CHP-dən Zəngəzur açıqlaması: Azərbaycanın nəzarətində olsun

Cənubi Qafqaz və Orta Asiya bölgəsini əhatə edən geosiyasi proseslər, xüsusən də Zəngəzur dəhlizi ilə bağlı perspektivlər Türkiyədə də diqqətlə izlənilir.
Türkiyənin ana müxalifət partiyası olan Cümhuriyyət Xalq Partiyasının (CHP) xarici siyasət koordinatoru İlhan Üzgel Zəngəzur dəhlizinin təkcə regional deyil, beynəlxalq əhəmiyyətə malik olduğunu bildirib.
“Cənubi Qafqaz bölgəsində sülh və sabitliyin davam etməsi bizim üçün önəmlidir. Belə bir mühitdə region ölkələri sahib olduqları potensialı daha səmərəli şəkildə həyata keçirə bilər. Biz bu sabitliyin qorunmasını və inkişaf etdirilməsini dəstəkləyirik” – deyə Üzgel vurğulayıb.
CHP rəsmisi Azərbaycanın Türkiyə üçün qardaş və etibarlı tərəfdaş olduğunu xüsusi qeyd edib:
“Azərbaycan bizim üçün sadəcə dost deyil, qardaş ölkədir. Biz hər zaman Azərbaycanın təhlükəsizlik və rifah içində olmasını istəyirik. Çünki Azərbaycanın təhlükəsizliyi Türkiyənin təhlükəsizliyidir. Türk xalqının dünyada ən çox güvəndiyi xalq azərbaycanlı qardaşlarımızdır”.



İlhan Üzgel Zəngəzur dəhlizi layihəsinin region üçün böyük strateji və iqtisadi əhəmiyyət daşıdığını bildirib:
“Zəngəzur dəhlizini biz yalnız Azərbaycanın iki parçasını birləşdirən layihə kimi deyil, eyni zamanda Türkiyədən Orta Asiyaya açılan strateji koridor, Türk dünyasını birləşdirən mühüm bir körpü kimi qiymətləndiririk. Bu layihə təkcə Azərbaycan və Türkiyəyə deyil, bütün bölgəyə iqtisadi fayda gətirəcək bir fürsətdir”.
CHP rəsmisi qeyd edib ki, bu dəhlizin tezliklə açılması həm Naxçıvanla Azərbaycanın əsas hissəsi arasında nəqliyyatı asanlaşdıracaq, həm də Türkiyə ilə Azərbaycan arasındakı əlaqələri yeni mərhələyə daşıyacaq:
“Zəngəzur dəhlizi həmçinin Orta Asiya ölkələrinin də Türkiyə və Azərbaycanla bağlarını möhkəmləndirəcək, regional əməkdaşlığa ciddi töhfə verəcək. Bu səbəbdən də biz bu prosesin sürətlə və Azərbaycanın maraqları nəzərə alınmaqla həll edilməsinin tərəfdarıyıq”.
İlhan Üzgel əlavə edib ki, CHP olaraq istər müxalifətdə, istərsə də gələcəkdə iqtidarda olsunlar, Azərbaycanın yanında olmağa davam edəcəklər:
“Biz partiya olaraq bu kimi strateji dəhlizlərin üçüncü ölkələrin nəzarətində deyil, Azərbaycanın razılığı və maraqları çərçivəsində idarə olunmasını dəstəkləyirik. Ən böyük arzularımızdan biri bu xəttin bir an öncə istifadəyə verilməsi və regionda yeni bir iqtisadi canlanmanın başlanmasıdır”.

SOCAR Yaxın Şərqdə fəaliyyətini genişləndirir

Azərbaycan artıq 14 dövləti təbii qaz ilə təchiz edir. Bu, Azərbaycanı həm dünya, həm də regional miqyasda vacib qaz təchizatçısına, eləcə də enerji təhlükəsizliyinə töhfə verən dövlətə çevirir.
Bunu iqtisadiyyat naziri Mikayıl Cabbarov Azərbaycandan Türkiyə üzərindən Suriyaya qazın nəqletmə mərasimi ilə bağlı keçirilən tədbirdə jurnalistlərə açıqlaması zamanı bildirib.
Nazirin sözlərinə görə, görülən işlərin müddətinə nəzər saldıqda həyata keçirilən işlər beynəlxalq əməkdaşlıq və Azərbaycanın bugünkü nüfuzu olmasaydı, mümkün olmazdı.
“SOCAR-ın fəaliyyəti nə qədər mürəkkəb olsa da, qısa müddətdə bu məsələnin logistika, kommersiya şərtlərinin, qaz həcmlərinin müəyyənləşdirilməsi işlərinin bünövrəsində Azərbaycanın bu sahədə olan nailiyyətləri durur. Sırf kommersiya nöqteyi-nəzərdən onu da qeyd etmək istəyirəm ki, bu təchizatın həyata keçirilməsi ilə Azərbaycan yalnız qərb istiqamətini deyil, cənub və şərq istiqamətini də, rəqabətli şəkildə öz enerjisi ilə təchiz edə bilməsini əyani nümayiş etdirib. Ümidvarıq ki, bu istiqamətdə orta və uzunmüddətli planlarda fəaliyyət davam etdiriləcək”, - deyə nazir əlavə edib.
Suriyanı qaz ilə Azərbaycanda fəaliyyət göstərən hər hansı xarici konsorsiumların deyil, məhz dövlət şirkəti SOCAR-ın təchiz etməsinə diqqət çəkən nazir bildirib ki, Yaxın Şərq bazarında, ümumiyyətlə, bu coğrafiyada Azərbaycan qazına olan ehtiyac, eyni zamanda, Azərbaycan qazının rəqabətli şərtlərlə Suriyaya nəqli imkanı bu layihə ilə təsbit edilib: “Bu müqavilənin reallaşması ilə bağlı türkiyəli qardaşlarımıza, türk həmkarlarımıza təşəkkürümü bildirmək istəyirəm. Çünki bu qazın tranziti üçün onlar münbit şərait yaradıblar. Gələcəkdə bu geniş coğrafiyada SOCAR şirkətinin fəaliyyətinin genişləndirilməsini planlaşdırırıq. Hədəf odur ki, öz üzərimizə götürdüyümüz öhdəliklər tam yerinə yetirilsin, ölkəmizin nüfuzuna xidmət etsin, kommersiya nöqteyi-nəzərdən faydalı nəticələr versin”.

Atəşkəs olmazsa ABŞ Ukraynaya hərbi yardım edəcək

ABŞ prezidenti Donald Tramp Rusiyanın Ukraynaya qarşı kütləvi hücumlarını “iyrənc” adlandıraraq, Moskvanın avqustun 8-nə qədər atəşkəs razılaşmasına gəlmədiyi təqdirdə yeni sanksiyalarla üzləşəcəyini bildirib.
Məsələ ilə bağlı sabiq xarici işlər naziri Tofiq Zülfüqarov bildirib ki, Trampın təklifi tərəflərin hazırda olduğu mövqelərdə qalmaqla atəşkəsə nail olunmasına yönəlib:
“Trampın təklif etdiyi plan ondan ibarət idi ki, hər kəs hazırda hansı mövqedədirsə, orada qalaraq atəşkəs əldə olunsun. Amma hazırda Rusiya fərqli mövqe nümayiş etdirir və bu, təşəbbüsün icrasını mümkünsüz edir” – deyə sabiq nazir bildirib.
O qeyd edib ki, Trampın avqustun 8-nə qədər verdiyi vaxt çərçivəsi başa çatarsa, Birləşmiş Ştatlar yalnız sanksiyalarla kifayətlənməyə bilər:
“İstisna etmirəm ki, həmin tarixdən sonra ABŞ yalnız sanksiyalar deyil, eyni zamanda Ukraynaya yenidən silah satışına da başlayacaq. Hazırda təmaslar davam edir və Trampın nümayəndəsinin yaxın günlərdə Moskvaya səfəri nəzərdə tutulur. Yaxın perspektivdə proseslərin hansı istiqamətdə inkişaf edəcəyini müşahidə etməliyik”.



Zülfüqarov bildirib ki, Rusiyanın həm hərbi, həm də iqtisadi imkanları ciddi şəkildə azalır:
“Rusiya üçün atəşkəsin özü də artıq zərurətə çevrilib. İqtisadi baxımdan da vəziyyət ağırlaşır. Neftin əsas alıcılarından olan Hindistan belə Moskva ilə əməkdaşlıq məsələsində tərəddüd göstərir. Davamlı sanksiyalar Rusiya üçün çox ciddi nəticələr doğurur”.
Sabiq nazir bildirib ki, son vaxtlar döyüş xəttində mövcud olan taktiki dəyişikliklər də nəzərəçarpacaqdır:
“Hazırda yerüstü toqquşmaların intensivliyi azalıb. Tərəflər daha çox artileriya, raket və dron zərbələrinə üstünlük verirlər. Belə şəraitdə ABŞ tərəfindən Ukraynaya göstəriləcək hərbi yardım müharibənin gedişini dəyişə bilər”.
Tofiq Zülfüqarovun fikrincə, Ukrayna artıq Rusiyanın bir sıra kommunikasiya xətlərinə ciddi zərbələr vurub və bu tendensiya davam edərsə, Moskvanın mövqeyi daha da zəifləyəcək.

Təkəri partlayan yük maşını aşdı, sürücü yaralandı

Tovuzda yük maşını aşıb,xəsarət alan var.
Hadisə Bakı-Qazax magistral yolunun rayondan keçən hissəsində baş verib.
Belə ki, hərəkətdə olan yük avtomobili idarəetmədən çıxıb. Nəticədə yük maşını əvvəlcə yol kənarındakı bardürə dəyib, daha sonra isə yolda çıxaraq aşıb.
Qəza zamanı sürücü 1994-cü il təvəllüdlü Z.Şabanlı xəsarət alaraq xəstəxanaya yerləşdirilib. Məlumata görə, qəzaya səbəb avtomobilin təkərinin partlaması olub.
Faktla bağlı araşdırma aparılır.

Azərbaycan gündəlik Suriyaya 3,4 milyon kubmetrdir qaz nəql edəcək

Azərbaycan qazını Suriyaya nəql edən boruların günlük potensialı 6 milyon kubmetrdir. Sadəcə, ilkin mərhələdə 3,4 milyon kubmetr qazın nəqli nəzərdə tutulur.
Bunu Suriyanın energetika naziri Məhəmməd Əl-Bəşir Azərbaycan qazının Türkiyə ərazisindən keçməklə Suriyaya nəqlinə dair keçirilən mərasimdən sonra jurnalistlərə açıqlamasında deyib.
“Azərbaycanlı qardaşlarımıza bu dəstəyə görə təşəkkür edirəm. Təbii ki, bu razılaşma hər iki ölkə başçısının sonuncu görüşündən sonra baş tutub. Bu, birbaşa Suriya xalqının rifahına və elektrik enerjisi ilə davamlı təminatına xidmət göstərəcək. Bu layihə sonuncu deyil, ilk layihədir. Bundan sonra da bizim birgə layihələrimiz olacaq. Azərbaycanın iqtisadiyyat naziri, qardaşım Mikayıl Cabbarov ilə də bir az öncə görüləcək işlərlə bağlı müzakirələr apardıq. Texniki qrupların qarşılıqlı şəkildə səfərləri təşkil olunacaq. Azərbaycanın Suriyada investisiya ilə bağlı proqram və layihələrini müzakirə etdik”, - deyə Suriyanın energetika naziri diqqətə çatdırıb.

"Azərbaycana görə Rusiya narahat olmasın" - Rus İcmasının sədrindən AÇIQLAMA

Bir müddətdir Rusiyada bəzi media orqanlarında Azərbaycan əleyhinə təbliğat materiallar dərc edilir, bəzi rusiyalı ekspertlərin və siyasətçilərin ölkəmizə qarşı ittiham xarakterli əsassız çıxışları yayımlanır.
Rus icmasının Azərbaycandakı rəhbəri, deputat Mixail Zabelin məsələylə bağlı açıqlama verib:
“Rusiya tərəfini sakitləşdirmək lazımdır. Birincisi, burada Azərbaycan Respublikasının Konstitusiyası var. Respublikamızın ərazisində yaşayan həm Azərbaycan, həm də digər xalqların əhalisinin hüquqları bu qanunlarla faktiki olaraq qorunur” – deyə o bildirib.
O qeyd edib ki, ən çətin illərdə belə, rus xalqı Azərbaycan xalqı ilə burada əl-ələ verib: “Azərbaycan həmişə ədalətli siyasətin tərəfində olub. Burada yüz illərdir ki, rus əhalisi azərbaycanlı əhalinin düşmənçiliyi ilə üzləşməməyib. Azərbaycan cəmiyyəti özü çox tolerantdır və bunu uzun onilliklər, əsrlər boyu müşahidə etmək olar ki, azərbaycanlılarla rus milliyətlə Azərbaycan vətəndaşları arasında heç vaxt qarşıdurma olmayıb”.
Azərbaycan hökumətinə, Heydər Əliyev Fonduna baxın, onlar Rus pravoslav kilsələrinə təmir edərkən nə qədər diqqətlə yanaşırlar.
“İstər Azərbaycan hökuməti, istərsə də onun xalqı, Azərbaycanda yaşayan rus xalqına hətta indiki dövrdə - ölkələr arasında siyasi qarşıdurma şəraitində belə, heç bir pis niyyət göstərilməyib”.
Rus icmasının sədri vurğulayıb ki, Azərbaycanda biz harmoniya içində yaşayırıq və özlüyündə Azərbaycan xalqının bu cür tolerant multikultural münasibəti bizə Azərbaycan Respublikasının tamhüquqlu vətəndaşı olmaq imkanı verir. Azərbaycanlılar burada yaşayan ruslara qarşı həmişə çox yaxşı davranıblar. Bunun əksini heç vaxt eşitməmişəm, görməmişəm.
“Azərbaycan Respublikası cəmiyyəti daxilində heç bir qarşıdurma yoxdur, Rusiyanın buna görə narahat olmağına dəyməz”- deyə sonda o qeyd edib.

Zakir Həsənov türkiyəli şəhid ailələri ilə görüşdü - FOTO

Avqustun 2-də Azərbaycan Respublikasının müdafiə naziri general-polkovnik Zakir Həsənov və müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev “YAŞAT” Fondunun dəvəti ilə ölkəmizdə səfərdə olan türkiyəli şəhid ailələrinin üzvləri ilə görüşüb.
Nazirlikdən verilən məlumata görə qonaqları salamlayan nazir onları Azərbaycanda görməkdən məmnun olduğunu bildirib. Azərbaycan və Türkiyə şəhidlərinin xatirəsinin hər zaman uca tutulduğunu qeyd edən nazir hər iki ölkə başçısının müvafiq göstərişlərinə əsasən, şəhid ailələrinə xüsusi həssaslıqla yanaşıldığını, onların daim diqqət və qayğı ilə əhatə olunduğunu vurğulayıb.
Görüş zamanı qarşılıqlı ziyarətlərin təşkilinin ölkələrimiz arasında mövcud tarixi dostluğun, əməkdaşlığın daha da inkişaf etdirilməsi və əlaqələrin möhkəmləndirilməsinə xidmət etdiyi qeyd olunub.
Qardaş ölkənin nümayəndələri səmimi qəbula və göstərilən qonaqpərvərliyə görə müdafiə nazirinə minnətdarlıqlarını ifadə ediblər.
Qeyd edək ki, qonaqlar səfər çərçivəsində ölkəmizin qədim və müasir memarlığın ahəngini özündə birləşdirən tarixi və mədəni abidələrlə zəngin məkanlarını ziyarət edir, Azərbaycanın şanlı tarixi və zəngin mədəniyyəti ilə yaxından tanış olurlar.

Azərbaycanda deputat xadiməni MƏHKƏMƏYƏ VERDİ

Naxçıvan Ali Məclisinin deputatı Əli Abbasov sosial şəbəkələrdə haqqında yayılan məlumatlara görə məhkəməyə müraciət edib.
Modern.az-ın məlumatına görə, deputat 27 iyun 2025-ci il tarixində xadimə işləyən Pərvin Məmmədovanın (şərti ad) onun şərəf və ləyaqətini alçaldan, nüfuzuna xələl gətirən, böhtan xarakterli paylaşımlar etdiyini əsas gətirərək, həmin şəxs barəsində xüsusi ittiham qaydasında şikayət verib.
Ərizədə qeyd olunur ki, Pərvin adlı şəxs deputat Əli Abbasovun guya qızının evinə zorla daxil olması, sərxoş halda avtomobil idarə etməsi, müəllim adına layiq olmaması və əvvəlki illərdə Şərur rayonunda bir neçə ailəni dağıtması kimi əsassız ittihamlar irəli sürüb.
Deputatın nümayəndəsi şikayət ərizəsini düzgün hazırlamadığı üçün məhkəmə işi icraata götürməkdən imtina edib.

Türkiyəli nazir Zəngəzur dəhlizindən danışdı - "Yaxın zamanda..."

Yaxın zamanda Türkiyəyə bütün enerji resursları Zəngəzur dəhlizi üzərindən ötürüləcək və logistik yollar birləşdiriləcək.
Bunu Türkiyə-Suriya qaz boru kəmərinin açılış mərasimində Türkiyənin energetika və təbii sərvətlər naziri Alparslan Bayraktar azərbaycanlı jurnalistlərə açıqlamasında bildirib.
O qeyd edib ki, hazırda Azərbaycandan Türkiyəyə elektrik enerjisi Gürcüstan ərazisindən keçməklə ötürülür.
Bayraktarın sözlərinə görə, Orta Asiyada yerləşən digər enerji mənbələri və logistik marşrutlar Azərbaycan üzərindən Türkiyəyə, oradan isə Avropaya çatdırılacaq.
Nazir vurğulayıb ki, Azərbaycandakı təbii sərvətlər - neft, qaz, bununla yanaşı, elektrik enerjisinin Türkiyəyə ixracı ilə bağlı bütün layihələr birgə icra olunur. Bu istiqamətdə mühüm irəliləyişlərin olduğunu diqqətə çatdıran Bayraktar deyib: “Bu günədək həyata keçirilən layihələrə misal olaraq Bakı-Tbilisi-Ceyhan, Bakı-Tbilisi-Ərzurum kəmərləri, eləcə də Naxçıvan-Türkiyə elektrik interkonnektorunu qeyd edə bilərəm”.

Naxçıvanda “Lifan” yandı

Naxçıvan Muxtar Respublikasının Naxçıvan şəhərində “Lifan” markalı minik avtomobilinin salon hissəsi yanıb.
Avtomobilin qalan hissəsi yanğından mühafizə olunub.
Yanğın yanğından mühafizə bölmələri tərəfindən söndürülüb.