Sakinlər yolsuzluqdan şikayətlənir

Yasamal rayonundakı MAİN yaşayış kompleksində yaşayan sakinlər yolsuzluqdan şikayətlənirlər. Belə ki 10-dan artıq hündür mərtəbəli binanın həyətinə normal nəqliyyat yolu yoxdur. Oraya getmək üçün avtomobillər "Alatava" adlanan ərazidəki dolanbac dar küçələrdən keçməyə məcburdur. Digər alternativ yol Biləcəri qəsəbəsini dolanıb keçməkdən ibarətdir.
Bunlar azmış kimi, yaşayış kompleksinin girişində yenicə inşa edilmiş doqquz mərtəbəli bina sakinlərin piyada yoluna da ciddi əngəl yaradıb. Binanın birinci mərtəbəsində yeni açılan "Oba" marketin qabağında sutka boyu lövbər salmış maşınlar yolu keçilməz edib. Burada hər an ağır yol qəzası baş verə bilər. Hələ ki, əlaqədar qurumlar sakinlərin bu çətinliyini görməzdən gəlirlər.

R.T.Ərdoğan: ''Qəzzaya daha çox yardım etmək qardaşlıq borcumuzdur”

Butov.az trt.net.tr saytına istinadla bildirir ki, bu sözləri Türkiyə Prezidenti Rəcəb Tayyib Ərdoğan partiyasının Giresundakı mitinqində çıxışında deyib: “'Qəzzada axan qanı dayandırmaq və İsrailin qətliamının qarşısını almaq istəyiriksə qardaş ölkələrlə əlaqələrimizi gücləndirməliyik. Birləşmiş Ərəb Əmirliklərinə və Misirə səfərimiz bu baxımdan çox uğurlu oldu. Dövlət başçıları ilə ticarət və investisiyalardan əlavə Fələstin məsələsini də müzakirə etdik. Hər iki ölkə ilə əməkdaşlığımızı gücləndirmək qərarına gəldik. Oktyabrın 7-dən Qəzzadakı qardaşlarımıza humanitar yardım materialları göndəririk. Bu mövzuda həmişə Misir səlahiyyətliləri ilə koordinasiyalı hərəkət etmişik. Misirin dəstəyi ilə bölgəyə 34 min tondan çox humanitar yardım göndərdik. Ramazan ayı yaxınlaşır və İsrailin Qəzzada törətdiyi qətliamlar artır. Məqsədimiz ən qısa zamanda atəşkəsi təmin etmək və Qəzzaya humanitar yardımın fasiləsiz çatdırılmasıdır. Ramazan ayında Qəzzaya daha çox yardım etmək bizim qardaşlıq borcumuzdur. İnşallah, bu yardımın çatdırılması mövzusunda Misirlə əməkdaşlıq edəcəyik. Qəzza xalqının öz torpaqlarından sürgün edilməsinə qarşı da Misirlə birlikdə hərəkət edəcəyik”.

“İRƏLİ” İB Azərbaycan Gəncləri Gününü silsilə tədbirlərlə qeyd edib

“İRƏLİ” İctimai Birliyi 2 Fevral – Azərbaycan Gəncləri Gününü silsilə tədbirlərlə qeyd edib.
Birliyin Mətbuat xidmətindən Butov.az-a məlumat verilib ki, tədbirlər planının keçirilməsində əsas məqsəd Ümummilli Lider Heydər Əliyev tərəfindən əsası qoyulan və hazırda Prezident İlham Əliyev tərəfindən davam etdirilən dövlət gənclər siyasətinin mühüm istiqamətləri ilə gəncləri yaxından tanış etmək, habelə gənclərin asudə vaxtının səmərəli təşkili və müxtəlif sahələr üzrə bilik və bacarıqlarının artırılmasıdır.
Tədbirlər çərçivəsində təşkilatın nümayəndə və üzvləri Fəxri xiyabanda dövlət gənclər siyasətinin banisi, Ulu Öndər Heydər Əliyevin məzarını ziyarət ediblər.
Təşkilat tərəfindən 30 yanvar tarixində “Gənclik İrəlidədir” həftəsi elan olunub. Tədbirlər planı çərçivəsində gənclərin asudə vaxtının səmərəli təşkili, müxtəlif sahələr üzrə panel görüşlər, sərgi, ekskursiya, konsert və digər kütləvi-mədəni tədbirlərin təşkili həyata keçirilir. 5 fevral tarixinədək davam edəcək tədbirlər vətənpərvərlik, yaşıl dünya, şəxsi inkişaf, Qərbi Azərbaycan, təhsil, tarix, mədəniyyət və idman istiqamətlərini əhatə edəcək.
Qeyd edək ki, 2 Fevral – Azərbaycan Gəncləri Gününədək Azərbaycan Xalça Muzeyində “Mədəni İrsimİZ”, Azərbaycan Milli İncəsənət Muzeyində “Mədəni yaddaşımızda Qərbi Azərbaycan” sərgiləri baş tutub. Sərgilərlə yanaşı Azərbaycan Real Aykido Klubunun tərəfdaşlığı ilə özünümüdafiə təlimi, DİN İdman Cəmiyyətinin tərəfdaşlığı ilə isə əlbəyaxa döyüş təlimi həyata keçirilib. Qarşıdakı günlərdə bir sıra istiqamətdə görüş və təlimlərin həyata keçirilməsi nəzərdə tutulur.
“İRƏLİ” İctimai Birliyin təşkilatçılığı, Azərbaycan Respublikası Mədəniyyət Nazirliyinin dəstəyi və Azərbaycan Gənclər Fondunun tərəfdaşlığı ilə “MədəniyyətimİZ” proqramının növbəti görüşü də 2 Fevral – Azərbaycan Gəncləri Gününə həsr olunub.
Görüş müddətində Xalq şairi Vahid Əziz Ulu Öndər Heydər Əliyevlə bağlı olan ən zəngin xatirələrdən, Azərbaycan ədəbiyyatının inkişafı kontekstində milli nümunələrin təbliği, yaradıcı sənayenin müasir tendensiyalardan söhbət açıb. Tədbir “Mədəniyyətimizin yaşadılması, inkişafı və təbliğində Azərbaycan dili və ədəbiyyatın rolu”, “Ədəbi mühitdə yeni, innovativ yanaşmalar: Yaradıcı sənayenin inkişafı kontekstində müasir yazarlıq ənənələrinə baxış” və “İstedadlı gənclərin tanıdılması” mövzularında panel müzakirə ilə davam edib.

Yaşa görə pensiyaya çıxanların sayında azalma olacaq

Yaşa görə pensiyaya çıxanların sayında azalma olacaq.
Buna səbəb qadınların pensiya yaşının artırılmasıdır.
Qadınların pensiya yaşının artırılması yaşa görə pensiyaya çıxanların sayının azalmasına səbəb olacaq. Bildirək ki, 2019-cu ildə yaşa görə 742 min insan pensiya alırdı. Bunun 466,8 min nəfəri qadınlar idi. 2023-cü ilin əvvəlində yaşa görə pensiya alanların sayı 696 min nəfərə, qadın pensiyaçıların sayı isə 404,5 min nəfərə enib.
Pensiya yaşının artırılmasından sonra qadınlar arasında yaşa görə pensiya alanların sayı bir qədər də azalacaq.
Xatırladaq ki, “Əmək pensiyaları haqqında” qanunun 7-ci maddəsində nəzərdə tutulmuş kişilərin yaş həddi 2017-ci il iyulun 1-dən başlayaraq 2021-ci il iyulun 1-dək, qadınların yaş həddi 2017-ci il iyulun 1-dən başlayaraq 2027-ci il iyulun 1-dək hər il 6 ay artırılır.

Mina partlayışında əlil olanların şəhidlərlə sosial ödənişlərində fərq olmayacaq

Şəhidlərimizlə mina partlayışı nəticəsində əlil olan şəxslərin sosial ödənişlərində fərq olmayacaq.
Bunu Dövlət Məşğulluq Agentliyinin təşkil etdiyi Peşələr Festivalının final mərhələsində Əmək və Əhalinin Sosial Müdafiə naziri Sahil Babayev jurnalistlərə açıqlamasında bildirib.
“Azərbaycanın ərazi bütövlüyü və suverenliyi uğrunda həlak olanlar, şəhidlərimiz və mina partlayışı nəticəsində yaralanaraq öz əzalarını itirənlərin, yəni əlillik qazanan şəxslərin statusunda hər hansı bir fərq yoxdur. Onlara sosial ödənişlər bərabər şəkildə şamil olunur” - deyə, nazir bildirib.
Qeyd edək ki, 2020-ci ilin noyabrından bu günədək ümumilikdə 197 mina hadisəsi baş verib. Bu partlayışlar nəticəsində mina qurbanlarının sayı 337-yə çatıb. Bu faciə Ermənistanın yaratdığı mina təhlükəsinin dəhşətlərini bir daha sübut edir.

Sahil Babayev: “Bu ilin 10 ayı ərzində 41 min şəxsə əlillik təyinatı aparılıb”

“Bu ilin 10 ayı ərzində 41 min şəxsə əlillik təyinatı aparılıb”.
Bunu Milli Məclisin Əmək və sosial siyasət komitəsinin bu gün keçirilən iclasında əmək və əhalinin sosial müdafiəsi naziri Sahil Babayev deyib.
O qeyd edib ki, komissiyanın tərkibində aidiyyəti dövlət qurumlarının ekspertləri dəvət olunur.
"Narazılıq edən kiçik qrup qalıb və 4-5 dəfə komissiyada olub, dəfələrlə deyilib ki, sizə əlillik təyinatı düşmür. Amma insan bununla razılaşmaq istəmir, onların hüququnu tanıyırıq və gedib 2 aydan sonra yenidən sənədləri ilə müraciət edir. Bir daha qəbul edirik və cavabı yenidən bildiririk. Bu gün müharibə ilə bağlı 6300 şəhadətləndirilmiş vətəndaş olub. Şəhadətlənmə əlillik üçün yox, yüngül yaraya da verilir ki, ona birdəfəlik sosial sığorta ödənişi verilsin. Onlardan 4021 nəfərə əlillik təyin edilib. Psixi xəstəliklərlə əlaqəli əlillik təyinatında isə 4021 nəfərin 43 %-i məhz kəllə-beyin travması və bunun nəticəsində yaranan psixi pozuntularla əlaqəli vermişik”,- deyə nazir bildirib.

Nazir pensiya üçün kişi və qadınların yaşını açıqladı

“Bu gün Azərbaycanda pensiya yaşı kişilər üçün 65, xanımlar üçün 63-dür”.
Bunu Milli Məclisin Əmək və sosial siyasət komitəsinin bu gün keçirilən iclasında əmək və əhalinin sosial müdafiəsi naziri Sahil Babayev deyib.
“Biz Milli Məclisə nazirliyin fəaliyyətinə dair hesabat təqdim edirik. Bu gün Azərbaycanda median pensiya 360 manata çatıb. Bu isə median əməkhaqqının 70%-dən azdır. Məbləğ olaraq götürəndə artım son 4 il ərzində 2,5 dəfədir. Kifayər qədər ciddi artım var. Orta pensiya üçün rəqəmlər də açıqlanıb. Cari il üçün 483 manat, növbəti il üçün yaşa görə pensiya 516 manat proqnozlaşdırılır. Median pensiya nəyə görə orta pensiyadan aşağıdır? Bu əməkhaqqı sistemində də, pensiya sistemində də eynidir”, - o bildirib.
Nazir deyib ki, hər kəs Azərbaycanda ən yüksək əmək haqları və pensiyalar olmasını arzulayır.
“Nominal rəqəmin yüksək olması hamımızın arzusudur. Nominal rəqəmin arzu etdiyimiz səviyyəyə çatmasını biz də istəyirik. Hələ o səviyyəyə çatmamışıq. Bunu bir günə etmək çox böyük çağırışlar, fəsadlar törədə bilər. Ona görə də dinamikaya baxmaq lazımdır", - deyə nazir bildirib.

Dərələyəz icması xalq qəhrəmanı Balo bəy Vəkilovun məzarını ziyarət edib

Naxçıvanda keçirilən “Qərbi Azərbaycana qayıdış” festival-konqresində iştirak edən Dərələyəz icmasının üzvləri Xalq qəhrəmanı Balo bəy Vəkilovun məzarını ziyarət ediblər.
Bu barədə Dərələz icmasının sədr müavini Möhübbət Səmədoğlu məlumat verib. O, bildirib ki, icma rəhbəri professor Mahirə Nağıqızının təşəbüsü ilə Naxçıvanda səfərdə olan Dərləyəz İcmasının üzvüvələri 25 noyabr 2023-cü il tarixində Naxçıvan şəhər qəbristanlığında uyuyan Xalq qəhrəmanı Balo bəy Vəkilovun məzarını ziyarət ediblər. Məzarın önündə çıxış edən professor Mahirə Nağıqızı bildirib ki, Müzəffər Ali Baş Komandan cənab İlham Əliyevin rəhbərliyi ilə torpaqlarımızın azad edilməsi onu göstəriki biz qəhrəman xalqıq. Bu qəhrəmanlıq tarixi şura əsaslanır. Odur ki biz tariximizi yaxşı öyrənməliyik.
Sonra professor Mahirə Nağıqız 1918-1920-ci illər erməni-müsəlman qırğınlarına toxunar bu dövrü Azərbaycan tarixinin ən mürəkkəb və çətin dövrü adlandırmışdır.Professor M.Nağıqızı:” Bir tərəfdən Andoluda erməni dövləti yaratmaq istəyən qüvvələrin xülyaları boşa çıxmışdı. Digər tərəfdən isə Çar Rusiyası süquta uğarmışdır. Fürsətdən istifadə edən ermənilər Qafqaz Hərbi dairəsindəki silahları ələ keçirmiş, Osmanlıda qırğınlar törədən Andranik Ozanyana saxta general rütbəsi verilmişdi. Belə bir şəraitdə Azərbaycan öz müstəqilliyini elan etmişdir. Andarnik Ozanyanın hərbi dəstləri Anadoludan Azərbaycan ərazisinə daxil olaraq silahsız mülki əhaliyə qarşı kütləvi qətllər həyata keçirirdi.



Belə bir şəraitdə məhz Xalq Qəhrəmanı Balo bəy Vəkilov Çivə özünümüdafiə taborunu yaradaraq Şərur-Dərələyəz qəzasında Andarnikin qoşunlarına qarşı milli mücadiləni təşkil etmişdir.Təsadüfi deyil ki, ermənilər nə qədər mübarizə aparsalarda Çivə kəndini aylarla mühasirədə saxlasalarda kəndi təslim edə bilməyiblər. Belə qəhrəmanlar unudulmamalıdır. Keçmişinə sahib çıxmayanın gələcəyi olmaz deyib atalar. Balo bəy Vəkilov kimi qəhrəmanlarımızın ehtiramını saxlamaq hər birimizin borcudur”.
M.Nağıqızı tarixçi alim Əli Əliyevin xatirələrində Balo bəy Vəkilov haqqında yazılanların maraqlı bir mənbə olduğunu da söylədi.
Sonra o, Balo bəy Vəkilovun irsinin tədqiq edilməsi onun haqqında ayrıca kitabın yazılması, səndli filimin çəkilməsinin zəruriliyini vurğuladı. M.Nağıqızı onu da qeyd etdi ki, Balo bəy Vəkilov haqqında onu görən tanıyan şəxslərin şəxsi xatirlərini də toplamaq olduqca vacibdir və bu işləri təxirə salınmadan həyata keçirmək lazımıdr.

Sonra Balo bəy Vəkilovun oğlu görkəmli dövlət xadimi Tofiq Vəkilovun da məzarı ziyarət edilmişdir.
Qeyd edək professor Mahirə Nağıqızı ilə bərabər Dərələyəz icmasının üzvləri Möhübbət Səmədoğlu, tarix üzrə fəlsəfə doktoru Leyla Calalova, həkim Mehparə Calalova, hüquqşünas Səməd Vəkilov, filologiya üzrə fəlsəfə doktoru, dosent Könül Həsənova, filologiya elmləri doktoru Könül Səmədova, pedaqogika üzrə fəlsəfə doktoru, dosent Nazilə Abdullazadə və digər qonaqlar Naxçıvan Xalça və İplik İstehsalı Müəssisəsi Məhdud Məsuliyyətli Cəmiyyətinin direktoru Rövşən Vəkilov, müsəssisənin əməkdaşı Ülvi Əsgərov, Şərur rayonu Dan Yeri kədinin sakini müharibə veteranı Tofiq Calalov, kənd sakini Yusif Yusifli də iştirak ediblər.
Tədbirin sonunda hüquqşünas Səməd Vəkilov Dərləyəz icmasının rəhbəri professor Mahirə Nağıqızına vəkilovlar ailəsi adından təşəkkürünü bildirib.
Qeyd edək ki, Azərbaycan tarixində müstəsna xidmətləri olmuş vəkilovlar nəslinin nümayəndəsi Xalq qəhərmanı Balo bəy Cəlil bəy oğlu Vəkilov 1898-cu ildə Şərur-Dərələyəz qəzasının Çivə kəndində doğulub.İlk təhsilini mədrəsədə alıb.



Uşaq yaşlarında (1905-1907) erməni-müsəlman qırğınlarının şahidi olmuşdur. 1918-ci il hadisələri başlayandan Balo bəy ermənilərin elə ilk hücumlarından sonra silaha sarılır. Könüllülərdən ibarət güclü müdafiə dəstəsi yaradır. Dəstədə Əhməd bəy (Amo), İsmayıl bəy, Əli bəy, Hüseyn bəy, Qafar bəy, Yusif bəy, Kərbəlayı Əşrəf bəy, Kərbəlayi Firudin bəy, Paşa bəy vəkilovlar və kəndin qəhrəman əhalisidə şücaətlə iştirak edirlər.
Qüvvələrin qeyri-bərabər olmasına baxmayaraq kəndin camaatı igidliklə vuruşur, ermənilərin bütün hücumlarını dəf edir, onlara sarsıdıcı zərbələr vururdu. Bir müddətdən sonra Naxçıvan və Qərbi Azərbaycanın əhalisi kütləvi şəkildə öz doğma yurdlarını tərk edərək İran ərazisinə keçmək zorunda qalırlar. Həmin vaxtı Balo bəyin rəhbərlik etdiyi Çivə müdafiəçiləri də İrana keçməli olurlar. İrandan geri qayıtdıqdan sonra Balo bəy Bakıya gedir, Məhəmməd Əmin Rəsulzadə ilə görüşür.
Məhəmməd Əmin Rəsulzadə öz kəndlərinə qayıtmağı məsləhət görür. Bu dövrdə Dərələyəzin əhalisinin bir hissəsi Qarabağa köçür. Balo bəy və Çivə müdafiəçiləri isə öz kəndlərinə qayıdır. Yenidən döyüşlər şiddətlənir. Bu döyüşlərdə Balo bəy və müdafiəçilər özlərini məğlubedilməz qəhrəman kimi göstərirlər. Ermənilər Balo bəy və Abbasqulu bəy Şadlinskinin başına mükafat təyin edirlər. Lakin yenə də bu igidləri öldürmək azğın düşmənə qismət olmur.
30-cu illərin ağır repressiyalarında Balo bəyin də adı repressiya olunanların siyahısına salınır. Lakin Balo bəyə olan xalq sevgisi onun gizlənməklə repressiyadan xilas olmasına kömək edir. Lakin Naxçıvanda olan vəzifəli ermənilərə Balo bəyin sağ qalması ağır gəlirdi. Böyük Vətən müharibəsi başlayanda ermənilər Balo bəyi müharibəyə göndərməyə cəhd etsələr də onun yaşının çoxluğu ermənilərin murdar niyyətini həyata keçirməyə mane olur.



1943-cü ildə Balo bəy Naxçıvanda dükanda satıcı işləyir. Balo bəy burada da ermənilərin hiyləsindən xilas ola bilmir. Ermənilərin şahidlik ilə Balo bəyi guya ticarətdə etdiyi saxtakarlığa görə həbsinə nail olurlar. Məhkəmə hətta Balo bəy haqqında ölüm hökmü çıxarır (gələcəkdə oxucuları məhkəmə sənədləri ilə tanış edəcəyik), lakin hökm icra edilmir. Balo bəy iki il həbsdə olur. Sonra isə Naxçıvan MR Nazirlər Sovetində işləyən əmisi oğlu İlyas Vəkilovun köməyi ilə həbsdən azad olur. Ömrünün sonuna qədər Naxçıvan şəhərində yaşayan Balo bəy Vəkilov 1982-ci ildə Naxçıvan şəhərində vəfat etmiş və Naxçıvan şəhər məzarlığında dəfn edilmişdir.

Bu öhdəliyi yerinə
yetirən kişilərə yeni hüquq verilir

Üç yaşınadək uşağını təkbaşına böyüdən kişilərə yeni hüquq verilir.
Bu, Milli Məclisin Əmək və sosial siyasət komitəsinin bu gün keçirilən iclasında müzakirəyə çıxarılan Əmək Məcəlləsinə təklif edilən dəyişiklikdə əksini tapıb.
Dəyişikliyə görə, üç yaşınadək uşağını təkbaşına böyüdən kişilər gecə vaxtı yerinə yetirilən işlərə yalnız onların yazılı razılığı ilə cəlb edilə biləcəklər.

ÜZÜ DÖNSÜN AYRILIĞIN...

Ürəklərdə yalnız xoş xatirələriylə yaşayan Elgün Rzayevi amansız əcəl 6 ildir, bizdən ayırıb. Ömür-gün yoldaşı Aydan Rzayevanın statusunda paylaşdıqlarını və ili ərəfəsində qələmə aldıqlarımı saytın izləyicilərinə təqdim edirəm.

* * *
Bu gün yoxluğunun 6-cı il dönümüdür. Çiyinlərimdə ağır yüklə, ürəyimizdə çox böyük dərdlə səni sənsiz göz yaşları ilə anırıq. Səndən sonra hər şey, çox şey dəyişdi. Bir sənin yoxluğuna öyrəşə bilmədim. Qəbullana bilmədim sənsizliyi, mənim hörmətli, ziyalı dostum, sirdaşım, həyat yoldaşım. Evimizin günəşi idin. Artıq 6 ildir ki, o günəş doğmur. Çox çətindi yoxluğun. Nə vaxtsa qayıdarsan deyib, özümüzü inandıraraq yaşayırıq. Əslində isə dönməyəcəyini bilirəm. Sənsiz ruhən ölsəm də, cismən yaşayıram. Nə bilim, bəlkə də ölmüşəm, bilmirəm. Günəşli bir gündə evdən çıxdın, bir daha qayıtmadın. Yoxluğun qəlbimizin ən ağır dərdidir, əzizim. Adını çağırmaq istəyirəm. Səni evimizdə istəyirəm. Yaşamağını istəyirəm. Yenə birlikdə olmağımızı istəyirəm. Ancaq əlimdən heç nə gəlmir. Allahın qisməti belə imiş. Bir də nə vaxt görüşərik, bilmirəm. Bircə onu bilirəm ki, sənsizliyə tab gətirmək ağırdır, dözülməzdir. Sən güllərdə, çiçəklərdə yat, mənim xoşbəxt adamım. Cismən yanımda olmasan da, ruhumda, gözlərimdə, ürəyimdə, evimizdə, baxdığım hər yerdəsən.
Aydan Rzayeva

* * *
Ayrılıqların ən dəhşətlisi olan ölüm... Dörd hərfli sözün vahiməsi necə dəhşət... O ki yarımçıq qırılmış ömür ola... Yolu başa çatmayan səfər ola... Belə ömürləri qələmə almağın ağırlığı bilsəniz necə çətin...
Elgün Rzayev Vaqif oğlu 1977-ci ildə Lənkəran şəhərində anadan olub. 1983-cü ildə Lənkəran şəhər 4 saylı beynəlmiləl orta məktəbin 1-ci sinfinə gedib, 1993-cü ildə həmin məktəbi bitirib. 1993-97-ci illərdə Bakı Menecment Universitetinin Beynəlxalq iqtisadı münasibətlər və menecment fakültəsində gömrük işi ixtisası üzrə bakalavr dərəcəsi alıb. 1997-2001-ci illərdə Lənkəran Dövlət Universitetinin İnzibati İdarəetmə fakültəsində gömrük işinin təşkili və idarə edilməsi üzrə yenidən təhsil alıb, 2001-ci ildə hərbi xidmətə çağırılıb. Bir il Sərhəd Qoşunları Dəstəsində xidmət edib. Hərbi xidmətdən sonra sahibkarlıqla məşğul olub. 2007-ci ilin yanvarından 2013-cü ilin noyabrınadək Milli Təhlükəsizlik Nazirliyinin Lənkəran şəhər şöbəsində çalışıb. Və oradan təqaüdə çıxıb. Yenə də sahibkarlıqla məşğul olub.
40 illik yarımçıq ömrün qısa, yığcam bioqrafiyası.
“Astarada 1 nəfərin ölümü, 6 nəfərin yaralanması ilə nəticələnən zəncirvari yol-nəqliyyat hadisəsi baş verib. Ağır qəzada Rzayev Elgün Vaqif oğlu ölüb”. Bu xəbər ildırım sürətilə yayılır. Bir payız günü. Noyabrın 12-si. Aydın, günəşli hava. Nə duman var, nə də qar, yağış... Ömür qisməti bura kimiymiş.
Elgün Rzayevin ailə üzvləriylə görüşəndə anası Tərifə müəllimə, qayı-nanası Naibə xanım da onlarda idi. Gözlərinin yaşı qurumamış anaları dinləmək çox ağırdı mənə. Elgünü tanımamağıma təəssüflənirlər. Nə yaxşı ki, şəxsən tanımamışam. Onsuz da onun doğmalarının, əzizlərinin ovqatındayam. Göz yaşlarımı boğa bilmirəm. Tanısaydım, daha çətin olacaqdı... Söhbətlərdən aydın olur ki, Elgün Rzayev bir evdən, bir ailədən yox, eldən gedən oğullardandı. Uşaqlıqdan sanki yaşından tez böyüyüb. Xarakteri xeyirxahlıqla, qayğıkeşliklə yoğrulub. Sözündə, danışığında kim olubsa, əməlində, işində də o olub. Sözünün, əməlinin ağası... İştirak etdiyi hər yerdə xoş aura, gözəl atmosfer yarada bilib. İlk tanışlıqdan hamının yaddaşında dost kimi qalıb.
2006-cı ilin 14 yanvarında qapılarında toy çalınıb. Ailəyə Aydan adlı gəlin gəlib. Həmin ilin noyabrın 27-də nübar qızları Gülay dünyaya göz açıb. 2011-ci ildə Gülayın Leyla adlı bacısı ailəyə daha bir sevinc gətirib. Normal, xoşbəxt ailə həyatı yaşayırlar. Aydan Rzayeva Lənkəranda V.Əliyev adına 4 saylı humanitar təmayüllü məktəb-liseydə dərs deyir. Peşəsini sevən Aydan müəllimə məktəbin sevilən müəllimlərindəndir. Dəfələrlə məktəb rəhbərliyinin, Lənkəran Şəhər İcra Hakimiyyətinin başçısı Taleh Qaraşov cənablarının Fəxri Fərmanlarıyla təltif olunub. Gülay məktəbin əlaçı şagirdlərindəndir. Leyla da ötən il məktəbə qədəm qoyub. Anasının sinfində təhsilə başlayıb. Hər şeyin düz xətlə getdiyi bir dövrdə əcəl macal vermədi...
Onlara qonaq gedəndə avqust ayının 4-ü idi. Bir gün əvvəl balaca Leylanın doğum gününü qeyd ediblər. Atasının yoxluğunu dərk etməyən Leylanın gözləri yolda qalıb. Axı atası hər il onları müxtəlif yerlərə aparıb, doğum gününü qeyd edərdilər. Aydan özünə yer tapa bilmir. 12 illik birgə ömürdə bir gün də ayrı qaldıqları yadına gəlmir. Hər yerə bir gedib, bir qayıdıblar. 9 ayın ayrılığına necə dözüb, tab gətirməyinə özü də inana bilmir.
Həyatda hamımız müəllimlərimizi ən güclü insan bilirik. İlk məllimimizə olan sevgini isə ilk məhəbbət kimi ömrümüz boyu qəlbımizdə yaşadırıq. Aydan müəllimə ötən dərs ilində birinci sinfi götürmüşdü. Sentyabrdan noyabrın 12-nə cəmi 2 ay vaxt keçmişdi. Amma müəllimlə şagirdləri arasında qeyri-adi bağlılıq yaranmışdı. Leylası da həmin sinfın şagirdlərindəndi. Həyat yoldaşının qəfıl ayrılığından sarsılan Aydan müəllimə işdən çıxmağı, işlədiyi məktəbə bir daha qayıtmamağı qərarlaşdırır. Fəqət məktəbin təcrübəli direktoru Yeganə Əsgərova Aydan müəlliməni bu fıkrindən daşındırır.
Atasının yoxluğunu bir dəfə də dilinə gətirməyən 11 yaşlı Gülay bu əbədi ayrılığın nə olduğunu dərk edə bilmədiyindən atasının yolunu gözləyir. Hiss və duyğularını kağızlarla bölüşür. Onlarda olanda mənə yaxınlaşıb əlindəki dəftəri göstərərək - ilk dəfə anama şeir yazmışam. Atama oxumuşdum, çox xoşuna gəlmişdi. Sonra bacıma, müəllimlərimə yazdım. Onların da xoşuna gəldi. İndi atama yazıram... Baxışları kövrəldi, gözləri nəmləndi... Dəftərindəki dörd bəndlik şeirini mənə verdi ki, evdə oxuyum. Hisslərini evdəkilərdən gizlətməyə çalışırdı.

Ən gözəl varlıqdır o həyatda,
Bir an unutmazsan onu dünyada.
Canındır sənin, varındır sənin
Həmişə qoruyan atandır sənin.

Zəhmətkeş, qayğılı bu gözəl insan,
Hər zaman sevibdir səni o insan.
İndi niyə gəlməyirsən, ay ata?
Bəs nə vaxt gələcəksən, ay ata?

Hər zaman qoruyub səni hər anda,
Unutmaq olarmı səni bir an da?!
Həmişə sevirəm səni qəlbimdə,
Həkk olub qalmısan sən yaddaşımda.
Darıxıram sənin üçün hər zaman,
Gözləyirəm mən yolunu hər zaman.
Bilirəm ki, gələcəksən, unutmazsan sən bizi,
İnanırıq gələcəksən bir zaman...
Əlbəttə, qızcığazın misraları bugünkü ovqatının təzahürüdür. Kin bilir, bəlkə də, bu istedadlı qız gələcəkdə “Gülay Elgünqızı” imzası ilə tanınıb atasının adını soyadında yaşadacaq...
Əvvəldə dediyım kimi, bir evdən, bir ailədən yox, eldən gedən oğul haqqında hamının qəlbində az qala bir kitablıq söz var. Amma hamısını yazıya gətirə bilmədim. Ən yaxınlarının ürək sözlərini qələmə aldım.
Böyük əmisi Yaşar Rzayev: - Elgün hamımızın əzizi, hamımızın sevimlisi idi. Yaşından asılı olmayaraq hamıyla ünsiyyət qurmağı, hamıyla dostluq etməyi bacarırdı. Qohum-əqrəba arasında problemi olan hər kəs ona müraciət edirdi. Dost-tanışı çox olduğundan hamının probleminin həllinə nail olmağı baçarırdı. Gözlənilməz qəza nəticəsində aramızdan qəfil getməsi hamımızı sarsıdıb. Özümüzə gələ bilmirik. Məzarı nurla dolsun.
Kiçik əmisi Rafail Rzayev: - Elgün qohum-qardaş arasında sevilən-seçilən bir oğul idi. Dost yolunda, qohum-qardaş yolunda canından keçməyə hazır bir oğul idi. Onun üçün müşkül məsələ, aça bilmədiyi qapı yox idi. Təəssüf ki, əcələ qalib gələ bilmədi. Hadisədən bir az əvvəl işimizə nazirlikdən müfəttişlər gələcəkdi. Həmişə olduğu kimi, Elgünlə danışdım. Narahatlığa heç bir əsas olmadığını bildirdi. Müfəttişlər gələnə kimi mehmanxana, yeməkxana problemi həll olundu. Gəlib müfəttişlərlə də tanış oldu. İlk tanışlıqdan aralarında xoş münasibət yarandı. Aradan bir həftə sonra bu faciəli hadisə baş verdi. Müfəttişlər eşidən kimi zəng vurdular. İşgüzar, istiqanlı bir cavanın vaxtsız gedişinə təəssüfləndilər. Onun yeri ömrümüz boyu qəlbimizdə boş qalacaq. Ruhu şad olsun.
Bibisi Hacı Elazə xanım: - Ürəyimizin əziz parası olan Elgünün yoxluğundan danışmaq mənə çox ağırdır. Faciəli qəzadan sonra özümüzə gələ bilmirik. Elgün hamımızm ümid qapısıydı. Çətinliyə düşən kimi Elgünü axtarırdım. Münasibətdə təmənnasız idi. Xeyirxahlıqdan, yaxşılıq etməkdən zövq alırdı. Haqqında günlərlə danışsam, qurtarmaz. Təsəllimiz yadigarları olan 2 qız balasıdır. Hamımız sevimli Aydanına arxa-dayaq olub Gülayla Leylanı atalarının adına layiq böyütməkliyik. Yeri cənnətlik olsun.
Qayınatası İntiqam Hüseynov: - Elgünü balalarımdan ayırmırdım. Bu hörməti, bu məhəbbəti özü qazanmışdı. Hər iki ailədə qohumluq münasibəti yüksək səviyyədə qorunurdu. Elgün xarakterinə uyğun olaraq hər işdə ehtiyatlı idi. Maşın sürməkdə də beləcə. Onun qədər ehtiyatlı maşın sürən ikinci şəxs tanıya bilmirəm. Bu faciə - maşın qəzası necə baş verdi, inana bilmirəm. Əlimizdən heç nə gəlmir. Təsəllimiz övladlarıdır. Allah qorusun.
Deyirlər, bu fani dünyada insanı əcəli öldürmür. İnsan onu sevənlərin bitib qurtardığı yerdə ölür. Bu mənada Elgün Rzayev onu tanıyanların qəlbində zaman-zaman yaşayıb ölümsüzlük qazanacaq.

Sevda ƏLİBƏYLİ,
“Söz” jurnalının baş redaktoru








[/center]