10-10-2023, 19:53
TARİX YAZAN ƏLİHÜSEYN
Tarix boyu müharibələr çox olub. Bu müharibələrdə oğullarımız şəhidlik zirvəsinə ucalıblar. Ölməzliyə və əbədiyyətə qovuşan böyük zirvə! Bu zirvəyə yüksəlmək də hər insana qismət olmayıb. Çünki zirvəni fəth edənlər Allahın sevimli bəndəsi olan şəhid oğullardır. Bu gün hər birimiz onların ruhları qarşısında baş əyirik! Haqqında söhbət açacağım qəhrəmanım Vətən müharibəsi şəhidi Əlihüseyn Məmmədovdur. O, 1998-ci il yanvarın 24-də Bakıda anadan olub. Uşaqlıq illəri Şəki şəhərində babasıgildə keçib. I sinfi də 2005-ci ildə Şəki şəhərindəki 18 nömrəli məktəbdə oxuyub. Sonradan ibtidai təhsilini 2009-cu ildə Bakıdakı Xarici dillər təmayüllü gimnaziyada alıb.
Tale elə gətirir ki, Əlihüseyn Məmmədov yenidən Şəki şəhərinə qayıdaraq təhsilini 18 nömrəli tam orta məktəbdə davam etdirir. Məktəbdə sakit təbiəti, yüksək intellekti, xoş rəftarı ilə seçilir. Əlihüseyn texniki fənləri öyrənsə belə tarix müəllimi ona öz fənnini sevdirir. Bəlkə də tarix müəllimi ağlına gətirməzdi ki, atestatına “5” qiymət yazdığı şagirdi Əlihüseyn vaxt gələcək qəhrəmanlığı ilə tarix yazacaq! İllərin tez keçməsindən Əlihüseyn xəbər tutmur. Saf və kövrək qəlbinin dərinliyində haray salan, bitib-tükənməyən arzuları çox idi Əlihüseynin! Onun arzularının ilk pilləsində isə ali təhsil almaq, tələbə olmaq dayanırdı. 2016-cı ilin isti yay günü Əlihüseynin həyatına xoşbəxt gün kimi daxil olur. Çünki o, tələbə adını qazanmışdı, nüfuzlu ali məktəb olan Azərbaycan Dövlət Neft və Sənaye Universitetinin İstilik energetikası mühəndisliyi fakültəsinə daxil olmuşdu. Ən çox oğlunun uğuruna sevinən isə anası Arzu xanım oldu. Arzu Məmmədova nümunəvi təhsil işçisi kmi şagirdlərinin uğuruna hər zaman arxa olduğundan övladı Əlihüseynə mənəvi dəstək olur.
Tələbəlik illərində Əlihüseyn düşünür ki, gündüzlər oxumaqla bərabər, axşamlar işləməlidir. Əslində ailədə Əlihüseynin işləməyinə ehtiyac olmasa belə onu fikrindən döndərmək də olmur. Beləcə, Əlihüseyn Məmmədov universitetdə təhsil aldığı illərdə “Araz” supermarketlər şəbəkəsində əvvəl satıcı, sonra kassir işləyir. Gündüzləri oxumaqdan, gecələri işləməkdən yorulmayan Əlihüseyn özünə etibarlı dostlar qazanır. Ürəyinin saflığı, mərhəməti ilə seçilən Əlihüseyn o qədər güclü iradəyə malik idi ki, dostlarının əhatəsində yorğunluğunu belə unudardı. Çoxdan idi ki, istədiyi arzusunu reallaşdırmaq niyyətində idi. Bu arzusu ilə bağlı ən böyük sirdaşı olan anasına “mən “Əlinin burgeri” adlı yemək məkanını açmaq istəyirəm” - demişdir. Ana da bu fikirlə razılaşmışdı.
Şirin söhbətləri, mənalı düşüncələri ilə hər zaman hamının diqqətindəydi Əlihüseyn! Valideynləri, qardaşı və bacısı Ruhəngiz də Əlihüseynlə fəxr edərdi. Universiteti bitirəndən sonra Əlihüseyn Vətənə şərəflə xidmət etməyi isə bircə an yadından çıxartmır. O, universitetdə imtahanları verdikdən sonra hərbi xidmətə çağrılmağını belə həsrətlə gözləyir. Nəhayət, o, anasına çağırış vərəqəsini göstərərək özünün nə qədər sevincli olduğunu söyləyir. Bu xəbər Arzu xanım üçün gözlənilməz olur. Oğlunun Vətənə xidmət borcunu, əsgər anası olmaq hissini içində çox duyğulandırır və göz yaşına qərq olur.
2020-ci il 7 iyul. Bu tarixdə Əlihüseyn Məmmədov Azərbaycan Respublikası Silahlı Qüvvələrində həqiqi hərbi xidmətə çağrılır. Beyləqanda yerləşən “N” saylı hərbi hissədə atıcı kimi xidmət edir. Hərbi andiçmədən sonra Məmmədovlar ailəsi əsgər Əlihüseynin yanına getmək üçün hazırlıq görür. Narahatlıq keçirən Arzu xanım oğlunun sevdiyi yeməkləri və müxtəlif şirniyyatları bişirərək əsgər oğlunun görüşünə tələsir. Axı, iki ay idi ki, bişirdiyi ev yeməklərini Əlihüseyn yeməmişdi. Ana həm də istəyirdi ki, oğlu ilə görüşəndə, onu bağrına basıb, isti nəfəsini duysun.
Beləcə, 2020-ci il 6 sentyabr tarixində Əlihüseyn ailəsi ilə görüşür. Ancaq anası Arzu xanım bilmirdi ki, 21 gün sonra mənfur ermənilərə qarşı II Qarabağ müharibəsi başlayır, Vətənə sədaqət andı içən Əlihüseynlə isə bu son görüşdü!
27 sentyabr 2020-ci ildə erməni faşıstlərinə qarşı Vətən müharibəsi başlayır. 44 günlük Vətən müharibəsində Azərbaycan Respublikasının Prezidenti, Ali Baş Komandan İlham Əliyevin rəhbərliyi altında Müzəffər Azərbaycan Ordusunun hərbi qulluqçuları igidliklə vuruşurlar. Azərbaycan əsgəri Əlihüseyn Məmmədov düşmənə layiqli cavab vermək üçün Füzuli, Cəbrayıl, Xocavənd uğrunda döyüşlərdə iştirak edir. İkinci Qarabağ müharibəsində neçə-neçə döyüşdə qəhrəmanlıq göstərir. Ancaq Məmmədovlar ailəsi Əlihüseynin müharibədə iştirak etdiyini bilmir. Hətta tez-tez evə zəng edən Əlihüseyn anasını belə inandırıb demişdi ki, “hərbi xidmətdəyəm, işlərim çox yaxşıdır”.
Oğlunun döyüşdə iştirakndan xəbərsiz olan ananın narahatlığı isə getdikcə artırdı. Əlihüseyn də bacardıqca evlə telefon əlaqəsini kəsmir, anasının həyəcanını aydın hiss edirdi. Sonuncu zəngində Əlihüseyn anasına nigaran qalmamağı tapşırır.
Vətən müharibəsində yurd təəsübü çəkən Əlihüseyn Məmmədov torpaqlarımızın erməni işğalından azad edilməsində əsl kişi kimi döyüşür. Komandir Özal Quluzadə onun müharibədə göstərdiyi qəhrəmanlıq haqqında demişdir:
"Əlihüseyn verilən tapşırıqları tez mənimsəyirdi və böyük həvəslə yerinə yetirməyə çalışırdı. Bir dəfə döyüş zamanı mərmi az qalmışdı. Olduğumuz yerə də hərbi maşın gələ bilmirdi. Bir qrup əsgərimə mərmi gətirilməsi üçün tapşırıq verdim. Əlihüseyn də həmişə olduğu kimi özünü qabağa verərək, bu tapşırığı icra etməyi məndən xahiş etdi. O, uzun məsafə qət edərək mərmiləri gətirdi.”
Hələ sağlığında “Xəyalıımda qurduğum xoşbəxtliyə bir gün bu kəpənək kimi uçaraq qovuşacam...” – deyən Əlihüseynin arzusu gerçək olmasa da, ancaq o, sinəsini Vətən yolunda, torpaq yolunda sipər etdi. 2020-ci il oktyabrın 9-da Füzuli istiqamətində gedən döyüşdə Əlihüseyn Məmmədov düşmənin atdığı mərminin qəlpəsindən şəhid olur, əbədiyyətə qovuşur. İgid, cəsur döyüşçü Əlihüseyn Məmmədov Şəki şəhərindəki Şəhidlər qəbiristanlığında dəfn edilir. Azərbaycan Respublikasının Prezidenti İlham Əliyevin Sərəncamları ilə Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş hərbi qulluqçu Əlihüseyn Məmmədov ölümündən sonra “Füzulinin azad olunmasına görə”, “Cəsur döyüşçü”, “Vətən uğrunda” medalları ilə təltif olunub. Hazırda Bakının Sabunçu rayonu ərazisindəki yaşadığı binanın divarına şəhid Əlihüseyn Məmmədovun xatirə lövhəsi vurulub.
Bakının Suraxanı rayonundakı 226 nömrəli tam orta məktəbin direktoru, şəhid Əlihüseynin anası Arzu Məmmədovaya vətənpərvər, igid və qəhrəman oğul böyütdüyünə görə təşəkkür edirik! Arzu xanıma ən böyük təsəllimiz odur ki, Vətənin dar günündə şəhadətə ucalan Əlihüseyn Məmmədovla indi bütün Azərbaycan fəxr edir!
Nur içində yat Əlihüseyn, məkanın cənnət olsun!
Təranə CƏBİYEVA
10-10-2023, 19:21
Paşinyan rus sülhməramlılarının Ermənistanın köçürülməsinin əleyhinədir
Ermənistan Baş naziri Nikol Paşinyan Rusiyanın Qarabağdakı sülhməramlılarının Ermənistana köçürülməsinin əleyhinədir.
Bu barədə o, İctimai telekanala müsahibəsində deyib.
Paşinyan bildirib ki, əgər Qarabağdakı Rusiya sülhməramlıları regionu tərk etsə, onlar Ermənistana köçürülmək əvəzinə, Rusiya Federasiyasına qayıtmalıdırlar.
O qeyd edib ki, Ermənistan “3+3” formatında görüş keçirməyə hazırdır. Paşinyanın sözlərinə görə, görüşün Tehranda baş tutacağı barədə razılıq əldə olunub.
10-10-2023, 18:18
Milli Məclis İlham Əliyevlə əlaqədar bəyanat qəbul edəcək
Milli Məclis İlham Əliyevin Prezident seçilməsinin 20-ci ildönümü ilə əlaqədar bəyanat qəbul edəcək.
Bu məsələ parlamentin oktyabrın 12-də keçirilməsi nəzərdə tutulan xüsusi iclasının gündəliyinə salınıb.
Belə ki, İlham Heydər oğlu Əliyevin Azərbaycanın Prezidenti seçilməsinin 20-ci ildönümü ilə əlaqədar Milli Məclis bəyanat qəbul edəcək.
10-10-2023, 17:41
Zaxarova:”Moskva problemin uğurla həll ediləcəyini gözləyir”
"Rusiya sülhməramlılarının Qarabağdakı fəaliyyəti son hadisələr nəzərə alınmaqla uyğunlaşdırılacaq".
Bunu Rusiya XİN-in sözçüsü Mariya Zaxarova brifinqdə bildirib.
O deyib ki, sülhməramlıların Qarabağa yeridilməsi şərtləri, o cümlədən sentyabrın 19-20-də baş verən son toqquşmalardan sonra "əhalinin köçü fonunda dəyişib".
"Sülhməramlılar artıq bir sıra stasionar və müvəqqəti müşahidə məntəqələrini bağlayıblar. Moskva Bakı ilə sülhməramlılarla bağlı fundamental məsələləri müzakirə edəcək. Xarici işlər nazirlərinin mümkün üçtərəfli görüşünə gəlincə, Moskva aydınlaşan kimi onun keçirilmə vaxtını açıqlayacaq. Moskva problemin uğurla həll ediləcəyini gözləyir", - Mariya Zaxarova deyib.
"Məsələ Rusiya Federasiyasının “hamı üçün” prinsipi əsasında mübadilə etməyə çağırdığı Ermənistan və Azərbaycan tərəfləri tərəfindən həll edilməlidir. Saxlanılanlara humanitar hüququn bütün normaları tətbiq edilməlidir. Əgər onların arasında Rusiya vətəndaşları varsa, o zaman Moskva bütün lazımi yardımı göstərəcək", - sözçü əlavə edib.
Xatırladaq ki, Rusiya Təhlükəsizlik Şurasının katibi Nikolay Patruşev Bakıya gəlib.
10-10-2023, 17:30
Prezident bu sənədin təsdiqiylə bağlı qanunu imzaladı
«Beynəlxalq Əmək Təşkilatının Nizamnaməsində dəyişiklik edilməsi haqqında 1986-cı il tarixli sənəd» təsdiq edilib.
Prezident İlham Əliyev bununla bağlı qanunu imzalayıb.
Xatırladaq ki, sənəd 1986-cı il iyunun 24-də Cenevrə şəhərində qəbul edilib.
10-10-2023, 17:17
Hakan Fidan pakistanlı həmkarıyla Şuşada görüşdü
Türkiyənin xarici işlər naziri Hakan Fidan Şuşada pakistanlı həmkarı Cəlil Abbas Cilani ilə görüşüb.
Bu barədə Türkiyənin Xarici İşlər Nazirliyindən bildirilib.
Tərəflər İqtisadi Əməkdaşlıq Təşkilatının Nazirlər Şurasının oktyabrın 10-da Şuşada keçirilən 27-ci iclası çərçivəsində bir araya gəliblər.
Hakan Fidan və Cəlil Abbas Cilani qarşılıqlı maraq doğuran məsələləri müzakirə ediblər.
10-10-2023, 16:57
Fələstin-İsrail arasında gərginliyin azalması gözlənilmir - Zaxarova
"Yaxın gələcəkdə Fələstin-İsrail münaqişəsi zonasında gərginliyin azalması gözlənilmir".
Bunu keçirdiyi brifinqdə Rusiya XİN-in sözçüsü Mariya Zaxarova deyib.
"Rusiya Federasiyası Yaxın Şərqdəki tərəfdaşları ilə birlikdə münaqişə zonasında ruslar üçün riskləri minimuma endirməyə səylər göstərir. Fələstində yaşayan ruslar üçün təxliyə işləri aparılır, İsraildən müntəzəm reyslərlə uçmaq mümkündür. Sergey Lavrov oktyabrın 16-dan 18-dək Pekinə səfər edəcək, səfər zamanı Çinin xarici işlər naziri Vanq Yi ilə danışıqlar aparacaq", - o söyləyib.
"Noyabrın 5-də keçiriləcək ümumi seçkilər ərəfəsində Moldovada vəziyyət pisləşməyə meyllidir", - sözçü belə hesab edir.
10-10-2023, 16:46
İƏT-ə sədrlik Azərbaycandan İrana keçdi
İqtisadi Əməkdaşlıq Təşkilatına (İƏT) sədrlik Azərbaycandan İrana keçib.
Bu barədə qərar İƏT-in Nazirlər Şurasının oktyabrın 10-da Şuşada keçirilən 27-ci iclasında qəbul olunub.
Qeyd edək ki, bu gün Şuşada Azərbaycanın sədrliyi ilə İƏT-in Nazirləri Şurasının 27-ci iclası keçirilib. Toplantıda Azərbaycan xarici işlər naziri Ceyhun Bayramov, Türkiyənin xarici işlər naziri Hakan Fidan, Tacikistanın xarici işlər naziri Sirojiddin Muhriddin, İran xarici işlər nazirinin müavini Mehdi Səfəri və təşkilata üzv olan digər dövlətlərin xarici siyasət idarələrinin rəhbərləri və təmsilçiləri iştirak ediblər.
10-10-2023, 16:34
Misir Qəzza zolağıyla sonuncu keçid məntəqəsini bağladı
Misir Qəzza zolağı ilə sərhəddə fəaliyyət göstərən sonuncu keçid məntəqəsini bağlamaq qərarına gəlib.
Bu barədə “The Washington Post” bildirib.
Məlumata görə, rəsmi Qahirə Misirlə Qəzza zolağının sərhədində yerləşən Rəfah şəhərindəki məntəqənin fəaliyyətini dayandırıb. Misir İsraillə sərhəddə yerləşən Taba keçid məntəqəsini də bağlayıb.
“Haanretz”in məlumatına görə, adının açıqlanmasını istəməyən Misirin dövlət məmuru bildirib ki, keçid məntəqəsi İsraiin istəyi ilə deyil, sülhü təmin etmək məqsədi ilə bağlanıb. Başqa mənbələr isə bildirib ki, bu addım Qəzza zolağına hücumlar nəticəsində fələstinlilərin Sinay yarımadasına qaça biləcəyindən qorxduğu üçün atılıb.
Bildirilib ki, Misir hakimiyyəti Qəzza zolağı ilə sərhəddə hərbi patrul xidmətini gücləndirib.
Qəzetin qeyd etdiyi kimi, Rəfah Yaxın Şərqdə münaqişənin kəskinləşməsindən sonra tibbi yardım, qida və generatorlar üçün yanacaq, eləcə də digər zəruri mallar üçün Qəzza zolağına sonuncu keçid məntəqəsi olub.
Bir müddət əvvəl İsrail hökuməti Qəzza zolağının tam mühasirəyə alınması, su və elektrik təchizatının dayanması, ərzaq və yanacaq tədarükü yollarının kəsilməsi barədə göstəriş verib.
10-10-2023, 16:28
Paşinyan Qırğızıstan Prezidentiylə telefon danışığı apardı
Ermənistanın baş naziri Nikol Paşinyan və Qırğızıstan prezidenti Sadır Japarov arasında telefon danışığı olub.
Bu barədə "Sputnik" məlumat yayıb.
Söhbət zamanı Paşinyan Qırğızıstan tərəfinin diqqətinə çatdırıb ki, o, Bişkekdə keçirilən MDB sammitində iştirak edə bilməyəcək.
Həmçinin qarşılıqlı maraq doğuran digər mövzular müzakirə olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!