21-04-2025, 17:38
Yeni Roma Papası kim olacaq? - SİYAHI+DOSYE
Aprelin 21-i Papa Fransisk Vatikand vəfat edib. Onun ölümündən sonra bütün dünyada katoliklərin yeni dini liderinin kim olacağı barədə müzakirələr başlayıb.
Butov.az Roma Papası postuna potesinal namizədləri təqdim edir:
Jan-Mark Avelin – Fransadan olan islahatçı
Fransanın Marsel şəhərinin arxiyepiskopu Jan-Mark Avelin 66 yaşındadır. O, Papa XXIII İohanı xatırladan görünüşü və liberal baxışları ilə tanınır. Əlcəzairdə İspaniyadan köçən ailədə doğulan Avelin uzun illərdir Marseldə yaşayır. İmmiqrasiya və İslam dünyası ilə dialoq məsələlərində Papa Fransisk ilə ideoloji yaxınlığı var. 2023-cü ildə Aralıq dənizi məsələlərinə həsr olunmuş beynəlxalq kilsə konfransını təşkil etməsi onun nüfuzunu daha da artırıb. O, Roma Papası seçilərsə, 14-cü əsrdən bəri ilk dəfə fransalı din xadimi bu vəzifəni tutacaq.
Peter Erdo – Mühafizəkar
Macarıstanın 72 yaşlı kardinalı Peter Erdo həm Avropada, həm də Afrikada geniş əlaqələrə malikdir. Teoloji baxımdan mühafizəkar olan Erdo eyni zamanda Vatikanla konfrantasiyaya girməyən praqmatik şəxs kimi tanınır. O, 2015-ci il miqrant böhranı zamanı Papa Fransiskin qaçqınları qəbul etmə çağırışına qarşı çıxması ilə diqqət çəkmişdi. Hüquq üzrə mütəxəssis olan Erdo bir neçə dil bilir, bu da onun diplomatik cəhdlərinə üstünlük qazandırır.
Mario Qreç – Maltadan olan islahatçı
Malta adasının Qozo bölgəsindən olan 68 yaşlı Mario Qreç yepiskoplar Sinodunun baş katibidir. Bir vaxtlar mühafizəkar kimi tanınan Qreç zamanla Fransiskin islahatlarının fəal müdafiəçisinə çevrilib. LGBT icmasına daha açıq yanaşması və ailə strukturlarına dair çağdaş yanaşmaları onu mübahisəli fiqura çevirib. Kiçik ölkədən olması onun seçilməsinin diplomatik baxımdan problem yaratmayacağını göstərir.
Xuan Xose Omella – Sosial ədalətin müdafiəçisi
İspaniyanın Barselona şəhərinin arxiyepiskopu, 79 yaşlı Xuan Xose Omella sadə həyat tərzi və kasıblara yönəlik fəaliyyəti ilə Papa Fransiskin ruhunu daşıyan şəxs kimi qəbul edilir. Zairdə (indiki Konqo) missioner kimi çalışmış Omella İspaniyada sosial problemlərlə yaxından məşğul olub. Uşaq istismarı qalmaqalında təmkinli mövqeyi və Papa ilə yaxın münasibətləri onun üstünlükləri, eyni zamanda bəzi dairələrdə tənqid obyektidir.
Pietro Parolin – Diplomatiya ustası
İtaliyalı kardinal, 70 yaşlı Pietro Parolin, hazırda Vatikanın dövlət katibi – faktiki olaraq ikinci adamıdır. Çin və Vyetnamla münasibətlərin inkişafında əsas rol oynamış Parolin həm mühafizəkar, həm də liberal dairələrə eyni dərəcədə yaxın hesab edilir. Pastoral təcrübəsi az olsa da, zəngin diplomatik bacarığı və çoxdilli olması onun əsas üstünlükləridir.
Luis Antonio Taqle – Asiyanın "Fransiski"
Filippinli 67 yaşlı Taqle Katolik dünyasında "Asiyanın Fransiski" kimi tanınır. İllərlə pastoral və humanitar fəaliyyətlə məşğul olub, Vatikanın missionerlik üzrə orqanına rəhbərlik edib. "Caritas Internationalis"dəki rəhbərliyindən uzaqlaşdırılması suallar yaratsa da, sosial ədalət yönümlü fəaliyyəti və Vatikan təcrübəsi onu güclü namizədlərdən biri edir.
Cozef Tobin – Amerikalı liberal arxiyepiskop
ABŞ-ın Nyuark arxiyepiskopu, 72 yaşlı Cozef Tobin Amerika tarixində ilk papa ola bilər. Açıqfikirli mövqeyi, LGBT icmasına dəstək bəyanatları və Vatikan daxilindəki təcrübəsi ilə tanınır. Nyu Cersi arxiyepiskopluğunda baş vermiş cinsi istismar qalmaqalını şəffaf şəkildə idarə etməsi ona ictimai dəstək qazandırıb.
Peter Turkson – Afrikadan potensial lider
Qana əsilli 76 yaşlı kardinal Peter Turkson sosial ədalət və iqlim dəyişiklikləri üzrə Vatikanın əsas səs sahiblərindən biri olub. Afrika mənşəli ilk papa ola biləcək Turkson Vatikan daxilində rəhbərlik etdiyi idarələr və beynəlxalq forumlarda fəal iştirakı ilə seçilir. Media ilə əlaqələrdə açıq olması bəziləri tərəfindən kampaniya apardığı kimi qiymətləndirilib.
Matteo Maria Zuppi – “İtalyan Fransisk”
69 yaşlı Bolonya arxiyepiskopu Matteo Zuppi "küçə keşişi" kimi tanınır və immiqrantlar, kasıblarla işə xüsusi önəm verir. Münaqişələrin həllində vasitəçi kimi iştirak edən Zuppi Papa tərəfindən Rusiya-Ukrayna münaqişəsində sülh təşəbbüslərinə cəlb olunub. Onun İtaliya Kilsəsinin lideri kimi cinsi istismar məsələlərindəki zəif fəaliyyəti isə mənfi baxış doğura bilər.
Yeni papa seçkilərinin nə vaxt keçiriləcəyi rəsmi olaraq açıqlanmasa da, Vatikan dairələrində artıq favoritlər və strategiyalar formalaşmağa başlayıb. Bu şəxslərdən hər biri müxtəlif təbəqələrin və coğrafiyaların səsini qazana biləcək profildədir.
21-04-2025, 17:22
Papanın ölümünə görə 3 ölkədə matəm elan olundu
Avropa İttifaqının (Aİ) Brüsseldəki rəsmi orqanları Roma Papası Fransiskin (Xorxe Mario Berqolyo) vəfatı ilə əlaqədar bayraqları yarıya qədər endirib.
Bu barədə xarici KİV məlumat yayıb.
Roma Papasının vətəni Argentinada bir həftəlik, İspaniyada isə üç günlük matəm elan edilib. Braziliyada da bir həftəlik matəm elan olunub.
Bundan əlavə, Parisdəki Eyfel qülləsinin işıqları Fransiskin xatirəsinə hörmət əlaməti olaraq bu gün söndürüləcək.
Qeyd edək ki, ABŞ Prezidenti Donald Tramp, İtaliyanın Baş naziri Ciorcia Meloni, Fransa, Polşa, İsrail prezidentləri Emmanuel Makron, Ancey Duda, İshak Hersoq, Almaniya kansleri Olaf Şolts və digərləri pontifikin ölümü ilə əlaqədar başsağlığı veriblər.
21-04-2025, 17:13
Bakının bir rayonunda 110 bina söküləcək
Xətai rayonu ərazisində 110-a yaxın qəzalı vəziyyətdə olan bina var.
Bunu Xətai Rayon İcra Hakimiyyətinin ictimai-siyasi və humanitar məsələlər şöbəsinin müdiri Pənah İmanov deyib.
O qeyd edib ki, ilk növbədə istismar müddətini başa vurmuş, qamış üzlüklü binaların söküntüsünün aparılması nəzərdə tutulur.
"Həmin binaların restavrasiyası mümkün deyil. Binaların söküntüsü mərhələli şəkildə həyata keçiriləcək", deyə şöbə müdiri qeyd edib.
Xatırladaq ki, Bakı şəhərinin yeni Baş Planı, Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramının icrası çərçivəsində ilk növbədə Yasamal rayonunda "Sovetski”nin növbəti hissəsi, Azərbaycan Dövlət Akademik Milli Dram Teatrının ətrafı (sağ istiqamətdə), Nizami küçəsi ilə Təzəpir məscidi arasındakı ərazilərdəki köhnə tikililər, istismar müddəti başa çatan kommunikasiya və mühəndis qovşaqları, qəzalı vəziyyətdə olan su və kanalizasiya xətləri söküləcək, köçürüləcək sakinlərə müvafiq kompensasiyaların məbləğinin hesablanması və ödənilməsi təmin ediləcək.
Eyni zamanda, Bakının Sabunçu, Nəsimi, Xətai, Nərimanov və digər rayonlarında istismar müddəti başa çatmış, qəzalı vəziyyətdəki binalar, evlər, qeyri-yaşayış obyektləri söküləcək.
Qeyd edək ki, Bakı şəhərinin bəzi ərazilərində köhnə tikililərin, yaşayış və qeyri - yaşayış obyektlərin köçürülməsi, söküntü və abadlıq işlərinin həyata keçirilməsi nəzərdə tutulur.
Söküntü işləri istismar müddəti başa çatan və tarixi əhəmiyyət daşımayan əsasən qəzalı vəziyyətdə və aşınma dərəcəsi olduqca yüksək olan bina və tikililəri əhatə edir.
Mənbədən bildirilib ki, aparılacaq söküntü işləri ilə əlaqədar Azərbaycan Respublikası Şəhərsalma və Arxitektura Komitəsi, Əmlak Məsələləri Dövlət Xidməti və müvafiq Rayon İcra Hakimiyyətləri ilə birlikdə əraziyə baxış keçirilir, ölçü işləri aparılır.
21-04-2025, 16:48
Növbəti delimitasiya harada aparılacaq? - Mher Qriqoryandan cavab
Ermənistan və Azərbaycan sərhədlərin delimitasiyası işinin növbəti mərhələləri ilə bağlı fikir və təklif mübadiləsini davam etdirir.
Bunu Ermənistanın baş nazirinin müavini, Ermənistanla Azərbaycan arasında sərhədin delimitasiyası üzrə komissiyanın sədri Mher Qriqoryan mətbuatın sualına cavabında deyib.
Delemitasiya komissiyalarının növbəti görüşünün tarixi ilə bağlı sula cavabında Qriqoryan deyib:
“Növbəti görüşün vaxtı ilə bağlı konkret razılaşma yoxdur. Tərəflər delimitasiya işlərinin növbəti mərhələlərinin təşkili məsələləri ilə bağlı fikir və təklif mübadiləsini davam etdirirlər”.
21-04-2025, 16:41
Bu şəxslərə 2500 manat veriləcək - Prezidentdən SƏRƏNCAM
1941-1945-ci illərdə İkinci Dünya müharibəsində iştirak etmiş şəxslərə, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım veriləcək.
Prezident İlham Əliyev bununla bağlı Sərəncam imzalayıb.
Sərəncamla 1941–1945-ci illərdə İkinci Dünya müharibəsində iştirak etmiş şəxslərə 2 500 manat məbləğində, İkinci Dünya müharibəsində həlak olmuş və ya sonralar vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslərə, İkinci Dünya müharibəsi illərində döyüş cəbhələrinin arxa hüdudları, yaxud döyüşən donanmaların əməliyyat zonaları daxilində ordunun və donanmanın mənafeyi üçün tapşırıqları yerinə yetirmiş xüsusi birləşmələrin işçilərinə, İkinci Dünya müharibəsi dövründə Leninqrad şəhərinin müdafiəsinə görə müvafiq medal və döş nişanı ilə təltif edilmiş şəxslərə, habelə Leninqrad şəhərinin mühasirəsi iştirakçılarına 1 250 manat məbləğində birdəfəlik maddi yardım veriləcək.
Bu məqsədlə Azərbaycan Prezidentinin ehtiyat fondundan 3,2 milyon manat vəsait ayrılıb.
21-04-2025, 16:34
"İran sobası" bir ailənin 4 üzvünün həyatına son qoydu - TƏFƏRRÜAT
Tərtərdə bir ailənin 4 üzvü dəm qazından ölüb.
Rayonun Sarov qəsəbəsində yaşayan əslən Kəlbəcər rayonundan olan Tağızadə Rüfət Mais oğlu, onun həyat yoldaşı Tağıyeva Əfsanə Fəqan qızı, onların övladları Tağızadə Ümid Rüfət oğlu və Tağızadə Sürəyya Rüfət qızı yaşadıqları evdə dəm qazından boğularaq həyatlarını itirib.
Hadisəyə "İran sobası" adlanan qızdırıcı qurğu səbəb olub.
Ailə üzvlərinin cəsədlərini qonşular aşkarlayıb. Rüfət Tağızadə qəsəbədə kənd təsərrüfatı ilə məşğul olub, azyaşlılardan biri ibtidai sinifdə, digəri bağçada təhsil alırmış.
Mərhumların meyitləri müayinə olunmaq üçün ekspertizaya təhvil verilib. Faktla bağlı araşdırma aparılır.
21-04-2025, 16:30
Milli Məclisdə iki yeni təyinat
Milli Məclisdə yeni təyinatlar olub.
İlqar Nəbiyev parlament Aparatının İcra hakimiyyəti orqanları ilə əlaqələr şöbəsində sektor müdiri təyin edilib.
İlqar Nəbiyev bundan əvvəl Beynəlxalq münasibətlər şöbəsinin Protokol sektorunun müdiri olub. Beynəlxalq münasibətlər şöbəsinin Protokol sektorunun müdiri vəzifəsinə isə İlqar Nuri təyin edilib.
21-04-2025, 16:25
Azərbaycanda repetitorluq dövrü başa çatır
Azərbaycanda buraxılış imtahanlarının nəticələri
geniş müzakirə olunur.
Təhsil eksperti Məzahir Məmmədli bildirib ki, illərdir təhsilin “olmazsa-olmazı” kimi qəbul etdiyimiz repetitorluq sistemi tədricən sıradan çıxır.
"DİM-in qismən mövqe yumşaltması həm şagirdlərin, həm də valideynlərin üzünü güldürüb. Artıq son iki ilin nəticəsinə görə maksimum nəticə göstərən şagird sayı təxminən 100 nəfərə çatıb (keçən il 55 bu il bu rəqəm 43-dür). Bu nəticələr arasında yalnız məktəb təhsili ilə uğur qazanan, repetitor yanına getməyən şagirdlər də var.
“Bunker müəllimlər” dövrü kimi tanınan 1994-95-ci illərdən bu yana formalaşmış sistem artıq arxada qalır. Bu il müxtəlif liseylər, gimnaziyalar, hətta kənd məktəblərindən belə yüksək nəticə göstərən şagirdlərin sayı artıb. Nümunə kimi bu günlərdə sosial şəbəklərdəki müzakirələri göstərə bilərik. Gəncədə bir liseyin şagirdləri 90% yüksək nəticə əldə edib, Lənkəranın Vilavur kəndindən olan məzunların əksəriyyəti isə repetitor dəstəyi olmadan yüksək nəticələr göstəriblər. Ucqar rayonlardan maksimum 300 ballıq bir neçə məzunlarımız oldu", - o qeyd edib.
21-04-2025, 15:59
Ərdoğanla Putindən başsağlığı
Türkiyə Prezidenti Rəcəb Tayyib Ərdoğan Roma Papası Fransiskin vəfatı ilə bağlı başsağlığı verib.
Bu barədə Türkiyə Prezidenti sosial media hesabından paylaşım edib.
Ərdoğan Papanın ailəsinə, Vatikan dövlətinə və katolik dünyasına səbir diləyib.
Rusiya Prezidenti Vladimir Putin Roma Papası Fransiskin vəfatı ilə bağlı başsağlığı verib.
21-04-2025, 15:45
Ceyhun Bayramov vyetnamlı həmkarı ilə görüşüb
Azərbaycan Respublikasının xarici işlər naziri Ceyhun Bayramov Vyetnam Sosialist Respublikasının xarici işlər nazirinin müavini Lu Tu Hangın rəhbərlik etdiyi nümayəndə heyətini qəbul edib.
Bu barədə XİN-dən məlumat verilib.
Görüşdə Azərbaycan və Vyetnam arasında mövcud ikitərəfli və çoxtərəfli münasibətlər, habelə regional və beynəlxalq vəziyyət müzakirə olunub.
Ölkələrimiz arasında mövcud siyasi dialoqun saxlanılması və inkişaf etdirilməsində qarşılıqlı səfər və təmasların, o cümlədən siyasi məsləhətləşmələr mexanizminin əhəmiyyəti qeyd olunub.
İqtisadiyyat, ticarət, enerji təhlükəsizliyi, kənd təsərrüfatı, humanitar, turizm, təhsil və s. sahələr üzrə əməkdaşlığın inkişafı üçün geniş perspektivlərin mövcud olduğu diqqətə çatdırılıb. Mövcud imkanlardan istifadə olunmasının, habelə bu istiqamətdə iqtisadi, ticarət, elmi və texniki əməkdaşlıq üzrə Azərbaycan–Vyetnam Hökumətlərarası Komissiyasının fəaliyyətinin əhəmiyyəti qeyd edilib.
Regional və beynəlxalq təşkilatlar, o cümlədən BMT, Asiyada Qarşılıqlı Fəaliyyət və Etimad Tədbirləri üzrə Müşavirə (AQEM), ASEAN çərçivəsində əməkdaşlıq məsələləri müzakirə olunub.
Görüş zamanı, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) zamanı qəbul edilən tarixi qərarların əhəmiyyəti vurğulanıb.
Nazir Ceyhun Bayramov, eyni zamanda qarşı tərəfi postmünaqişə dövründə bölgədə mövcud vəziyyət və reallıqlar, işğaldan azad olunmuş ərazilərdə aparılan genişmiqyaslı bərpa və quruculuq işləri, mina təhdidi ilə mübarizə səyləri, habelə Azərbaycan-Ermənistan normallaşma prosesinin gedişatı barədə ətraflı məlumatlandırıb.
Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Eyni gündə, Azərbaycan Respublikası və Vyetnam Sosialist Republikasının Xarici İşlər Nazirlikləri arasında siyasi məsləhətləşmələr aparılıb. Siyasi məsləhətləşmələrə Azərbaycan tərəfindən nazir müavini Elnur Məmmədov, Vyetnam tərəfindən isə xarici işlər nazirinin müavini Lu Tu Hang rəhbərlik edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!