18-04-2024, 18:13
Respublika Pediatriya Mərkəzi yaradıldı
Əhaliyə göstərilən tibbi xidmətlərin keyfiyyətinin daha da yüksəldilməsi və tibb müəssisələrində optimallaşdırma işlərinin həyata keçirilməsinin təmin edilməsi məqsədilə görülən işlər çərçivəsində TƏBİB-in tabeliyində Respublika Pediatriya Mərkəzi yaradılıb.
Bu barədə TƏBİB-dən bildirilib.
Mərkəzin yaradılmasında məqsəd bu sahədə fəaliyyətin səmərəliliyinin artırılması, uşaq əhalisinin müalicə diaqnostika prosesinin vahid mərkəzdə təkmilləşdirilməsi, yeni xidmət növlərinin yaradılmasıdır.
TƏBİB-in Müşahidə Şurasının qərarı ilə yaradılan Respublika Pediatriya Mərkəzinə direktor təyinatı olub.
Belə ki, TƏBİB-in İcraçı direktoru Vüqar Qurbanovun təqdimatı ilə Respublika Pediatriya Mərkəzinə Azər Əhmədov direktor təyin edilib.
İcraçı direktor Vüqar Qurbanov 18 aprel 2024-cü il tarixində yeni təyin olunmuş Azər Əhmədovu kollektivə təqdim edib.
Məlumat üçün bildirək ki, Azər Əhmədov 2001-2007-ci illərdə Azərbaycan Tibb Universitetində həkim-pediatr ixtisası üzrə təhsil alıb. 2007-2008-ci illərdə Ə.Qarayev adına 2 saylı Uşaq Klinik Xəstəxanasında internatura keçib. 2015-2019-cu illərdə Türkiyədə Qazi Universitetində təhsilini davam etdirərək uzmanlıq dərəcəsi alıb.
O, 2005-2007-ci illərdə Bakı şəhər Təcili və Təxirəsalınmaz Tibbi Yardım Stansiyasında feldşer, 2007-2008-ci illərdə Ə.Qarayev adına 2 saylı Uşaq Klinik Xəstəxanasında intern, 2008-2011-ci illərdə Kəlbəcər Rayon Mərkəzi Xəstəxanasında həkim-pediatr, 2012-2015-ci illərdə Ankarada özəl tibb müəssisələrində Acil şöbə müdiri kimi çalışıb. 2020-ci ildə Bakı Sağlamlıq Mərkəzinin Pediatriya Mərkəzinin rəhbəri, 2020-2023-cü illərdə isə K.Y.Fərəcova adına Elmi-Tədqiqat Pediatriya İnstitutunda direktor müavini vəzifəsini icra edib. 2023-cü ilin mart ayından indiyədək isə Ege Hospitalda pediatr kimi çalışıb.
18-04-2024, 17:34
Hacıqabulda qatar qadını vurdu
Bu gün saat 16:45 radələrində Azərbaycan Dəmir
Yollarına (ADY) məxsus yük qatarı Hacıqabul stansiyasında hərəkətdə olarkən bir qadın qəfil qatarın qarşısına çıxıb.
Bu barədə ADY-yə istinadən xəbər verir.
Məlumata görə, maşinist təcili tormozlama aparsa da, məsafə az olduğundan toqquşma qaçılmaz olub və həmin şəxs hadisə nəticəsində ciddi xəsarət alıb. Yaralı təcili tibbi yardım briqadası tərəfindən xəstəxanaya çatdırılıb.
ADY bir daha piyadaları yol hərəkəti qaydalarına ciddi əməl etməyə, dəmiryol xəttini yalnız müəyyən olunmuş yerdən keçməyə, qəflətən qatarın yoluna çıxmamağa çağırır.
18-04-2024, 17:20
Dron hücumları Rusiyada dizel ixracını 25% azaldıb
"Dronların hücumları səbəbindən Rusiyanın dizel yanacağı ixracı dörddə bir qədər azalıb.
Bu barədə "Bloomberg" yazıb.
Nəşr yazır ki, neft emalı dərəcələri 11 aylıq minimum həddədir. Aprelin 13-dək 10 gün ərzində tədarüklər gündə orta hesabla 0,74 milyon barel təşkil edib.
Bu da 2019-2023-cü illər arasında ilin bu dövrü üçün orta göstəricidən təxminən 25% azdır.
18-04-2024, 17:06
Azərbaycanı yenidən AŞPA-da görmək istəyirəm - AŞ Nazirlər Komitəsinin rəhbəri
Avropa Şurası Nazirlər Komitəsinin rəhbəri, Lixtenşteynin xarici işlər naziri Dominik Hasler Azərbaycan nümayəndə heyətini tezliklə Parlament Assambleyasında görmək istədiyini bildirib.
Avropa Şurası Parlament Assambleyasının (AŞPA) sessiyasında irlandiyalı deputat Pol Havanın sualına cavab verən Dominik Hasler deyib:
“Hesab edirəm ki, bizim bir-birimizə ehtiyacımız var və ümid edirəm ki, Azərbaycan nümayəndə heyəti tezliklə Parlament Assambleyasında öz yerinə qayıdacaq”.
O daha sonra əlavə edib:
“Ümid edirəm ki, nümayəndə heyətinin tezliklə geri qayıtması ilə tərəflər arasında əməkdaşlıq və dialoq bizi birləşdirən dəyərlərin maraqları naminə davam edəcək”.
Dominik Haslerin sözlərinə görə, o, Nazirlər Komitəsinin sədri kimi hamı üçün ən məqbul həll yolunu tapmaq məqsədilə üçtərəfli müzakirə təşkil edib.
O qeyd edib ki, Azərbaycan nümayəndə heyətinin qayıdışı ümumi ideyaların qorunması və təbliği baxımından, xüsusən də təşkilatın 75 illik yubileyinin qeyd olunması üçün mühüm əhəmiyyət kəsb edir.
“Azərbaycan 2001-ci ildə Avropa Şurasına üzv olduqdan sonra demokratikləşmə prosesində AŞ-nin dəstəyindən yararlanıb və AŞ da öz dəyərlərini təbliğ etmək və əhatə dairəsini genişləndirmək üçün Azərbaycandan faydalanıb. Bu, qarşılıqlı faydalı əməkdaşlıqdır və iş başa çatmayıb, ciddi islahatlar tələb edir”, - deyə Lixtenşteyn Xarici İşlər Nazirliyinin rəhbəri əlavə edib.
Xatırladaq ki, Azərbaycanın AŞPA-dakı nümayəndə heyəti 2024-cü ilin yanvarında bu qurumda iştirakını qeyri-müəyyən müddətə dayandırıb. Nümayəndə heyəti bu addımını AŞPA-da Azərbaycana qarşı aparılan qərəzli kampaniya ilə əlaqələndirib.
18-04-2024, 16:33
Baş prokuror Çinə səfər edib
Baş prokuror Kamran Əliyevin rəhbərlik etdiyi nümayəndə heyəti Beynəlxalq Prokurorlar Assosiasiyasının İcraiyyə Komitəsinin 57-ci iclasında iştirak etmək üçün Çinin Makau Xüsusi İnzibati Bölgəsinə səfərə gedib.
Bu barədə Baş Prokurorluğun Mətbuat xidmətindən məlumat verilib.
Bildirilib ki, aprelin 18-də Kamran Əliyev Çinin Ali Xalq Prokurorluğunun Baş prokurorunun birinci müavini Tonq Cianminq və Makaunun Baş prokuroru İp Son Sanq ilə ikitərəfli görüş keçirib.
Baş prokuror cari ilin 29 sentyabr- 2 oktyabr tarixlərində Beynəlxalq Prokurorlar Assosiasiyasının 29-cu İllik Konfransı və Ümumi Yığıncağının Azərbaycanda keçirələciyini və bununla bağlı həmkarına dəvət məktubu ünvanladığını bildirib.
Daha sonra tərəflər hüquqi və institusional əməkdaşlığın ikitərəfli və beynəlxalq platformalar çərçivəsində genişləndirilməsi perspektivləri barədə fikir mübadiləsi aparıblar. Nümayəndə heyətinin Çinə işgüzar səfəri davam edir.
18-04-2024, 15:55
Bakıda 2 nəfər dəm qazından öldü
Bakıda 2 nəfərin dəm qazından zəhərlənərək ölməsi faktı üzrə araşdırma aparılır.
Baş Prokurorluğun Mətbuat xidmətindən bildirilib ki, aprelin 18-də paytaxtın Sabunçu rayonunun Ramana qəsəbəsi ərazində yerləşən evlərdən birində 2 nəfərin dəm qazından zəhərlənərək ölməsi faktı üzrə Sabunçu rayon prokurorluğunda araşdırma aparılır.
18-04-2024, 15:38
Nazir: "Məktəb psixoloqlarından yanlış gözləntilər var"
"Məktəb psixoloqlarından yanlış gözləntilər var".
Bu barədə elm və təhsil naziri Emin Əmrullayev deyib.
Nazir bildirib ki, məktəb psixoloqu fərdi terapiya aparan şəxs deyil.
“Bir məktəb psixoloqu 800 şagirdə psixoloji xidmət verə bilməz. Şagirdlərin psixoloji davranışları ilə müəllimlər də məşğul olmalıdır”,- deyə nazir əlavə edib.
18-04-2024, 15:11
Zurabişvili qanun layihəsinə veto qoydu
Gürcüstan prezidenti Salome Zurabişvili parlament seçkilərində partiyaların proporsional siyahılarında olan qadınlar üçün kvotaların ləğvini nəzərdə tutan qanun layihəsinə veto qoyub.
Layihə qanunverici orqana geri qaytarılıb.
Bundan əvvəl parlament partiya siyahıları üzrə hər 4 namizədin ən azı birinin qadın olması mexanizmini ləğv edib.
Hakim “Gürcü Arzusu” Partiyası Gürcüstan Mərkəzi Seçki Komissiyasının rəhbəri vəzifəsinə Giorgi Kalandarişvilinin namizədliyini dəstəkləmək müqabilində Girçi Partiyasının təşəbbüsünü dəstəkləməyə razılaşıb.
Qeyd edək ki, prezident qalmaqallı "xarici agentlər" qanununu da veto edəcəyini açıqlayıb.
18-04-2024, 14:24
Marketdən 8 min manatlıq spirtli içki oğurlayan şəxs saxlanıldı
Bakı şəhəri Səbail rayonu ərazisində yerləşən marketlərin birindən müxtəlif vaxtlarda 8000 manat dəyərində spirtli içki oğurlanması barədə polisə məlumat daxil olub.
Daxili İşlər Nazirliyinin Mətbuat Xidmətindən verilən məlumata görə, Səbail Rayon Polis İdarəsinin 41-ci Polis Bölməsinin əməkdaşlarının həyata keçirdikləri tədbirlərlə hadisəni törədən paytaxt sakini əvvəllər oğurluq, soyğunçuluq və narkotik cinayətlərinə görə məhkum olunmuş Rasim Abdullayev saxlanılıb.
R.Abdullayevin Bakı şəhərində analoji cinayətlərdə iştirakının olub-olmadığı araşdırılır. Saxlanılan şəxsin qanunsuz əməllərindən zərərçəkən başqa vətəndaşlar varsa polis orqanlarına müraciət edə bilərlər.
18-04-2024, 14:17
Rusiya İrəvandan cavab tələb etdi
Rusiya rəsmi İrəvandan rus qoşunlarının Ermənistandan çıxarılması planlarının İrəvan, Brüssel və Vaşinqton arasında razılaşdırıldığı barədə məlumatlara aydın cavab gözləyir.
Bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı bildirib.
“Əvvəllər onlar İrəvanda açıq şəkildə əmin etdilər ki, Qərb ölkələri ilə münasibətlərin inkişafı üçüncü ölkələrə qarşı yönəlməyib. Bu amillərin məcmusunu gözləyərək, ortaya çıxan məlumatlara Ermənistan hakimiyyətindən aydın cavab gözləyirik. Təbii ki, o məlumatı təkzib etmək ideal olardı, amma hər halda söhbət rəsmi İrəvandan gedir”, - Zaxarova bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!