1996-cı ildə yaradılmış və 20 illik yubileyini qeyd edən Azərbaycan Respublikası İngilis Dili Müəllimləri Birliyi (AzETA) 6-7 may 2017-ci il tarixlərində Avropa Azərbaycan Məktəbinin (EAS) akt zalında özünün XII Beynəlxalq konfransını keçirib. Müzakirələr “XXI əsr şagirdinə dərs deməyin üstünlükləri və çətinlikləri” mövzusu ətrafında aparılıb.

Butov.az Axar.az-a istinadən xəbər verir ki, konfransda ölkənin əksər şəhər və rayonlarından 160 müəllim, məktəb direktoru, təhsil ekspertləri ilə yanaşı, altı xarici ölkələnin tanınmış təhsil mütəxəssisləri də iştirak ediblər. Konfransın təşkilinə Avropa Azərbaycan Məktəbi, ABŞ səfirliyi, Azərbaycan Müəllim İnkişafı Mərkəzi, “British Council” təşkilatı və Təhsil Nazirliyi təşkilati dəstək göstərib.

Açılış mərasimində ABŞ və Türkiyənin Azərbaycandakı səfirliklərinin, Avropa Azərbaycan Cəmiyyətinin nümayəndələri, “British Council” təşkilatının, Avropa Azərbaycan Məktəbinin, Azərbaycan Müəllim İnkişafı Mərkəzinin rəhbər işçiləri çıxış ediblər.

Əsas natiqlər olan Türkiyənin təhsil mütəxəssisi doktor Ərdəm Söyləməz “XXI əsr şagirdinin təhsilində müəllimin rolu” mövzusunda, Böyük Britaniyanın ingilis dili mütəxəssisi Les Kirkham isə “İngilis dilinin tədrisində fənlərarası inteqrasiya fonunda XXI əsr şagirdi” mövzusunda məruzə ediblər.

Bölmə iclaslarında Azərbaycanın müxtəlif regionlarından olan mütəxəssislərlə yanaşı, ABŞ, Böyük Britaniya, Gürcüstan, Yaponiya, Özbəkistan və Türkiyədən olan 27 təhsil mütəxəssisi konfransın əsas mövzusu ətrafında təqdimatlar verib, könfrans iştirakçıları maraqlı müzakirələr və fikir mübadiləsi aparıblar.