1-02-2025, 17:08
Xalq artisti Reabilitasiya Mərkəzinə köçürüldü
Xalq artisti Ənvər Həsənov bu gün müalicə aldığı Xəzər Tibb Mərkəzindən Reabilitasiya Mərkəzinə köçürülüb.
Bu barədə Xalq artistinin ailə üzvləri məlumat veriblər.
Qeyd edək ki, Xalq artisti bir müddət əvvəl səhhətində yaranan narahatlıqlar səbəbi ilə xəstəxanaya yerləşdirilib.
1-02-2025, 15:10
İrəvanda oxunan “Qarabağ” mahnısına görə cinayət işi açıldı
Ermənistan Milli Təhlükəsizlik Xidməti Müstəqil Strateji Araşdırmalar Mərkəzinin rəhbərinə qarşı cinayət işi açıb.
Məlumata görə, mərkəz rəhbəri Ermənistan paytaxtının tam mərkəzində bir qrup şəxsin Azərbaycan dilində “Qarabağ” mahnısını oxuduğu rezonans doğuran videonu ilk paylaşanlardan biri olub.
Görüntülər yanvarın 30-da sosial şəbəkələrdə peyda olub və sürətlə internetdə yayılaraq istifadəçilərin reaksiyasına səbəb olub.
Ermənistan Milli Təhlükəsizlik Xidməti tərəfindən müəyyən edilib ki, videoda əks olunan şəxslər İran vətəndaşlarıdır. Onlar dekabrın 30-dan yanvarın 3-dək turist qismində Ermənistanda olublar. Erməni təhlükəsizlik qüvvələri onların adlarını açıqlayıb: Milad Kaqramaniafşar, Behzad Qafari Şabanlou, Mehdi Mohammadi, Hamed Azizi Maleki və Nader Qafari.
Eyni zamanda, qurumdan qeyd edilib ki, Ermənistanda Azərbaycan dilində mahnı oxumaq qadağan olunmayıb. Amma görünənə görə, belə videoların internetdə yayılması qadağandır.
“Biz həqiqətə uyğun olmayan və ya təsdiqlənməmiş məlumat və şərhləri dərc etməkdən çəkinməyə çağırırıq”, - deyə xüsusi xidmətdən bildirilib.
31-01-2025, 13:22
Körpükənd – yüz illərin arasına körpü salan kənd
Zərdab rayon Körpükənd kənd sakini, naşir, Azərbaycan Jurnalistlər birliyinin üzvü Elman Qasımovun təşkilatçılığı, Azərbaycan Yazıçılar və Jurnalistlər birliyinin üzvü, filologiya üzrə fəlsəfə doktoru, Prezident təqaüdçüsü Faiq Şükürbəylinin müəllifliyi ilə “Körpükənd – yüz illərin arasına körpü salan kənd” kitabı işıq üzü görmüşdür.
Öncə deyim ki, mən bu kitabın ərsəyə gəlməsində hər zaman bu insanların yanında olmuşam. Kitabın materiallarının toplanması üçün ən azı beş dəfə mən, bir o qədər Faiq müəllim, bir o qədər Fazil Kərimov bu kəndə gəlmişik. Hər dəfə də Elman müəllim hər kəslə fərdi görüşlər təşkil edib, arayışlar toplamışdır. Faiq müəllim Azərbaycan, Gürcüstan, İran və Rusiya Federasiyasının arxivlərindən lazımi sənədləri toplayıb, rus dilindən tərcümə edib kitabda cəmləşdirərək onu zənginləş¬dirmişdir. Burada bir nəfərin yox, bir ensklopedik redaksiyanın işləri görülmüşdür.
Kəndin tarixi sənədlər əsasında, xronoloji qaydalara uyğun olaraq nizamlı şəkildə ardıcıllıqla verilmişdir. Hər bir coğrafi məkanın, kəndin, şəhərin, yaşayış məntəqəsinin insanlar kimi öz taleyi vardır. Xoş günləri, acı günləri, sirli xatirələri, kontrastlı bir taleyi vardır. Bütün kəndlər haqqında çoxlu rəvayətlər mövcud olub. Tarix keçdikcə isə assimulyasiya olaraq itib gedir və gələcək nəslə ötürülməmək təhlükəsi yaranır. Bu lazımı kitabı ərsəyə gətirməklə, belə böyük məsuliyyəti öz üzərinə götürməklə Elman Qasımov, təsəvvür edin ki, insanlarda olduğu kimi Körpükənd kəndinin şəxsiyyət vəsiqəsini tərtib etmişdir. Kəndin tarixi pasportunu yaratmışdir. Pasporta daxil olan bütün parametrlər çox şəffaf şəkildə tərtib edilmiş, demək olar ki, hər kəsə və dövrə yer ayrılmışdır. Belə ki, kəndin ziyalıları, fədakar və zəhmətkeş əhalisi, dövlət işlərində çalışan tanınmışlar, VDNX (ümumxalq sərgi) iştirakçıları, kəndi təmsil edən hər kəsi kitabda xüsusi olaraq işıqlandırmışdır. Ən əsası Qarabağ müharibəsi iştirakçıları, şəhidləri və qaziləri haqqında rəngarəng materiallar toplanmışdır. 1990-cı ilin qanlı yanvarında şəhid olan bacı-qardaşlarımız haqqında xalq şairi B. Vahabzadə belə yazmışdır: hər tökülən şəhid qanı torpağa əkilən tumurcuqlardır. O, mütləq pöhrələnib bəhrəsini verəcəkdir.
44 günlük müharibədə və 19 sentyabr 2023-cü ildə həmin tumurcuqlar Ali Baş Komandanın rəhbərliyi və milli xalq dəstəyi ilə 30 illik ədalətsiz müharibədə bizi Böyük Qələbəyə – Zəfərə qovuşdurdu. Biz hər zaman şəhidlərimizi hörmət və ehtiramla anırıq. Bütün ömrümüz boyu onlara borcluyuq. Bu mənada kitabda şəhidlərimizə və qazilərimizə, eləcə də müharibədə iştirak edən hər kəsə xüsusi yer ayrılmışdır. Ruhları şad olsun şəhidlərimizin.
Kitaba son söz yazan E.Qasımov xalq şairi Fikrət Qocadan sitat gətirir: “adətən belə kitablarda müəllif öz kəndini, şəhərini, məşhur qohumlarını və yaxud adlı-sanlı həmyerlilərini mədh edər, bəlağətli sözləri zər kimi şəhərin, kəndin, insanların üstünə səpərdi. Bir sözlə hap-gop”.
Elman Qasımov və Faiq Şükürbəylinin araya-ərsəyə gətirdikləri kitab isə sanki Körpükənd kəndinə güzgü tutmuşdur. Hər şeyi olduğu kimi, orijinal şəkildə şəffaflıqla ortaya qoya bilmişlər. Körpükənd kəndinin bir dostu kimi həm sevinirəm, həm də Faiq Şükürbəyli və Elman Qasımovu bu işin öhdəsindən layiqincə gəldiklərinə görə təbrik edirəm. Böyük Azərbaycan yazıçısı İsa Hüseynov (Muğanna) deyir ki, bəzən səni kimi rənginə, kimi ətrinə, kimi boynu bükük olduğuna görə sevir. Mən isə onu Vətən gülü, çiçəyi olduğu üçün sevirəm. Mən də Elman Qasımovu Körpükənd kəndinin bənövşəsi olaraq sevirəm. O gülü hansı səbəbdən olmasına baxmayaraq hamı sevir. Hər kəs onun cazibəsinə düşür. Elman da elə. Daim cazibə qüvvələri tükənmir. Biz sizinlə fəxr edirik, qürur duyuruq. Xeyirli uğurlu olsun!
Kitaba Milli Məclisin deputatı, professor Jalə xanım Əliyeva ön söz yazmışdır.
Hacı Məmmədov
Azərbaycan Jurnalistlər Birliyinin üzvü
25-01-2025, 19:53
Türk Mədəniyyəti və İrsi Fondunun ekspertləri Bakıda toplaşdı
23-24 yanvarın tarixlərində Türk Mədəniyyəti və İrsi Fondunun (TMİF) Bakı şəhərində yerləşən Baş qərargahında Şura iclasına hazırlıq məqsədilə ikinci ekspert görüşü baş tutub. İclasda Azərbaycan, Qazaxıstan, Qırğızıstan və Türkiyənin Xarici İşlər və Mədəniyyət nazirliklərinin nümayəndələri, həmçinin təşkilatın əməkdaşları iştirak edib.
Öncə Fondun prezidenti Aqtotı Raımkulova qonaqları salamlayıb və 2024-cü ildə Fondun həyata keçirdiyi işlər barədə ətraflı məlumat verib. O, Fond tərəfindən 74-dən çox layihə və tədbirin reallaşdırıldığını vurğulayıb. Aqtotı Raımkulova bir sıra mühüm layihələri qeyd edib:
Astanada keçirilən sammit çərçivəsində Alaqul Osmonovun Bişkekdəki ev-muzeyinin bərpa və yenidənqurma işlərinin tamamlanması, "Türk Dünyası 2040-a baxış" sənədinə və TURKTIME-ın təşəbbüsünə uyğun olaraq Türk Mədəniyyəti İrsinin Kataloqunun hazırlanması, Beşinci Dünya Köçərilər Oyunlarının dəstəklənməsi, İstanbulda Türk mədəniyyət irsinin idarə olunması sahəsində mütəxəssislər arasında təcrübə və bilik mübadiləsi proqramının keçirilməsi, "Türk Dünyasının Məşhur Şəxsiyyətləri", "Türk ədəbiyyatının Zərgərləri", "Türk Dünyasının Elmi Xəzinələri" adlı kitab seriyalarının nəşr edilməsi, Bakıda "Türk Dünyası tarixi və mədəni irsinin UNESCO perspektivindən öyrənilməsi və qorunması" mövzusunda beynəlxalq konfransın təşkili, Parisdəki UNESCO qərargahında türk dünyasının görkəmli alimi Mahmud Kaşğari tərəfindən XI əsrdə yazılmış "Divani Lüğət at-Türk" adlı ilk Türk dilləri ensiklopedik lüğətinin 950 illiyinə həsr olunmuş beynəlxalq elmi konfrans və sərginin keçirilməsi...
İclasın gündəliyində Türk xalqlarının mədəni irsinin qorunub saxlanılması istiqamətində əməkdaşlığın genişləndirilməsi məsələləri yer alıb. Dövlət orqanlarının nümayəndələri və Fondun əməkdaşları təşkilatın normativ sənədlərində dəyişikliklərin edilməsi ilə bağlı müzakirələr aparıb, 2025 və 2026-cı illər üçün Fondun fəaliyyət planlarına daxil edilmiş Türk Dünyasının zəngin irsinin populyarlaşdırılması, qorunması və bərpasına yönəlmiş layihələr ətrafında ətraflı müzakirələr aparılıb.
Qeyd etmək lazımdır ki, cari ildə Fondun Şurasına Qazaxıstan Respublikası sədrlik edir və Fondun təsisçi ölkələrinin mədəniyyət nazirlərinin iştirak edəcəyi 2-ci Şura iclası 2025-ci il fevralın 7-də Astana şəhərində keçiriləcək.
23-01-2025, 12:30
Tərlan Musayeva-70
Əmək qəhrəmanı Tərlan Musayevaya həsr olunan kitabın təqdimatı keçirilib.
Mirvarid Dilbazi Poeziya Məclisi İctimai Birliyinin təşəbbüsü ilə işıq üzü görən kitabda Tərlan Musayevanın ömür yolundan, ictimai fəaliyyətindən bəhs edilir.
Tədbirdə kitabın müəllifi, ədəbi təhlilçi, yazıçı Vaqif Osmanlı, redaktoru, Mirvarid Dilbazi Poeziya Məclisi İctimai Birliyinin rəhbəri Güllü Eldar Tomarlı, Milli Məclisin deputatı Razi Nurullayev, şəhid anası Sevil Hüseynova, Əməkdar Mədəniyyət işçisi Çimnaz Əliyeva, politoloq, yazıçı Reyhan Mirzəzadə, Vətən müharibəsi qazisi, şair Rafael Tağızadə, şəhid bacısı, şair Lalə İsmayıl, Brilyant Atəş, Arzu Yaqubqızı və başqaları çıxış edərək əmək fəaliyyətinə görə “Qırmızı Əmək Bayrağı”, “Xalqlar Dostluğu” ordenləri ilə təltif olunmuş, şəninə mahnılar, poemalar, şeirlər, sənədli əsərlər yazılan tanınmış mexanizator, pambıq ustasını 70 illik yubileyi münasibətilə təbrik ediblər.
Çıxış edənlər bildiriblər ki, Tərlan Musayeva kimi əmək qəhrəmanlarını nəinki bugünkü, həm də gələcək nəsillər tanımalıdır. O, hələ lap gənc yaşlarından çalışdığı sahədə fədakarlığı ilə seçilib. 17 yaşında orta məktəbi əla qiymətlərlə bitirib ali təhsil arxasınca getmək əvəzinə, peşə məktəbini seçməklə ailəsini, müəllimlərini, həm də məktəb yoldaşlarını təəccübləndirib. 18 yaşında pambıq tarlasında "dəmir at"ın sükanı arxasına keçəndə, 21 yaşında 10 il dalbadal Sevil Qazıyeva adına mükafatın, həmçinin Paşa Angelina, Tursunoy Axunova mükafatlarının qalibi olanda da çoxları heyrətlənib. 23 yaşında SSRİ Ali Sovetində Azərbaycanın 9 rayonunu təmsil edən ən gənc deputat kimi hamının diqqətini cəlb etməyi bacarıb. Keçən yüzilliyin 70-80-ci illərində orta məktəb şagirdləri əmək mövzusunda inşa yazanda çoxları Tərlan Musayevanı özünün idealı, qəhrəmanı, kumiri hesab edirdi.
Qeyd edilib ki, "Ulu Öndərin "canlı əsəri" Tərlan" kitabının yazılmasının məqsəd və məramı əsəri oxuyandan sonra oxuculara aydın olacaq. Kitabla tanış olanlar bir daha əmin olacaqlar ki, müəllifin gördüyü iş, sadəcə, indiki zamana yox, daha uzaq zamanlara hesablanıb. Tərlan Musayeva vətənimizdə tanınan, üzdə olan, əməyindən, uğurlarından, mənəvi məziyyətlərindən həddən artıq çox yazılan, danışılan məşhur Azərbaycan xanımıdır. Müəllif onun ilk baxışda görünməyən, necə deyərlər, kölgədə qalan, az işıqlandırılan cəhətlərini tapmağa, onun haqqında yazılan ədəbiyyat nümunələrini, rəngarəng mövzulardakı saysız-hesabsız müsahibələrini, cəsarətli çıxışlarını bir toplu kimi düzüb-sıralayıb kitaba sığışdırmağa çalışıb. Öz qəhrəmanını onu tanımayanlara daha yaxşı tanıtmağa çalışıb. Kitab Tərlan xanımın 70 illik zəngin və mənalı ömrünə müəllifin özünəməxsus prizmadan baxışıdır.
Kitabda Azərbaycanın ən yaxın tarixinin – ötən əsrin 70-80-ci illərindən çağdaş günlərimizə qədərki dövrünün ictimai-siyasi mənzərəsinə, sadə bir zəhmət adamının şəxsiyyətinə, mənəvi dünyasına, eləcə də Vətən və torpaq sevgisinə Tərlan xanımın ömür və əmək yolunu vərəqləməklə işıq salınır.
Təqdimat mərasimində Tərlan Musayeva onun haqqında yazılmış kitabın ərsəyə gəlməsində əməyi olan hər kəsə təşəkkürünü bildirib, tədbirin təşkilatçılarına və iştirakçılarına minnətdarlıq edib. Özünün keçdiyi zəhmət yoluna qısa nəzər salaraq deyib ki, Ulu Öndər Heydər Əliyev onun qazandığı uğurlara hər zaman xüsusi diqqət, qayğı göstərib və böyük qədirbilənliklə yanaşıb. Qazandığı bütün uğurlara görə Heydər Əliyevə borclu bildiyini xüsusi olaraq vurğulayıb.
Yubilyar gəncləri zəhmətdən qorxmamağa, daim əməksevər olmağa səsləyib, çəkilən zəhmətin mütləq öz bəhrəsini verəcəyinə əminliyini ifadə edib.
Təqdimat mərasiminin yekununda kitab müəllifin imzası ilə iştirakçılara təqdim olunub.
19-01-2025, 18:11
Xalq artisti insult keçirdi - Xəstəxanada müalicə alır
Ötən gün səhər insult keçirən Xalq artisti Ənvər Həsənov reanimasiyadan palataya köçürülüb.
Bu barədə aktyorun yaxınları məlumat verib.
Bildirilib ki, insult keçirəm Ənvər Həsənov bir az öncə palataya köçürülüb, müalicəsi davam etdirilir.
Qeyd edək ki, aktyor 26 nömrəli Mərdəkan Xəstəxanasında müalicə olunur.
17-01-2025, 20:20
UNEC-də Flora Davudqızının 80 illiyinə həsr edilən tədbir keçirilib
Yanvar ayının 17-də UNEC-də tanınmış alim və ziyalı Flora Davudqızının anadan olmasının 80 illiyinə həsr edilən anım tədbiri keçirilib.
UNEC-in 95 illik yubileyi çərçivəsində təşkil olunmuş tədbirin məqsədi Flora Davudqızının UNEC-də çalışdığı dövr ərzində Azərbaycan elminə və təhsilinə verdiyi töhfələri anmaq, onun elmi fəaliyyətini və tədris sahəsindəki nailiyyətlərini geniş ictimaiyyətə təqdim etməkdən ibarət olub.
Tədbiri Xarici Dillər Departamentinin direktoru, dosent Aysel Xəlilova açaraq, Flora xanımın UNEC-də uzun illər ərzində gördüyü işlər, elmi nailiyyətləri və yaradıcılığı haqqında geniş məlumat verib. Bidirib ki, F.Davudqızı 1966-cı ildən UNEC-də “Xarici dillər” kafedrasında müəllim, 1988-2000-ci illərdə kafedranın müdiri vəzifələrində çalışaraq, bu müddət ərzində universitetin tədris və elmi fəaliyyətində önəmli rol oynamışdır. O, 2008-ci ildə “Kitabi-Dədə Qorqud” dastanlarının alman dilinə tərcüməsi və tədqiqi” adlı doktorluq dissertasiyasını müdafiə edərək, filologiya elmləri doktoru alimlik dərəcəsi almışdır.
A.Xəlilova Flora Davudqızının Azərbaycanın folklorşünaslıq tarixindəki xidmətlərindən də söz açıb. Qeyd edib ki, Flora xanım Berlin Kral Kitabxanasının "Dits fondu"nda “Kitabi-Dədə Qorqud” dastanının elmə məlum olmayan əlyazmasını aşkar edərək, bu sahədə dəyərli tədqiqatlar aparmışdır. Alim 100-dən çox elmi-metodiki məqalənin, 10 monoqrafiya, kitab və dərs vəsaitinin müəllifi olmuşdur. Onun ““Kitabi-Dədə Qorqud” dastanının alman dilinə tərcümə sənətkarlığı” adlı monoqrafiyası Azərbaycan-Avropa Ədəbi-Mədəni Əlaqələr Mərkəzinin diplomuna layiq görülmüşdür.
Sonra dosent Aygün Vəkilova, filologiya üzrə fəlsəfə doktoru Sevinc Bağırova və Rəfayət Cəfərova çıxış edərək, Flora Davudqızının elmi və təhsil, xüsusilə folklorşünaslıq sahəsindəki misilsiz xidmətlərindən söz açıblar.
Tədbirdə Flora Davudqızının nəvələri Fatimə Cəfərova və Leyla Kişiyeva, həmçinin UNEC Tərcümə Mərkəzinin direktoru Nəcəf Nəbiyev dəyərli alim haqqında xatirələrini bölüşərək, onun yüksək insani keyfiyyətlərindən və elmə olan sevgisindən danışıblar.
Yubiley tədbirində Flora Davudqızının həyat və fəaliyyətindən bəhs edən videoçarx nümayiş olunub.
16-01-2025, 12:26
Professor Flora Davud qızı Mustafayeva - 80
Sözə ədəbiyyata mistik bağlılığı olan Qazax torpağı Azərbaycan elminə ədəbiyyatına bir çox görkəmli şəxsiyyətlər bəxş edib. Bu insanlardan biri də professor Flora Davudqızıdır. Flora xanımın atası Salahlı kəndindən olan Davud müəllimdir. Anası isə Azərbaycanın ən köklü ailələrindən olan vəkilovlar nəslinin nümayəndəsidir. Anası Fatma Həsən ağa qızı Vəkilova Azərbaycan xalqına ilk xalq şairi Səməd Vurğun, Azərbaycan milli istiqlal hərakatının parlaq şəxsiyyətləri, Cümhuriyyət hökümətinin parlament üzvləri və hökümət təmsilçiləri Mustafa bəy Vəkilov, Doktor Məmmədrza ağa Vəkilov(Azərbaycanın ilk həkimi), yeganə topoqrafiya generalı İbrahim ağa Vəkilov, İstiqlal bəyannaməsinin mətninin müaəllifi Rəhim bəy Vəkilov, Xalq qəhrəmanı Balo bəy Vəkilov, ilk hüquq professoru Mustafa ağa Vəkilov, görkəmli dövlət xadimi İlyas bəy Vəkilov və.s şəxsləri bəxş etmiş vəkilovlar nəslinin nümayəndəsidir.
Professor Flora Davud qızı Mustafayeva 13 yanavar 1945-ci ildə anadan olmuşdur. O,1960-cı ildə Ağstafada 22 saylı orta məktəbi bitirmişdir. 1966-cı ildə isə M. F. Axundov adına APDİ-ni alman-Azərbaycan dilləri müəllimi ixtisası üzrə əla qiymətlərlə bitirmişdir. Uzun illər elmi pedaqoji fəaliyyətlə məşğul olmuş 1984-cü ildə "Azərbaycan folkloru alman dilində" mövzusunda namizədlik dissertasiyası müdafiə edərək filologiya elmləri namizədi alimlik dərəcəsi almışdır. 2008-ci ildə isə ""Kitabi-Dədə Qorqud" dastanlarının alman dilinə tərcüməsi və tədqiqi" adlı doktorluq dissertasiyasını müdafiə edib filologiya elmləri doktoru alimlik dərəcəsi almışdır. ADİU-nin Xarici dil kafedrasına uzun illər (1988-2000) rəhbərlik etmiş 2012-ci ildən işlədiyi kafedranın professoru olmuşdur. Flora Davud qızı Mustafayeva təşəbbüskar, vətənpərvər, demokratik fikirli bir ziyalıdır. O, 100-ə yaxın elmi-metodiki məqalənin, 10 monoqrafiya, kitab və dərs vəsaitinin müəllifidir. Almaniyada və Türkiyədə elmi məqalələri çapdan çıxmışdır.
Elmi yaradıcılığı ilə əlaqədar dəfələrlə Almaniyada olmuş, Berlin, Halle, Bonn, Köln, Maqdeburq, Drezden kitabxanalarında axtarışlar aparmış, Azərbaycan folklorşünaslıq üçün mühüm əhəmiyyət daşıyan Dədə Qorqud eposunun Berlin nüsxəsi üzərində tədqiqat aparmışdır.
"Kitabi Dədə Qorqud" dastanının alman dilinə tərcümə sənətkarlığı" adlı monoqrafiyası elmi ictimaiyyət tərəfindən maraqla qarşılanmışdır. Professor Flora Davudqızının elmi irsinə qiymət verərkən Azərbaycan xalqının qeyri-maddi mədəni irsinin mayasını təşkil edən “Dədə Qorqud” eposunun tədqiqi mühüm yer tutur. Eposun Azərbaycan xalqının mədəniyyətində yeri barəsində Ümummili lider Heydər Əliyevin söylədiyi bu fikirlər mədəniyyət nümunəsinin xalqımızın düşüncəsində nə qədər böyük yer tutduğunu təsdiq edir.
Heydər Əliyev: “Bizim zəngin tariximiz, qədim mədəniyyətimiz və milli mənəvi dəyərlərimiz “Kitabi-Dədə Qorqud” eposunda öz əksini tapmışdır. Bu epos bizim ümumi sərvətimizdir və hər bir azərbaycanlı onunla haqlı olaraq fəxr edə bilər. Dastanın məzmununu, mənasını, onun hər bir kəlməsini hər bir azərbaycanlı məktəbdən başlayaraq bilməlidir. Bu, bizim ana kitabımızdır və gənclik bu kitabı nə qədər dərindən bilsə, millətini, xalqını, vətənini, müstəqil Azərbaycanı bir o qədər də çox sevəcəkdir”
Bəli görkəmli alim Flora Davudqızı elmi irsinin əsasını məhz “Dədə Qorqud” eposunun tədqiqi və Avropa dillərinə tərcüməsi tutur. Bu eposun alman dilinə tərcümə edilməsi folklorşünas alimlər tərəfindən yüksək qiymətləndirilməkdədir.
Bu il, 21 may 2015-ci ildə dünyadan köçən, görkəmli folklorşünas alim Flora Davudqızının 80 illik yubileyidir. Bu məqalə onun parlaq xatirəsinə kiçik bir töhfədir.
Səməd Vəkilov
Tədqiqatçı-hüquqşünas
Sevil Yusifova
İTV Yayım Şurasının üzvü, folklorşünas
11-01-2025, 15:29
Hökumət filmlərlə bağlı qərar verdi
Dövlət sifarişi ilə istehsal edilən filmlərin müəlliflərinə ödənilən müəllif qonorarlarının və haqlarının minimum miqdarı və verilməsi qaydalarına dəyişiklik edilib.
Nazirlər Kabinetinin 1997-ci il 2 may tarixli 38 nömrəli Qərarına 10 nömrəli əlavə – “Dövlət sifarişi ilə istehsal edilən kinofilmlərin yaradıcılarına ödənilən müəllif qonorarlarının və sair ödənilən haqların miqdarı və verilməsi Qaydaları” Mədəniyyət Nazirliyi tərəfindən yeni redaksiyada hazırlanıb və Nazirlər Kabinetinin müvafiq qərarı ilə təsdiq edilib.
Qeyd edək ki, filmlərin yaradıcılarına ödənilməli olan minimum müəllif qonorarlarının, quruluş haqlarının və digər haqların miqdarının denominasiyadan sonrakı məbləğlərə uyğunlaşdırılması zamanı istehsal olunan audiovizual əsərlərin diversifikasiyası şəraitində fərqli təcrübə və biliklər, mədəniyyət sahəsindəki nailiyyətlər, peşəkarlıq və yaradılacaq əsərlərin mürəkkəbliyi əsas götürüləcək. Bundan əlavə, müəlliflərin ədalətli mükafatlandırılması, müəllif qonorarlarının və digər haqların ödənilməsi ilə bağlı yaranan münasibətlərin müasir tələblərə uyğun şəkildə tənzimlənməsi həyata keçiriləcək.
11-01-2025, 12:10
Yeni filmdə Putini o canlandıracaq
Olivier Assayasın "Kreml sehrbazı" filmində Rusiya Prezidenti Vladimir Putini canlandıracaq aktyor məlum olub.
Rusiya liderini britaniyalı aktyor Cud Lou canlandıracaq.
“Bunu tərəddüdlə deyirəm, çünki hələ rol üzərində işləməyə başlamamışam. Demək istədiyim odur ki, mən artıq başlamışam, amma indi bu iş Everestə dırmaşmaq kimidir”, - deyə aktyor bildirib.
Qeyd edək ki, film üzərində işlər ötən ilin ortalarından başlayıb.
Ekran əsəri Giuliano da Empolinin eyniadlı kitabı əsasında çəkilib. Kitab 1990-cı illərdə Vladimir Putinin siyasi strateqinə çevrilən televiziya prodüseri Vadim Baranovun hekayəsindən bəhs edir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!