7-12-2024, 17:12
FHN Tovuzdakı partlayışla bağlı məlumat yaydı
Bu gün Fövqəladə Hallar Nazirliyinin "112" qaynar telefon xəttinə Tovuz şəhəri, M.Musayev küçəsində avtomobil təmiri sexinin qarşısında yük avtomobilinin çənində təmir işləri aparılan zaman partlayış baş verməsilə bağlı məlumat daxil olub.
Bu barədə FHN-in Mətbuat Xidmətindən məlumat verilib.
Bildirilib ki, partlayış nəticəsində 2 nəfər xəsarət alıb.
FHN-in Dövlət Yanğından Mühafizə Xidmətinin Tovuz rayon Yanğından Mühafizə Hissəsinin qüvvələri əraziyə cəlb olunub. Ərazidə müvafiq təhlükəsizlik tədbirləri görülüb.
7-12-2024, 16:58
Dünya bu reallığı qəbul etməyə məcburdur - Əli Əhmədov
Azərbaycan və Türkiyə arasında dostluq inkişaf etdikcə hər iki dövlət beynəlxalq münasibətlər sistemində daha ciddi rol oynamaq imkanı qazanırlar. Öz gücümüzü daha inamla dünyaya nümayiş etdirmək imkanı qazanmışıq.
Bu barədə “İctimai diplomatiyada parlamentlərin rolu: Azərbaycan və Türkiyə nümunəsi” adlı beynəlxalq dəyirmi masa müzakirəsi zamanı Milli Məclis sədrinin birinci müavini Əli Əhmədov deyib.
O qeyd edib ki, Türkiyə və Azərbaycan dünya birliyində qüvvətli dövlətlər kimi tanınır.
“Bugünki tədbirdə dostluq və qardaşlığımızın bir ifadəsidir. Parlament sadəcə olaraq, qanunları qəbul etmək üçün deyil, eyni zamanda dövlətlər arasında əlaqələrin və münasibətlərin inkişaf etməsi üçün böyük əhəmiyyət kəsb edir”,- deyə o bildirib.
“İkinci Dünya Müharibəsindən sonra dünya nizamını möhkəmləndirmək üçün yaradılan beynəlxalq münasibətlər sistemi hazırda yeni dünya reallıqlarına lazımınca cavab verə bilmir. Düşünürəm ki, dünya bu reallığı qəbul etməyə məcburdur”, - o deyib.
Ə.Əhmədov vurğulayıb ki, ayrı-ayrı dövlətlərin içərisində olduğu proseslərdə parlamentlərin rolunu artırmağa ehtiyac var:
“Azərbaycan yalnız öz torpaqlarını işğaldan azad etməyib, həm də təcavüzə qarşı ədalətli müharibə aparmaq nümunəsi göstərib. Nəticədə Qafqazda sülh və əməkdaşlığın güclənməsi üçün real imkan yaranıb. Dövlətlərin daxili işlərə qarışmasından nə qədər insanın əziyyət çəkdiyini görürük. Türkiyə-Azərbaycan qardaşlığının möhkəmləndirilməsi üçün səylərin artırılmasına ehtiyac var”.
Qeyd edək ki, bu gün Milli Məclisdə “Parlamentarizm: ənənələr və perspektivlər” mövzusunda beynəlxalq parlament konfransı keçirilib.
Tədbirdə 13 ölkənin parlamentindən və beynəlxalq təşkilatlardan 100-ə yaxın nümayəndə iştirak edib.
Konfransda dünyada gedən proseslərdə parlamentlərin rolu, parlamentarizm ənənələrinin inkişafı, parlament diplomatiyasının imkanları, parlament müstəvisində aparılan müzakirələrin dünyadakı müasir çağırışlara verə biləcəyi töhfələr barədə fikir mübadiləsi aparıb.
7-12-2024, 16:38
ABŞ vətəndaşlarını Suriyanı tərk etməyə çağırdı
ABŞ vətəndaşlarına fövqəladə vəziyyət və qeyri-sabit şərait riski səbəbindən Suriyanı tərk etmələri tövsiyə olunub.
Müvafiq məlumat ABŞ-nin Suriyadakı səfirliyinin saytında dərc olunub.
"Suriyada təhlükəsizliklə bağlı vəziyyət qeyri-sabit və gözlənilməz olaraq qalır, ölkədə silahlı qruplaşmalar arasında aktiv toqquşmalar davam edir. Nə qədər ki Dəməşqdə kommersiya reysləri mümkündür, Dövlət Departamenti ABŞ vətəndaşlarını Suriyanı indi tərk etməyə çağırır", - deyə paylaşımda bildirilib.
Suriyanın paytaxtı Dəməşqdə ABŞ səfirliyinin olmaması səbəbindən vətəndaşların Çexiya səfirliyi ilə əlaqə saxlaya biləcəkləri qeyd edilir. Ölkəni tərk etməmək qərarına gələnlər üçün ABŞ səlahiyyətliləri fövqəladə hallara hazırlaşmağı və uzun müddət sığınacaqda qalmağa hazırlıqlı olmağı tövsiyə ediblər.
Həmçinin, nəzərə çatdırılıb ki, Suriyada təcili köməyə ehtiyacı olan, lakin Çexiya səfirliyinin ABŞ-nin maraqları şöbəsi ilə əlaqə saxlaya bilməyən ABŞ vətəndaşları İordaniyanın Əmman şəhərindəki ABŞ səfirliyi ilə əlaqə saxlaya bilərlər.
7-12-2024, 16:25
Qətərdə 22-ci Doha Forumu başlayıb
Bu gün Qətərdə “İnnovasiyanın zəruriliyi” mövzusunda 22-ci Beynəlxalq Doha Forumu başlayıb.
İki gün davam edəcək forumun açılış mərasimində Qətər Dövlətinin, Seneqal, Dominikan, Namibiya, Bosniya-Herseqovina, Qazaxıstan, Ruanda və Mərkəzi Afrika respublikalarının dövlət başçıları, ümumilikdə 150-dən çox ölkədən 4 min 500-dən çox nümayəndə, o cümlədən hökumət başçıları, nazirlər, parlament üzvləri, akademiklər, biznes dairələrinin rəhbərləri, qeyri-hökumət təşkilatlarının nümayəndələri və müxtəlif ölkələrdən ekspertlər iştirak edib.
Azərbaycanın da təmsil olunduğu forum zamanı 80-dən çox iclasda qlobal miqyasda ən aktual və təhlükəli çağırışlar üçün innovativ həll yolları müzakirə ediləcək. Müzakirələr geosiyasi gərginliklərdən və qlobal təhlükəsizlikdən tutmuş, humanitar böhranlar və texnoloji inkişaflara qədər geniş mövzuları əhatə edir.
Forumun builki sessiyaları mövcud çağırışlar və siyasət, iqtisadiyyat, təhlükəsizlik və texnologiya sahələrindəki qlobal dəyişikliklər fonunda xüsusi əhəmiyyət daşıyır. Sessiyaların əsas mövzularına “Ağıllı iqtisadiyyatlar dövründə rəqabət”, “İnnovasiyanın zəruriliyi: Qlobal inkişaf üçün texnologiyanın idarə olunması”, “Mədəniyyətlərarası dialoqun sülh şəraitində birgəyaşayışa töhfəsi” və “Platformaların gücü: Qlobal böhranlarda sosial şəbəkə influenserlərinin artan rolu” daxildir.
Forum, həmçinin mövcud böhranlara və onların yaratdığı çağırışlara diqqət yetirir. Bu kontekstdə “Beynəlxalq humanitar hüququn və məsuliyyətin gücləndirilməsi”, “Sülh müqavilələri hələ də qüvvədədirmi?” və “Qəzzada müharibə fonunda ərəb ictimai rəyinin dəyişən tendensiyaları” kimi mövzular ətrafında müzakirələr aparılır. Bundan əlavə, “Qlobal sülh və davamlı inkişaf naminə BMT Nizamnaməsinin gələcək üçün gücləndirilməsi” mövzusunda sessiyalar təşkil olunur.
Forumun diqqət çəkən digər sessiyalarına “İqtisadi təhlükəsizliyin gücləndirilməsi: Qlobal əməkdaşlıq və texnologiya suverenliyi arasında tarazlığın əldə edilməsi”, “Qlobal idarəetmə və siyasət: Seçkilərdən bir il sonra mümkün irəliləyişlər” daxildir.
“Dəyişiklik üçün birlik: Yoxsulluq və aclığa qarşı qlobal alyans” adlı sessiyada Braziliyada keçirilmiş G20 zirvəsində elan edilən alyansın aspektlərinə diqqət çəkilir. “Davamlılıq və innovasiya: münaqişə və postkonflikt dövrlərində qadın və qızlara dəstək” mövzusunda keçiriləcək sessiyada isə münaqişə bölgələrində qadınlara dəstək yolları müzakirə ediləcək.
Forumun mühüm mövzularından biri də müasir geosiyasi çağırışlara qarşı çevik diplomatik strategiyalar, qlobal sərmayələr və strateji tərəfdaşlıqlar vasitəsilə dayanıqlılığın və inkişafın təmin edilməsidir. “Koordinasiya olunmuş humanitar diplomatiya strategiyası qlobal böhranlara reaksiyada dönüş yarada bilərmi?” sualı ətrafında müzakirələr aparılır.
Builki tədbirdə təhsil, mədəniyyət və müvafiq çağırışlarla bağlı məsələlərə də xüsusi diqqət yetirilir. Əsas sessiyalarda “Qarışıqlıq dövrlərdə təhsilin beynəlmiləlləşməsi: İmkanları, çağırışları və riskləri anlamaq”, “Mədəniyyətin gücü: XXI əsrdə qlobal diplomatiya”, “Sənət vasitəsilə dialoq və müxtəlifliyin təşviqi” və “Təhsil böhranını həll etmək üçün gələcəyin maliyyələşdirilməsi” mövzuları müzakirə olunur.
İştirakçılar, həmçinin Asiya-Sakit okean regionunun Yaxın Şərqdə sülh və münaqişələrin həllində rolu, kriptovalyutalar və süni intellekt kimi yeni alətlərin kibercinayətkarlıqda istifadəsinə qarşı mübarizə, Mərkəzi Asiya və qlobal enerji təhlükəsizliyində yeni dövr, kosmos yarışında rəqabət və texnoloji innovasiya kimi məsələləri də müzakirə edirlər.
Forum çərçivəsində Qətərin vasitəçilik və qlobal sülh quruculuğu sahəsindəki səylərini əks etdirən “Sülhə aparan yol” adlı sərgi də keçirilir.
Doha Forumunun missiyası, siyasətçilər, biznes liderləri və vətəndaş cəmiyyəti nümayəndələri üçün mühüm platforma yaradaraq qlobal çağırışlara birgə həll yolları tapmaq üçün fikir mübadiləsi aparmaqdan ibarətdir.
21-ci Doha Forumu 2023-cü ilin dekabrında baş tutub. Tədbirdə 120 ölkədən 3 min 500-dən çox qonaq və 270-dən çox spiker iştirak edib.
7-12-2024, 16:11
Ukrayna Danimarkadan F-16 qırıcılarını alıb - Zelenski
Danimarka F-16 qırıcı təyyarələrinin ikinci partiyasını Ukraynaya göndərib.
Ukrayna Prezidenti Volodimir Zelenski bu barədə özünün sosial media hesabında yazıb.
“Danimarkanın Ukrayna üçün göndərdiyi F-16 qırıcılarının ikinci partiyası artıq ölkədədir”, - deyə dövlət başçısı bildirib.
İkinci partiyada Kiyevə tədarük olunan qırıcıların sayı barədə məlumat verilmir.
Qeyd edək ki, noyabr ayında Danimarkanın Baş naziri Mette Frederiksen altı ədəd F-16 qırıcısının Ukraynaya təhvil verildiyini və daha 13 təyyarənin tədarükünün planlaşdırıldığını elan edib.
7-12-2024, 16:03
Tovuzda partlayış - Xəsarət alanlar var
Tovuz rayonunda "Təzə Bazar" adlanan ərazisində sexdə partlayış olub.
Çilingər sexində baş verən bədbəxt hadisə zamanı 1992-ci il təvəllüdlü R.Rüstəmov və 1965-ci il təvəllüdlü Ə.Quliyev xəsarət alıb.
Zərərçəkənlər xəstəxanaya yerləşdirilib, vəziyyətləri orta-ağır və kafi qiymətləndirilir.
İlkin məlumata görə, hadisə yanacaq çənini kəsərkən qeydə alınıb.
Faktla bağlı araşdırma aparılır.
7-12-2024, 15:46
Paşinyan referendum təklifini dəstəklədi
Ermənistanın Baş naziri Nikol Paşinyan ölkənin Avropa İttifaqına (Aİ) üzvülüyünə dair referendum keçirilməsi təşəbbüsünü dəstəkləyib.
Bu barədə “Ermənistanın Avropa Partiyası”nın rəhbəri Tiqran Xzmalyan açıqlama verib.
Deputat bildirib ki, ölkənin Mərkəzi Seçki Komissiyası referendum layihəsinin müzakirəsi üçün imzatoplama kampaniyasını yekunlaşdırıb və yaxın günlərdə sənəd parlamentə təqdim olunacaq.
T. Xzmalyannın sözlərinə görə, layihə qanunverici orqanın dəstəyini qazana bilməsə kampaniya yenidən keçiriləcək və 300 min imza toplamaq mümkün olsa ümumxalq səsverməsi qanunverici orqanın qərarı olmadan baş tutacaq.
7-12-2024, 15:40
Baş nazir Türkiyə parlamentinin komitə sədri ilə görüşdü
Azərbaycanın Baş naziri Əli Əsədov ölkədə səfərdə olan Türkiyə Böyük Millət Məclisinin Xarici əlaqələr komitəsinin sədri Fuat Oktayla görüşüb.
Bu barədə Nazirlər Kabinetindən bildirilib.
Qeyd edək ki, F.Oktay Azərbaycanda səfərdədir.
7-12-2024, 15:11
Tramp Fransaya getdi
ABŞ-nin yeni seçilmiş prezidenti Donald Tramp Notr-Dam kilsəsinin açılış mərasimində iştirak edəcəyi Parisə gedib.
Bu barədə “Frans Press” məlumat yayıb.
Qeyd olunur ki, bu, Trampın seçildikdən sonra ilk xarici səfəridir.
Katedralın açılış mərasimindən əvvəl ABŞ-nin yeni seçilmiş prezidenti Yelisey sarayında Fransa lideri Emmanuel Makron tərəfindən qəbul ediləcək.
7-12-2024, 14:50
Bu gün Azərbaycan tarixinin ən əlamətdar günlərindən biridir
Bu gün – 7 dekabr Azərbaycan tarixinin ən əlamətdar günlərindən biridir. 106 il öncə bu gün Azərbaycan Xalq Cümhuriyyətinin parlamenti ilk iclasını keçirib, müstəqilliyimizin və hürriyyətimizin rəmzi olan üçrəngli bayrağımızı ilk parlament binasının üzərində qaldırıb. 70 il ərzində səsləndirilməsi qadağan olunmasına baxmayaraq ürəklərdə yaşadılmış azadlıq düşüncələrində, müstəqillik arzularında və demokratiya xəyallarında qorunub saxlanmış “Bir kərə yüksələn bayraq bir daha enməz” məşhur kəlamı da ilk dəfə məhz o gün səsləndirilib. 1991 – ci ildə xalqımız bütün qadağalara sinə gərərək hürriyyət bayrağımızı yenidən ucaltmaqla Azərbaycan xalqının istiqlal əzmini qırmağın mümkün olmadığını bütün dünyaya sübut etdi.
Azərbaycan öz müstəqilliyini bərpa etdi və Ulu öndər Heydər Əliyevin sayəsində özünün dediyi kimi, …Azərbaycan dünyaya günəş kimi yenidən doğdu.”
Tariximizin bütün dönəmlərində Müstəqillik və Dövlətçilik hər bir Azərbaycanlı üçün uğrunda canını belə əsirgəməyəcəyi ən müqəddəs amal olmuşdur. Ona görə də bu gün ən böyük bayramlarımızdan biri kimi milli, dini, irqi mənsubiyyətindən və istənilən digər fərqlilikdən asılı olmayaraq hər bir Azərbaycanlı üçün müqəddəs bir tarixdir. Bu gün fərqli millətlərin və mədəniyyətlərin Azadlıq və Müstəqillik uğrunda vahid bir ailədə birləşdiyi Azərbaycan tarixinin bu günkü və gələcək nəsillərə qürur yaşadan şanlı səhifəsidir. Bu tarixi gün münasibətilə bütün xalqımızı təbrik edir, bayrağımızın həmişə ucalarda olmasını arzulayıram.
7 dekabrın tarixi əhəmiyyəti yalnız Vətənimiz Azərbaycanla məhdudlaşmır. 106 il öncə ilk Milli Məclisimizin öz işinə başlaması böyük türk dünyası tarixində və coğrafiyasında xalqın iradəsi ilə formalaşmış ilk parlament olmaqla bütün türk xalqlarının hər zaman qürur duyacağı tarixi bir nailiyyətdir. Bu baxımdan 106 yaşlı Azərbaycan parlamenti bütün türk xalqları üçün azadlıq, müstəqillik və türk demokratiyası və parlamentarizminin beynəlxalq miqyasda ilk təntənəsidir. 7 dekabr günü bütün türk xalqları üçün parlamentarizm və demokratiyanın inkişaf perspektivlərində hər zaman istinad edəcəyi müasir əsaslı türk dövlətçiliyi tarixinin başlanğıc günüdür. Ona görə də Azərbaycan parlamentinin 106- cı ildönümü münasibətilə bütün türk xalqlarını təbrik edir, dünyanın müxtəlif bölgələrində yaşayan bütün türk xalqlarına əbədi İstiqlal arzulayıram.
Cavanşir Feyziyev
Millət vəkili, fəlsəfə doktoru
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!