29-01-2024, 14:23
Hacı Əli Behiştinin cinayət işi üzrə məhkəmə prosesi yekunlaşdı
Dövlətə xəyanətdə ittiham olunan Hacı Əli Behiştinin (Əliyev) cinayət işi üzrə məhkəmə prosesi yekunlaşıb.
Bakı Ağır Cinayətlər Məhkəməsində hakim Azər Tağıyevin sədrliyi ilə keçirilən iclasda hökm oxunub.
Hökmə əsasən təqsirləndirilən şəxs Hacı Əli Əliyev 15 il müddətinə azadlıqdan məhrum edilib.
Qeyd edək ki, bu il aprelin 6-da həyata keçirilən əməliyyatlar zamanı Binə qəsəbə sakini Hacı Əli Behişti (Əliyev) saxlanılıb.
Ona qarşı Cinayət Məcəlləsinin 274-cü (dövlətə xəyanət) maddəsi ilə ittiham irəli sürülüb. Yaşadığı evə keçirilmiş baxış zamanı xarici xüsusi xidmət orqanları ilə əlaqəsini təsdiq edən müxtəlif sənədlər aşkar edilərək götürülmüşdür. Hacı Əli Əliyev ifadəsində törətdiyi əməlləri etiraf edərək 2007-ci ildən etibarən xarici xüsusi xidmət orqanları ilə sıx əməkdaşlıq etdiyini, onların tapşırıqlarının icrası ilə əlaqədar müxtəlif məbləğlərdə pul vəsaitləri aldığını bildirib.
29-01-2024, 13:48
Qəzzada məktəb İsrail tərəfindən atəşə tutuldu - 10 nəfər öldü
Qəzza şəhərinin qərbindəki Rimal rayonunda yerləşən BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyinin (UNRWA) məktəbi İsrail tərəfindən atəşə tutulub.
Bu barədə “Əl-Cəzirə” telekanalı məlumat yayıb.
Bildirilib ki, zərbə nəticəsində azı 10 nəfər ölüb. Qeyd edilib ki, bu bina Qəzza zolağının digər döyüş bölgələrindən qaçan məcburi köçkünlərə sığınacaq kimi verilmişdi.
28-01-2024, 17:40
Husilərin Qırmızı dənizdəki PUA-sı vuruldu
Böyük Britaniyanın Kral Hərbi Dəniz Qüvvələrinə məxsus “Diamond” esminesi Yəmənin “Ənsar Allah” (husilər) üsyançı hərəkatı tərəfindən Qırmızı dənizdə buraxılan pilotsuz uçuş aparatını (PUA) vurub.
Bu barədə Böyük Britaniyanın Müdafiə Nazirliyi məlumat yayıb. Xəsarət alanların olmadığı bildirilir.
“Bu hücumlar tamamilə qəbuledilməzdir. Bizim məsuliyyətimiz Qırmızı dənizdə naviqasiya təhlükəsizliyini qorumaqdır”, - məlumatda deyilir.
“Diamond” esminesi iki aya yaxındır ki, regionda döyüş tapşırıqlarını yerinə yetirir. Bu müddət ərzində o, husilərin ticarət gəmilərinə atdığı pilotsuz təyyarələrin hücumlarının dəfələrlə qarşısını alıb.
Qeyd edək ki, Qəzza zolağında Fələstin-İsrail qarşıdurmasının şiddətlənməsindən sonra “Ənsar Allah” hərəkatı İsrail ərazisinə hücumlar həyata keçirəcəyini və gəmilərin Qırmızı dəniz suları və Bab əl-Məndəb boğazından keçməsinə icazə verməyəcəyini açıqlayıb.
28-01-2024, 17:27
Ərdoğan: “Cinayətkarların tutulması üçün lazımi tədbirlər görülür”
Türkiyə Prezidenti Rəcəb Tayyib Ərdoğan İstanbulda katolik kilsəsində iki maskalı silahlının bir nəfəri güllələyərək öldürdüyü hadisəni kəskin şəkildə pisləyib.
Bu barədə "A-Haber" telekanalı məlumat yayıb.
Prezident hücumu törədənlərin 24 saat ərzində tutulacağına əmin edib.
"Ölümlə bağlı cəmiyyətə başsağlığı verirəm. Cinayətkarların tutulması üçün lazımi tədbirlər görülür. Ümid edirik ki, hücumu törədənləri 24 saat ərzində tapıb saxlayacağıq", - Ərdoğan bildirib.
İstanbul prokurorluğu hadisə ilə bağlı araşdırmalara başlayıb. Türkiyə Ədliyyə Nazirliyinin rəhbəri Yılmaz Tuncun sözlərinə görə, silahlı hücumun araşdırılması üçün baş prokurorun müavini və iki prokuror təyin edilib.
28-01-2024, 15:42
İsrail və HƏMAS arasında aparılan danışıqlarda irəliləyiş var
ABŞ-dən olan vasitəçilər İsrail və Fələstinin HƏMAS radikal hərəkatı arasında aparılan danışıqlarda Qəzza zolağında hərbi əməliyyatların müvəqqəti dayandırlması ilə bağlı irəliləyiş əldə edib.
Vasitəçilər yüzdən çox girovun azad edilməsi müqabilində HƏMAS-a qarşı hərbi əməliyyatların iki ay müddətinə dayandırılması imkanını müzakirə edirlər.
Hələ bağlanmamış müqavilənin yeni şərtləri iki mərhələdə həyata keçiriləcək. Birinci mərhələdə hərbi əməliyyatlar dayandırılacaq ki, bu da HƏMAS-a qadınları, qocaları və yaralı girovları azad etməyə imkan verəcək.
Sonra bir aylıq fasilə zamanı İsrail əsgərləri və mülki şəxslər azad ediləcək. Yeni razılaşmada İsraildən Qəzzaya böyük miqdarda humanitar yardımın çatdırılmasına icazə verilməsi tələb olunur.
28-01-2024, 14:43
Moskvada məşhur teatr yandı - 50-yə yaxın şəxs təxliyə edildi
Rusiyanın paytaxtı Moskvanın Zəfər meydanında yerləşən məşhur Satira teatrında yanğın baş verib.
Teatra gələn 50-yə yaxın şəxs təxliyə edilib. Ölən və yaralananlar barədə məlumat verilmir.
Moskva Fövqəladə Hallar İdarəsinin məlumatına görə, yanğının sahəsi 250 kvadratmetrə qədər ərazini əhatə edib.
Hadisə yerinə 21 yanğınsöndürən texnika cəlb edilib.
28-01-2024, 14:17
İstanbulda kilsəyə silahlı hücum - Ölən var
Türkiyənin İstanbul şəhərində italyan kilsəsi “Santa Maria”ya silahlı hücum olub.
Hadisə yerinə çoxlu sayda polis və təcili yardım əməkdaşları cəlb edilib. İlkin məlumata görə, hücum zamanı 1 nəfər ölüb.
Türkiyənin daxili işlər naziri Ali Yerlikaya “X”dəki hesabında məlumatı təsdiqləyib. Nazir bildirib ki, hücum 2 maskalı şəxs tərəfindən həyata keçirilib. O, hadisə ilə bağlı araşdırmanın aparıldığını, cinayətkarların saxlanılması üçün tədbirlərin görüldüyünü qeyd edib. Nazir hücumu kəskin pisləyib.
28-01-2024, 13:41
ABŞ-nin təxribatçı hərəkəti nüvə müharibəsinə səbəb ola bilər
ABŞ-nin təxribatçı hərəkətləri Koreya yarımadasında nüvə müharibəsinə səbəb ola bilər.
Bu barədə Koreya Fəhlə Partiyasının nəşri olan “Nodong Sinmun” məlumat yayıb.
“Koreya yarımadasında münaqişə qızışarsa, bu, dünya nüvə müharibəsinə çevriləcək və bəşəriyyətə saysız-hesabsız fəlakətlər gətirəcək”, – Şimali Koreya qəzetində dərc olunan məqalədə deyilir.
Nəşr hesab edir ki, təcavüzkar müharibəyə başlamağa və qlobal təhlükəsizliyi tapdalamağa çalışan “imperialistlərə” qarşı bütün ölkələr birləşməlidir. Məqalə müəllifləri bildirirlər ki, KXDR münaqişə üçün yer olmayan dünya qurmaq üçün mübarizəni davam etdirəcək.
Bundan əvvəl Şimali Koreyanın şərq sahillərindən Yapon dənizinə doğru bir neçə qanadlı raket atdığı bildirilib. Cənubi Koreya ordusu monitorinqi gücləndirdiyini və Şimali Koreyanın hərəkətlərini izləmək üçün ABŞ ilə koordinasiya apardığını qeyd edib.
27-01-2024, 17:19
İranla Pakistan sərhədindəki naməlum şəxlər öldürüldü
İranın cənub-şərqində Sistan və Bəlucistan vilayətinin Pakistanla sərhədində yerləşən Səravan rayonunda naməlum silahlı şəxslər 9 nəfəri öldürüblər.
Bu haqda İran KİV-ləri məlumat yayıb.
Bildirilib ki, öldürülən şəxslər İran vətəndaşları deyil.
İndiyədək silahlı hücumu heç bir qrup öz üzərinə götürməyib.
Xatırladaq ki, yanvarın 16-da İran silahlı qüvvələri “Ceyş əl-Ədl” terror qruplaşmasının iki qərargahına hücum edib. Pakistanda yerləşən qərargahı vurmaq üçün pilotsuz uçuş aparatları və raketlərdən istifadə edilib. Nəticədə 2 uşaq ölüb, 3 nəfər yaralanıb.
Əlavə edək ki, 17 yanvar Pakistanın İranın cənub-şərqində yerləşən Sistan və Bəluçestan vilayətinin Səravan rayonunun sərhəd kəndlərindən birinə raket zərbələri endirib. Hücumlar nəticəsində 10 nəfər ölüb.
26-01-2024, 22:35
Şarl Mişel Avropa Parlamentinin seçkilərində iştirak etməyəcək
Avropa İttifaqı Şurasının Prezidenti Şarl Mişel Avropa Parlamentinə (AP) seçkilərdə iştirak etməmək qərarına gəlib.
Bu barədə yerli mətbuat məlumat yayıb.
Məlumata görə, siyasətçi səlahiyyət müddətinin sonuna qədər vəzifələrini tam yerinə yetirəcəyini bildirib.
Bu o deməkdir ki, o, 2024-cü il iyunun 6-9-da keçiriləcək seçkilərdə iştirak edə bilməyəcək.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!