8-03-2025, 22:58
İmişlidə faciə: ana və iki azyaşlı övladı dəm qazından öldü
İmişli rayonunda dəm qazından zəhərlənən bir ailənin üç üzvü ölüb.
Hadisə rayonun Bəhrəmtəpə qəsəbəsində qeydə alınıb. Hadisə zamanı ana və iki azyaşlı övladı dəm qazından zəhərlənərək ölüb.
Zəhərlənməyə məruz qalan 1989-cu il təvəllüdlü şəxs (kişi cinsli) İmişli Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya olunub. Onun vəziyyəti ağır qiymətləndirilir.
Faktla bağlı araşdırma aparılır.
8-03-2025, 22:31
Fuad Nağıyev Tahir Əmiraslanovu Şuşadan qovdu - Kulinardan sərt ittihamlar
Rusiyada yaşayan əslən azərbaycanlı, tanınmış kulinar Stalik Xankişiyev bir neçə gün əvvəl şiddətli töhmət verilən Dövlət Turizm Agentliyinin sədri Fuad Nağıyevə qarşı sərt ittihamlar səsləndirib.
Bu barədə o, özünün feysbuk hesabında paylaşım edib.
O qeyd edib ki, Fuad Nağıyev Milli Kulinariya Mərkəzinin sabiq baş direktoru Tahir Əmiraslanovu Şuşada keçirilən festivaldan qovub:
“Bir neçə il əvvəl məni Bakıya dəvət etdilər və Qarabağda keçirilən ilk beynəlxalq kulinariya festivalının fəxri sədri olmağımı xahiş etdilər. Mən dünyanın müxtəlif yerlərindən məşhur aşpazları dəvət edərək, vəhşilər tərəfindən dağıdılmış Şuşaya gəldikdə, dostlarıma belə bayramların niyə məhz burada keçirilməsi lazım olduğunu izah etdim. Çünki biz bu yaralı, əzilmiş torpağa həyat verməli idik.
Festival haqqında bakılı aşpazlar da eşitdilər. Hansı ki, onlar müharibə zamanı öz arzuları ilə cəbhəyə getmiş, Azərbaycan əsgərlərini ləzzətli yeməklərlə doyurmuşdular. Hətta onlar ilk qəhrəmanlardan sonra Şuşaya daxil olub orada isti çörək bişirmişdilər. Onlar da festivalda iştirak etmək istəyirdilər. Ancaq birdən Turizm Agentliyindən deyirlər ki, “bunlar lazım deyil”.
Bu necə ola bilər?! Bəs kim lazımdır? Kimi dəvət etmək lazımdır, əgər bu vətənpərvərlər gəlməyəcəksə? Onlar ailələrini tərk edib, restoranlarını buraxıb, həyatları ilə risk ediblər, bir aşpaz da şəhid olub. Şəhidlik isə şərəfdir! Ona görə də mən zəng etməli, inandırmaq, mübahisə etməli oldum. Dövlət Turizm Agentliyinə ən yüksək səviyyədən deyildi ki, məhz bu aşpazları birinci növbədə dəvət etmək lazımdır. Əgər bu Turizm Agentliyinin tərəfindən edilən ilk və son alçaqlıq olsaydı…
Festivala mənim müəllimim, dostum və mənim üçün böyük rəhbər olan Tahir Əmiraslanov da gəldi. O, artıq uzun illər çalışdığı təvazökar vəzifəsindən məhrum edilmişdi və təqaüdə çıxmasına cəmi 4 ay qalmışdı.
Birdən mənim yanıma bəzi uşaqlar gəlib sakitcə dedilər: “Stalik müəllim, Tahir Əmiraslanovdan xahiş edin, getsin”.
“Bu necə ola bilər?!” soruşduqda isə “belə lazımdır, bu rəhbərliyin xahişidir” dedilər. Çünki həmin gün festivalda rəhbərlikdən Fuad Nağıyev var idi. Məhz o, Tahir müəllimi işdən çıxarmışdı. O adam ki, bütün ömrünü Azərbaycana xidmətə sərf etmişdi.
Mən Tahir müəllimin mənzilində də olmuşam, onun illərdir tamamlanmamış bağ evində də. Mən bilirəm və görürəm ki, bu zəhmətkeş insan necə təvazökar yaşayır. Əgər başqaları işdən bir şey oğurlayıb evə gətirirsə, Tahir müəllim evdən götürüb işə aparırdı. Onda belə adam necə işdən çıxarıldı? Yaxşı, bəlkə bu onun qərarı deyildi, bəlkə Fuad Nağıyev belə qərar verməyib? Mən bilmirəm. Amma Azərbaycanın baş aşpazı Tahir Əmiraslanovu kulinariya festivalından qovmaq… Bu, həddən artıq ağır bir hərəkət idi!
Mehmanxananın foyesində divanda Tahir müəllim oturmuşdu, yanında isə köhnə portfel. O, Bakıya qayıtmaq üçün avtobus gözləyirdi. Onun gözlərində kədər və incidilmişlik var idi. Bu zaman Fuad Nağıyev gəldi. Mən onu görüb müraciət etdim:
“Fuad, gəlin buraya oturun, danışaq! Niyə siz Tahir müəllimi bu festivaldan qovursunuz? Azərbaycan kulinariyası üçün bu insandan daha çox iş görmüş kim var? Bu festival o olmadan necə keçə bilər? O sizə şəxsən nə pislik edib?”
Cavabında isə o yayındı, gülümsədi, özünü çox zəif aparırdı və heç bir konkret cavab vermədi.
Bundan sonra yenə mənim yanıma gənc oğlanlar gəldi: “Tahir müəllim getsin, bazar ertəsi onu çağırıb işi ilə bağlı səhvi düzəldəcəklər”.
Mən inandım. Özüm Tahir müəllimin yanına yaxınlaşıb xahiş etdim: “Əgər bu, işinizə qayıtmaqla bağlıdırsa, belə daha yaxşı olar”.
Amma aldadıldım! Onu heç yerdə çağırmadılar, işdən çıxarılma isə onun təqaüdünə təsir etdi ki, bunu özünüz də başa düşürsünüz? Alçaqlığa baxın! Fuad Nağıyev sadəcə qorxurdu ki, bəlkə respublika rəhbərliyindən kimsə Tahir müəllimi görüb onun işdən çıxarılması haqqında danışar.
Alçaqlıqdan əlavə, mən həm də utanc hissi yaşadım. Dünyanın hər yerindən gələn qonaqları mehmanxanada yalnız səhər yeməyi ilə qidalandırırdılar. Hər stenddə gözəl Azərbaycan yeməkləri hazırlanırdı, amma qonaqlar yalnız onları iyləyirdilər. Mən öz cibimdən mehmanxananın restoranından qonaqlar üçün yemək sifariş edirdim, bəzən isə onlar özləri ödəyirdilər. Milli mətbəximizin bütün yeməklərini isə yalnız iyləyirdilər.
Festivalın son günündə nəhayət qonaqlar üçün bir növ süfrə açıldı. Turizm Agentliyinin bəzi işçiləri də iştirak edirdi, Fuad Nağıyev də gəldi. Qonaqlar onu “nazir” kimi qəbul edirdilər. Fuad viski butulkalarını özü ilə gətirərək, qonaqların qarşısında sərxoş olmaqdan başqa heç nəyi ağlına gətirmədi. Qonaqlar da içdilər, amma əgər özünü nazir adlandırırsansa, əgər sənə yüksək vəzifə həvalə ediblərsə, düşün ki, sən Azərbaycanın üzüsən! Yaxşı, bir az iç, amma insani görünüşünü itirmə, xahiş edirəm! Atalarımızın inancını, xalqımızın ənənələrini unutma!
Mən yenə utandım. Yaxşı ki, Azərbaycanın həqiqətən hörmətli nümayəndələri də orada idi və bu narahatlıq anını yumşaltdılar. Qonaqlar məmnun şəkildə yola düşdülər, Dominikandan olan bir oğlan hətta Azərbaycanla vidalaşarkən səmimi şəkildə ağladı.
Festivalın ən sonunda təşkilatçılardan biri mənim yanıma gəlib dedi: “Stalik müəllim, sizə böyük təşəkkürlər! Respublika rəhbərliyi bizə sizi maddi cəhətdən mükafatlandırmağımızı tapşırdı. Festivalda iştirakınız üçün hansı məbləği almaq istərdiniz?”
“Mən buraya pul üçün gəlməmişəm! Azərbaycan mənim əcdadlarımın vətənidir, mənim üçün tək doğma torpaqdır. Xahiş edirəm, bu söhbəti burada bitirək”, – söylədim.
“Xeyr, siz məni çox çətin vəziyyətə salırsınız. Bu ən yüksək səviyyədən gələn təklifdir! Biz sizə 10.000 dollar verə bilərikmi?”, – deyə o bildirdi.
Sizə and içirəm, mən həqiqətən də Şuşaya pul üçün getməmişdim. Bəli, on min dollar böyük məbləğdir. Amma şükürlər olsun ki, mənə nəsib olanla kifayətlənirəm. Digər tərəfdən, mükafatdan tamamilə imtina etmək (bu həqiqətən də mükafat idi, çünki hər şeyi etdikdən sonra verirdilər) də düzgün deyildi.
Bilirsinizmi, mən razılaşdım. Hətta Dubaya iki bilet də aldım. Fikirləşdim ki, belə gözlənilməz pul gəlibsə, gedib istirahət edək! Amma pul yarım il keçsə də, hesabıma daxil olmadı. Mənə deyirdilər ki, bu gün günortadan sonra hesabınızı yoxlayın, pul artıq orada olacaq! Amma xeyr, yox idi! Pul mənə heç vaxt çatmadı. Mən öyrəndim ki, gecikmə Turizm Agentliyində baş verir. Mənə hər şey aydın oldu ki, bu, aşpaz-qəhrəmanlar və Tahir Əmiraslanovla bağlı prinsipial mövqeyimə görə xəsis hesablaşma idi.
Nəhayət, Bakıya zəng edib bütün bu hekayəni danışdım və dedim ki, bu pulu qəbul etməyə razılaşmağım həqiqətən də səhv idi. Bəlkə də yaxşı oldu ki, bu pulu göndərmədilər! Amma mən istəməzdim ki, kimsə bu pulu sanki mənə göndərib, özü isə cibinə atsın. Bu pullar Qarabağın azadlığı uğrunda şəhid olanların ailələrinə, yaralılara, Azərbaycan torpağı uğrunda qanını tökənlərə lazımdır!
Uzun müddət düşündüm ki, baş verənlərdən yazmağa dəyərmi? Şübhəsiz ki, bəziləri fikirləşəcək ki, mən Fuad Nağıyevin indiki çətin vəziyyətindən istifadə edib hesablaşmaq istəyirəm. Amma Fuad bu vəziyyətə kiminsə iradəsi ilə deyil, öz əməlləri sayəsində düşüb. Mən sizə bu əməllərin yalnız kiçik bir hissəsindən danışdım ki, oxucularım və tanışlarım üçün aydın olsun ki, ədalət var. Belə davranmaq olmaz. Öz cibin və karyeran haqqında daha az düşünmək, ləyaqətli əməklə məşğul olmaq lazımdır, nəinki intriqalar və yaltaqlıqla… Azərbaycan Milli Aşpazlar Assosiasiyasının kollektivinin dağıdılması isə Tahir Əmiraslanovun bütün ömründə gördüyü işlərin hədər getməsidir. Mən bunu Fuad Nağıyevə bağışlaya bilmərəm. Sən nə yaratmısan ki, başqalarının yaratdığını dağıdırsan?!”
8-03-2025, 21:22
"Qarabağ"dan növbəti qələbə
Bu gün Azərbaycan Premyer Liqasında 26-cı tura start verilib.
İlk gündə bir oyun baş tutub.
Lider “Qarabağ” səfərdə “Araz-Naxçıvan”la üz-üzə gəlib. Dörd qolun qeydə alındığı görüşün yekununda Ağdam təmsilçisi inamlı qələbəyə sevinib.
“Şamaxı” – “Sabah” və “Zirə” – “Səbail” oyunları mart 9-da, “Sumqayıt” – “Kəpəz” və “Neftçi” – “Turan Tovuz” görüşləri isə ayın 10-da keçiriləcək.
8-03-2025, 20:06
Doqquzuncu günün duası - İmsak və iftar vaxtı
Sabah Ramazan ayının 9-cu günüdür.
Qafqaz Müsəlmanları İdarəsinin açıqladığı Ramazan təqviminə əsasən, sabah üçün imsak saat 05:35-ya, iftar isə saat 18:55-ə təyin olunub.
Ramazan ayının 9-cu gününün duası:
“Allahumməc-əl li fihi nəsibən min rəhmətikəl-vasiə. Vəhdini fihi libərahinikəs-satiə. Və xuz binasiyəti ila mərzatikəl-camiə. Biməhəbbətikə ya əmələl-müştaqin”.
Tərcüməsi:
“İlahi, bu gün öz bol rəhmətini mənə nəsib et. Məni öz parlaq dəlillərinlə istiqamətləndir. Məni sənin razılığına bais olan və hər cür xeyri özündə cəm edən əməllərə doğru çək. Məhəbbətinə and verirəm, ey şövqlülərin istəyi!”
İftar duası:
“Allahummə ləkə sumtu və əla rizqikə əftərtu və əleykə təvəkkəltu. Bismillahir-Rəhmanir-Rəhim. Ya vasiəl-məğfirəti iğfirli”:
Tərcüməsi:
“İlahi, səndən ötrü oruc tutdum, sənin verdiyin ruzi ilə iftar açdım və sənə təvəkkül etdim. Bağışlayan və mehriban Allahın adı ilə. Ey hüdudsuz bağışlama sahibi, mənim günahlarımı bağışla!”
Allah orucunuzu qəbul etsin!
8-03-2025, 18:44
Kiyevdənsə, Moskva ilə işləmək daha asan olacaq - Tramp
Rusiya və Ukrayna arasında münaqişənin həlli üçün yekun nizamlanmaya gəlmək üçün Kiyevdənsə, Moskva ilə işləmək daha asan olacaq.
Bu sözləri ABŞ Prezidenti Donald Tramp deyib.
Onun sözlərinə görə, “bütün kartlar” Rusiya prezidenti Vladimir Putinin əlindədir.
Tramp əlavə edib ki, hazırda döyüş meydanındakı dinamikanı nəzərə alaraq, Putinin mövqeyində olan hər kəs Ukraynanı bombalayacaq. Tramp Ukraynaya kömək etmək istədiyini desə də, Kiyevin də sülh sazişi üzərində işləməli olduğunu vurğulayıb.
“Düşünürəm ki, biz Rusiya ilə çox yaxşı işləyirik, lakin hazırda onlar Ukraynanı bombalayırlar. Ukrayna ilə məşğul olmaq da mənə daha çətin gəlir, onların kartları yoxdur. Son razılaşmanın əldə edilməsi baxımından Rusiya ilə işləmək daha asan ola bilər, çünki onlarda bütün kartlar var”, - deyə Tramp söyləyib.
8-03-2025, 18:00
Axtarışda olan iki nəfər tutuldu
Daxili İşlər Nazirliyinin əməkdaşları tərəfindən törətdikləri cinayət əməllərinə görə axtarışda olan vətəndaşlar - 1987-ci il təvəllüdlü Nəcəfxanov Anar Abdula oğlu və 1985-ci il təvəllüdlü Əliyev Əhməd Fərhad oğlunun Bakı şəhəri, Sabunçu rayonu, Bakıxanov qəsəbəsində yerləşən mənzillərdən birində gizləndikləri müəyyən edilib və mənzilin qapısının açılması məqsədilə Fövqəladə Hallar Nazirliyinin "112" qaynar telefon xəttinə məlumat verilib.
Bu barədə Fövqəladə Hallar və Daxili İşlər nazirlikləri mətbuat xidmətlərinin birgə məlumatında bildirilib.
Qeyd edilib ki, məlumatla əlaqədar FHN-in Xüsusi Riskli Xilasetmə Xidmətinin xilasediciləri çağırış üzrə cəlb olunub. Birgə keçirilən əməliyyat nəticəsində mənzilin giriş qapısı açılaraq axtarışda olan şəxslər polis əməkdaşları tərəfindən saxlanılıblar.
8-03-2025, 17:52
Müəllimlərin maaşı vahid tarif cədvəli əsasında verilə bilər? - AÇIQLAMA
Azərbaycanda bir sıra peşələr var ki, əməkhaqqı vahid tarif cədvəli ilə tənzimlənmir. Bunlardan biri də müəllimlərin əməkhaqqıdır.
Elm və Təhsil Nazirliyi yanında İctima Şuranın katibi Günay Əkbərova bildirib ki, müəllimlərin maaşının vahid cədvəl əsasında tənzimlənməsi ilk baxışda ədalətli və sabit görünə bilər:
“Hər kəs hansı kriteriyalarla maaş aldığını bilər, şəffaflıq artar, bəzi hallarda isə əməkhaqqı ilə bağlı narazılıqlar azalır. Amma təcrübəyə baxanda bunun həmişə ən effektiv həll olmadığını görürük. Çünki müəllimlik sadəcə saat hesabı ilə ölçüləcək bir peşə deyil – burada peşəkarlıq, təcrübə, pedaqoji yanaşma, innovativ metodlardan istifadə, tələbələrin uğurları və daha çox şey önəm daşıyır. Dünyada fərqli modellər var. Məsələn, Finlandiyada müəllimlərin maaşı dövlət tərəfindən tənzimlənsə də, onlar vahid bir sistemə bağlı deyil. Burada əməkhaqqı müəllimin ixtisasına, iş təcrübəsinə və əlavə fəaliyyətlərinə görə dəyişir. Üstəlik, müəllimlər yüksək maaş və sosial təminat aldıqları üçün bu peşəyə hörmət də böyükdür. Nəticədə, Finlandiyanın təhsil sistemi dünya reytinqlərində ən üst sıralarda dayanır.Almaniyada isə müəllimlərin maaşı vahid deyil, regionlara görə fərqlənir. Məsələn, daha bahalı şəhərlərdə və ya müəllim çatışmazlığı olan yerlərdə əməkhaqqı yüksəkdir. Müəllimlər dövlət qulluqçusu kimi qəbul olunur və onlara müxtəlif sosial təminatlar verilir. Bu sistem müəllimlərin uzunmüddətli işləməsini və peşəyə bağlılığını artırır.Türkiyədə isə müəllimlərin əməkhaqqı vahid cədvəllə müəyyən edilir. Lakin bu, müəllimlərin motivasiyasını azaldır. Çünki fərqlənən müəllimlə digərləri eyni maaşı alır. Bu səbəbdən, bir çox müəllim əlavə qazanc üçün repetitorluq etməyə başlayır. Bunun nəticəsində məktəbdə dərslərə verilən enerji azalır, təhsilin keyfiyyətinə təsir edir.ABŞ-da vəziyyət daha fərqlidir. Burada maaş ştatdan, hətta məktəbdən məktəbə dəyişir. Bəzi yerlərdə müəllimlər yüksək maaş alır, bəzilərində isə olduqca azdır. Bu, müəllimlərin karyera seçiminə təsir edir – yaxşı şərtlər olan yerlərə üstünlük verilir, çətin bölgələrdə isə kadr çatışmazlığı yaranır”.
Ekspert düşünür ki, ölkəmizdə müəllimlərin maaşı vahid sistemlə tənzimlənsə, sabitlik yaranar: "Hər kəs biləcək ki, hansı şərtlərlə maaş alır. Bəzi hallarda təəssüf hissi ilə qarşılaşdığımız rüşvət və s. xoşagəlməz hallar azala bilər. Lakin digər tərəfdən, bu sistem müəllimlərin fərdi təşəbbüs göstərməsini azalda bilər. Yüksək nəticə göstərən və peşəsinə daha çox enerji sərf edən müəllimlə digərlərinin maaşı eyni olarsa, fərqlənmək üçün həvəs qalmaya bilər. Bu da təhsil keyfiyyətinə mənfi təsir edər".
Müsahibimiz sonda qeyd edib ki, ən effektiv yol isə yalnız vahid maaş cədvəli ilə məhdudlaşmamaqdır:
“Baza maaş müəyyən oluna bilər, lakin əlavə motivasiya mexanizmləri mütləq tətbiq edilməlidir. Müəllimlərin peşəkar inkişafı, sertifikatları, iş təcrübəsi, innovativ tədris metodlarından istifadəsi, layihələrdə iştirakı əməkhaqqısına təsir etməlidir. Bundan başqa, ucqar bölgələrdə çalışan müəllimlər üçün xüsusi güzəştlər nəzərdə tutulmalıdır ki, bu ərazilərdə təhsilin səviyyəsi yüksəlsin. Düzdür hazırda onlar üçün H1, H2 həvəsləndirici əlavə gəlir olur amma bu da yalnız gənc müəllimlərə tətbiq edilir. Səmimi desəm, mən müəllimlərin layiqli əməkhaqqı almasını çox istəyirəm. Müəllim təkcə sinfə girib dərs keçən biri deyil, o, gələcəyin formalaşdırıcısıdır. Onun əməyinin qarşılığı sadəcə vahid bir cədvəllə ölçülməməlidir. Biz müəllimlərin rifahını düşünərək, onların maaşlarını yalnız standart rəqəmlərlə deyil, işlərinin keyfiyyətinə, verdiyi töhfəyə və nəticələrinə əsasən formalaşdırmalıyıq. Azərbaycanın gələcək təhsil strategiyası da bu prinsiplərə əsaslanmalıdır”.
8-03-2025, 17:20
Bakıda xanımların veloyürüşü keçirildi - FOTO
Azərbaycan Velosiped İdmanı Federasiyası, Gənclər və İdman Nazirliyi, eləcə də Azərbaycan Yerüstü Nəqliyyat Agentliyinin (AYNA) təşkilatçılığı ilə "İdman həftəsi" çərçivəsində martın 8-də Bakıda xanımların veloyürüşü keçirilib.
Nüxtəlif sahələrdə çalışan xanımların iştirakı ilə baş tutan veloyürüş Dənizkənarı Bulvar ərazisində təşkil olunub.
Veloyürüşdə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva, gənclər və idman naziri Fərid Qayıbov və Azərbaycan Velosiped İdmanı Federasiyasının prezidenti Mədət Quliyev iştirak ediblər.
Veloyürüşün təşkilində əsas məqsəd həvəskar xanım velosipedçilərin asudə vaxtlarının səmərəli keçirilməsinə dəstək olmaq, ekoloji nəqliyyat vasitəsi olan velosipedi təbliğ etmək və qadınları velosipeddən istifadəyə həvəsləndirməkdir. Veloyürüş zamanı xanımlar Azneft dairəsi - Dəniz Vağzalı marşrutu üzrə hərəkət ediblər.
8-03-2025, 17:03
Masallıda dəhşətli cinayət: Yeniyetmə anasının sevgilisini bıçaqladı
Masallı rayonunda ötən il baş verən cinayət hadisə ilə əlaqədar məhkəmə prosesi başa çatıb.
Hadisə ötən ilin noyabr ayında baş verib.
Belə ki, 2005-ci il təvəllüdlü yeniyetmə (şərti adı M.N.) yaşadığı evin həyətində anasının münasibətdə olduğu kişi (şərti adı S.Ə) ilə qarşılaşıb. Bu zaman onlar arasında mübahisə yaranıb. Yeniyetmə bıçaqla S.Ə.-nin mədəsinə, dalağına və qida borusuna ciddi zədə yetirib.
Məhkəmə iclasında yeniyetmə özünü təqsirli bilib. O bildirib ki, anasının sevgilisi ilə evdə rastlaşması onu əsəbiləşdirib və S.Ə.nin ona qarşı təhqiramiz ifadələr işlətməsindən sonra hadisə baş verib. S.Ə.-nin fiziki cəhətdən ondan üstün olduğunu görən yeniyetmə bıçağı çıxardığını və özünü qorumaq məqsədilə zərbələr endirdiyini söyləyib. Hadisədən sonra isə bıçağı zibillik əraziyə tullayıb.
Zərərçəkmiş S.Ə. ifadəsində M.N.-nı uzun illər tanıdığını və onun ailə üzvləri ilə yaxın münasibətdə olduğunu deyib. Hadisə günü yeniyetmənin anası ona zəng edərək səhhətində problem olduğunu bildirib və onu evə çağırıb. S.Ə. evə daxil olandan sonra açar səsləri eşidib və bir müddət sonra yeniyetmənin qapını açaraq içəri girdiyini deyib. Onun sözlərinə görə, M.N ona “burada nə gəzirsən?” deyərək bıçaqla hücum edib.
Anasının sözlərinə görə, hadisədən sonra oğlu yanına gəlib və S.Ə.-ni bıçaqladığını etiraf edib. Daha sonra zərərçəkmiş xəstəxanaya çatdırılıb.
Yeniyetmə Azərbaycan Respublikası Cinayət Məcəlləsinin 126.1-ci maddəsi (qəsdən sağlamlığa ağır zərər vurma) ilə ittiham olunub. Lənkəran ağır cinayətlər məhkəməsi onu təqsirli bilib və ona 3 il azadlıqdan məhrumetmə cəzası verib. Lakin məhkəmə yetkinlik yaşına çatmayan şəxsin cəzanı həbsxanada çəkmədən islah olunmasının mümkün olduğu qənaətinə gələrək ona 1 il sınaq müddəti təyin edib.
Yeniyetmə sınaq müddətində yaşayış və təhsil yerini dəyişməmək, nəzarət orqanlarına məlumat vermədən müəyyən ərazilərə getməmək və elektron nəzarət vasitəsi gəzdirmək kimi öhdəliklər daşıyacaq.
8-03-2025, 15:43
Azərbaycan gimnastı dünya çempionu oldu
Azərbaycan gimnastı Nikita Simonov Bakıda keçirilən Dünya Kubokunda uğurla çıxış edib.
O, halqalarla hərəkət proqramında rəqiblərini qabaqlayıb və qızıl medala sahib çıxıb.
Qadın gimnastımız Dəniz Əliyeva isə dayaqla tullanmada yeddinci olub.
Qeyd edək ki, turnir martın 9-da başa çatacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!