ABŞ-ın Arkanzas ştatında xüsusi komissiya 13 məktəbdə müəllimlərə dərslərə silahla girməyə icazə verən sənəd imzalayıb.

ANS PRESS-in İtar-Tass-a istinadən verdiyi xəbərə görə, ştat rəhbərliyi, bu qərarın məktəblərdə təhlükəsizliyin təmin olunması məqsədilə verildiyini bildirib.

2012-ci ildə Sandy Hook məktəbində baş verən hadisəni və Adam Lanza adlı bir şəxsin 26 nəfəri öldürməsini və sonra da özünə qəsd etməsini xatırladan rəhbərlik qeyd edir ki, bu kimi faciələrinin yenidən təkrarlanmasına yol vermək olmaz.

Müəllimlərin silahlanmasını qanunsuz hesab edən ştatının əsas prokuroru Dastin Makdaniel, hakimiyyətin təşəbbüsünə etiraz edib. O, bildirib ki, başqa ştatlarda kütləvi qətllərin qarşısının alınması üçün ölçülər götürülür: "Belə ki, Ohayoda, Texasda və Yutada təşkil edilən pulsuz kurslardə müəllimlərə odlu silahdan istifadə etməyin qaydaları öyrədilir".

Həmin kurslara yüzlərlə müəllimin yazıldığını bildirən prokuror qeyd edib ki, artıq Amerika məktəblərində silahlı mühafizə xidməti yaranmağa başlayıb.

Qeyd edək ki, müəllimlərin silahlandırılması ilə bağlı amerikalılar arasında ümumi fikir yoxdur. Bəziləri hesab edirlər ki, əgər Sandy Hook məktəbinin müəllimlərində silah olsaydı, qırğından qaçmaq olardı. Ancaq onların qarşı çıxan başqa bir qrup isə iddia edirlər ki, müəllimlərə silah vermək təhlükəlidir, bu, həm də onları öz vəzifələrindən yayındıracaq.