Prezidentliyə namizədlərin 19 sentyabrda İctimai Televiziyada (İTV) kecirilən teledebatında Hafiz Hacıyevin, Milli Şuranın vahid namizədi Cəmil Həsənlinin ödənişsiz efir vaxtına müdaxilə etməsi Hafiz Hacıyevin namizədliyinin ləğv edilməsi sualını gündəmə gətirdi.
Xatırladaq ki,teledebat zamanı Müasir Müsavat Partiyasının sədri, prezidentliyə namizəd Hafiz Hacıyev Milli Şuranın vahid namizədi Cəmil Həsənlinin ailəsinə və özünə qarşı təhqiramiz sözlər işlədib. Bundan sonra Cəmil Həsənlinin ödənişsiz efir vaxtına müdaxilə edən və əlindəki su qabını ona atan H.Hacıyev mühafizəçilər tərəfindən studiadan uzaqlaşdırılıb.

Seçki Məcəlləsi 88-ci maddənin birinci məndində deyilir: "Azərbaycan Respublikasının Cinayət Məcəlləsinə, İnzibati Xətalar Məcəlləsinə və Mülki Məcəlləsinə uyğun olaraq, qeydə alınmış namizədlərin, siyasi partiyaların, siyasi partiya bloklarının, referendum üzrə təşviqat qruplarının seçkiqabağı proqramlarında (referendumqabağı çağırışlarında), yığıncaqlarda, kütləvi informasiya vasitələrində yayılan təşviqat materiallarında və çıxışlarda hakimiyyətin zorla ələ keçirilməsinə, Konstitusiya quruluşunun zorla dəyişdirilməsinə və dövlətin ərazi bütövlüyünün pozulmasına çağırışlar, vətəndaşların şərəf və ləyaqətini təhqir edən mülahizələr olmamalıdır. Bu qadağa Azərbaycan Respublikası Konstitusiyasının 47-ci maddəsinə uyğun tətbiq edilməlidir".
Hafiz Hacıyevin "4 milyon Qərbi Azərbaycanlı mənim arxamdadır" deməsi sosial, milli, dini, irqi ayrıseçklinik olmasa da "yerlibazlıqdır". Bu sözlər Qərbi Azərbaycan ziyalılarını da hiddətləndirib.
Dünən baş verən "namizəd qarşıdurması"ndan sonra "facebook" sosial şəbəkəsində Azərbaycan Respublikası Mərkəzi Seçki Komissiyasına müraciət hazırlanıb. Müraciətdə Hafiz Hacıyevin Seçki Məcəlləsinin tələblərini kobud şəkildə pozduğu və buna görə də onun namizədliyinin ləğv olunması xahiş olunur.

Milli Şuranın vahid namizədi Cəmil Həsənli məsələylə bağlı MSK-ya müraciət edəcəyi haqqında açıqlama verib. MSK-nın bu müraciət əsasında hansı qərar çıxaracağını cəmiyyət maraqla gözləyir.