Butov.az iyulun 26 - da Azərbaycan ədəbiyyatının, mədəniyyətinin itirdiyi, amma adını tarixə yazdığı iki şəxsiyyət haqqında məlumat verir.





Azərbaycan nasiri, ədəbiyyatşünası, publisisti, yazıçısı İsmayıl Şıxlı 1919 - cu ilin martın 22 - də Qazaxın İkinci Şıxlı kəndində müəllim ailəsində anadan olub. 1933 - 1936 - cı illərdə Kosalar kəndində ibtidai məktəbi bitirib. Qazax pedaqoji məktəbində təhsil alıb. Bir il Kosalar kənd orta məktəbində baş dəstə rəhbəri və müəllim işləyib. Sonra 1937 - 1941 - ci illərdə Azərbaycan Pedaqoji İnstitutunun dil və ədəbiyyat fakültəsində təhsil alıb. Qazax rayonunun Kosalar kənd orta məktəbində dərs hissə müdiri işləyib. İkinci Dünya Müharibəsi dövründə sovet ordusu tərkibində ön cəbhələrdə (Şimali Qafqaz, Krım, III Belorusiya cəbhəsi və Şərqi Prussiya istiqamətində döyüşən orduda sıravi əsgər) olub.

Xidmətlərinə görə "Qızıl Ulduz" (1945), "Şərəf nişanı" (1971), "Qırmızı əmək bayrağı" (1979), II dərəcəli "Böyük Vətən müharibəsi" (1985) ordenləri və medallarla təltif edilib. Azərbaycan SSR Ali Sovetinin Fəxri Fərmanını (1973) və Azərbaycan Respublikasının "Şöhrət" ordenini alıb (1994).

İ. Şıxlı 1995 - ci il iyulun 26 - da vəfat edərək Fəxri xiyabanda dəfn olunub.



Şəfiqə Axundova - Şərqdə ilk opera yazan bəstəkar qadın.

Şəfiqə Axundova 1924 - cü ildə Şəki şəhərində anadan olub. 1943 - 1944 - cü illərdə Asəf Zeynallı adına Bakı Musiqi Məktəbində oxuyarkən Üzeyir Hacıbəyovdan dərs alıb. 1956 - cı ildə Üzeyir Hacıbəyov adına Azərbaycan Dövlət Konservatoriyasını bəstəkarlıq ixtisası üzrə B. Zeydmanın sinfini bitirib. 1998 - ci ildə Azərbaycan Respublikasının xalq artisti adına layiq görülüb. 2004 - cü ildə isə "Şöhrət" ordeni ilə təltif edilib.

O, 1972 - ci ildə "Gəlin qayası" operasını yazmaqla Şərqin ilk opera yazan qadın bəstəkarı olub. Şəfiqə xanım həm də bir sıra gözəl mahnaların ("Leyla", "Bəxtiyar ellər" və s.), "Ev bizim, sirr bizim" operettasının (1965), simli kvartet üçün pyeslərin, dramatik teatr üçün "Aydın", "Əlvida, Hindistan!", "Nə üçün yaşayırsan?" və s. tamaşaların, "Təlxəyin nağılı", "Dovşanın ad günü" və s. kimi uşaq tamaşalarının musiqisinin müəllifidir. Onun Azərbaycan şairlərinin şerlərinə bəstələdiyi gözəl lirik mahnıları və romansları xalq arasında çox məşhurdur.

Bəstəkar mahnı yazmaq ilə kifayətlənməyib mürəkkəb, eləcə də çətin bir janra müraciət edib və Şərqdə ilk opera yazan qadın kimi tarixə düşüb. Ş. Axundova 1971 - ci ildə "Gəlin qayası" operası ilə musiqisevərləri valeh edib.

O, 26 iyul 2013 - cü ildə vəfat edib.