21-07-2025, 18:30
Şimali Makedoniya Prezidenti Mikayıl Cabbarovu qəbul edib
Azərbaycanın iqtisadiyyat naziri Mikayıl Cabbarov Şimali Makedoniya Respublikasının Prezidenti xanım Qordana Silyanovska-Davkovanın qəbulunda olub.
Bunu iqtisadiyyat naziri Mikayıl Cabbarov "X" sosial şəbəkəsindəki hesabında bildirib.
“Şimali Makedoniyaya işgüzar səfərimiz çərçivəsində Şimali Makedoniya Respublikasının Prezidenti xanım Qordana Silyanovska-Davkovanın qəbulunda olduq. Ölkələrimiz arasında münasibətlərin prioritet istiqamətləri və qtisadi əməkdaşlığın inkişafı barədə fikirlərimizi bölüşdük”, - deyə nazir bildirib.
20-07-2025, 22:45
Budapeştdə daha iki medal - FOTO
Azərbaycanın yunan-Roma güləşçiləri Macarıstanın paytaxtı Budapeştdə keçirilən reytinq turnirinin son günündə daha iki medal qazanıblar.
Bu barədə federasiyadan məlumat verilib.
Yarışın sonuncu günündə yunan-Roma güləşi üzrə millimizin bir neçə üzvü mübarizə aparıb.
60 kq
Nihat Məmmədli koreyalı Seunqhak Kimə (9:0), özbəkistanlı Mehrac Bəhramova (4:0) və serbiyalı Georgi Tibilova (3:2) qalib gələrək finala yüksəlib. Nihat həlledici görüşdə hindistanlı Sumit Sumit üzərində inamlı qələbə (5:1) qazanaraq, fəxri kürsünün ən yüksək pilləsinə qalxıb.
Bu çəkidəki digər təmsilçimiz İlkin Qurbanov 1/8 finalda qazaxıstanlı Qalim Kabdunassarova müqavimət göstərə bilməyib – 1:9.
63 kq
Ziya Babaşov təsnifat mərhələsində özbəkistanlı Asiya çempionu və dünya üçüncü İslamcan Bəhramova sonuncu xal prinsipinə əsasən (3:3) məğlub olub.
67 kq
Fərid Xəlilov koreyalı Byeonqqi Seonu (6:0) mübarizədən kənarlaşdırsa da, 1/4 finalda gürcüstanlı dünya və Avropa çempionu Leri Abuladzeyə ilk xal prinsipinə əsasən (1:1) məğlub olub.
77 kq
Sənan Süleymanov serbiyalı Aleksa İliçə (4:0) və moldovalı Aleksandrin Qutuya (8:0), özünü ilk dəfə bu çəkidə sınayan Ülvü Qənizadə isə xorvatiyalı Antonio Kamenyaseviçlə (1:1) koreyalı Hyeonjin Kanqa (3:3) qalib gələrək 1/4 finala yüksəliblər. Milli üzvləri bu mərhələdə qarşılaşmalı olsalar da, Ülvü xalçaya çıxmayıb və Sənan yarımfinala vəsiqə qazanıb. Süleymanov finalın bir addımlığında rusiyalı Sergey Kutuzova (6:8), bürünc medal görüşündə isə macarıstanlı Levente Levaya (2:3) məğlub olub.
82 kq
Qurban Qurbanov zədələndiyi üçün təsnifat mərhələsində moldovalı Mixail Bradu ilə görüşə çıxmadı və yarışdan çəkildi.
97 kq
Murad Əhmədiyev türkiyəli Abdulkadir Çebiyə (3:1), serbiyalı Uros Krstinə (9:0) və gürcüstanlı Giorgi Katsanaşviliyə (8:0) qalib gələrək yarımfinala adlayıb. Murad yarımfinalda gürcüstanlı Giorgi Meliaya 1:5 hesabıyla uduzub. Ancaq bürünc medal uğrunda mübarizədə rusiyalı İliya Yermolenkodan güclü olub – 8:4.
Onun çəki yoldaşı Arif Niftullayev hindistanlı Niteş Niteşə (9:0) və qazaxıstanlı Yussuf Matsiyevə (2:2) qalib gəlsə də, 1/4 finalda gürcüstanlı Giorgi Meliaya (tuş), təsəlliverici görüşdə isə rusiyalı İliya Yermolenkoya (3:3) məğlub olub.
Beləliklə, son yarış günündə “klassiklərimiz” 1 qızıl və 1 bürünc medal qazanıb. Yunan-Roma güləşi üzrə milli ilin son reytinq yarışını 4 medalla başa vurub. Xatırladaq ki, ötən gün Ruslan Nurullayev (72 kq) və İslam Abbasov (87 kq) üçüncü yeri tutub.
20-07-2025, 20:51
Kürdə batan var
Fövqəladə Hallar Nazirliyinin "112" qaynar telefon xəttinə Kür çayının Yevlax şəhərindən keçən hissəsində 1 nəfərin batması barədə məlumat daxil olub.
Bu barədə FHN-in Mətbuat Xidmətindən məlumat verilib.
Bildirilib ki, məlumatla əlaqədar Nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri axtarışlara cəlb olunublar.
Əlavə məlumat veriləcək.
20-07-2025, 20:22
Bakının tərəf müqabili Qum deyil, Tehrandır!
İranın ali rəhbəri Əli Xamanei öz müşavirlərini əsasən Rusiyaya göndərir. O bu dəfə baş müşaviri Əli Laricanini Kreml sahibi Vladimir Putinlə görüşə göndərib. Rusiya prezidentinin mətbuat katibi Dmitri Peskovun sözlərinə görə, Laricaninin Putinlə görüşü İran rəhbərliyinin birbaşa tapşırığı ilə həyata keçirib. Maraqlıdır, görəsən ali rəhbər müşavirlərini Kreml sahibi ilə görüşə göndərəndə, məqsədi barədə Prezidenti məlumatlandırır?
Bunu politoloq Elxan Şahinoğlu deyib.
O qeyd edib ki, İran Konstitusiyasında əsas fiqur ali rəhbərdir:
"Ancaq axı İran Prezidentinə tabe olan xarici işlər naziri var və ölkənin xarici siyasətinə o cavabdehdir. Azərbaycana baxışda İrana paralel strukturlarının fərqini gördük. İranın xarici işlər naziri Abbas Araqçının çıxışlarında və açıqlamalarında Azərbaycana iradı olmazkən, ali rəhbərin beynəlxalq məsələlər üzrə müşaviri Əli Əkbər Vilayət bir neçə gün əvvəl Pakistanın daxili işlər naziri ilə görüşdə ona Azərbaycandan şikayət edib. Bunun özü də maraqlıdır ki, müşavir Azərbaycanla bağlı “iradlarını” Pakistanın nazirinə niyə bildirib? Pakistan Azərbaycanın strateji tərəfdaşıdır və İslamabad Vilayətinin “iradlarını” təkrarlamayacaq. Görünür, Vilayəti ali rəhbərin Azərbaycanla bağlı “iradlarını” dolayı yolla Bakının diqqətinə çatdırmaq istəyib. Ancaq həmin “iradlar” məntiqsiz olduğuna görə, Bakı onlara əhəmiyyət verməyib. Bakının tərəf müqabili Qum deyil, Tehrandır.
Prezident İlham Əliyev Şuşa Qlobal Media Forumunda İranın “Mehr” agentliyinə müsahibəsində İranla münasibətlərin yüksək səviyyədə olduğunu bildirib. İlham Əliyev buna misal olaraq İran Prezidenti Məsud Pezeşkianın Xankəndinə səfərini göstərib. Bu Pezeşkianın qısa müddətdə Azərbaycana ikinci səfəri idi. Həqiqətən iki ölkə Prezidenti arasında isti münasibətlər formalaşıb. Ancaq İrandakı mühafizəkarların bu münasibətlərə çomaq soxmağa çalışması da ortadadır. Bu dairələr Pezeşkianın Azərbaycana səfərini tənqid atəşinə tutublar. Onların “məntiqinə” görə İran Prezidenti Xankəndinə getməməli və İlham Əliyevlə səmimi görüş keçirməməli idi. Bax elə bu cür siyasətə görə, İran qonşu ölkələrlə sabit münasibətlər qura bilmir. Halbuki, Pezeşkiana mane olmasalar, o qonşularla sıx münasibətlərin formalaşdırılması tərəfdarıdır".
20-07-2025, 20:15
Media Forumunun iştirakçıları Xocalıda - FOTO
III Şuşa Qlobal Media Forumunun iştirakçıları Ağdamdan sonra Xocalıya səfər ediblər.
Forum iştirakçılarına Xocalının 30 ildən artıq müddətdə işğal altında qalması, 2023-cü ilin sentyabrında Azərbaycan Ordusunun həyata keçirdiyi lokal xarakterli antiterror tədbirləri nəticəsində ölkənin suverenliyinin təmin olunması, işğaldan azad edilmiş ərazilərdə, o cümlədən Xocalıda aparılan bərpa-quruculuq işləri barədə məlumat verilib.
Bildirilib ki, 1992-ci il fevralın 25-dən 26-na keçən gecə Ermənistan silahlı qüvvələri Xocalı şəhərinə hücum edərək azərbaycanlılara qarşı soyqırımı törədib. Şəhər darmadağın edilib və talanıb, dinc əhaliyə amansızlıqla divan tutulub. 613 nəfər xüsusi amansızlıqla və işgəncə verilməklə öldürülüb. Onlardan 106-sı qadın, 63-ü uşaq, 70-i qoca olub. 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. 487 nəfər, o cümlədən 76 uşaq ağır yaralanıb, 1275 nəfər girov götürülüb. Girov götürülənlərdən 150 nəfərin taleyi indiyədək məlum deyil.
Diqqətə çatdırılıb ki, Azərbaycanın işğaldan azad olunmuş bütün əraziləri kimi, Xocalı da böyük bərpa-quruculuq işləri həyata keçirilir.
Artıq bir zamanlar yurdlarından didərgin düşən sakinlərin Xocalı şəhərinə və rayonun üç kəndinə qayıdışı təmin edilib.
Forum iştirakçıları Xocalı şəhəri ilə tanışlıqdan sonra Şuşaya yola düşüblər.
20-07-2025, 19:53
Qalmaqallı görüntüləri yayılan şirkət rəhbəri İSTEFA VERDİ
ABŞ-nin "Astronomer" texnologiya şirkətinin baş icraçı direktoru (CEO) Endi Bayron vəzifəsindən istefa verib.
Buna səbəb onun "Coldplay" qrupunun konsertində şirkətin insan resursları müdiri Kristin Kabot ilə qucaqlaşması görüntülərinin nəhəng ekrana verilməsi və videonun sosial şəbəkələrdə sürətlə yayılması olub.
ABŞ mediası hər iki şəxsin ailəli olduğunu ortaya çıxarıb. Hadisədən sonra şirkət məsələ ilə bağlı daxili araşdırma başladıb və Bayronun istefasını qəbul edib.
Şirkət rəhbərlərinin məsuliyyət və etik davranış baxımından nümunə göstərməli olduğunu bəyan edib. Hazırda şirkət yeni rəhbər axtarışına başladığını, müvəqqəti CEO-nun isə təyin olunduğunu açıqlayıb.
20-07-2025, 19:44
Piyadanı maşın vurdu - Tıxac yarandı
Xəzər rayonu, Buzovna-Mərdəkan yolunda piyada vurulması ilə nəticələnən yol-nəqliyyat hadisəsi baş verib.
Bu barədə Daxili İşlər Nazirliyi Nəqliyyatı İntellektual İdarəetmə Mərkəzindən bildirilib.
Qəza səbəbindən yolun hər iki istiqamətində nəqliyyat sıxlığı yaranıb.
Polis əməkdaşları tərəfindən sıxlığın aradan qaldırılması üçün zəruri tədbirlər görülür.
20-07-2025, 19:39
Dənizdə batan şəxs futbolçunun atası imiş - FOTO
Sumqayıtda dənizdə bədbəxt hadisə baş verib.
Hadisə Hacı Zeynalabdin qəsəbəsində Xəzər dənizi sahilində qeydə alınıb.
Məlumata görə, 1971-ci il təvəllüdlü Asif Muxtarov dənizdə çimərkən batıb.
Onun meyiti sudan çıxarılaraq aidiyyəti üzrə təhvil verilib.
Faktla bağlı araşdırma aparılır.
Asif Muxtarov keçmiş futbolçu Nicat Muxtarovun atasıdır.
20-07-2025, 19:14
Suallar çox, cavablar çox sərrast!
Bura Şuşadır — həm dağlar zirvəsindəki inci şəhər, həm də düşüncənin zirvəsi. Və o zirvədən dünyanın müxtəlif dillərində suallar eşidilir:
—Rusiya ilə münasibətlər necə olacaq?
—Ukrayna haqqında nə düşünürsünüz?
—Suriyadakı olaylar harada qədər sürər?
—Zəngəzur dəhlizi açılacaqmı?.. Suallar çoxvektorludur, cavablar bir dövlət başçısından gəlir.
Azərbaycan Prezidentinin intellekti, siyasi iradəsi, cəsarəti və informasiyası mürəkkəb sualları aydınlığa qovuşdurur.
Bu, sadəcə 3-cü Qlobal Şuşa Media Forumu deyil — bu, XXI yüzil informasiya dönəminin ən ciddi suallarının, Şuşa adlı cavab məntəqəsində məntiq bulmasıdır.
Prezident İlham Əliyev bu Forumda da media təmsilçilərinin suallarına sanki tarixin və gələcəyin vicdanına səslənərək cavab verirdi. Rusiyanın uçaq hadisəsinə cavab verməməsi ilə bağlı sual yenə səsləndi. - Cavab: Biz hələ təmkinlə gözləyirik… amma cavab gəlmir. - Açıq və prinsipial mövqe, təkcə Azərbaycanın deyil, bütövlükdə Qafqazın informasiyadakı siyasi mənzərəsinin xəbərçisidir. Müzəffər Ali Baş Komandan yenə haqqı söylədi, yenə haqqa səslədi.
Zəngəzurla bağlı Forumda səslənən suallar və onlara verilən cavablar beynəlxalq diqqət və təqdirə layiq məqamlar idi.
Bəli, Zəngəzur – İpək yolunun dəmir özəyidir. Bəli, Zəngəzur dəhlizi təkcə Azərbaycan üçün deyil, bölgə üçün açar olacaq:
“…bu arteriya sözsüz ki, bir çox ölkələri birləşdirəcək. Biz isə daşımaların bu dəmir yolu və ya avtomobil yolu ilə həyata keçirilməsinin zəruriliyindən danışarkən, təkcə Azərbaycanın əsas hissəsinin onun Naxçıvan Muxtar Respublikası ilə birləşdirilməsini nəzərdə tutmuruq. Söhbət beynəlxalq tranzit dəhlizdən gedir. Biz nəqliyyat və logistika infrastrukturuna çox fəal sərmayə qoyuruq. Son illər milyardlarla dollar sərmayə qoyulub, Xəzər dənizində ən böyük beynəlxalq ticarət limanı tikilib, indi biz onu genişləndiririk, onun yükqaldırma qabiliyyətini 25 milyon tona çatdırırıq. …Müasir infrastrukturun qurulması nəticəsində Azərbaycan ərazisindən tranzit daşımaların həcmi artır. Həmçinin rəqəmsallaşma prosesi gedir, gömrük inzibatçılığı sadələşdirilir. Bu, həm də regionumuzda baş verən geosiyasi dəyişikliklər, digər tranzit marşrutların problemli hala gəldiyi bir vaxtda baş verir. Ona görə də bütün bunları nəzərə alaraq, Zəngəzur dəhlizinin potensialını ilkin mərhələdə 15 milyon ton yük səviyyəsində qiymətləndiririk. Biz demək olar ki, Ermənistan və İranla sərhədimizin qovuşuğuna qədər dəmir yolunun tikintisini başa çatdırırıq və yəqin ki, bir ildən az müddətdə, bəlkə də gələn ilin yazında bu dəmir yolunun Azərbaycan hissəsi hazır olacaq”. - Bu, Prezident Əliyevin 3-cü Qlobal Şuşa Forumunda jurnalistlərin suallarına verdiyi cavabdandır. Sözünə davam edən dövlət başçısı başqa bir önəmli tarixi məqamı və o məqamdan irəli gələn perspektivi belə açıqladı:
“Bu dəmir yolunun Ermənistan hissəsinə gəlincə deməliyəm ki, sovet dövründə bu dəmir yolu Azərbaycan dəmir yolunun tərkib hissəsi olub. Ermənistanın dəmir yolu şəbəkəsinin qalan hissəsi ilə dəmir yolu əlaqəsi olmadığına görə ermənilərin dəmir yolu strukturuna daxil olmayıb. Bu yol Azərbaycanı Ermənistan ərazisindən keçərək Naxçıvan Muxtar Respublikası ilə birləşdirir və oradan Körfəzə çıxış yolu ilə İran ərazisinə keçir. …Yük axınının həcminin artırılması üçün böyük perspektivlər açılır”.
Azərbaycan Prezidenti yalnız Zəngəzur dəhlizi və davamını deyil, Zəngəzura və ümumən Azərbaycanadək gələn - Xəzəraşırı yol infrastrukturlarından da söz açdı:
“Bu gün Çindən Azərbaycan ərazisi vasitəsilə yükdaşımaların həcmi sürətlə artır. Eyni zamanda, Xəzər dənizinə çıxacaq Çin-Qırğızıstan-Özbəkistan-Türkmənistan dəmir yolu yenidən tikilir. Yəni, görürsünüz ki, artıq hansı böyük axınlar gedir və bu, bizim istiqamətimizdə davam edəcək. …Təəssüflər olsun ki, son beş ildə Ermənistan tərəfində heç bir iş aparılmayıb, bu məsələ qəsdən gündəmdən çıxarılıb. Amma belə olan halda Ermənistanın nə vaxtsa tranzit ölkəyə çevrilmək şansı sıfra yaxınlaşır. Bu prosesin qarşısını almaqda davam etsələr düşünürəm ki, özlərini nəinki bu gün düşdükləri nəqliyyat təcridində, həm də müəyyən dərəcədə siyasi təcriddə tapacaqlar”.
Bu cavablardan çıxan ilkin sonuclar nədir?
Birincisi, biz artıq sadəcə fiziki yola deyil, diplomatiya yoluna vurğu etmiş oluruq. Bu dəhliz daşımaçılıqdan çox, gələcəyin modeli kimi qarşımıza çıxır. Bir vaxtlar misilsiz yollardan kəsilən uluslar indi Gündoğardan Günbatara, Türküstandan (Orta Asiyadan) Aralıq dənizinə qədər yetəcək güclü nəfəsin yolunu açmaq istəyi vardır.
Azərbaycan burada nə qapıçı, nə tamaşaçı, nə də xahişçi deyil – məhz yol yiyəsidir.
Bu anlamda, Qlobal Şuşa – dəyərlər tribunasına dönüb deyə bilərik.
Media nümayəndələrinin Şuşaya və bu il həm də Xankəndinə toplaşması – təkcə jurnalist marağı deyil, əlbəttə. Əlbəttə, bu, informasiya dünyasının könüllü surətdə azadlıq və ədalət rəmzinə çevrilmiş şəhərə salam-sayğısıdır. Burada təqdim edilən platforma
— sözün məsuliyyəti,
— informasiyanın əxlaqı və
— süni intellekt dönəmində insan yaddaşının qorunması kimi əsaslı dəyərlər ətrafında qurulub.
Prezident İlham Əliyevin cavabları həm dövlət siyasətinin, həm də şəxsiyyətin mətinliyini, siyasi iradənin yüksək dərəcəsini göstərdi. O, dünya gündəmini yalnız şərh etmədi – necə deyərlər, onu formalaşdırmağı haqq edən formullar verdi.
Bütün dünyada informasiya savaşı gedir. Bəziləri üçün bu, texnoloji yarışdır. Azərbaycan üçünsə – varoluş savaşı kimidir. Biz işğalçı dövlətin özünü məğlub etsək də, dünya erməniliyi informasiya savaşını sürdürür. İşğal dönəmindəki qədər təsirli olmasa da, dünya erməniliyinin anti-Azərbaycan eyləmləri davam edir.
Bəli, dezinformasiyaya qarşı savaş - özü də, “ən yaxşı müdafiə - hücumdur” taktikası artıq sadəcə jurnalist peşəkarlığı sayılmaz – bu, bir növ, milli təhlükəsizlik komponenti sayıla bilər.
Azərbaycan mediyası – artıq oyunlara urayan və “sonradan cavab” modunda yox, oyunun qaydalarını dəyişdirən bir gücə çevrilərək irəli gedir.
Belə olunca, vətəndaş cəmiyyəti institutları ilə dövlətin, ulusun çıxarları qlobal planda səsləşirsə, uğur uğur gətirməli, Suriya, Rusiya, Ukrayna… ünvanlı suallara Şuşada, Xankəndidə cavab axtarılması təəccüblü deyil. Qarabağda yazılan suallar, verilən cavablar bölgənin yeni gerçəklikləri fonunda ağgünlərdən xəbər vermə potensialına sahibdir.
Dünyanın açıq yaraları, öz yaralarını saran Şuşadan daha aydın və anlamlı görünür. Azərbaycan öz prinsipial mövqeyini burada da nümayiş etdirir: müstəmləkəçilik, terror və ikili standartlara qarşıyıq. Amma bu bəyanatlar sadəcə siyasi korrektlik anlamı daşımır – konkret hadisələrlə sübut olunmuş mövqelərdir: Qarabağın işğaldan qurtuluşu, antiterror əməliyyatının həssas dəqiqliyi, diplomatiyanın əməli qüvvəyə çevrilməsi və s. – örnəyi kimi.
Şuşa Forumunu anatomik yoruma çalışsaq, belə bir metafor yerinə düşər:
bu Forumun vücudunda düşüncə, qanadlarında vicdan, nəfəsində milli ruh vardı. Şuşada, Xankəndidə deyilən söz sözdən üstündür. İllərlə işğal, yalan, şər-böhtan, dedi-qodu yuvasına çevrilən Qarabağ, erməni zülmündən qurtarınca, öz əslinə, mahiyyətinə, barış-dialoq dünyasına dönür və həqiqət ünvanı olur.
Prezident İlham Əliyevin oradakı mərdanə duruşu mədəniyyətin, tarix qarşısında dürüst cavabları olan bir dövlətin obrazı idi.
Necə deyərlər, Şuşada deyilən, Bakıda təsdiqlənər, Ankarada güclənər, Türküstanda yayılar və tərəqqipərvər insanlığın gücünə güc qatar.
Azərbaycanın informasiya siyasəti indi öz sınırlarını aşıb, Türk dünyasının strateji vizyonuna çevrilir. Şuşa Qlobal Media Forumu bunun hansısa bir qatı olmaqdan çıxıb – Zirvəyə çevrilib.
Zirvədə isə yalnız səmimi, dürüst və cəsarətli olanlar qala bilir.
DÖVLƏTİMİZ ZAVAL GÖRMƏSİN!
Əkbər QOŞALI
20-07-2025, 19:12
Daha 400 ailə Xocalıya qovuşacaq - RƏSMİ
Hazırda Xocalı şəhəri də daxil olmaqla 3 yaşayış məntəqəsinə - Ballıca, Təzəbinə və Xanyurdu kəndlərinə ümumilikdə 1 433 nəfərdən ibarət 327 ailə köç edib.
Bu fikirləri Xankəndi şəhərində, Ağdərə və Xocalı rayonlarında Prezidentin xüsusi nümayəndəsi Elçin Yusubov III Şuşa Qlobal Media Forumu iştirakçıları ilə Xocalıda keçirilən görüşündə deyib.
Onun sözlərinə görə, bu ilin sonunadək Xocalıya daha 400 ailə qayıdacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!