4-02-2025, 14:07
İlham Əliyev “Vətən” İdman Liseyində - FOTO
Azərbaycan Respublikasının Prezidenti İlham Əliyev Bakıda Tərlan Heybətov adına “Vətən” İdman Liseyində aparılmış yenidənqurma işlərindən sonra yaradılan şəraitlə tanış olub.
Elm və təhsil naziri Emin Əmrullayev dövlətimizin başçısına liseydə yaradılan şərait barədə məlumat verdi.
Bildirildi ki, “Vətən” İdman Liseyi 2022-ci ildə 126 nömrəli tam orta məktəbin bazasında yaradılıb. Birinci Qarabağ müharibəsi şəhidi Tərlan Heybətovun adını daşıyan 600 şagird yerlik Liseydə dövlət əsaslı vəsait qoyuluşu hesabına aparılan yenidənqurma işləri 2024-cü ilin dekabrında başa çatdırılıb.
Liseyin əsaslı təmir olunmuş tədris korpusunda 22 sinif otağı var. Şagirdlərin yüksək səviyyədə təhsil almaları üçün sinif otaqları zəruri dərs vəsaitləri ilə təchiz edilib.
Bu korpusda kimya, fizika, biologiya laboratoriyaları, informatika və çağırışaqədərki hərbi hazırlıq kabinetləri, kitabxana, 240 yerlik akt zalı, inzibati və yardımçı otaqlar yerləşir. Liseydə internet, mebel-inventar və digər zəruri avadanlıqlar müasir tələblər səviyyəsindədir.
Təhsil ocağının idman korpusunda isə universal zal (basketbol, voleybol, gimnastika, qılıncoynatma və s.) və güləş zalı əsaslı təmir olunub. Bundan əlavə, trenajor, cüdo zalı, fizioterapiya otağı, reabilitasiya idman zalı, buxar və yardımçı otaqlar yenidən qurulub.
Layihə çərçivəsində 100 nəfərlik yataqxana korpusu da əsaslı təmir olunub. Buradakı yeməkxana 220 nəfər üçün nəzərdə tutulub. Korpusdakı mətbəx, camaşırxana və digər yardımçı otaqlar da ən müasir avadanlıqlarla təchiz edilib.
Qeyd edək ki, yenilənən təhsil müəssisəsində tədris V-XI siniflər üzrə aparılır. Şagirdlərin təlim-tərbiyəsi ilə 60-a yaxın müəllim məşğul olur.
Burada bölgələrdən gələn və peşəkar idmanla məşğul olan şagirdlərin yataqxana ilə təmin edilməsi də nəzərdə tutulur. Liseydə həmin idmançıların günlük yemək normalarına uyğun qidalanması da təmin ediləcək.
Təhsil ocağının həyətində geniş abadlıq işləri görülüb.
Müasir dünyada hər bir ölkənin gələcəyi təhsilin səviyyəsi ilə ölçülür. Azərbaycan da bu ölkələr sırasındadır. Ölkəmizdə son illərdə təhsilin inkişafı ilə bağlı həyata keçirilən tədbirlər deməyə əsas verir ki, Azərbaycan öz gələcəyini daha etibarlı və inamlı görmək istəyir. Bundan başqa, zəngin təbii sərvətləri ilə dünyanın diqqətində olan Azərbaycan bu sərvətlərdən səmərəli istifadə ilə insan kapitalının daha da inkişaf etdirilməsini başlıca hədəf seçib.
“Vətən” İdman Liseyində görülən işlər və yaradılan şərait də bir daha təsdiqləyir ki, Azərbaycan Prezidenti İlham Əliyevin diqqəti sayəsində təhsil islahatları uğurla davam edir. Paytaxtda və bölgələrdə yeni məktəblərin inşası, əsaslı təmiri və yenidən qurulması ilə bağlı nəzərdə tutulmuş tədbirlər plana uyğun həyata keçirilir. Bütün bunlar, ilk növbədə, şagirdlərin ən yüksək səviyyədə təhsil almaları, onların elmin sirlərinə daha dərindən yiyələnmələri üçün hərtərəfli imkanlar açır.
Liseydə yaradılan şərait həm də onu göstərir ki, Azərbaycanda təhsilin və idmanın inkişafına ən yüksək səviyyədə dövlət qayğısı var. Çünki dövlətin yürütdüyü siyasətin prioritetlərindən biri də insan kapitalının daha da inkişaf etdirilməsidir. Bu baxımdan təhsil və idman sahəsinə qoyulan investisiyalar mühüm əhəmiyyət kəsb edir.
4-02-2025, 13:02
Hava soyuyacaq, temperatur 8 dərəcə enəcək - Yollar buz bağlayacaq
Gözlənilən hava şəraiti ilə əlaqədar olaraq fevralın 6-8-də gecə və səhər saatlarında bəzi dağlıq rayonlarda yolların buz bağlama ehtimalı var.
Məlumata əsasən Azərbaycanın rayonlarında bir neçə gün davam edən mülayim, yağmursuz hava şəraitindən sonra fevralın 5-i axşam şərq rayonlarından başlayaraq ayın 8-dək hava şəraiti dəyişəcək.
Belə ki, havanın fasilələrlə yağıntılı olacağı, dağlıq və dağətəyi rayonlarda qar yağacağı gözlənilir.
Ayrı-ayrı yerlərdə isə (Naxçıvan MR, Qarabağ və Şərqi-Zəngəzur, Balakən-Şəki, Quba-Qusar, Mərkəzi Aran, Lənkəran-Astara) yağıntıların intensivləşəcəyi ehtimal olunur.
Havanın temperaturu ötən günlərlə müqayisədə tədricən 5-8° aşağı enəcək.
4-02-2025, 12:35
Sabahın havası
Fevralın 5-də gözlənilən hava şəraiti açıqlanıb.
Milli Hidrometeorologiya Xidmətindən verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gecə və səhər bəzi yerlərdə çiskinli olacağı, axşam isə arabir yağış yağacağı ehtimalı var. Arabir güclənən şimal-qərb küləyi əsəcək.
Havanın temperaturu gecə 4-6° isti, gündüz 7-9° isti olacaq. Atmosfer təzyiqi normadan yüksək 765 mm civə sütunu olacaq. Nisbi rütubət 70-80 % olacaq.
Azərbaycanın rayonlarında havanın əsasən yağmursuz keçəcəyi, lakin gündüz şərq rayonlarından başlayaraq bəzi yerlərdə arabir yağıntılı olacağı, dağlıq rayonlarda qar yağacağı gözlənilir. Axşam arı-ayrı yerlərdə intensivləşəcəyi ehtimalı var. Bəzi yerlərdə arabir duman olacaq. Qərb küləyi ayrı-ayrı yerlərdə arabir güclənəcək.
Havanın temperaturu gecə 1° şaxtadan 3°-dək isti, gündüz 6-11° isti, dağlarda gecə 0-5° şaxta, gündüz 3-8° isti olacaq.
4-02-2025, 12:26
İran baş prokurorunun müavini Orxanın atası ilə danışıb - Təfərrüat AÇIQLANDI
Azərbaycanın İrandakı səfirliyinə terror
hücumundan 2 il ötür. 27 yanvar 2023-cü il tarixində səfirliyimizə hücum edən İran vətəndaşı Yasin Hüseynzadə “Kalaşnikov” markalı avtomat silahla mühafizə xidmətinin rəisi Orxan Əsgərovu qətlə yetirib. Səfirliyin mühafizə xidmətinin iki əməkdaşı - Vasif Tağıyev və Mahir İmanov hücumun qarşısını alarkən yaralanıblar.
Orxan Əsgərov Bakıdakı İkinci Şəhidlər xiyabanında dəfn edilib. 3 fevral 2023-cü ildə Azərbaycan Prezidentinin Sərəncamı ilə Orxan Rizvan oğlu Əsgərov (ölümündən sonra) "Vətən uğrunda" medalı ilə təltif edilib.
Qatil barəsində ölüm hökmü çıxarılsa da, iki il boyunca icra edilməyib. Hətta bu yaxınlarda onun işi prokurorluğa geri qaytarılıb. Nəhayət iki il sonra edam hökmü Ali Məhkəmə tərəfindən təsdiq olunub. Hökm icra üçün Tehran məhkəməsinə göndərilib.
Hazırda proses nə yerdədir, edam nə vaxt baş tutacaq?
Məsələ ilə bağlı Orxan Əsgərovun atası Rizvan Əsgərov bildirib ki, hələ ki edam günü ilə bağlı onlara heç bir məlumat verilməyib:
“Edam günü ilə bağlı bizdə heç bir məlumat yoxdur. Ailə üzvlərinin edam tələbi ilə əlaqədar ərizə yazmalı olduğunu dedilər. Ərizəni yazıb göndərdik. Təbrizdəki Baş konsulun adına etibarnamə yazdıq ki, İranda bütün məsələləri adımızdan həll etsin. Sənədlər hazırlayıb vermişik”.
R.Əsgərov kompensasiya tələbi məsələsinə də toxunub:
“2023-cü ildə İrandan nümayəndə heyəti gəlmişdi. Nümayəndə heyətinin rəhbəri İranın baş prokurorunun müavini idi. Məni və kiçik oğlumu dəvət etmişdi. Baş prokurorun müavini İran dövləti adından üzrxahlığını bildirdi, başsağlığını çatdırdıqdan sonra dedi ki, İran qanunvericiliyinə görə, öldürülən şəxsin ailəsi ya kampensasiya, yaxud da edam tələb edə bilər. Bizim də, şəxsən mənim tələbim edam oldu. Məsələ birdəfəlik bağlanıb. Bizim mövqeyimizin qəti olduğunu gördülər".
Orxanın atası onun dostlarının daim onlarla maraqlandığını da söyləyib: "Bəli, mütəmadi zəng edirlər, ailəsinə baş çəkirlər, mənə zəng edirlər. Onların hamısının atasını da tanıyıram. Orxanın iş yoldaşları bizimlə həmişə maraqlanırlar".
4-02-2025, 12:19
“44 günlük müharibədən sonra yeni imkanlar əldə etdik” - Paşinyan
“44 günlük müharibədən sonra biz müstəqil, suveren dövlətə sahib olmaq imkanı əldə etdik”.
Bunu ABŞ-da erməni icmasının nümayəndələri ilə görüşündə Ermənistanın baş naziri Nikol Paşinyan bildirib.
“Mən də istəməzdim ki, bu təhlillər bizi həlak olan əsgərlərmizin fədakarlığının boşa getdiyi qənaətinə gətirsin. Mən bu mövqe ilə razı deyiləm. Bu mövzu üzərində uzun müddət düşündüm və əmin oldum ki, bu qurbanlar Ermənistan Respublikasının müstəqilliyi və suverenliyi naminə verilib. Biz bu fədakarlığın yaratdığı fürsətə diqqət etməliyik. Bu, asan olmayacaq", - Paşinyan deyib.
“Ermənistanda tutduğumuz yola görə hazırda ideoloji transformasiya gedir. Bu ideologiya Ermənistana mövcud olmaq şansı verir”, - baş nazir əlavə edib
"Bugünkü vəziyyəti dəyərləndirərək, bunu deyə bilərəm: məncə, o məğlubiyyəti keçməklə biz bu gün müstəqil və suveren dövlətə sahib olmaq imkanı əldə etmişik”.
Paşinyan bildirib ki, ABŞ-ın yeni Administrasiyası Cənubi Qafqaza diqqəti azaltmamalıdır:
“Cənubi Qafqazda sülhün əldə edilməsi gündəmi ABŞ siyasi elitasının prioritetləri sırasına daxil edilməlidir. İnsanların azadlıqlarını qorumaq üçün ən yaxşı vasitə davamlı sülhdür, çünki münaqişə mühiti bütün mümkün insan hüquqlarının pozulması üçün ən uyğun mühitdir”.
Paşinyan deyib ki, Cənubi Qafqaz regionu son dərəcə mürəkkəbdir, bu gün də dərin tarixi ziddiyyətlərlə doludur.
“İndi biz gələcək üçün perspektivlər açacaq bir gündəmə diqqət yetirməliyik”.
4-02-2025, 11:31
İrandan Azərbaycana 16 kq narkotik keçirilməsinin qarşısı alındı
Narkotik vasitələrin ölkə ərazisinə keçirilməsinin qarşısı alınıb.
Bu barədə Dövlət Sərhəd Xidmətinin Mətbuat Mərkəzi məlumat yayıb.
Dövlət sərhədinin etibarlı mühafizəsinin təmin edilməsi, qaçaqmalçılıq və narkotik vasitələrin qanunsuz dövriyyəsinə qarşı keçirilmiş sərhəd axtarışı və əməliyyat tədbirləri nəticəsində yanvar ayının 30-da saat 11:20-də Dövlət Sərhəd Xidmətinin Sərhəd Qoşunları Komandanlığının “Göytəpə” sərhəd dəstəsinin xidməti ərazisində ümumi çəkisi 16 kiloqram 400 qram narkotik vasitə (11 kq 300 qram marixuana, 5 kq 100 qram tiryək) və 1990 ədəd narkotik tərkibli güclü təsiredici metadon M - 40 həbinin qaçaqmalçılıq yolu ilə İran İslam Respublikasından Azərbaycan Respublikası ərazisinə keçirilməsinin qarşısı alınıb.
Fakt üzrə əməliyyat-istintaq tədbirləri davam etdirilir.
4-02-2025, 11:03
Balakəndə iri marketin fəaliyyəti dayandırıldı - VİDEO
Fövqəladə Hallar Nazirliyinin Dövlət Yanğın Nəzarəti Xidməti səlahiyyətlərinə uyğun olaraq, ölkə ərazisində yanğın təhlükəsizliyinin təmin edilməsi məqsədilə zəruri tədbirlərin görülməsini davam etdirir.
Bu çərçivədə, Dövlət Yanğın Nəzarəti Xidməti tərəfindən Balakən şəhərində yerləşən “Balməkan” marketində keçirilən yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib. Belə ki:
- obyektdə mövcud olan avtomatik yanğınxəbərverici siqnalizasiya sistemi nasaz vəziyyətdədir;
- elektrik təsərrüfatı “Elektrik Qurğularının Quraşdırılması Qaydası”nın tələblərinə uyğun quraşdırılmayıb, o cümlədən elektrik naqilləri yanar materialların üzəri ilə çəkilib, elektrik təsərrüfatına profilaktik baxış keçirilərək kabel və naqillərin izolyasiyasının gərginliyə qarşı müqaviməti ölçülməyib;
- obyekt odsöndürən balonlarla təmin olunmayıb;
- obyektin istismarı Dövlət Yanğın Nəzarəti Xidməti ilə razılaşdırılmayıb.
Beləliklə, mövcud vəziyyət onu göstərir ki, obyektin istismarının davam etdirilməsi nəticəsində orada hər an baş verə biləcək yanğın qısa müddətdə genişlənərək faciəni qaçılmaz edəcək.
Qeyd olunanları nəzərə alaraq, yanğın təhlükəsizliyi norma və qaydalarının tələblərinin kobud pozulması faktları aşkar edilmiş Balakən şəhərində yerləşən “Balməkan” marketinin fəaliyyətinin dayandırılması barədə Qərar qəbul olunub və Qərarın bir nüsxəsi obyektin nümayəndəsinə təqdim edilib.
[media=https://youtu.be/BCM36eo9mSM]
4-02-2025, 10:18
Bu səhərin müjdəsi
Xocalının ilk körpəsi dünyaya gəldi
İşğaldan azad edildikdən sonra Xocalı rayonunun Ballıca kəndində ilk körpə dünyaya gəlib.
Xocalı sakini, 1996-ci il təvəllüdlü Sevanə Məmmədovanın dünyaya gətirdiyi ilk övladı oğlandır. Ballıca kəndində dünyaya göz açan körpəyə babası Mehdinin adını veriblər. Hazırda anaya və körpəyə zəruri tibbi xidmətlərin göstərilməsi davam etdirilir, vəziyyətləri qənaətbəxşdir.
Qeyd edək ki, körpənin atası İlqar Məmmədov Vətən müharibəsinin iştirakçısı, qazi, müharibə veteranıdır. Hazırda ANAMA- da işləyir. Məmmədovlar ailəsi bir müddət əvvəl Ballca kəndinə köçüblər.
3-02-2025, 22:50
Özbəkistana da şəxsiyyət vəsiqəsi ilə gedə biləcəyik
Azərbaycan vətəndaşlarının Özbəkistana şəxsiyyət vəsiqəsi ilə səfər edə bilməsi ilə bağlı müzakirələr aparılır.
Bu barədə Özbəkistanın "Dunyo" informasiya agentliyi məlumat yayıb.
Bildirilir ki, Özbəkistan və Azərbaycanın müvafiq qurumunun nümayəndələri danışıqlar aparıb, şəxsiyyət vəsiqələrinin qarşılıqlı tanınması məsələləri müzakirə olunub.
"Danışıqlar çərçivəsində hər iki ölkənin Xarici İşlər Nazirliyinin konsulluq və hüquq idarələrinin əməkdaşlarının iştirakı ilə biometrik şəxsiyyət vəsiqələrinin Özbəkistan və Azərbaycan sərhədlərini keçmək üçün sənəd kimi tanınması imkanları müzakirə edilib", - məlumatda deyilir.
Məlumatda qeyd olunur ki, bu addım vətəndaşların gediş-gəlişini sadələşdirəcək, ikitərəfli əlaqələri gücləndirəcək və miqrasiya siyasəti sahəsində əməkdaşlığı genişləndirəcək. Xüsusilə, belə səfərlərin rahatlığı hər iki ölkənin vətəndaşlarına xarici pasport almadan sərhədi keçməyə imkan verəcək.
Xatırladaq ki, Özbəkistanla Azərbaycan arasında vizasız rejim mövcuddur, lakin iki ölkə vətəndaşları sərhədi yalnız xarici pasportla keçə bilərlər.
Qeyd edək ki, hazırda Azərbaycanla Türkiyə arasında şəxsiyyət vəsiqəsi ilə qarşılıqlı səfərlər mümkündür.
3-02-2025, 21:14
Nazir yeni rəis təyin etdi
Mədəniyyət Nazirliyinin Mil-Muğan Regional Mədəniyyət İdarəsinə yeni rəis təyin edilib.
Bu barədə mədəniyyət naziri Adil Kərimli əmr imzalayıb.
Bildirilir ki, sözügedən vəzifə Nadir Quliyevə həvalə edilib.
O, bundan əvvəl Mil-Muğan Regional Gənclər və İdman İdarəsinin rəisi vəzifəsində çalışıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!