə isti olacaq

Aprelin 29-da Bakıda və Abşeron yarımadasında havanın yağmursuz keçəcəyi gözlənilir.
Milli Hidrometeorologiya Xidmətindən bildirilib ki, sabah mülayim cənub-şərq küləyi əsəcək.
Havanın temperaturu gecə 13-18° isti, gündüz 25-30° isti olacaq. Atmosfer təzyiqi normadan yüksək 765 mm civə sütunu olacaq. Nisbi rütubət gecə 50-60%, gündüz 30-40% olacaq.
Azərbaycanın rayonlarında hava şəraiti əsasən yağmursuz keçəcək. Lakin gündüz saatlarında bəzi dağlıq ərazilərdə qısamüddətli az yağıntılı olacağı, şimşək çaxacağı ehtimalı var. Gecə və səhər bəzi yerlərdə arabir duman olacaq. Mülayim şərq küləyi əsəcək.
Havanın temperaturu gecə 12-17° isti, gündüz 26-31° isti, dağlarda gecə 9-14° isti, gündüz 15-20° isti olacaq.

Sabahın havası - 30 dərəcə isti olacaq