29-01-2026, 18:40
İstanbulda məhkumları daşıyan avtobus aşdı - 19 yaralı
İstanbulda məhkumları daşıyan avtobus aşıb.
Hadisə nəticəsində 19 nəfər xəsarət alıb.
Məlumata görə, avtobusda altı jandarm, bir sürücü və 12 məhkum olub.
Yaralanan xidməti əməkdaşlardan ikisinin vəziyyəti ağırdır.
29-01-2026, 18:32
Şirkət rəhbəri aylıq ödənişləri etməyən sakini vəhşicəsinə döydü - HƏBS OLUNMADI
Bakıda bina sakinlərinin təşkil etdiyi şirkətin rəhbəri qonşunu döyüb.
Hadisə Binəqədi rayonu, 7-ci mikrorayon ərazisində, S. S. Axundov küçəsində yerləşən yaşayış kompleksində qeydə alınıb.
Sakinlərin bina xərclərini ödəmək üçün təşkil etdikləri Mənzil Mülkiyyətçilərinin Müştərək Cəmiyyətinə 60 yaşlı Vüsal Bədəlov (ad və soyad şərtidir) sədr seçilib. Onunla aylıq ödənişləri vaxtında ödəməyən qonşusu Afiq (şərti adla) arasında mübahisə yaranıb. Mübahisə zamanı şirkət sədri Vüsal Bədəlov Afiqi sinəsindən itələyərək yumruqla həmin nahiyəsinə zərbə vurub və boynundan tutaraq yerə yıxıb. Sonra isə yerdə Afiqin sifətinə yumruqla zərbələr vurub. Nəticədə zərərçəkən bir sıra xəsarətlər alıb.
Bu əməlinə görə V. Bədəlov saxlanılıb və barəsində cinayət işi açılıb.
Məhkəmə istintaqı zamanı o, “Konstitusiya və Suverenlik İli” çərçivəsində amnistiya aktının ona da şamil olunmasını xahiş edib. Zərərçəkən də həmçinin bu barədə qərarın verilməsini məhkəmənin mülahizəsinə buraxdığını deyib.
Binəqədi rayon Məhkəməsinin qərarı ilə cinayət təqibinə xitam verilib və V. Bədəlov məsuliyyətdən azad olunub.
29-01-2026, 18:27
Zarubin də "qara siyahI"ya salındı
Avropa İttifaqı rusiyalı jurnalistlərə sanksiya tətbiq edib
Jurnalistlər Yekaterina Andreyeva və Pavel Zarubin "qara siyahı"ya salınıb.
Qeyd edək ki, Zarubin Rusiya prezidenti Vladimir Putinə yaxınlığı ilə tanınan jurnalistlərdən biridir.
Sanksiyalara Avropa Birliyinə giriş qadağası və Avropa maliyyə qurumlarında saxlanılan aktivlərin dondurulması daxildir.
29-01-2026, 18:18
Görüş yerini dəyişmək olmaz
Ukrayna Prezidenti Volodimir Zelenskinin Moskvada sülh danışıqları aparmaq üçün təkrar göndərilən dəvətə hələlik heç bir reaksiyası olmayıb.
Bu barədə Kremlin sözçüsü Dmitri Peskov bildirib.
Onun sözlərinə görə, Rusiya Prezidenti Vladimir Putinlə Zelenski arasında mümkün görüşün təşkili məsələsində hazırda gündəmdə olan variant Moskvadır.
Peskov bu açıqlamanı Putinin Zelenski ilə Birləşmiş Ərəb Əmirliklərində görüşə hazır olub-olmaması ilə bağlı suala cavab verərkən səsləndirib. O qeyd edib ki, görüşün təşkili ilə bağlı ehtimal xarakterli mülahizələr yersizdir.
Daha əvvəl Rusiya prezidentinin köməkçisi Yuri Uşakov bəyan edib ki, Rusiya Zelenskini Moskvaya dəvət edir və əgər o, Putinlə görüşə hazırdırsa, bu təklif qüvvədədir.
Ukraynanın xarici işlər naziri Andriy Sibiqa isə Avropa İttifaqı Xarici İşlər Nazirləri Şurasının onlayn iclasında çıxışı zamanı bildirib ki, Zelenski Putinlə görüşməyə və ən vacib məsələləri müzakirə etməyə hazırdır. Onun sözlərinə görə, bu müzakirələrə ərazi məsələləri və Zaporojye Atom Elektrik Stansiyasının taleyi də daxildir.
Nazir əlavə edib ki, hazırda Ukrayna və ABŞ növbəti üçtərəfli görüşə hazırlıq aparır və bu görüşün yaxın vaxtlarda baş tutması planlaşdırılır.
29-01-2026, 18:09
Dezinfeksiya şirkətlərinə RƏSMİ XƏBƏRDARLIQ
Son dövrlər Azərbaycan Qida Təhlükəsizliyi nə (AQTA) daxil olan müraciətlər və aparılan nəzarət tədbirləri zamanı müəyyən edilib ki, bəzi dezinfeksiya xidməti göstərən özəl şirkətlər tərəfindən Agentliyin adından sui-istifadə hallarına yol verilir.
Sözügedən şirkətlərin nümayəndələri qida sahəsində fəaliyyət göstərən obyektlərə daxil olaraq özlərini Agentliyin əməkdaşı kimi təqdim edərək, dezinfeksiya xidmətləri ilə bağlı müqavilə bağlamağı təklif edirlər. Bu xidmətlərdən imtina edildiyi halda isə obyektlərdə nəzarət tədbirlərinin aparılacağı, barələrində ciddi tədbirlərin görüləcəyi ilə bağlı əsassız iddialar irəli sürürlər.
AQTA bildirir ki, Agentlik dezinfeksiya xidməti göstərən qurum deyil. AQTA-nın hər hansı dezinfeksiya xidməti həyata keçirən şirkəti mövcud deyildir. Dezinfeksiya xidmətləri göstərən şəxslər lisenziya əsasında fəaliyyət göstərən müstəqil sahibkarlıq subyektləridir.
Qeyd edək ki, “Qida təhlükəsizliyi haqqında” Azərbaycan Respublikası Qanununun tələblərinə əsasən, qida obyektlərinin sahibləri öz müəssisələrində mütəmadi olaraq dezinfeksiya tədbirləri həyata keçirməli və bu tədbirlərin icrasını təsdiq edən müvafiq sənədləri saxlamalıdırlar. Agentlik isə yalnız bu tələblərə əməl olunmasına nəzarəti həyata keçirən mərkəzi icra hakimiyyəti orqanıdır.
AQTA sahibkarları diqqətli olmağa çağırır və bu kimi hallarla rastlaşdıqları təqdirdə, Agentliyin adından sui-istifadə edən şəxslər və ya şirkətlər barədə “1003-Çağrı Mərkəzi”nə məlumat vermələrini xahiş edir. Eyni zamanda, Agentliyin adından sui-istifadə edən dezinfeksiya şirkətləri belə hallara təkrar yol verəcəyi təqdirdə barələrində zəruri tədbirlərin görülməsi üçün hüquq-mühafizə orqanlarına müraciət olunacaqdır.
29-01-2026, 18:02
Sel daşqınlarına qarşı 7 milyonluq işlər görüləcək
Azərbaycan Respublikasında çay sularının daşması nəticəsində yaranan təhlükələrin qarşısının alınması və infrastrukturun qorunması məqsədilə növbəti iri layihələrə start verilir.
"Tikilməkdə Olan Obyektlərin Müdiriyyəti" Publik Hüquqi Şəxsi Astara və Tərtər rayonlarında sel və daşqın sularından mühafizə tədbirlərinin həyata keçirilməsi üçün iki böyük tender elan edib.
Astara rayonu: Pensərçayın daşması ehtimalına qarşı Siyəkü, Pensər və Şiyəkəran kəndlərində yaşayış evlərinin, həyətyanı və təsərrüfat sahələrinin mühafizəsi təmin ediləcək. Bu istiqamət üzrə 3.046.185,34 AZN vəsait ayrılıb.
Tərtər rayonu: Tərtərçay ətrafında aparılacaq işlər çərçivəsində Bərdə-Tərtər magistral avtomobil yolu və Bayraq Meydanı kompleksi ərazisi sel sularından qorunacaq. Bu layihənin dəyəri 3.975.405,84 AZN müəyyən edilib.
Hər iki layihənin icrası üçün nəzərdə tutulan ümumi ehtimal olunan qiymət 7.021.591,18 AZN təşkil edir. Bu vəsait çay ətraflarında torpaq bərkitmə və mühafizə bəndlərinin qurulmasına yönəldiləcək.
29-01-2026, 17:48
Bakı-Tbilisi-Qars dəmiryol xətti üzrə müqavilələr imzalandı - FOTO
29 yanvar tarixində Tbilisidə “Azərbaycan Dəmir Yolları” QSC-nin (ADY) və “Marabda-Kartsaxi Dəmir Yolu” MMC-nin törəmə şirkətlərinin birgə müəssisəsi olan “BTKI Railways” MMC ilə “Gürcüstan Dəmir Yolları” SC arasında Bakı–Tbilisi–Qars (BTQ) dəmir yolu xətti üzrə birgə müəssisənin tam fəaliyyətə başlamasının təmin edilməsi məqsədilə müvafiq müqavilələr imzalanıb.
Müqavilələrdən biri Marabda–Axalkalaki dəmir yolu infrastrukturundan istifadəni, digəri isə Axalkalaki stansiyasında terminal xidmətlərinin göstərilməsini nəzərdə tutur.
İmzalanma mərasimində bildirilib ki, yeni razılaşmalar Orta Dəhlizin mühüm seqmenti olan BTQ üzrə əməliyyatların daha səmərəli təşkilinə və yükdaşıma həcmlərinin artırılmasına imkan verəcək.
Qeyd edək ki, ADY BTQ xəttinin Gürcüstandan keçən və mürəkkəb coğrafi relyefə malik 184 kilometrlik hissəsində təmir-bərpa və modernləşdirmə işlərini uğurla yekunlaşdırıb, nəticədə xəttin illik yükötürmə qabiliyyəti 1 milyon tondan 5 milyon tona çatdırılıb. Bu dəmir yolu xəttinin modernləşdirilməsinin əsas məqsədi Orta Dəhlizin rəqabət qabiliyyətini artırmaq və BTQ-ni dəhlizin əsas yükdaşıma arteriyalarından birinə çevirməkdir.
“BTKI Railways” MMC 2024-cü il avqustun 13-də yaradılıb. Birgə müəssisənin fəaliyyəti BTQ üzrə əməliyyatların səmərəli idarə olunması və yeni yüklərin cəlbi, regionda strateji nəqliyyat əlaqələrinin gücləndirilməsi və Orta Dəhlizin potensialının artırılması kimi istiqamətləri əhatə edir.
29-01-2026, 17:37
Mərkəzi Banka yeni baş direktor təyin olundu
Mərkəzi Banka yeni baş direktor təyin olunub.
Mərkəzi Bankın sədri Taleh Kazımovun əmri ilə Tural Feyzullayev Mərkəzi Bankın baş direktoru vəzifəsinə gətirilib.
Qeyd edək ki, T.Feyzullayev 2022-2025-ci illərdə Azərbaycan Respublikası Prezidentinin Administrasiyasının Qanunvericilik və hüquq siyasəti şöbəsinin Hüquqi təminat və təhlil sektorunun müdiri vəzifəsində çalışıb. 2026-cı ilin yanvar ayından Mərkəzi Bankın baş direktoru vəzifəsinə təyinat alıb
29-01-2026, 17:29
Gənclər və İdman Nazirliyində nöqsanlar aşkarlandı
Hesablama Palatası Gənclər və İdman Nazirliyinin idmanın inkişafı istiqamətində fəaliyyətinin auditini aparıb.
Auditin nəticələri qurumun bu günkü Kollegiya iclasında təqdim edilib.
İclasda aşkar edilmiş nöqsanların aradan qaldırılması məqsədilə audit olunan qurum tərəfindən zəruri tədbirlərin görülməsi barədə qərar qəbul olunub.
İclasın ikinci hissəsində 2026-cı ilin İş Planına əsasən bir nəzarət tədbirinin başlanılması ilə bağlı proqram müzakirə edilərək təsdiqlənib.
29-01-2026, 17:22
Taleh Kazımov özünə 7-ci müşavir təyin etdi
Azərbaycan Mərkəzi Bankının (AMB) rəhbərliyində dəyişiklik olub.
Məlumata görə,AMB-ın sədri Taleh Kazımovun əmri ilə baş direktor Rəna Məlikova AMB sədrinin müşaviri vəzifəsinə təyin edilib.
Bununla da Mərkəzi Bankın sədrinin müşavirlərinin sayı 7-yə çatıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!