Fevralın 14-də Azərbaycan Dillər Universitetində (ADU) “Xocalı hadisəsi erməni vandalizminin nəticəsidir” mövzusunda “dəyirmi masa” keçirilib.

Butov.az xəbər verir ki, ADU-dan AZƏRTAC-a bildiriblər ki, sosial elmlər kafedrasının müdiri, dosent Ədalət Abdiyeva tədbirin Xocalı soyqırımının 25-ci ildönümünə həsr olunan silsilə tədbirlər planı əsasında keçirildiyini diqqətə çatdırıb. Vurğulanıb ki, bu dəhşətli hadisə millətimiz üçün həm böyük insan tələfatı, həm də çoxlu sayda tarixi mədəniyyət abidələrinin məhv edilməsi ilə nəticələnib. Dövlətimiz tərəfindən Xocalı soyqırımının dünya səviyyəsində tanınması və təbliği, düzgün qiymətləndirilməsi istiqamətində kifayət qədər işlər görülür. Ancaq ikili standartlar ucbatından haqq səsimizi bəyan etməkdə bəzi çətinliklərlə üzləşirik.

Tədbirdə digər çıxış edənlər Ermənistan-Azərbaycan, Dağlıq Qarabağ münaqişəsinin ən qanlı səhifələrindən olan Xocalı qətliamının faktlara əsaslanan gerçəkliyi barədə məlumat veriblər. Diqqətə çatdırılıb ki, tarix boyu ermənilər xalqımıza qarşı düşmənçilik mövqeyi tutub, ayrı-ayrı dövrlərdə Azərbaycanın inamlı addımlarla irəliləməsindən narahat olaraq beynəlxalq hüquq normalarına zidd müxtəlif təxribat və qırğınlar törədiblər. Heydər Əliyev Fondunun vitse-prezidenti Leyla Əliyevanın təşəbbüsü ilə təsis edilmiş “Xocalıya ədalət!” beynəlxalq kampaniyasının uğurla həyata keçirilməsi nəticəsində artıq bir sıra dövlətlər Xocalıda törədilən qırğını soyqırımı kimi qəbul edib.

ADU-nun prorektoru, professor Ələddin Əliyev mövzu ilə bağlı fikirlərini bölüşüb. Bildirilib ki, tələbələrin milli ruhda tərbiyə olunmaları baxımından, bu cür tədbirlərin təşkili vacibdir.