11-03-2025, 17:03
Şimali Makedoniya Prezidenti Heydər Əliyevin məzarını ziyarət edib
Ölkəmizdə rəsmi səfərdə olan Şimali Makedoniya Respublikasının Prezidenti Qordana Silyanovska-Davkova martın 11-də Fəxri xiyabana gələrək xalqımızın Ümummilli Lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə əklil qoyub.
Görkəmli oftalmoloq-alim, akademik Zərifə xanım Əliyevanın da xatirəsi anılıb, məzarı üzərinə tər çiçəklər düzülüb.
11-03-2025, 16:50
Paşinyan AŞ baş katibi ilə Ermənistan-Azərbaycan məsələsini müzakirə etdi
Ermənistanın Baş naziri Nikol Paşinyan Avropa Şurasının (AŞ) baş katibi Alen Berset ilə telefon danışığı aparıb.
Həmsöhbətlər Ermənistan-AŞ tərəfdaşlığı və təşkilatın dəstəyi ilə Ermənistanda həyata keçirilən islahatlarla bağlı məsələləri müzakirə ediblər.
Ermənistanla Azərbaycan arasında sülhün bərqərar olması və regional sabitliklə bağlı məsələlərə də toxunulub.
11-03-2025, 16:37
Şimali Makedoniya və Azərbaycan arasında bu şəxslər üçün viza tələbi ləğv edilir
"Mən qarşımda xarici işlər nazirini görürəm, biz dərhal diplomatik və xidməti pasport sahibləri üçün viza tələbinin tətbiqi kimi təəccüblü bir vəziyyətə son qoyacağıq".
Bu sözləri Azərbaycan və Şimali Makedoniya prezidentlərinin mətbuata bəyanatı zamanı Qordana Silyanovska-Davkova deyib.
"Zənnimcə, bu, nə Şimali Makedoniyanı, nə də Azərbaycanı qane edən vəziyyət deyil və bu addımın atılması iki xalq arasında yaxınlaşmaya xidmət edəcəkdir. Ümid edirəm ki, biz Azərbaycanın mədəniyyətini də tanımağa davam edəcəyik. Bundan əlavə, elm sahəsində də universitetlərimiz arasında əməkdaşlığın qurulmasına nail ola bilərik", - bildirib.
11-03-2025, 16:34
Əmlak Məsələləri Dövlət Xidmətinin vəzifələri artırıldı
Prezident İlham Əliyev 12 may 2020-ci il tarixli fərmanı ilə təsdiq edilmiş “İqtisadiyyat Nazirliyi yanında Əmlak Məsələləri Dövlət Xidmətinin Əsasnaməsi”ndə dəyişiklik edib.
Bununla bağlı dövlət başçısı yeni fərman imzalayıb.
Fərmana əsasən, Dövlət Xidmətinin vəzifələrinə "üzərinə həbs qoyulmuş əmlakın idarə edilməsi çərçivəsində əmlakın satılmasına, icarəyə və ya idarəetməyə verilməsinədək əmlaka qulluqla əlaqədar tədbirləri və üzərinə həbs qoyulmuş əmlakın idarə edilməsini təşkil etmək, habelə əmlakın idarə edilməsi ilə bağlı rəy vermək" əlavə olunub.
11-03-2025, 16:14
Hökumətin parlamentə təqdim edəcəyi hesabatda nələr var... - Detallar AÇIQLANDI
Üç gün sonra hökumət Milli Məclisə hesabat verəcək. Nazirlər Kabinetinin 2024-cü ildə fəaliyyəti haqqında hesabat artıq Milli Məclisə daxil olub.
Hesabat parlamentin martın 14-də keçiriləcək plenar iclasında müzakirə ediləcək. İclasda Baş nazir Əli Əsədov, nazirlər, komitə rəhbərləri və digər vəzifəli şəxslərin iştirakı nəzərdə tutulub.
Qeyd edək ki, “Azərbaycan Respublikasının Milli Məclisinin Azərbaycan Respublikasının Nazirlər Kabinetinə etimad məsələsinin həll edilməsi hüququnun əlavə təminatları haqqında” Konstitusiya Qanununun 1-ci maddəsinə əsasən, Nazirlər Kabineti hər il Milli Məclisin yaz sessiyasının beşinci iclasında fəaliyyəti haqqında hesabat verir.
Hesabatda hökumətin 2024-cü ildə gördüyü işlər, ölkənin sosial-iqtisadi vəziyyəti ilə bağlı ən müxtəlif məsələlər öz əksini tapıb.
Milli Məclisin İqtisadi,siyasət, sənaye və sahibkarlıq komitəsinin sədr müavini Azər Badamov hesabatla tanış olduğunu bildirib. O, Nazirlər Kabinetinin hesabatının məqbul olduğunu deyib.
Deputatın sözlərinə görə, 2024-cü ildə Nazirlər Kabinetinin fəaliyyəti haqqında bütün məqamlar hesabatda qeyd olunub.
"İlk növbədə büdcə ilinin uğurla başa çatması, Böyük Qayıdışa dair dövlət proqramının yüksək formada icra edilməsinin davam etdirilməsi, keçmiş məcburi köçkünlərin öz doğma yurdlarına qayıtması, regionlarda sosial infrastruktur layihələrin davam etdirilməsi-bütün bunlar təbii ki, hökumətin səmərəli fəaliyyətinin nəticəsi və cənab Prezidentin müəyyənləşdirdiyi siyasi, iqtisadi kursun uğurla davam etdirilməsinin göstəricisidir. Hesabat Milli Məclisin plenar iclasında dinləniləcək, millət vəkilləri öz fikirlərini bildirib, təkliflərini səsləndirəcək. Həmişə olduğu kimi konstitusiyaya uyğun hesabatın dinlənilməsi həyata keçiriləcək və parlament hesabata öz münasibətini bildirəcək”.
A.Badamov vurğulayıb ki, hesabata ilkin münasibət müsbətdir:
“2024-cü ili uğurla başa çatdıra bildiksə, bu, hökumətin apardığı sosial-iqtisadi siyasətin düzgün olduğunu göstərir. Ətrafımızdakı ölkələrə baxdıqda, həmin ölkənin milli valyutanın inflyasiyaya uğraması, iqtisadiyyatlarında inflasiya müşahidə olunması fonunda Azərbaycan iqtisadiyyatı sabitliyini və dinamik inkişafını qoruyub saxlaya bilmişdi”.
11-03-2025, 16:06
İrandan Azərbaycana 10 kq yaxın narkotiki keçirməyə cəhd göstərən şəxslər saxlanıldı
Külli miqdarda narkotik vasitəni ölkə ərazisinə keçirməyə cəhd göstərən şəxslər saxlanılıb.
Bu barədə Dövlət Sərhəd Xidmətindən məlumat verilib.
Dövlət sərhədinin etibarlı mühafizəsinin təmin edilməsi, qaçaqmalçılıq, narkotik vasitələr, psixotrop maddələr və onların prekursorlarının qanunsuz dövriyyəsinə qarşı mübarizə tədbirləri davam etdirilir.
Mart ayının 9-da Dövlət Sərhəd Xidmətinin Sərhəd Qoşunları Komandanlığının “Göytəpə” sərhəd dəstəsinin xidməti ərazisində sərhəd naryadı tərəfindən 2 (iki) nəfər naməlum şəxsin İrandan Azərbaycan Respublikası istiqamətində dövlət sərhədini pozması müşahidə edilmişdir.
Keçirilmiş sərhəd axtarışı və əməliyyat tədbirləri nəticəsində dövlət sərhədindən ümumi çəkisi 9 kiloqram 69 qram narkotik vasitəni (9 kq 60 qram marixuana; 9 qram tiryək) ölkə ərazisinə keçirməyə cəhd göstərən İran İslam Respublikası vətəndaşları - 1999-cu il təvəllüdlü Cavadi Məmmədreza Məhəmməd və 2001-ci il təvəllüdlü Mirzadeh Milad Cəlal saxlanılmışdır.
Fakt üzrə əməliyyаt-istintaq tədbirləri dаvаm еtdirilir.
11-03-2025, 16:00
Bu yolda hərəkət tam məhdudlaşdırılır - Sürücülərin nəzərinə!
Sabah saat 09:00-dan 23:00-a qədər Bakının Nəsimi rayonunun Cəlil Məmmədquluzadə küçəsində aparılacaq təmir işləri ilə əlaqədar olaraq, nəqliyyat vasitələrinin hərəkəti sözügedən küçənin Abbas Səhhət küçəsindən Hənifə Ələsgərov küçəsinə qədər olan hissəsində tam məhdudlaşdırılacaq.
Bu barədə Azərbaycan Avtomobil Yolları Dövlət Agentliyindən məlumat verilib.
"Sürücülərdən aparılan işlərə anlayışla yanaşmaları, qeyd olunan müddət ərzində hərəkət istiqamətlərinə uyğun alternativ yollardan istifadə etmələri xahiş olunur", - məlumatda qeyd olunub.
11-03-2025, 15:44
Pakistanda 450 nəfər girov götürüldü
Pakistanın cənub-qərbində yerləşən Bəlucistan əyalətində silahlılar qatara hücum edib.
Bildirilir ki, qatardakı 450-yə yaxın sərnişin girov götürülüb. Hücum zamanı sürücü yaralanıb. Hücuma görə məsuliyyəti separatçı Bəlucistan Azadlıq Ordusu qruplaşması öz üzərinə götürüb.
Qrup dəmiryol relslərini partladıb və "Sibinin ucqar bölgəsində (Bəlucistan şəhəri) qatara nəzarət edir". Adı açıqlanmayan polis zabiti AFP-yə bildirib ki, qatar “dağlarla əhatə olunmuş tunelin qarşısında” ilişib. Yaxınlıqdakı xəstəxanalarda fövqəladə vəziyyət elan edilib.
Qeyd edək ki, Bəlucistan Pakistanın ən böyük və ən yoxsul əyalətlərindən biridir. Bir neçə onilliklərdir ki, Bəlucların separatçı qrupları (Pakistanda təxminən 7 milyon bəluc yaşayır) əyalətdə fəallıq göstərirlər. Bəlucistan Azadlıq Ordusu 1970-ci illərin əvvəllərində yaradılıb. Üzvləri tərəfindən həyata keçirilən hücumlara görə Pakistan, ABŞ, Böyük Britaniya, Avropa Birliyi və Çində terror təşkilatı kimi tanınıb.
11-03-2025, 15:33
Qarayazı qoruğunda yanğın
Qarayazı Dövlət Təbiət Qoruğunda yanğın baş verib.
Fövqəladə Hallar Nazirliyinin Mətbuat xidmətindən verilən məlumata görə, “112” qaynar telefon xəttinə Qarayazı Dövlət Təbiət Qoruğunun Ağstafa rayonu, Soyuqbulaq kəndi ərazisinə düşən hissəsində yanğın baş verməsi barədə məlumat daxil olub və dərhal FHN-in Dövlət Yanğından Mühafizə Xidmətinin qüvvələri əraziyə cəlb olunub.
Hazırda yanğının söndürülməsi istiqamətində tədbirlər davam etdirilir.
11-03-2025, 15:25
Azərbaycan qazı bir çox Avropa ölkəsinin enerji təhlükəsizliyini təmin edir
Bu gün Azərbaycan qazı bir çox Avropa ölkəsinin enerji təhlükəsizliyini təmin edir.
Bu barədə Azərbaycan Prezidenti İlham Əliyev Şimali Makedoniya Prezidenti Qordana Silyanovska-Davkova ilə mətbuata bəyanatında bildirib.
“Biz Avropadakı tərəfdaşlarımızın xahişlərinə hər zaman böyük diqqətlə yanaşmışıq”, - deyən dövlətimizin başçısı əlavə edib.
Azərbaycan Prezidenti, həmçinin vurğulayıb:
“Yəni, energetika sahəsində ikitərəfli formatda əməkdaşlıq bizim üçün çox önəmlidir və mən ümid edirəm ki, bu praktiki əməkdaşlıq digər sahələrdə də əməkdaşlığa gətirib çıxaracaq”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!