"Babamın papağı, nənəmin kəlağayısı" kitabının təqdimatı keçirilib

Mirvarid Dilbazi Poeziya Məclisinin təşəbbüsü və təşkilatçılığı ilə Gəncliyə Yardım Fondunda milli mənəvi dəyərlərimizdən bəhs edən, "Elm və təhsil" nəşriyyatında yenicə işıq üzü görmüş "Babamın papağı, nənəmin kəlağayısı" kitabının təqdimatı və milli üslubda qədimi, həm də müasir baş geyimləri və örtüklərinin sərgisi keçirildi.
Mirvarid Dilbazi Poeziya Məclisinin sədri, Kəlağayı Ev Muzeyinin direktoru Güllü Eldar Tomarlı tədbir iştirakçılarını salamladı, milli mənəvi dəyərlərimizən bəhs edən kitabın bu günkü gənclər və gələcək nəsillər üçün önəmli olduğunu vurğuladı.
Vətənimizin bütövlüyü, azadlığı, suverenliyi uğrunda canından keçən şəhidlərimizin əziz xatirəsi bir dəqiqəlik sükutla anıldı. Azərbaycan himni səsləndirildi.
Söz kitabın redaktoru araşdırmaçı yazar, ədəbi təhlilçi, publisist Vaqif Osmanlıya verildi. O bildirdi ki,
mili ruh hər bir xalqın milli simasıdı. Milli simasını, milli kimlyini qoruya bilməyən xalq yaşaya bilməz. Milli kimliyi yaşadan da xalqın milli mənəvi dəyərləridir. Mirvarid Dilbazi Poeziya Məclisi yarandığı gündən məhz milli dəyərlərimizin keşiyindədir. Azərbaycan xanımların gözəllik, yaraşıq, abır-həya, ismət rəmzi kəlağayının ölkədə və ölkəmizdən kənarda tanıdılmasında, təbliğində İctimai Birliyin sədri, şairə, publisist Güllü Eldar Tomarlının xidmətləri danılmazdır. Artıq onun dəstəyi ilə yeni ədəbi janr - kələğayı ədəbiyyatı yaranmışdır. Artıq papağın da təbliğinə başlamaq vaxtıdır. Bu məqsədlə çap olunan "Babamın papağı, nənəmin kəlağayısı" kitabında toplanan Türk kişisinin namus, qeyrət, qəhrəmanlıq rəmzi papağa və kəlağayıya aid ədəbi, tarixi yazılar gənc nəslin milli ruhda tərbiyəsində önəmli yer tutacaq.
Sonra neftçi Turan İbrahimov, Əməkdar Mədəniyyət işçisi Solmaz Kosayeva, Əməkdar jurnalist Şəmsiyyə Kərimova, qurama ustası Aybəniz Camalova, şairlərdən - Sazlı, sözlü Borçalı Cəmiyyətinin sədri Sədi Yaradanqulu, Brilyant Atəş, Güləmail Murad, Tofiq Həsrət, Sevda Səfərli, Könül İbrahimsoy, Səriyyə Dumanlı, Zakir Ağdamlı, Afət Ömür İsmayıl, Mayil Məmmədli, QHT rəhbərləri Dünya Əliyeva, Mehriban Abdullayeva, Hicran Həsənova, ziyalılarımızdan Rasim İmanov, Əli Nəsib Zərdabi, Sayalı Dadaşova milli dəyərlərimizdən, folklorumuzdan söhbət açdılar, şeirlər söylədilər.
Tədbirdə şəhid ailələri, kitabda imzası olan şair və yazıçılar, KİV nümayəndələri, QHT rəhbərləri, poeziyasevərlər iştirak etdilər.

Quramaçı Aybəniz Camalova hazırladığı "Qurama Kəlağayı" kompozisiyasını Kəlağayı Muzeyinə hədiyyə etdi və tədbir iştirakçılarının böyük marağına səbəb oldu. Bu kompozisiya Güllü Eldar Tomarlının illərlə topladığı istifadəyə yararsız kəlağayıların naxışlarını qorumaq məqsədi ilə hazırlanıb.
Sonda şəhid Zaur İsmayılzadənin anası Sevil xanım Hüseynovanı tədbir iştirakçıları ayaq üstə dinlədi. Şəhidlərimizin yad edilməsi, Azərbaycan himni ilə başlayan möhtəşəm tədbir iştirakçılarının ifası ilə "Qarabağ" mahnısı ilə tamamlandı.