17-01-2026, 21:10
Tramp 8 Avropa ölkəsinə tarif tətbiq etdi
Fevralın 1-dən ABŞ Danimarka, Norveç, İsveç, Fransa, Almaniya, Birləşmiş Krallıq, Hollandiya və Finlandiyanın ABŞ-a göndərdiyi bütün məhsullara 10 faiz tarif tətbiq ediləcək.
Bu barədə ABŞ Prezidenti Donald Tramp “Truth” sosial mediasında yazıb.
Tramp bu rəqəmi iyunun 1-dən etibarən 25 faizə qaldıracağını deyib. O əlavə edib ki, dünya sülhü təhlükədədir və bu tarif Qrenlandiyanın tam satınalma sazişi imzalanana qədər ödəniləcək.
17-01-2026, 20:51
Paşinyan Zəngəzur dəhlizi təcrübəsindən belə istifadə etmək istəyir
“Beynəlxalq Sülh və Rifah naminə Tramp Marşrutu” (TRIPP) layihəsi üzrə əldə olunacaq sərhəd və gömrük nəzarəti texnologiyalarının Ermənistanın digər keçid məntəqələri ilə yanaşı, İrəvanın Zvartnots Beynəlxalq Hava Limanında da tətbiqi planlaşdırılır.
Bu barədə Ermənistanın baş naziri Nikol Paşinyan Yüksək Texnologiyalar İttifaqının təşəbbüsü ilə keçirilən qeyri-rəsmi görüşdə bildirib.
Paşinyanın sözlərinə görə, TRIPP layihəsi (Zəngəzur dəhlizi) çərçivəsində sərhəd və gömrük nəzarəti sahəsində müasir texnoloji həllər tətbiq olunacaq və bu sistemlərin gələcəkdə Ermənistanın digər sərhəd-keçid məntəqələrində də istifadəsi nəzərdə tutulur.
Baş nazir vurğulayıb ki, sözügedən texnoloji yeniliklər ölkənin nəqliyyat və təhlükəsizlik infrastrukturunun modernləşdirilməsi baxımından xüsusi əhəmiyyət daşıyır.
Nikol Paşinyan yeni biometrik pasport sisteminin tətbiqinin vacibliyini də qeyd edib. Onun sözlərinə görə, bu sistem üzərində hazırda Fransanın Idemia konsorsiumu çalışır və layihə çərçivəsində əldə olunacaq texnologiyalarla uzlaşdırılacaq. Ermənistan hökuməti biometrik həllərin sərnişin axınının idarə olunması, təhlükəsizlik səviyyəsinin artırılması və prosedurların sürətləndirilməsi baxımından mühüm rol oynayacağını hesab edir.
17-01-2026, 20:26
Yeni müsəlman ittifaqı
Türkiyə müdafiə və təhlükəsizlik sahələrində Pakistan və Səudiyyə Ərəbistanı ilə əməkdaşlıq platformasının formalaşdırılmasına çalışır.
“Hürriyyət” qəzeti xəbər verir ki, bu təşəbbüslə bundan əvvəl Prezident Rəcəb Tayyib Ərdoğan çıxış edib.
Nəşrin yazdığına görə, regionda sabitliyin möhkəmləndirilməsi və kənar müdaxilələrin qarşısının alınması məqsədi daşıyan birgə mexanizmlərin yaradılmasına səy göstərilir.
“Türkiyədə dövlətlərin inkişaf yolunun müstəqil seçilməsinin prioritetliyi vurğulanır, “xarici ssenarilərin” qəbul etdirilməsi rədd olunur. Ölkələr arasında etimadsızlıq mühitinin regionda qeyri-sabitliyə, terror strukturlarından istifadəyə və ya dövlətlərin işlərinə birbaşa müdaxiləyə yol açdığı barədə aydın mövqe səsləndirilir”, — deyə nəşrin materialında bildirilir.
Məqalədə qeyd olunur ki, təhlükəsizlik və müdafiə sistemi region dövlətlərinin özləri tərəfindən qurulmalıdır, bunun üçün isə “böhran vəziyyətlərinin operativ idarə olunmasına dair birgə yanaşmalar” vacibdir.
“Təşəbbüs ətrafında müzakirələr davam edir və hələlik rəsmi səviyyədə razılaşmalar mərhələsinə çatmayıb. İdeya üçüncü ölkələrə qarşı yönəlməyib, Cənubi Asiyadan Yaxın Şərqədək geniş məkanda problemlərin aradan qaldırılması və birgə həll yollarının axtarılması məqsədilə “səylərin bölüşdürülməsi”ni nəzərdə tutur”- deyə qəzet yazır.
17-01-2026, 19:53
İranda nə baş verir? - ƏN SON DURUM
ABŞ Dövlət Departamenti İran hakimiyyətini ölkədə baş verən daxili problemlərin real həlli əvəzinə “susqunluq və izolyasiya” yolunu seçməkdə ittiham edib.
ABŞ Dövlət Departamenti tərəfindən X sosial şəbəkəsində fars dilində yayımlanan açıqlamada qeyd olunub ki, internetə tətbiq edilən uzunmüddətli məhdudiyyətlər rəsmi Tehranın öz legitimliyinə olan inamsızlığını açıq şəkildə nümayiş etdirir.
Açıqlamada xatırladılıb ki, İran rəsmiləri internetin ən azı mart ayının sonunadək məhdudlaşdırılacağını əvvəlcədən bəyan ediblər. ABŞ tərəfinin hesablamalarına görə, İran cəmiyyəti artıq 216 saatdan çoxdur ki, faktiki olaraq “rəqəmsal izolyasiya” şəraitində yaşayır.
Yerli mənbələrdən daxil olan məlumatlara əsasən, Tehran və digər şəhərlərdə, o cümlədən Yəzd şəhərində gündəlik həyat nəzərəçarpacaq dərəcədə zəifləyib. Bir çox mağazanın fəaliyyətini dayandırdığı, insanların təzyiq və hədələr fonunda küçəyə çıxmaqdan çəkindiyi bildirilir.
Eyni zamanda, xəstəxana və tibbi mərkəzlərdə təhlükəsizlik qüvvələrinin yerləşdirildiyi, odlu silahdan istifadə nəticəsində yaralanan və ağır əməliyyatlara ehtiyacı olan şəxslərin olduğu iddia edilir. Məlumatlarda həmçinin hakimiyyətin yas mərasimlərinə mane olduğu, həlak olanların cəsədlərinin ailələrinə verilməsi üçün ödəniş tələb edildiyi də qeyd olunur.
Rəsmi mövqeyə yaxın "Tasnim" agentliyi internet blokadasının “beynəlxalq praktikaya” uyğun olduğunu bildirib, lakin hansı standartlardan söhbət getdiyini açıqlamayıb. "Fars" agentliyi isə şəxsi yazışmaların və qrup çatlarının yalnız milli messencerlər vasitəsilə əlçatan olacağını yazıb.
Sosial şəbəkələrdə yayılan videolarda, iddialara görə, etirazların yatırılması zamanı hüquq-mühafizə orqanlarının sərt müdaxiləsi, o cümlədən saxlanılan şəxslərə yaxın məsafədən atəş açılması əks olunub. Rəsmi qurumlar bu görüntülərlə bağlı açıqlama verməyib.
Yerli sakinlərdən birinin sözlərinə görə, etirazlarda iştirak edənlərin böyük hissəsi artıq saxlanılıb və təhlükəsizlik vəziyyəti bərpa olunub. Bununla yanaşı, o, ölkədə inflyasiyanın artımından ciddi narazılıq olduğunu, lakin etirazların bu cür sərt üsullarla yatırılmasının cəmiyyət tərəfindən birmənalı qarşılanmadığını vurğulayıb.
"Mehr" agentliyi internetin iğtişaşlar zamanı tamamilə kəsilməsindən sonra bəzi istifadəçilər üçün qismən bərpa edildiyini bildirib.
17-01-2026, 19:34
Hava ilə bağlı əhaliyə xəbərdarlıq edildi
Milli Hidrometeorologiya Xidmətinin məlumatına görə, ölkə ərazisində yaxın günlər ərzində havanın yağıntılı olacağı, əsasən dağlıq və dağətəyi rayonlara qar yağacağı, ayrı-ayrı yerlərdə intensiv olacağı, temperaturun xeyli enəcəyi, bəzi yerlərdə arabir güclü külək əsəcəyi proqnozlaşdırılır. Qeyd olunanlarla bağlı Fövqəladə Hallar Nazirliyi əhaliyə müraciət edərək, müvafiq təhlükəsizlik qaydalarına ciddi əməl etməyə çağırır.
Nazirlikdən verilən məlumata görə, soyuq hava şəraiti qaz və elektrik qızdırıcı cihazlarından istifadənin xeyli artmasına səbəb olduğundan bu cihazlardan istifadə zamanı yanğın təhlükəsizliyi qaydalarına ciddi riayət edilməlidir.
“Nasaz, qeyri-standart və ya kustar üsulla hazırlanmış qızdırıcı cihazlardan istifadə edilməməli, elektrik şəbəkəsi həddindən artıq yüklənməməli, işlək vəziyyətdə olan qızdırıcı cihazlar nəzarətsiz qoyulmamalıdır. Eyni zamanda, xüsusilə dağlıq ərazilərdə vətəndaşlar şaxtalı və qarlı havada mümkün qədər yaşayış məntəqəsini tərk etməməli, belə bir zərurət yarandıqda hərəkət istiqaməti barədə yaxınlarını əvvəlcədən məlumatlandırmalı, avtomobilin texniki göstəricilərinin fəslə uyğunluğunu və kifayət qədər yanacaq ehtiyatını təmin etməlidirlər. Qar uçqunu ehtimalı olan yerlərdən, o cümlədən dik yamaclardan kənar gəzmək və günün qaranlıq vaxtına qalmadan yaşayış məntəqəsinə geri dönmək tövsiyə olunur.
Bundan başqa, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəyi və naqillərinin, hündür ağacların altında dayanmamaq tövsiyə olunur. Həmçinin güclü küləyin baş verən yanğınların söndürülməsi ilə əlaqədar yaratdığı çətinlikləri nəzərə alaraq, küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir”, - deyə qurumun məlumatında bildirilir.
17-01-2026, 18:17
Sumqayıtda aptek yanır
Sumqayıt şəhərində yanğın hadisəsi qeydə alınıb.
Hadisə şəhərin 36-cı məhəlləsində yerləşən apteklərin birində baş verib.
Əraziyə Fövqəladə Hallar Nazirliyinin (FHN) Dövlət Yanğından Mühafizə Xidmətinin canlı qüvvəsi və texnikası cəlb olunub.
Yanğının söndürülməsi istiqamətində operativ tədbirlər görülür.
Yanğının baş vermə səbəbləri araşdırılır.
17-01-2026, 17:57
Bu hallarda hərbi vəzifəlilərin maaşları saxlanılacaq
İşçilərin iş yerinin və orta əmək haqqının saxlandığı hallara dəyişiklik edilib.
Bu, Prezident İlham Əliyevin təsdiqlədiyi Əmək Məcəlləsində dəyişiklik edilməsi barədə Qanunda öz əksini tapıb.
Daha əvvəl hərbi mükəlləfiyyətlə bağlı vəzifələrin yerinə yetirilməsi üçün hərbi və xüsusi toplanışlara və səlahiyyətləri daxilində hərbi komissarlıqların cəlb etdiyi digər hərbi tədbirlərdə iştirak etdikdə, habelə hərbi nəqliyyat vəzifəsinin yerinə yetirilməsi ilə əlaqədar ezam olunduqda işçinin iş yeri və orta əmək haqqı saxlanılırdı.
Qanuna əsasən, hərbi mükəlləfiyyətlə bağlı vəzifələrin yerinə yetirilməsi üçün hərbi təlim, yoxlama, xüsusi toplanışlarda və fəaliyyət istiqamətlərinə uyğun olaraq müvafiq icra hakimiyyəti orqanının müəyyən etdiyi orqanın (qurumun) cəlb etdiyi digər tədbirlərdə (hərbi qeydiyyat, xüsusi hərbi ixtisaslar üzrə hazırlıq, çağırışçıların tibbi müayinəsi, hərbi vəziyyət rejiminin təmin edilməsinə yönəldilmiş tədbirlər və s.) iştirak etdikdə, habelə hərbi nəqliyyat vəzifəsinin yerinə yetirilməsi ilə əlaqədar ezam olunduqda işçinin iş yeri və orta əmək haqqı saxlanılacaq.
17-01-2026, 17:39
Biznes qurmaq adı altında 24 min manatlıq DƏLƏDUZLUQ
Sumqayıt şəhərində zərərçəkən polisə müraciət edərək 24 min manat maddi vəsaitinin dələduzluq yolu ilə ələ keçirildiyini bildirib.
Bu barədə Daxili İşlər Nazirliyinin Mətbuat Xidmətindən məlumat verilib.
Bildirilib ki, Sumqayıt Şəhər Polis İdarəsi əməkdaşlarının keçirdikləri tədbirlərlə əməli törətməkdə şübhəli bilinən, əvvəllər məhkum olunmuş 42 yaşlı İ.Quliyev saxlanılıb. Ondan psixotrop maddə olan metamfetamin də aşkarlanıb.
DİN-dən verilən məlumata görə, araşdırma zamanı İ.Quliyevin zərərçəkənə birgə biznes qurmaq vədi verərək onun qızıl-zinət əşyalarını satdığı və pulu ələ keçirdiyi məlum olub.
Faktla bağlı cinayət işi başlanılıb, araşdırmalar davam etdirilir.
17-01-2026, 17:30
İranda etirazlara qarşı kimyəvi silahdan istifadə olunub
“İran etirazçılara qarşı toksik kimyəvi maddə tətbiq etmiş ola bilər”.
Britaniya parlamentinin keçmiş üzvü Bill Rammell "GB News" telekanalının efirində deyib.
O bildirib ki, nümayişlər zamanı saxlanılanlarla qəddar rəftarı əks etdirən reportaj-faktlar var:
"Ehtimal olunur ki, etirazçılara qarşı hansısa toksik kimyəvi maddə tətbiq edilib və buna görə də bəzi zərərçəkənlər bir neçə gündən sonra vəfat ediblə”.
Qeyd edək ki, bundan əvvəl İranın ali dini lideri Ayətullah Seyyid Əli Xameneyi ölkədəki etirazlar barədə danışarkən vurğulayıb ki, iğtişaşlara görə ABŞ məsuliyyət daşımalıdır.
17-01-2026, 17:12
Hava şəraiti ilə əlaqədar əhaliyə müraciət edildi
Fövqəladə Hallar Nazirliyi gözlənilən hava şəraiti ilə əlaqədar əhaliyə müraciət edib.
Müraciətdə deyilir:
"Milli Hidrometeorologiya Xidmətinin məlumatına görə, ölkə ərazisində yaxın günlər ərzində havanın yağıntılı olacağı, əsasən dağlıq və dağətəyi rayonlara qar yağacağı, ayrı-ayrı yerlərdə intensiv olacağı, temperaturun xeyli enəcəyi, bəzi yerlərdə arabir güclü külək əsəcəyi proqnozlaşdırılır.
Qeyd olunanlarla bağlı Fövqəladə Hallar Nazirliyi əhaliyə müraciət edərək, müvafiq təhlükəsizlik qaydalarına ciddi əməl etməyə çağırır.
Belə ki, soyuq hava şəraiti qaz və elektrik qızdırıcı cihazlarından istifadənin xeyli artmasına səbəb olduğundan bu cihazlardan istifadə zamanı yanğın təhlükəsizliyi qaydalarına ciddi riayət edilməlidir. Nasaz, qeyri-standart və ya kustar üsulla hazırlanmış qızdırıcı cihazlardan istifadə edilməməli, elektrik şəbəkəsi həddindən artıq yüklənməməli, işlək vəziyyətdə olan qızdırıcı cihazlar nəzarətsiz qoyulmamalıdır.
Eyni zamanda, xüsusilə dağlıq ərazilərdə vətəndaşlar şaxtalı və qarlı havada mümkün qədər yaşayış məntəqəsini tərk etməməli, belə bir zərurət yarandıqda hərəkət istiqaməti barədə yaxınlarını əvvəlcədən məlumatlandırmalı, avtomobilin texniki göstəricilərinin fəslə uyğunluğunu və kifayət qədər yanacaq ehtiyatını təmin etməlidirlər. Qar uçqunu ehtimalı olan yerlərdən, o cümlədən dik yamaclardan kənar gəzmək və günün qaranlıq vaxtına qalmadan yaşayış məntəqəsinə geri dönmək tövsiyə olunur.
Bundan başqa, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəyi və naqillərinin, hündür ağacların altında dayanmamaq tövsiyə olunur. Həmçinin, güclü küləyin baş verən yanğınların söndürülməsi ilə əlaqədar yaratdığı çətinlikləri nəzərə alaraq, küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir.
Unutmayın: Qaydalara biganəlik – həyatımıza təhlükədir!
Təhlükə zamanı 112-yə zəng edin!".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!