14-08-2025, 16:30
"Qarabağ"ın oyunundakı maskotla bağlı RƏSMİ AÇIQLAMA
UEFA Çempionlar Liqasının III təsnifat mərhələsində qarşı-qarşıya gələn "Qarabağ" Şkendiya” oyunu öncəsi hadisə yaşanıb. Sosial şəbəkədə yayılan iddialara görə, stadionda olan maskot qovulub.
"Qarabağ" FK-nın mətbuat katibi Anar Hacıyev qeyd edib ki, maskotun stadiondan qovulması ilə bağlı yayılan xəbərlər həqiqəti əks etdirmir:
"Maskot oyun bitənə, hətta azerkeşlər stadionu tərk edənə qədər stadionda olub. O öz fəaliyyətini davam etdirib. Orada başqa hər hansı məsələ yoxdur".
Qeyd edək ki, Tofiq Bəhramov adına Respublika stadionunda keçirlən matçda Ağdam təmsilçisi "Qarabağ" 5:1 hesabı ilə Şimali Makedoniya futbol klubu "Şkendiya"ya qalib. Görüşdə hesabı qonaqlar açıblar. 10-cu dəqiqədə Fabris Tamba adını tabloya yazdırıb. 5 dəqiqə sonra rəqibin heyətində Klisman Sake avtoqol müəllifi olmaqla hesaba tarazlıq gətirib. Daha sonra müvafiq olaraq fərqlənən Kadi Borges (18), Nəriman Axundzadə (33), Marko Yankoviç (35), Leandro Andrade (59) “Qarabağ”ın 5:1 hesablı qələbəsində pay sahibi olublar.
"Qarabağ"ın növbəti rəqibi Macarıstan futbol klubu “Ferensvaroş” olacaq.Qarabağ"ın "pley-off"da ilk oyunu avqustun 19-da Budapeştdə, cavab matçı avqustun 27-si Bakıda keçiriləcək.
14-08-2025, 15:40
Ərdoğan Özgür Özəldən 1 milyon tələb edir
Türkiyə Prezidenti Rəcəb Tayyib Ərdoğan Cümhuriyyət Xalq Partiyasının (CHP) sədri Özgür Özələ qarşı 1 milyon lirəlik təzminat iddiası qaldırıb.
Bu barədə Prezidentin vəkili Hüseyn Aydın məlumat verib.
Onun sözlərinə görə, iddia Özgür Özəlin 13 avqust 2025-ci il tarixində Bayrampaşada keçirilən mitinqdəki fikirləri zamanı və eyni gün Marmara Həbsxanasının çıxışında mətbuata açıqlamasında Rəcəb Tayyib Ərdoğanı hədəf alan əsassız ittihamları səbəbilə qaldırılıb.
Bildirilib ki, bundan əlavə, Prezidentə təhqir ittihamı ilə bağlı Ankara Baş Prokurorluğuna da şikayət ərizəsi verilib.
14-08-2025, 15:03
Azərbaycan hərbçiləri Pakistandakı paradda - VİDEO
Avqustun 13-də Pakistan İslam Respublikasının paytaxtı İslamabad şəhərində ilk dəfə "Müstəqillik günü" və "Haqqın qələbəsi"nə həsr edilmiş hərbi parad keçirilib.
Müdafiə Nazirliyindən verilən məlumata görə, paradı Pakistanın siyasi və hərbi rəhbərliyi ilə yanaşı, Azərbaycan Respublikası müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev, ölkəmizin Pakistan İslam Respublikasındakı səfirliyi və hərbi attaşelik aparatının nümayəndələri, eləcə də digər rəsmi qonaqlar izləyiblər.
Müxtəlif ölkələrin silahlı qüvvələrinin nümayəndələrinin iştirak etdiyi hərbi paradda ölkəmizi Azərbaycan Ordusunun parad heyəti təmsil edib.
14-08-2025, 14:26
Zelenski Londondadır - FOTO
Ukrayna prezidenti Volodimir Zelenski Londonda səfərdədir.
O, Böyük Britaniyanın baş naziri Key Starmerlə görüşüb.
Qeyd edək ki, Zelenski ötən gün Berlində səfərdə olub və Avropa liderləri ilə birgə ABŞ Prezidenti Donald Trampla danışıqlar aparıb.
14-08-2025, 14:05
[b]Trampın xanımı Baydenin oğlunu 1 milyardlıq təzminatla hədələdi[/b]
ABŞ prezidenti Donald Trampın həyat yoldaşı Melaniya eks-prezident Co Baydenin oğlu Hunteri Ceffri Epşteyn işi kontekstində onun barəsində böhtan xarakterli ifadələrə görə 1 milyard dollarlıq məhkəmə iddiası ilə hədələyib.
Bu barədə “Fox News” Melaniya Trampın vəkilinin məktubuna istinadən məlumat yayıb.
Məlumata görə, avqustun 5-də Hunter YouTube-da “Ovçu Bayden qayıdır” adlı video yerləşdirib, bundan sonra Melaniya videoda yalan ifadələrin olduğunu bildirib.
Vəkilin məktubunda deyilir: "Videoda mahiyyət etibarilə böhtan xarakterli yalan ifadələr var: "Epsteyn Melaniyanı Trampa təqdim etdi. Əlaqələr çox geniş və dərin görünür”".
Vəkil müvəkkilinin adından Hunterdən "dərhal yalan, böhtan, alçaldıcı və qızışdırıcı ifadələr verməkdən əl çəkməyi" tələb edib.
Co Baydenin oğlu Melaniyanın tələbini yerinə yetirməsə, sonuncu onu məhkəməyə vermək, 1 milyard dollar təzminat tələb etmək niyyətindədir. Şərtlərin yerinə yetirilməsi üçün son tarix avqustun 7-si idi.
Bundan əvvəl “The Washington Post” yazıb ki, Donald Tramp Epşteyn işi ilə bağlı administrasiyasının hərəkətlərindən narazılığını bildirib. Nəşrin yazdığına görə, o, mövzunun tez bir zamanda aradan qalxacağını gözləyən məmurların səhvlərindən və dəqiq strategiyasının olmamasından məyusdur.
14-08-2025, 00:48
Ağ Evdəki görüşdən yeni GÖRÜNTÜLƏR
Avqustun 8-də Vaşinqtonda Azərbaycan Prezident İlham Əliyevlə ABŞ lideri Donald Tramp arasında Ağ Evdə keçirilən görüşün geniş videosu yayılıb.
Videoda dövlət başçılarının olduqca səmimi dialoqu öz əksini tapıb.
Baku TV-yə istinadən həmin dialoqun tam versiyasını təqdim edirik:
14-08-2025, 00:20
Şamaxıda ağır qəza - ölən var
Şamaxı rayonunun Çöl Göylər kəndi ərazisində ölümlə nəticələnən yol-nəqliyyat hadisəsi baş verib.
İlkin məlumata görə, hərəkətdə olan minik avtomobili idarəetməni itirərək aşıb. Qəza nəticəsində müxtəlif dərəcəli ağır bədən xəsarətləri alan 23 yaşlı Leyla Qasımova hadisə yerində dünyasını dəyişib.
Tibbi Ərazi Bölmələrini İdarəetmə Birliyindən (TƏBİB) bildirilib ki, hadisə nəticəsində ümumilikdə 9 nəfər (4 kişi, 5 qadın) müxtəlif dərəcəli bədən xəsarətləri ilə Şamaxı Rayon Mərkəzi Xəstəxanasının Təcili Yardım şöbəsinə hospitalizasiya olunub.
Tibb müəssisəsində yaralılara bel və döş fəqərələrinin kompression sınıqları, sol bazu sümüyünün sadə və çoxqəlpəli sınıqları, bel, sol çiyin və sol diz nahiyəsinin yumşaq toxumalarının əzilməsi, qapalı kəllə-beyin travması, sağ göz ətrafı toxumalarda hematoma, eləcə də üz nahiyəsində çoxsaylı səthi sıyrıntılar diaqnozu qoyulub.
Zəruri tibbi yardım göstərildikdən sonra 2 nəfər ambulator müalicə üçün evə buraxılıb. 1983-cü il təvəllüdlü qadın isə ixtisaslaşdırılmış tibbi yardım məqsədilə Elmi Tədqiqat Travmatologiya-Ortopediya İnstitutuna göndərilib. Digər şəxslərin müalicəsi Təcili Tibbi Yardım şöbəsində davam etdirilir.
Daxili İşlər Nazirliyinin mətbuat xidmətinin regional qrupundan verilən məlumata görə, faktla bağlı ərazi üzrə polis orqanında cinayət işi başlanılıb və araşdırma aparılır.
13-08-2025, 23:51
Putin müharibəni dayandırmağa razı olmasa... - Tramp
ABŞ Prezidenti Donald Tramp cümə günü Alyaskada keçiriləcək görüş zamanı Rusiya Prezidenti Vladimir Putinin Ukraynadakı müharibəni dayandırmağa razı olmadığı təqdirdə, bunun Rusiya üçün çox ağır nəticələri olacağını deyib.
Bu barədə Tramp Vaşinqtondakı Kennedi Mərkəzində çıxışı zamanı keçirilən tədbirdə bildirib.
O, bunun yeni sanksiyalar və ya tariflər demək olduğuna dair sualdan yayınıb.
"Bu barədə nəsə deməyə məcbur deyiləm. Lakin bunun çox ağır nəticələri olacaq",- deyə Tramp qeyd edib.
13-08-2025, 23:34
Putin onlara güvənmir - Kreml elitası daxilində PARÇALANMA
Rusiyada iqtisadi vəziyyət getdikcə pisləşir, Ukrayna müdafiəsi isə möhkəm qalır. Bu şəraitdə Kreml elitası həm müharibədən qazandıqları imtiyazları qorumağa, həm də böyük insan və maliyyə itkilərinə görə məsuliyyətdən yayınmağa çalışır.
Nüfuzlu “Foreign Policy” jurnalında dərc edilən məqalədə deyilir ki, Rusiya Prezidenti Vladimir Putin elita içindəki parçalanmanın və gələcəyə dair narahatlığın rejimin birliyini sarsıda biləcəyindən ehtiyat edir.
Bu səbəbdən Kreml “milli təhlükəsizlik” adı altında misilsiz hüquqi mexanizmlər tətbiq edir. Məqsəd Qərblə əlaqədə və ya azacıq “sədaqətsizlikdə” şübhələnilən şəxslərin sərvətlərini müsadirə edib, vəsaiti daha az bacarıqlı olsa da Putinə açıq dəstək göstərənlərə ötürməkdir.
Yeni mexanizm Rusiya elitası daxilində “məhbus dilemması”na səbəb olub, burada ən təhlükəsiz yol nümayişkaranə sədaqət göstərmək və rəqibləri səssizcə zəiflətməkdir.
ABŞ üçün əsas məsələ bu daxili proseslərin Ukrayna müharibəsinin bitməsinə mane olmamasıdır. “Foreign Policy” yazır ki, Vaşinqton Kreml rəhbərliyini və sənaye elitasını müharibənin iqtisadi və siyasi qiyməti barədə narahat saxlamaqla, sülh danışıqlarında üstünlük qazana bilər. Bunun üçün “müharibənin memarları”na sanksiyalar davam etməli, müharibəyə açıq dəstək verməyənlər üçün isə yumşaq davranılacağı mesajı verilməlidir.
Putin 2022-də başladığı müharibəni siyasi zirvəsinin “tac qələbəsi” kimi görsə də, indi sistem onu qorumağa məcburdur. BBC və “Mediazona”nın hesablamalarına görə, 2025-ci ilin iyuluna qədər ən azı 165 min rus hərbçisi həlak olub. “Oryx” platforması isə 22 min hərbi texnika itkisini sənədləşdirib.
2024-də yüksək vəzifəli məmurlar arasında 122 cinayət işi açılıb, 100 nəfər korrupsiya ittihamı ilə həbs olunub. Müdafiə Nazirliyindən onlarla zabit işdən çıxarılıb. 2022-dən bəri strateji sektorlara bağlı 27 yüksək səviyyəli iş adamı müəmmalı şəkildə ölüb. İyulda nəqliyyat naziri Roman Starovoytun “intihar” etdiyi xəbəri yayılıb, ardınca nazirlikdə başqa bir yüksək vəzifəli şəxs qəfil infarktdan öldü. Elita daxilində artıq qorxu yaranıb: “Növbə məndədir?”
Müharibə bəzi dairələr üçün isə sərvət mənbəyinə çevrilib. Müdafiə sənayesi oliqarxları, istehsal müəssisələrinə ev sahibliyi edən qubernatorlar və Qərb aktivlərini ələ keçirən şəxslər böyük mənfəət qazanır. Onlar dövlət dəstəkli güzəştli hərbi kreditlər alır, amma qalan iqtisadiyyat üçün faiz dərəcələri 18–21% civarındadır.
Kreml sədaqətsizliyi cəzalandırmaq üçün sərvət bölgüsünü silah kimi istifadə edir. 2022-dən bəri ÜDM-in təxminən 2%-i (49 milyard dollar) həcmində aktivlər milliləşdirilib. Məsələn, Putinin partiyasının üzvü Konstantin Strukovun biznesləri, qızına kapital ötürdüyünə və xaricə pul çıxardığına görə, cəmi 9 günə dövlətə keçirilib.
Maliyyə naziri Anton Siluanov açıqlayıb ki, bu aktivlər sovet üsulu ilə müsadirə olunmayacaq, “etibarlı” yeni sahiblərə satılacaq. Beləliklə, strateji sektorlar sadiq elitaya paylanır.
ABŞ prezidenti Donald Tramp Putinə müharibəni bitirməsi üçün son tarix qoysa da, “Foreign Policy” hesab edir ki, hətta atəşkəs siqnalları belə Kreml daxilində mübarizəni qızışdıracaq. Müharibə zamanı əldə edilən aktivlər iqtisadiyyat daraldıqca başqalarının hədəfinə çevriləcək.
Vaşinqton üçün ən yaxşı strategiya tələsmədən, iqtisadi təzyiqi davam etdirərək rus elitasında müharibənin “udulmaz” olduğu qənaətini gücləndirməkdir. ABŞ həm sanksiyaları davam etdirib, həm də səssizcə müharibədən uzaq duranlara gələcəkdə Qərblə barışıq imkanı təqdim edə bilər.
Beləliklə, Putin öz mövqeyini qorumağa çalışsa da, “Foreign Policy”yə görə, onun ətrafındakı elita artıq gələcəyi düşünür və müharibənin davamı onların şəxsi sərvətləri üçün getdikcə daha böyük risk yaradır.
13-08-2025, 22:46
Şairin küçədə meyiti tapıldı
Şair, nasir, jurnalist Kəramət Şükürovun küçədə meyiti aşkarlanıb.
Bu barədə “Qobustan” dərgisinin əməkdaşı, yazıçı Oqtay Əhmədov sosial şəbəkədəki hesabında bildirib.
K.Şükürovun vəfat səbəbi məlum deyil.
Faktla bağlı araşdırmalar aparılır.
Qeyd edək ki, Kəramət Rza oğlu Şükürov 1 dekabr 1957- ci ildə Masallı rayonunun Göyçöl kəndində anadan olub.
Əmək fəaliyyətinə Göyçöl kənd orta məktəbində Azərbaycan dili və ədəbiyyatı müəllimi kimi başlayıb. 1987-ci ildən "Yazıçı" və "Elm" nəşriyyatlarında çalışıb, Azərbaycan Yazıçılar Birliyinin Natəvan adına klubunun direktoru olub. Bir müddət "Novruz", "Oğuz eli" qəzetlərində əməkdaşlıq edib. "Nəfəs", "Yeni quruluş" qəzetlərinin baş redaktoru, "Məqam" qəzetinin şöbə müdiri olub.
Tələbəlik illərindən hekayə və şeirləri dövri mətbuatda, "Ulduz" jurnalında və "Yaşıl budaqlar" almanaxında dərc olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!