26-01-2022, 13:47
Bir neçə gün bundan öncə bir qrup Yasamal rayon sakini İnşaat Konstruksiyaları MMC tərəfindən illərdir evsiz-eşiksiz qalmaları və sökülən evlərinin qarşılığında tikinti şirkəti tərəfindən bu günə kimi mənzillə təmin olunmamaları ilə bağlı ölkə mətbuatına müraciət etmişdi. Həmçinin tikinti şirkəti tərəfindən hüquqlarının pozulması və evlərinin vaxtında verilməməsi ilə bağlı etiraz aksiyası keçirərək, pozulmuş hüquqlarının bərpası ilə əlaqədar olaraq ölkə rəhbərliyinə müraciət etmişdilər. Vətəndaşlar müraciətlərində qeyd edirdilər ki, tikinti şirkəti bina sakinlərə qarşı laqeyd münasibət bəsləyərək, mənzillərin təmirini gecikdirir və illərdir süründürməçiliyə məruz qoyur.
Bundan başqa sakinlər qeyd edirdi ki, bina hələ də bu günə kimi elektrik enerjisi həmçinin su anbarı ilə təmin olunmayıb. Etiraz aksiyası zamanı sakinlər bildirirdilər ki, binada heç bir təmir işləri həmçinin mənzillərdə bölgülər və blokların pilləkənlərində mərmərlər döşənməyib. Məsələ ilə əlaqədar olaraq, vətəndaşların şikayətini yerində araşdırmaq məqsədi ilə tikinti gedən ərazidə etirazçıların fikirlərini öyrənməyə çalışdıq. Bina sakinləri tərəfindən səsləndirilən ittihamlara cavab olaraq, şirkətin baş mühəndisi Elçin Əsədov açıqlama verərək, tikintinin 2022-ci ilin dekabr ayında bitərək dövlətə təhvil veriləcəyini qeyd etdi.
Şirkət rəsmisi açıqlamasında tikintinin başa çatdırılmasında gecikmənin əsas səbəbinin pandemiya dövrü və maliyyə sıxıntısı ilə əlaqələndirdi. Digər səsləndirilən ittihamlara cavab olaraq qeyd etdi ki, bina elektrik enerjisi ilə tam təmin olunub, enerji bloku quraşdırılıb və su anbarı tikilib. Bundan başqa mənzillərdə bölgü işləri aparılıb və binanın blokları ağardılaraq, mərmərlərlə döşənilib.
Ərazidən köçürülən sakinlərin kirayə haqları vaxtı-vaxtında şirkət tərəfindən ödənilib. Sakinlər tərəfindən səsləndirilən ittihamların əsassız olduğunu bildirən Elçin Əsədov, şirkətin işgüzar nüfuzuna xələl gətirməyə çalışan bir qrup şəxslərin dediklərinin həqiqətə uyğun olmadığını xüsusilə vurğuladı.
(AZƏRBAYCANREALLIĞI.COM)
Bütöv.az
26-01-2022, 13:42
“Prezident Armen Sarkisyanın istefasından sonra hökumət üzvləri çılğınlıq içindədirlər, kimin prezidentliyə namizədliyini irəli sürəcəklərinə qərar verə bilmirlər. Baxmayaraq ki, hakim “Mülki müqavilə” partiyası çoxdan istəyirdi ki, prezident bu siyasi təşkilatdan olsun, yəni Armen Sarkisyandan qurtulsunlar. Amma yeni prezidentin təyinatı məsələsinin onlar üçün böyük problem olacağını təsəvvür etmirdilər”.
Bu fikirləri Ermənistanda çıxan “Joğovurd” qəzeti yazıb. Qəzet qeyd edir ki, indi həm hakim partiya, həm də eyni adlı parlament çoxluğu baş nazir Nikol Paşinyanın iştirak edəcəyi növbəti iclası gözləyir. Verilən məlumata görə, hökumətin Dilicanda təxirə salınan iclası yəqin ki, bu həftəsonu baş tutacaq. Yalnız bundan sonra hakim partiyanın prezidentliyə namizədinin kim olduğu bilinəcək.
“Məsələ burasındadır ki, Paşinyan prezidentliyə namizədi şəxsən seçib onu komanda yoldaşlarına təqdim edəcək və yəqin ki, partiya üzvləri namizəd seçiminə nə etiraz edəcək, nə də bu barədə müzakirə aparacaq”, - qəzet yazır.
Hakimiyyət mətbuatında bir neçə prezidentliyə namizədin adı nəzərdən keçirilsə də, Paşinyanın son anda öz komandasından birini prezident postuna gətirəcəyi istisna olunmur. Nikol Paşinyan son mətbuat konfransı zamanı yeni prezidentin hökumət və parlament çoxluğu, “Mülki müqavilə” partiyası ilə ahəngdar işləməli olduğunu vurğulayıb. O xatırladıb ki, hələ ötən il Baş Qərargah rəisi Onik Qasparyan baş
nazirin istefasını tələb edərkən Armen Sarkisyan onun vəzifədən azad edilməsi haqqında fərmanı imzalamaq istəmirdi.
“Həmin harmoniyanın olmaması səbəbindən bizim çox ciddi çətinliklərimiz var idi, bəlkə də o anda hətta onların dərinliyini qeyd etməmişdik. Xüsusən də Baş Qərargahın ötən il məşhur bəyanatı kontekstində bu, ümumiyyətlə, hökumətin problemi deyildi, bu, icra hakimiyyətinin problemi deyildi, mənim qiymətləndirməm odur ki, biz o zaman dövlətçiliyi itirmək ərəfəsində idik”, -Paşinyan bildirib.
A.Qorxmaz
Bütöv.az
26-01-2022, 12:26
Paşinyan öz fikirlərində səmimidirsə, o zaman tezliklə Azərbaycanın ərazi bütövlüyünü tanımalı və sərhədlərin delimitasiya və demarkasiya prosesi başlamalıdır. Bu sözləri Bakı Politoloqlar Klubunun rəhbəri Zaur Məmmədov Ermənistan Baş naziri Nikol Paşinyanın sülh sazişi və sərhədlərin delimitasiya və demarkasiyası ilə bağlı açıqlamasını şərh edərkən deyib. Politoloq bildirib ki, Nikol Paşinyanın onlayn formada keçirdiyi mətbuat konfransında Ermənistanın sülh müqaviləsinə hazır olduğunu qeyd etməsi müsbət haldır:
“Məğlub olmuş ölkənin lideri ictimaiyyət qarşısında sülh müqaviləsinə hazır olduğunu qeyd edir, bu, yaxşı haldır. Amma digər tərəfdən biz bilirik ki, Paşinyan daima ikibaşlı fikirləri və qeyri-səmimiliyi ilə seçilib. Təəssüflər olsun ki, üçtərəfli bəyanatdan bir ildən çox vaxt keçməsinə baxmayaraq, hələ də delimitasiya və demarkasiya ilə bağlı Ermənistan birgə işçi qrupunun yaradılmasına maneə yaradır. Baxmayaraq ki, iki aydır Paşinyan delimitasiya və demarkasiyaya müsbət yanaşdığını bildirir”.
Z.Məmmədov Azərbaycanın öz gücünə arxalandığını və atacağı addımların nədən ibarət olduğunu yaxşı bildiyini vurğulayıb:
“Ermənistan hakimiyyətində isə vəziyyət bunun əksidir: nə öz güclərinə arxayındırlar, nə öz siyasətləri var, nə də strategiyaları.
Ermənistan daxili və xarici siyasətindəki bu xaosa son verməyincə, belə də davam edəcək. İstənilən erməni, harada yaşamasından asılı olmayaraq, bilməlidir ki, əgər Azərbaycan sərhədləri Ermənistan tərəfindən tanınmayacaqsa, biz eyni addımı Ermənistana qarşı atacağıq. Ermənistan dövləti Azərbaycan torpaqları üzərində qurulub. Təkcə Sovetlər dövründə Ermənistanın ərazisi 20 min kv km genişlənib. Buna görə də Ermənistanın ərazi bütövlüyü və sülh sazişi məsələsində ikibaşlı oyunu onun ziyanına işləyir. Azərbaycan qarşılıqlı iddia ilə çıxış edə bilər və bunun üçün bütün tarixi, siyasi əsasımız, ən başlıcası isə gücümüz var”.
Politoloq sonda qeyd edib ki, Ermənistan sərhədlərin delimitasiya və demarkasiyasını 2025-ci ilə qədər uzatmaq istəyir və geosiyasi vəziyyətin dəyişməsinə ümid edir:
“Ona görə də Prezident İlham Əliyevin dediyi kimi, Azərbaycanın təklifləri müddətsiz deyil və hər şey Ermənistanın əleyhinə çevrilə bilər”.
Bütöv.az
25-01-2022, 20:10
Azərbaycanda son sutkada koronavirusa 2 468 yeni yoluxma faktı qeydə alınıb, 5 197 nəfər müalicə olunaraq sağalıb.
Nazirlər Kabineti yanında Operativ Qərargahdan verilən məlumata görə, COVID-19 üçün götürülən analiz nümunələri müsbət çıxmış 13 nəfər vəfat edib.
Azərbaycanda indiyədək ümumilikdə 636 956 nəfər koronavirus infeksiyasına yoluxub.
Onlardan 617 791 nəfər müalicə olunaraq sağalıb, 8 632 nəfər vəfat edib, aktiv xəstə sayı 10 533 nəfərdir.
Ölkədə son sutka ərzində 11 525, hazırkı dövrədək isə 6 081 949 test aparılıb.
Bütöv.az
25-01-2022, 19:58
Suraxanı Rayon Polis İdarəsinin Dövlət Yol Polisi Şöbəsinin əməkdaşlarının həyata keçirdikləri növbəti tədbir zamanı narkotik vasitələrin təsiri altında taksi fəaliyyəti ilə məşğul olan sürücü müəyyən edilib.
Bu barədə Daxili İşlər Nazirliyi məlumat yayıb.
Ramana qəsəbəsində yaşayan Səbuhi Quliyev idarə etdiyi VAZ-2107 markalı avtomobilin sükanı arxasında olan zaman nəzarət-yoxlama qaydasında saxlanılıb. İlkin sorğu zamanı sürücü avtomobili narkotik vasitə qəbul edərək idarə etdiyini etiraf edib. Təyin olunan ekspertizanın nəticəsində Səbuhi Quliyevin sükan arxasında narkotik vasitənin təsiri altında olduğu məlum olub.
Araşdırma zamanı həmçinin həmin şəxsin nəqliyyat vasitəsini sürücülük hüququ olmadan idarə etdiyi müəyyən edilib. Sürücü barəsində İnzibati Xətalar Məcəlləsinin müvafiq maddəsi ilə protokol tərtib olunub. Səbuhi Quliyevin törətdiyi qanun pozuntusuna hüquqi qiymət verilməsi üçün toplanmış material məhkəməyə göndərilib.
Qeyd edək ki, narkotik vasitələrin təsiri altında avtomobil idarə edən sürücülərin müəyyən edilməsi istiqamətdə polis əməkdaşları tərəfindən tədbirlər bütün ölkə ərazisində davam etdirilir.
Bütöv.az
25-01-2022, 19:45
Regionda münasibətlərin normallaşdırılması prosesinin gələcəyinə ümid bəsləməyə imkan verən Bakı, Ankara, Moskva və İrəvandan verilən silsilə bəyanatlara ASALA terror qruplaşması tərəfindən də münasibət bildirilib.
Bu barədə “Caliber”in “YouTube” kanalında yayımlanan növbəti təhlilində qeyd olunub.
Terror qruplaşması verdiyi bəyanatda birmənalı şəkildə xəstə şüurun məhsulu olan iddialarından çəkinmədiyini göstərib. Münasibətlərin normallaşdırılmasına cəhdlərin əbəs yerə olduğunu bildirən ASALA terror qruplaşması hətta “Qərbi Ermənistan”ı ələ keçirmək iddialarından da geri qalmayıb.
Ətraflı “Caliber”in təhlilində:
Bütöv.az
25-01-2022, 19:19
Azərbaycan Respublikasının Prezidenti İlham Əliyev yanvarın 25-də Ukrayna Prezidenti Volodimir Zelenskiyə zəng edib.
Bununla bağlı Azərbaycan Prezidentinin Mətbuat Xidməti məlumat yayıb.
Dövlətimizin başçısı Ukrayna Prezidentini ad günü münasibətilə təbrik edib, fəaliyyətində uğurlar və möhkəm cansağlığı arzulayıb.
Təbrikə və xoş sözlərə görə dövlətimizin başçısına minnətdarlığını bildirən Volodimir Zelenski Prezident İlham Əliyevin bu yaxınlarda ölkəsinə səfərini məmnunluqla xatırladığını qeyd edib. Azərbaycan Prezidenti səfər çərçivəsində göstərilən qonaqpərvərliyə görə Ukraynanın dövlət başçısına təşəkkür edib.
Telefon söhbəti zamanı gələcək ikitərəfli əlaqələrə dair fikir mübadiləsi aparılıb.
Bütöv.az
25-01-2022, 14:45
UEFA növbəti dəfə “Qarabağ” futbol klubuna ödəniş edib.
“Report” xəbər verir ki, Ağdam təmsilçisinə Konfrans Liqasının qrup mərhələsinin son 3 oyununda əldə olunmuş 1 qələbə və 1 heç-heçəyə görə 666 000 avro, turnirin qrup mərhələsini ikinci pillədə başa vuraraq play-offa vəsiqə qazandığı üçün 325 000 avro və əlavə bonus olaraq 187 200 avro maliyyə vəsaiti ayrılıb.
Ümumilikdə, 1 178 200 avro AFFA-nın vasitəçiliyi ilə klubun hesabına köçürülüb.
Qeyd edək ki, “Qarabağ” Konfrans Liqasının pley-off mərhələsində Fransa “Marsel”i ilə qarşılaşacaq.
Bütöv.az
25-01-2022, 14:06
CIF bazisi üzrə İtaliyanın Auqusta limanı şərtləri ilə Azərbaycanın yüngül neftinin qiyməti yanvarın 24-də 89,1 dollar/barel təşkil edib ki, bu da əvvəlki göstəricidən 2,31 dollar/barel azdır.
Bütöv.az xəbər verir ki, bu barədə Trend-ə ölkənin neft-qaz bazarındakı mənbə bildirib.
FOB bazisi üzrə Türkiyənin Ceyhan limanında Azərbaycanın yüngül neftinin qiyməti 88,27 dollar/barel təşkil edib ki, bu da əvvəlki göstəricidən 2,34 dollar/barel azdır.
Novorossiysk limanından yüklənən URALS neftinin qiyməti isə 84,21 dollar/barel təşkil edib ki, bu da əvvəlki göstəricidən 2,29 dollar/barel azdır.
Şimal dənizindən hasil edilən "Brent Dated" etalon növlü neftin qiyməti 87,52 dollar/barel olub ki, bu da əvvəlki göstəricidən 2,29 dollar/barel azdır.
25-01-2022, 13:07
“Sözügedən dərsliyin istifadə müddəti 2022-2023-cü tədris ilində bitəcək. Bundan sonra həmin səhifənin yenilənmiş versiyası dərsliyə əlavə edilməsi üçün çap olunaraq məktəb kitabxanalarına göndəriləcək”.
Bu iki cümləlik açıqlama Təhsil Nazirliyinin 4-cü siniflərin rus dili dərsliyindəki 20 yanvar faciəsinin saxtalaşdırılmasına verdiyi reaksiyadır. Dərsliyin hazırlanmasında iştirak edən Təhsil Nazirliyi, “Şərq-Qərb” nəşriyyatı və müəlliflər heç nə olmamış kimi, cəmiyyətin haqlı etirazına məhəl qoymurlar.
Xatırladaq ki, həmin kitabın 20 yanvar hadisələrinə aid hissəsində Sovet ordusunun Bakını işğal etməsi real işğal, təcavüz faktı yox, Azərbaycan Xalq Cəbhəsinin “dağıdılması” əməliyyatı kimi qələmə verilib.
Şəhidlərinsə guya Sovet əsgərləri ilə AXC “döyüşçüləri” arasında gedən atışma nəticəsində həlak olduğu göstərilir: “Sovet ordusu Xalq Cəbhəsini dağıtmaq və hakim partiyanın hakimiyyətini xilas etmək üçün Bakıya hücum edib. Əsgərlərlə Xalq Cəbhəsinin döyüşçüləri arasındakı küçə döyüşlərinin gedişində dinc vətəndaşlar həlak olub…”
Hazırda ölkədə 340 rus məktəbində 130 minə yaxın şagird təhsil alır. Hər il 15 minə yaxın uşaq bu məktəblərdə 1-ci sinfə gedir. Kiçik bir hesablama nəticəsində bu kitabdakı saxta informasiyanın nə qədər şagird tərəfindən oxunduğunu bilmək olar.
Haqqında bəhs olunan kitab 2019-cu ildən tədris edilir. Hər il təqribən 15 min şagirdin 4-cü sinifdə təhsil aldığını nəzərə alsaq, 3 il ərzində 50 minə yaxın şagirdə 20 yanvar faciəsi ilə bağlı saxta, yalan bilgi verildiyi məlum olar. Təcrübədə sübut olunub ki, insanların uşaq vaxtlarında oxuduqları kitablar onların yaddaşına həkk olunur və həqiqət olaraq qəbul edilir.
Qeyd edək ki, təhsil müəssisələri üçün dərsliklərin hazırlanması, təsdiqlənməsi və nəşri qaydaları Nazirlər Kabinetinin 2020-ci il 25 fevral tarixli qərarı ilə təsdiq olunub. Bu qərara əsasən, hazırlanan dərsliklər inkişafyönümlü, dəyəryönümlü, tərbiyəyönümlü olmalı və Azərbaycan Respublikası qanunvericiliyinin tələblərini qarşılamalıdır.
Dərsliklərin ümumi təhsil müəssisələrində istifadə edilməsi üçün Təhsil Nazirliyi tərəfindən qrif verilməli, yəni təsdiqlənməlidir. Təhsil Nazirliyi dərsliyi yoxlamaq və qiymətləndirməni həyata keçirmək üçün bu sahədə ən azı 10 ildən artıq pedaqoji təcrübəsi və ya elmi dərəcəsi olan 3 nəfər mütəxəssis cəlb edir. Dərslik 2 ay ərzində yoxlanılır və 100 ballıq şkala əsasında, müxtəlif meyarlar üzrə qiymətləndirilir. Daha sonra Nazirlik tərəfindən təsdiq olunmuş dərsliklər 5 tədris ili ərzində istifadəyə yararlı hesab olunaraq təhsil müəssisələrinə göndərilir.
Burdan aydın olur ki, dərsliyi yoxlayan və təsdiqləyən Təhsil Nazirliyi olduğundan, əsas məsuliyyət də bu qurumun üzərinə düşür. Belə çıxır ki, bu 3 mütəxəssis ya dərsliyi oxumadan təsdiqləyiblər, ya da bu rüsvayçı nöqsana bilərəkdən göz yumublar.
“Şərq-Qərb” nəşriyyatına gəlincə, bu qurumun AMEA prezidenti Ramiz Mehdiyevə məxsus olduğu bildirilir. Burada Təhsil Nazirliyinin rus dilində dərsliyin hazırlanması üçün bu nəşriyyatı seçməsi də olduqca maraqlı faktdır.
Qeyd edək ki, dərsliklərdəki nöqsanlarla bağlı qanunvericilikdə heç bir cəza tədbiri, sanksiya nəzərdə tutulmayıb.
Hüquqşünas Ceyhun Yusifov “AzPolitika.info”-ya bildirib ki, burada əsas cəzalandırma mexanizmi ictimai qınaqdır: "Hesab edirəm ki, dərsliklər hazırlanan zaman xüsusi komissiya yaradılmalı və bu işə nəzarət olunmalıdır. Komissiyanın müsbət rəy vermədiyi dərslik nəşr edilməməlidir. Digər bir məqam odur ki, dərsiyi yazanların da gərək vətəndaşlıq mövqeyi, milli ənənələrə bağlılığı yüksək səviyyədə olsun”.
Dərsliyin müəlliflərinə gəlincə, Bela Nuriyeva və Nigar Mustafazadə Nəsimi rayonu T.Həsənov adına 23 nömrəli orta məktəbin ibtidai sinif müəllimləridir. Hər iki müəllim Təhsil Nazirliyinin böyük diqqət göstərdiyi, “əl üstündə tutduğu” müəlimlərdəndir.
1968-ci ildə Bakı şəhərində anadan olan Bela Nuriyeva 1994-cü ildə Rusiyanın Omsk şəhərindəki OMSK dövlət universitetinin ibtidai təhsilin metodikası fakultəsini bitirib.
O, 2008-2013-cü illərdə Təhsil Nazirliyinin keçirdiyi “Ən yaxşı müəllim” müsabiqəsinin qalibi olub. 2009-cu ildə isə Azərbaycan Respublikasının “Qabaqcıl təhsil işçisi” döş nişanı ilə təltif olunub.
Nigar Mustafazadə də Təhsil Nazirliyi tərəfindən müxtəlif vaxtlarda mükafatlar, təşəkkürnamələr və hədiyyələr alıb. N.Mustafazadə 2013-2014-cü illərdə keçirilmiş “Ən yaxşı müəllim”müsabiqəsinin qaliblərindən olub və 5 min manat mükafat alıb.
Qeyd edək ki, Bela Nuriyeva və Nigar Mustafazadə 2021-ci ilin iyunun 24-də adlarının ilk iki hərflərini birləşdirərək, “BENİ” tədris mərkəzi təsis ediblər. Bu mərkəzdə müəyyən məbləğ qarşılığında 5-7 və 8-11 yaşlı uşaqlara rus dili dərsindən hazırlıqlar keçirilir. Görəsən, dərslikdə ciddi nöqsana yol verən bu müəllimlər, tədris mərkəzində də 20 yanvar faciəsini uşaqlara təhrif edilmiş formada çatdırırlar?
Problemlə bağlı Təhsil Nazirliyinə bir daha müraciət edərək konkret suallar ünvanladıq: “Dərsliyin nəşri üçün müsbət rəy verən ekspertiza qrupu ilə səhvin necə baş verdiyi araşdırılıbmı? Pedaqoji qurum bu kitabı neçə balla qiymətləndirib?”
Qurumdan aldığımız cavab həmişəki kimi iki cümlədən ibarət oldu: "Dərsliklər nəşriyyatlar tərəfindən hazırlanır və bir neçə mərhələdən ibarət ekspertizadan keçir. Bu zaman dərsliyə mütəxəssislər, müvafiq elmi-pedaqoji qurumlar qiymət verir. Dərslik layihələri ictimaiyyətin müzakirəsi üçün tims.edu.az saytında yerləşdirilir. Sözügedən dərsliyin istifadə müddəti 2022-2023-cü tədris ilində bitəcək. Həmin səhifənin yenilənmiş versiyası dərsliyə əlavə edilməsi üçün çap olunaraq məktəb kitabxanalarına göndəriləcək”.
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!