29-08-2024, 16:07
MSK Ağ Partiyanın nümayəndələrini qeydə aldı
2024-cü il sentyabrın 1-nə təyin edilmiş Milli Məclisə növbədənkənar seçkilərdə Ağ Partiyanın səlahiyyətli nümayəndələri qeydə alınıb.
Bu barədə Mərkəzi Seçki Komissiyasının (MSK) bu gün keçirilən iclasında məsələ müzakirə olunub.
MSK katibi Arifə Muxtarova bildirib ki, Ağ Partiyanın 13 nəfər səlahiyyətli nümayəndəsi qeydə alınmaq üçün müraciət edib.
29-08-2024, 15:54
Zəngəzur dəhlizi uğrunda mübarizə qızışır
Rusiya prezidenti Vladimir Putinin Azərbaycana səfərindən sonra kommunikasiyaların açılması ilə bağlı bu ölkənin rəsmi şəxsləri tərəfindən bir neçə çıxışlar olub. Elə Putin Bakıda olarkən Rusiya xarici işlər naziri Sergey Lavrov Ermənistanı kommunikasiyaların açılması məsələsini sabotaj etməkdə ittiham edib. Ötən gün isə Zəngəzur dəhlizi məsələsi ilə bağlı Rusiya Xarici İşlər Nazirliyinin sözçüsü Mariya Zaxarova çıxış edib.
“Azərbaycanın əsas ərazisini Ermənistan ərazisindən keçməklə Naxçıvan muxtariyyəti ilə birləşdirə biləcək marşrut kommunikasiyalarının bloklanması üzrə məsələ üçtərəfli işçi qrupu çərçivəsində digər marşrutlarla yanaşı müzakirə edilir”, - o deyib.
Məsələ ilə bağlı danışan VI çağırış Milli Məclisin deputatı Elşad Mirbəşiroğlu bildirib ki, Ermənistan Baş naziri Nikol Paşinyan Zəngəzur dəhlizinin açılmasını yubatmaqla öz imzasına hörmət etmədiyini göstərir:
"Üçtərəfli bəyantın 9-cu maddəsinə əsasən, Ermənistan Azərbaycanın Qərb rayonları ilə Naxçıvan arasında sərnişinlərin, yüklərin manesiz hərəkətinə zəmanət verməlidir. Nəqliyyat dəhlizi üzərində də nəzarəti Rusiya Federal Təhlükəsiz Xidməti həyata keçirməlidir. Ermənistan Baş naziri Nikol Paşinyan bu sənədə imza atıb. Daha sonra Qərbdən gələn tapşırıqla Zəngəzur dəhlizinin açılmasının qarşısı hər vasitə və yolla Ermənistan tərəfindən alınıb. Nəzərə almaq lazımdır ki, Ermənistan tərəfi birgə bəyanatda olan müddəaların heç birini yerinə yetirməyib. İndiyə qədər birgə bəyanatın müddəaları Azərbaycanın gücü ilə həyata keçirilib. Bununla da Ermənistan rəhbəri bir daha öz imzasına etinasız yanaşdığını nümayiş etdirir. Ona görə də, ümumiyyətlə, Ermənistana etimad etmək düzgün deyil".
E.Mirbəşiroğlunun fikrincə, son günlər Ermənistanın bölmələrimizi atəşə tutması Rusiyanın kommunikasiya xətlərinin açılması məsələsini intensivləşdirməsi ilə bağlıdır:
"Belə bir vaxtda bölmələrimizi atəşə tutmaqla Ermənistan Qərbin yenə də hər vasitə ilə Zəngəzur dəhlizinin açılmasının qarşısını almağa çalışdığını göstərir. Düzdür, ABŞ Zəngəzur dəhlizinin açılmasında maraqlı olduğunu bildirib. Amma ABŞ özünün nəzarəti altında nəqliyyat kommunikasiyasının açılmasını istəyir. Bu, heç kimdə şübhə yaratmır. Başqa coğrafiyalarda da ABŞ istər enerji daşıyıcılarının ötürülməsi xətti, istərsə də nəqliyyat kommunikasiya infratrukturlarını öz nəzarətində saxlamağa çalışır. Ermənistan ərazisindən Naxçıvanla kommunikasiya yaradılacaqsa, ABŞ, eləcə də Qərb dairələri bu kommunikasiyanı öz nəzarəti altında saxlamağa çalışırlar. Çünki Ermənistan Baş naziri beynəlxalq nəzarət mexanizminin olması məsələsini irəli sürdükdə elə ABŞ-nin və ya onun Fransa ilə birgə nəzarətini nəzərdə tutub. Bu baxımdan düşünürəm ki, yenə də Ermənistan tərəfi təxribatlar törətməklə vəziyyəti gərginləşdirməyə, diqqəti nəqliyyat dəhlizinin açılmasından yayındırmağa çalışır. Lakin zamanla da olsa, regionda planlaşdırılan bütün nəqliyyat kommunikasiya dəhlizləri açılacaq".
Politoloq Elxan Şahinoğlu isə vurğulayıb ki, Kremlin yeganə yapışmaq istədiyi məsələ Zəngəzur dəhlizidir:
"Rusiya Prezidenti Vladimir Putin Bakıya səfərinin ardınca, əvvəlcə Ermənistanın baş naziri Nikol Paşinyanla, bir neçə gün sonra isə Azərbaycan Prezidenti İlham Əliyevlə telefonla danışıb. Putin anlayır ki, Ukrayna ilə müharibə fonunda və Rusiya üçün indiki ağır vəziyyətdə Cənubi Qafqazdakı maraqlarını qorumaq çətindir. Kreml Bakı ilə İrəvan arasında vasitəçi ola bilmir, sülh sazişinin mətninin hazırlanmasında və sərhəd danışıqlarında iştirak imkanlarını itirib. Kremlin yeganə yapışmaq istədiyi mövzu Zəngəzur dəhlizidir. Rusiya həm bu dəhlizdən istifadə, həm də dəhlizə nəzarət etmək istəyir və bu zaman 2020-ci il 10 noyabr üçtərəfli bəyanatına istinad edir. Bakı və İrəvan Rusiyanın dəhlizdən istifadəsinə müsbət yanaşır, ancaq dəhlizə nəzarət Azərbaycanla Ermənistanın maraqlarına ziddir və Putinin telefon zəngləri durumu dəyişə bilmir".
29-08-2024, 15:27
MİQ-də II tur başlayır - Müddətli müqavilə ilə vakansiya
Müddətli müqavilə ilə vakansiya seçiminə start verilir.
30 avqust saat 11:00-dan etibarən müddətli müqavilə ilə müəllimlərin işə qəbulu (MİQ) üzrə müsabiqənin vakansiya seçimi mərhələsinə start veriləcək.
Bu barədə Təhsil İnstitutu nəzdində İnsan Resursları Mərkəzindən bildirilib.
Vakansiya seçimi test imtahanında ümumtəhsil proqramı üzrə minimun 34 bal və tədris metodikası üzrə minimum 6 bal olmaqla, ümumi 40 bal və daha yüksək nəticə göstərən namizədlər vakant yerlərin seçiminə buraxılır.
Qeyd edək ki, müddətli müqavilə ilə vakansiya seçimi zamanı namizədlər 4 vakant yer seçə bilərlər. Namizədlər 2 sentyabr saat 11:00-dək şəxsi səhifələrinə daxil olaraq vakant yer seçməli və elektron ərizələrini təsdiq etməlidirlər.
29-08-2024, 15:14
Rusiya və Ukrayna razılaşmaya yaxın idi - Türkiyədən ABŞ-a sərt ittiham
“2022-ci ildə İstanbulda keçirilən sülh danışıqları
zamanı Rusiya və Ukrayna münaqişəyə son qoymaq üçün razılaşmaya yaxın idilər, lakin bəzi ölkələr bunu istəmədilər”.
Bu fikirləri Türkiyə parlamentinin sədri Numan Kurtulmuş “Habertürk” telekanalına açıqlamasında deyib.
Onun sözlərinə görə, Dolmabağçada aparılan danışıqlarda demək olar ki, sülh sazişinin imzalanma həddinə çatılmışdı.
“Amma təəssüf ki, bəzi ölkələr müharibənin bitməsini istəmədi. Çünki ABŞ Ukraynadakı hərbi əməliyyatlara görə Avropa qitəsini konsolidasiya etməyə çalışır, Rusiyanı ciddi problemlərə cəlb etmək istəyir və oradakı qüvvələr balansı üçün regional çaxnaşmaları vacib hesab edir”.
29-08-2024, 14:50
Mirzoyan erməni diplomatları Azərbaycanla sərhədə gətirdi
Ermənistanın xarici işlər naziri Ararat Mirzoyan erməni diplomatlarına Tavuş vilayətinin Kirants kəndində Azərbaycanla yeni sərhədin necə olduğunu göstərib.
Bu barədə "Sputnik Armenia" məlumat yayıb.
Qeyd olunub ki, Ermənistanın digər ölkələrdə akkreditə olunmuş səfirləri Dilcandakı iki günlük toplantıdan sonra delimitasiyanın nəticələri ilə tanış olmaq üçün sərhədə aparılıb.
29-08-2024, 14:43
Hakan Fidan yunanıstanlı həmkarı ilə görüşüb
Türkiyə xarici işlər naziri Hakan Fidan Brüsseldə yunanıstanlı həmkarı Giorgos Gerapetritis ilə görüşüb.
Bu barədə Türkiyə Xarici İşlər Nazirliyindən (XİN) bildirilib.
Qeyd olunub ki, nazirlər Avropa İttifaqının xarici işlər nazirlərinin qeyri- rəsmi iclası çərçivəsində bir araya gəliblər.
Onların hansı məsələləri müzakirə etdikləri hələ ki açıqlanmayıb.
29-08-2024, 14:31
Azərbaycan xaricə daha qoyun əti satmır
2023-cü ildə Azərbaycandan xaricə qoyun və keçi ətinin ixracı qeydə alınmayıb.
Dövlət Statistika Komitəsinə xəbər verir ki, 2019-cu illə müqayisədə 2022-ci ildə qoyun və keçi ətinin ixracı 171 dəfə azalaraq 1 tona düşüb. 2023-cü ildə isə ümumiyyətdə ixrac olmayıb.
Ötən il 89 min ton qoyun və keçi əti istehsal edilib, 4,8 min ton məhsul da idxal olunub.
2023-cü ildə qoyun əti ixracı qeydə alınmasa da 605 ton ət itkiyə gedib.
29-08-2024, 14:22
Ermənistan konstitusiyasını dəyişir - Tarix açıqlandı
Ermənistanda konstitusiya islahatları ilə bağlı referendumun 2027-ci ildə keçirilməsi planlaşdırılır.
Bunu Ermənistanın ədliyyə naziri Qriqor Minasyan jurnalistlərə bildirib.
Konstitusiya komissiyasının növbəti iclası sentyabrın 5-də baş tutacaq. Eyni zamanda, Konstitusiyanın ilk 3 maddəsinə edilən dəyişikliklər və Müstəqillik Bəyannaməsinə istinadın çıxarılması məsələsi müzakirə olunmur.
"Biz müzakirə etdik və konsensusa gəldik - bizə konstitusiya dəyişiklikləri yox, yeni Konstitusiya lazımdır. Hazırda əsas diqqət sabit parlament çoxluğu mövzusuna yönəlib və konstitusiya islahatlarının təşəbbüskarları bu normanı gələcək Konstitusiyada təsbit etmək istəyirlər", - nazir vurğulayıb.
29-08-2024, 13:59
"Formula 1"ə görə bu küçələr bağlanacaq
Bakıda keçiriləcək "Formula 1" üzrə Azərbaycan Qran-prisi ilə əlaqədar logistik əməliyyatların həyata keçirilməsi məqsədilə sentyabrın 7-də, gecə saat 01:00-dan etibarən Puşkin küçəsinin Üzeyir Hacıbəyov küçəsi və Neftçilər prospekti ilə kəsişməsindən olan hissəsi nəqliyyatın hərəkəti üçün məhdudlaşacaq.
Bu barədə Bakı Şəhər Halqası Əməliyyat Şirkətindən məlumat verilib.
Məhdudiyyət tədbirin sonunadək davam edəcək.
Nəqliyyatın İdarəetmə Planına əsasən, Bakı Şəhər Halqasının keçdiyi küçələr və trekin əhatə etdiyi ərazilər sentyabrın 9-da, gecə saat 01:00-dən etibarən nəqliyyatın hərəkəti üçün bağlı olacaq. Hərəkət 17 sentyabr, səhər saat 8:00-dan etibarən bərpa olunacaq.
Nəqliyyatın hərəkət məhdudiyyəti 3 zonada tətbiq ediləcək. Birinci zona yarış halqasının əhatə etdiyi İçərişəhər ərazisi, ikinci Azadlıq meydanı və onun yaxınlığında yerləşən digər küçələr, üçüncü zona isə BMT-nin 50 illiyi küçəsinini keçdiyi ərazidir. Yarışın keçirildiyi müddətdə qeyd olunan ərazilərə nəqliyyatın giriş-çıxışı üçün “Yaşayış Yerinə Giriş İcazəsi” veriləcək. Qeyd olunan sənədi paylanma məntəqələrinə yaxınlaşaraq, həftənin bazar ertəsindən, cümə gününə kimi, saat 10:00-dan 17:00-dək əldə etmək mümkündür. Bunun üçün vətəndaşlar zonalar üzrə aşağıdakı müvafiq idarələrə müraciət etməlidirlər:
Zona 1 – İçərişəhər Dövlət Tarix-Memarlıq Qoruğu İdarəsi
Böyük Qala küçəsi 41, keçmiş ensiklopediya binası, 4-cü mərtəbə
Tel: (012) 497-35-89
Zona 2 – Mənzil-Kommunal və İstismar İdarəsi № 4
Xəqani küçəsi 26/32
Tel: (012) 498 88 06
Zona 3 – Mənzil-Kommunal və İstismar İdarəsi № 58
İstiqlaliyyət küçəsi 5
Qeyd edək ki, “Yaşayış Yerinə Giriş İcazəsi”nin paylanması 29 avqust tarixindən başlayıb 13 sentyabradək davam edəcək.
Hər il olduğu kimi, bu il də yarış müddətində piyadaların hərəkətinə heç bir məhdudiyyət qoyulmayacaq.
Qeyd edək ki, Azərbaycan Qran-prisi sentyabrın 13-15-i aralığında baş tutacaq.
29-08-2024, 13:47
Durov hələ də Rusiya vətəndaşıdır - Peskov
"Telegram"ın həmtəsisçisi Pavel Durov hələ də Rusiya Federasiyasının vətəndaşıdır və Kreml onun neçə başqa ölkənin vətəndaşlığına malik olduğunu bilmir.
Bu barədə jurnalistlərə Rusiya prezidentinin mətbuat katibi Dmitri Peskov məlumat verib.
"Durov hələ də Rusiya vətəndaşıdır və Fransa vətəndaşlığını almağa gəlincə, biz burada heç nə bilmirik, bu, bizim işimiz deyil", - Kremlin sözçüsü bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!