İsrail Fələstinə qarşı mövqeyini dəyişmir

İsrailin Baş naziri Benyamin Netanyahu bazar günü bəyan edib ki, İsrail Fələstin dövlətinə qarşı mövqeyini dəyişmir.
Məlumata görə, bu açıqlama ABŞ tərəfindən dəstəklənən və Fələstin müstəqilliyinə aparan mümkün yolu dəstəkləyən bəyanata görə sağçı koalisiya tərəfdaşlarının etirazlarından sonra səsləndirilib.
Netanyahu bu açıqlamanı, İsrailin əsas müttəfiqi olan ABŞ və çoxsaylı müsəlman ölkələrinin Prezident Donald Trampın Qəzza sülh planını dəstəkləyən BMT qətnamə layihəsini təsdiqləməsindən iki gün sonra edib. Onların fikrincə, bu proses Fələstin dövlətçiliyinə yol aça bilər.
Qeyd edək ki, 15 üzvlü BMT Təhlükəsizlik Şurası noyabrın 7-də layihə üzərində danışıqlara başlayıb. Qətnamə layihəsi Trampın Qəzzada “Sülh Şurası” adlı keçid administrasiyası yaratmağı nəzərdə tutan təklifinə əsaslanır və müharibədən sonrakı bərpa, iqtisadi dirçəliş kimi məsələləri əhatə edir.
Trampın 20 maddəlik planında bir bənd var ki, əgər Fələstin Administrasiyasında islahatlar olsa, “Fələstin xalqının arzusu kimi tanıdığımız öz müqəddəratını təyinetmə və dövlətçiliyə aparan etibarlı yol üçün şərtlər nəhayət formalaşa bilər”.