22-12-2021, 11:11
Kənd Təsərrüfatı Nazirliyinin Baytarlıq Elmi-Tədqiqat İnstitutu tərəfindən keçirilən tender müsabiqəsinin (Kotirovka sorğusu) qalibi məlum olub.
DİA.AZ-ın məlumatına görə, Yeniavaz.com açıqlanan rəsmi məlumatlara istinadən bildirir ki, tender müsabiqəsinin qalibi “Raveller Az Company” MMC (VÖEN- 1604549501) olub.
Müsabiqənin şərtinə görə, “Raveller Az Company” MMC Baytarlıq Elmi-Tədqiqat institutunun 120 illik yubileyinin qeyd olunması üçün keçiriləcək Beynəlxalq Konfransı təşkil edəcək. MMC görüləcək işin qarşılığında 42 min 478 manat 50 qəpik alacaq.
Məlumat üçün bildirək ki, Kənd Təsərrüfatı Nazirliyinin Baytarlıq Elmi-Tədqiqat İnstitutu tender müsabiqəsini 02.11.2021-ci il tarixində elan edib. Tenderin qalibi olan “Raveller Az Company” MMC isə tender elanından cəmi 10 gün əvvəl – 22.10.2021-ci il tarixində dövlət qeydiyyatına alınıb.
Nizamnamə kapitalı 5 manat olan “Raveller Az Company” MMC-nin hüquqi ünvanı “Nizami rayonu, Türkmən, ev 8, m. 1”də yerləşir. MMC-nin qanuni təmsilçisi Hüseynzadə Tosif Rəşid oğludur.
Maraqlı məqamlardan biri də odur ki, “Raveller Az Company” MMC-nin dövlət qeydiyyatına alındığı ünvanda oktyabr ayının 22-də daha 2 şirkət qeydiyyata alınıb və bu şirkətlərin qanuni təmsilçiləri də Hüseynzadə Tosif Rəşid oğlu olub.
Bundan başqa son bir il ərzində “Raveller Az Company” MMC ilə birgə “Nizami rayonu, Türkmən, ev 8, m. 1” ünvanında onlarla şirkət qeydiyyata alınıb və onların bir çoxunun qanuni təmsilçiləri eyni şəxslər olub. “Nizami rayonu, Türkmən, ev 8, m. 1” ünvanında qeydə alınan MMC-lərin adlarındakı uyğunluq (“TT”, “SS”, “Group”, “2021” və s.) onlar arasında hansısa əlaqənin olduğunu göstərir.
Məlumat üçün onu da bildirək ki, "Dövlət satınalmaları haqqında" Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlığının olması lazımdır. Cəmi 10 gün əvvəl “sirli ünvanda” qeydiyyata alınan MMC-nin hansı təcrübəyə sahib olacağı müəmma olaraq qalır.
Yeri gəlmişkən qeyd edək ki, qurumun rəsmi saytında Bakıda Baytarlıq Elmi-Tədqiqat İnstitutunun 120 illik yubileyinə həsr olunan ikigünlük beynəlxalq elmi-praktik konfransın noyabr ayının 25-i və 26-sı tarixlərində keçirildiyi qeyd olunub. Lakin, dövlət satınalmaları üzrə vahid portalda tender müsabiqəsinin icrasına dekabr ayının 15-də başlanılacağı göstərilib.
Onu da qeyd edək ki, 10 gün əvvəl qeydiyyatdan keçən şirkəti 42 min manatlıq tenderin qalibi edən Baytarlıq Elmi-Tədqiqat İnstitutunun direktoru Sialə Rüstəmovanın 2016-cı ildə işdə yol verdiyi nöqsanlara görə Sumqayıt şəhər Baytarlıq İdarəsinin rəisi vəzifəsindən çıxarıldığı bildirilir. Sialə Rüstəmova 2010-2015-ci illərdə Dövlət Baytarlıq Nəzarəti Xidmətinin də rəisi vəzifəsində çalışıb.
Bütöv.az
22-12-2021, 11:08
AZAL-ın Amerikadakı təmsilçisi Elnur Ələkbərov bu ilin iyununda Nyu Yorkda 790 min dollara mənzil alıb.
Qaynarinfo xəbər verir ki, bu barədə jurnalist Cavanşir Həsənli məlumat yayıb.
O bildirib ki, Nyu Yorkda, şəhərin 3567 Shore Pkwy #H3A, Brooklyn, NY 11235 ünvanında yerləşən mənzilin qiyməti 790 min dollardır. Mənzili Elnur Ələkbərova türk əsilli Nyu York Akgök ailəsi satıb.
Qeyd edək ki, Elnur Ələkbərov 2017-ci ildən Nyu Yorkda AZAL-ın törəmə müəssisəsi kimi qeydiyyata alınmış AZAL TRAVEL INC. şirkətininin direktorudur.
(Qaynarinfo)
Bütöv.az
22-12-2021, 11:05
Dünya bazarında neft qiymətlərində artım müşahidə olunur.
WTI markalı neftin yanvar fyuçersləri 0,27 % bahalaşaraq, bir bareli 71,31 ABŞ dolları olub.
“Brent” markalı neftin fevral fyuçersləri 0,03 % bahalaşaraq, bir bareli 74 ABŞ dolları təşkil edib.
Mənbə: Bloomberg
Bütöv.az
22-12-2021, 11:03
Axar.az Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyevin “Baymedia”ya müsahibəsini təqdim edir:
- Qüdrət bəy, “Turizm haqqında” Qanununun müzakirəsi zamanı ölkəyə turist cəlb etmək üçün Zəngəzurda və “Böyük Zirə” adasında kazino açmaq təklifinizdən sonra bəzilərinin sanki əlinə bəhanə düşübmüş kimi, sizə qarşı bir kampaniya başlatdılar. Əlbəttə, bu dediklərimiz ədəb çərçivəsində fərli mövqe sərgiləyənlərə aid deyil. Bu barədə fikrinizi bilmək istərdik.
- Bir qrup uğursuz və uğursuzluğun mənəvi deqradasiyaya uğratdığı ünsürlər mənə hücum etməklə özlərini yenidən biabır edirlər. Araşdırsanız, görərsiniz ki, təhqir yazanlar və onlara bu cür göstəriş verənlərin hamısı əxlaqsız ailələrdə böyümüş üzdəniraqlardı. Ağıllı və məsuliyyətli insanlar mənim çıxışımla tanış olanda həmin elementlərdən fərqli olaraq başa düşürlər ki, mən nə təklif etmişəm. Mən ölkəmizdə turizmin inkişafı üçün xidmətlərin səviyyəsinin yüksəldilməsini və xidmət xərclərinin azaldılmasını təklif etdim. Sözsüz ki, bura uçuş xərcləri də daxildir. Xidmət səviyyəsinin yüksəldilməsi, dünya elminə və mədəniyyətinə çıxış məqsədilə həm də ingilis dilinin ölkəmizdə geniş miqyasda tədris olunması, bu məqsədlə xüsusi dövlət proqramının qəbul edilməsinin zəruriliyini vurğulamışam. Vətəndaşlarımızın təkcə internet üzərindən xarici lotereya təşkilatçılarına hər il təqribi hesablamalara görə, 700 milyon manat (bu, müvafiq dövlət orqanı tərəfindən Milli Məclisə rəsmi təqdim olunmuş məlumatdı) pul uduzduğunu nəzərə alaraq, ölkəmizə turist cəlb etmək məqsədilə müəyyən ərazilərdə kazinoların açılmasını təklif etmişəm. Bura xarici kazinolarda uduzulan pullar daxil deyil. Mən bu təşəbbüslə əvəllər də çıxış etmişəm. Gürcüstanı çox zaman bizə nümunə kimi təqdim edən bu gerizəkalılar gedib öyrənsinlər ki, Gürcüstan kazinolarının əsas müştəriləri kimlərdir? Gürcülər kazinolar hesabına nə qədər turist cəlb edir və turizmdən nə qədər pul qazanır? Yaxud qardaş Şimali Kipr Türk Respublikası (ŞKTR) olsun. Kimsə deyə bilər ki, Gürcüstan müsəlman ölkəsi deyil, bəs ŞKTR necə? Biz müharibədən çıxmışıq, Qarabağın bərpası, şəhid ailələrinin, qazilərimizin sosial müdafiəsi üçün ölkəmizə pul lazımdır. Əsgər və zabitlərimiz qan töküb o torpaqları azad etməyiblər ki, xalqımız o torpaqlarda yas saxlasın. Şəhid ailələri daxil xalqımız o torpaqlarda yeyib-içib əylənməli, xoşbəxt həyat yaşamalıdır. Bu gün Razi Nurullayevin bir açıqlaması ilə tanış oldum. Həmin qaragüruha xitabən söyləyir ki, islamda sələmə pul verilməsi haramdır. Bəs niyə banklardan kredit götürürsünüz? Biz şəriət qanunları ilə yaşayan islam dövləti deyilik.
Mənim həmin gün qaldırdığım digər vacib məsələlər barədə susan bu üzdəniraq siyasi dələduzlar yapışıblar kazinodan. Halbuki həmin gün eyni vaxtda “Lotereyalar haqqında” Qanuna və Cinayət Məcəlləsinə birinci oxunuşda dəyişiklik edildi. Dəyişiklikyə əsasən, CM-nin 244-1-ci maddəsinin “Qeyd” hissəsi aşağıdakı kimi təklif olunur. “Bu Məcəllədə “qumar oyunları” dedikdə lotereya təşkilatçısı tərəfindən “Lotereyalar haqqında” Azərbaycan Respublikasının qanununa uyğun olaraq keçirilən lotereyalar (o cümlədən stimullaşdırıcı lotereyalar) və idman mərc oyunları operatoru tərəfindən “Bədən tərbiyəsi və idman haqqında” Azərbaycan Respublikasının Qanununa uyğun olaraq keçirilən idman mərc oyunları istisna olmaqla, digər şəxslər tərəfindən sahibkarlıq fəaliyyəti çərçivəsində təşkil edilən və ya keçirilən qeyri-müəyyənlikdən və ya təsadüfdən asılı olan uduşların, mükafatların və ya digər gəlirlərin verilməsini nəzərdə tutan lotereya, idman mərc oyunları və digər mərc oyunları qumar oyunu hesab olunur”.
Beləliklə, bundan sonra qanunlara uyğun olaraq, keçirilməyən istənilən mərc oyunu qumar oyunu hesab olunacaq. Bu günə qədər qumar oynamaq inzibati hüquqpozma hesab olunurdu və mənəviyyat əleyhinə yönələn xəta sayılırdı. Bundan sonra isə edilmiş dəyişikliyə, hüquqi məntiqə və hüquq düşüncəsinə görə qumar oynamaq lisenziyasız sahibkarlıq fəaliyyəti ilə məşğul olmaq, iqtisadi fəaliyyət əleyhinə yönələn qanunpozuntusu kimi başa düşülməlidir və qanunvericilikdən “qumar oynama”, qumarxana təşkil etmə və saxlama “ictimai mənəviyyat əleyhinə yönələn xətalar və cinayətlər” kateqoriyasından çıxarılmalıdır. Bu məqsədlə müvafiq dəyişikliklər edilməlidir.
Yeri gəlmişkən qeyd edim ki, həmin gün qonşu ölkələri misal çəkərək Milli Məclisə təqdim olunan qanun layihələrində qanunvericilik texnikası baxımından ciddi qüsurların, boşluqların, kolliziyaların olmaması, sui-istifadə hallarına yol açacaq normaların qarşısının alınması üçün Milli Məclis, yaxud Nazirlər Kabineti, yaxud Ədliyyə Nazirliyi yanında “Qanunvericilik institutunun” yaradılması barədə təşəbüslə çıxış etdim. “Uşaqpulu müavinət”inin verilməsinin zəruriliyi barədə mətbuata açıqlama verdim. Amma tərbiyəsiz kütbeyinlər bu kimi məsələləri müzakirə edə bilməzlər, çünki həm savadları yoxdur, həm də Cəfər Cabbarlının “Almaz” pyesində olduğu kimi aldıqları tapşırıqlar “məsciddən” danışmaqdır.
Bütöv.az
22-12-2021, 10:59
“Azərbaycan-Ermənistan dövlət sərhədində və Rusiya sülhməramlı kontingentinin müvəqqəti yerləşdiyi Azərbaycan Respublikasının ərazilərində vəziyyət daim nəzarətimiz altındadır”.
Bunu müdafiə naziri Zakir Həsənov “Azərbaycan” qəzetinə müsahibəsində deyib.
Nazir qeyd edib ki, həmin ərazilərdə baş verən hər hansı bir təxribata dərhal adekvat cavab verilir.
“Azad edilmiş ərazilərdə dislokasiya olunan bölmələrimizdə qoşun xidmətinin təşkili, şəxsi heyətin döyüş hazırlığının və döyüş qabiliyyətinin daim yüksək səviyyədə saxlanılması, yeni hərbi infrastruktur obyektlərinin yaradılması, bölmələrin, idarəetmə məntəqələrinin fəaliyyətinin yaxşılaşdırılması, döyüş planlarının dəqiqləşdirilməsi, maddi-texniki, tibbi təminatın davamlı yüksəldilməsi, ərazilərin mina, partlamamış döyüş sursatlarından təmizlənməsi və bu kimi digər məsələlərin həlli gündəlik fəaliyyətimizin əsas prioritetlərindəndir”, - deyə Zakir Həsənov əlavə edib.
Bütöv.az
22-12-2021, 04:01
Avrasiya ədəbiyyat festivallarını birləşdirən "LiFFt" Festivallar Festivalı 2016-cı ildən etibarən hər il Birləşmiş Millətlər Təşkilatının himayəsi altında keçirilir. Avrasiya materikinin ədəbiyyat üzrə 5-ci "LiFFt" Festivalı 2021-ci ildə Türkiyədə, İstanbul şəhərində ədəbiyyatsevərləri bir araya toplayıb. Festivala 69 ölkədən, 500-ə yaxın şair - Türkiyə, Azərbaycan, Amerika, Rusiya, Belçika, Avstriya, Qazaxıstan, Qırğızıstan, İsrail, Misir və dünyanın digər ölkələrindən qatılıblar. Festival Pandemiya şəraitinə uyğun olaraq, Taksimdəki İstanbul Kültür Mərkəzi “Yapı Kredi” səhnəsindən və ekranından, eyni zamanda LIFFT YouTube kanalında yayımlanmışdır.
Festival, Beynəlxalq Ədəbiyyat Hərəkatının Prezidenti, Rusiyanın avanqard şairi Margarita Al tərəfindən "Biz eyni planetin insanlarıyıq" devizi ilə açılmışdır.
Festival çərçivəsində bir çox görüşlər, dəyirmi masalar, təqdimatlar təşkil olunmuşdur. Festivalın təşkilatçıları LIFFT Vəqfi, Avrasiya Xalqları Assambleyası Ədəbiyyat Şurası, İLESAM (Türkiye İlim ve Edebiyat Eseri Sahipleri Meslek Birliyi) olmuşdur.
Festivalın müxtəlif nominasiyalar üzrə qalibləri elan edilmişdir. Qızıl medalı Misir şairi Aşraf Aboul Yazid qazanmışdır. Avrasiya materikinin ədəbiyyat üzrə 5-ci LiFFt Festivallar Festivalı qalibi tanınmış Misir şairi Aşraf Aboul Yazidin həmçinin kitabı “Qızıl LiFFt” seriyasından ingilis dilində dərcinə layiq görülmüşdür. O, 6-cı festivalın Misirdə keçirilməsini öz ölkəsi üçün təmin etmişdir.
Xatırladaq ki, öncəki illərdə laureat adlarını Tuğrul Tanyol (Türkiyə), Varis Yolçuyev (Azərbaycan), Konstantin Kedrov-Çelışev (Rusiya) və Oljas Süleymenov (Qazaxıstan) qazanıblar. Ümumilikdə, dünyanın 69 ölkəsinin -ABŞ, Avstriya, Türkiyə, Azərbaycan, Belarus, Misir, Almaniya, Rusiya, Bolqarıstan, Boliviya, Braziliya, Yunanıstan, İsrail, Hindistan, Meksika, İspaniya, İtaliya, İrlandiya, Çin, Qazaxıstan, Qana, Argentina, Kolumbiya, Kuba, Macarıstan, Niderland, Yeni Zelandiya, Polşa, Pakistan, Rusiya, Rumıniya, Venesuela, Serbiya, Səüdiyyə Ərəbistanı, Ukrayna, Fransa, Çexiya, İsveçrə, CAR, Cənubi Koreya, Aruba, Barbados, Monserrat, San-Tome, Prinsipe və s., 196 yazarı festivalın iştirakçı Sertifikatına layiq görülmüşdür.
Azərbaycandan festivala qatılaraq müsabiqədən keçən, iştirakçı statusu qazanan yazarlar: Səidə Sübhi, Azadə Novruzova, Təranə Turan Rəhimli, Elmira Almasova, Sahib Məmmədov, Marina Kolomazova, Səriyyə Məmmədova, Nərgiz İsmayılova, Sadiq Qarayev, Ramil Əhməd və Ləman Bağırovadır.
Azərbaycan Yazıçılar Birliyinin (AYB), Azərbaycan Jurnalistlər Birliyinin (AJB) üzvü, şairə-publisist Azadə Novruzova Festivalın iştirakçısı Sertifikatı ilə yanaşı, Festivalın diplomu ilə də təltif olunmuşdur. Sözü dünyanın ən qiymətli cəvahiri sayan şairənin şeirləri də dünyada ilk dəfə hazırlanacaq 100 şair və yazıçının əsərlərindən ibarət « Jivoy Antloqii pisateley mira” adlı topluya salınacaq.
O, bu uğurunu müasir Azərbaycan ədəbiyyatının dünya xalqları arasında təbliğinə bir töhfəsi kimi dəyərləndirib. Diplomunun Nizami Gəncəvi Forumunun yekun ziyafət gecəsində dünyanın bir çox ölkəsindən qonaq olan dostlarının əhatəsində V Avrasiya Ədəbiyyat Hərakatının Prezidenti, hörmətli Mаrqarita Аl tərəfindən təqdim edilməsini sevinclə qarşıladığını bildirib. Festivala, bu nəhəng ədəbiyyat platformasına gələcək fəaliyyətində uğur diləyən şairə, sonda öz arzusunu belə ifadə etdi. Dostlarımdan tezliklə doğulduğum əsrarəngiz gözəllikləri olan Zəngəzurda görüşmək ümidi ilə ayrıldım...
İki damla göz yaşısan
sıxsam gözlərimi dənizə
gəmilər boğulacaq
balıqların donu daralacaq
dərya yetim ayrılıqlar doğacaq
həsrət-həsrət baxışlar boylanacaq
küçələrin gözlərindən.
Qəhər tıxanacaq boğazına
yosunlar dolaşıq düşəcək
telləri əlçimlənəcək dalğaların
qağayılar sərgərdan olacaq
özgə ellər Vətən olmur
qaçqın uşağa.
Vətən yarımır naxələfdən oğul doğanda
noğullar kəsərsiz olur
oğullar fərsiz olanda.
Arılar bal yığammır
çiçəklər solanda.
yağış ol, ələn üstümə
quruyum ...günçıxanda.
Butov.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!