28-03-2025, 22:40
Bu sənəd Türkiyənin daxili işlərinə qarışmağa yönəlib
Türkiyənin ədliyyə naziri Yılmaz Tunç bir gün əvvəl Ankaraya qarşı qərəzli Bəyannamə qəbul edən Avropa Şurasının Yerli və Regional Hakimiyyətlər Konqresinin ünvanına sərt tənqidlə çıxış edib.
O, Avropa Şurasının bu strukturunun mövqeyini “hüquqi reallıqdan uzaq” adlandırıb, onun qərəzsizlik prinsipini pozduğunu vurğulayıb.
Y.Tunç sosial şəbəkədəki paylaşımında Türkiyənin hüquqi dövlət olduğunu, müstəqil məhkəmələrin fəaliyyət göstərdiyi və “hüququn aliliyi” prinsipinə hörmət edildiyini vurğulayıb.
“Avropa Şurasının Yerli və Regional Hakimiyyətlər Konqresinin Bəyannaməsi kimi siyasi xarakterli sənədlər müstəqil məhkəmə sisteminə deyil, Türkiyənin daxili işlərinə qarışmağa yönəlib. Davam edən məhkəmə prosesləri ilə bağlı qərəzli və birtərəfli bəyanatların nazirliyin ümumi qəbul edilmiş hüquqi normaları ilə heç bir əlaqəsi yoxdur”, - deyə nazir qeyd edib.
O əlavə edib ki, Avropa Şurasının Yerli və Regional Hakimiyyətlər Konqresi siyasiləşmiş və qərəzli ritorikaya əl atır ki, bu da ona olan inamı sarsıdır.
28-03-2025, 21:51
"Qarabağ"dan 4 qolluq qələbə
Misli Premyer Liqasında 18-ci tura start verilib.
Açılış oyununda son çempion "Qarabağ" səfərdə "Turan Tovuz"la qarşılaşıb.
Matç qonaqların 4:1 hesablı qələbəsi ilə yekunlaşıb.
Ağdam klubu 67 xalla turnir cədvəlinə başçılıq edir. Tovuz təmsilçisi isə 43 xalla dördüncü pillədə qərarlaşıb.
Qeyd edək ki, tur martın 30-da başa çatacaq.
28-03-2025, 21:33
ABŞ Ukraynanın təbii sərvətlərini ələ keçirmək istəyir
ABŞ Ukraynanın təbii sərvətləri üzərində nəzarət əldə etmək istəyir, lakin bu prosesdə Ukraynanın təhlükəsizliyinə zəmanət verilmir.
Bu barədə “Financial Times”, “Bloomberg” və “Reuters” kimi nüfuzlu media orqanları məlumat yayıb.
Yeni layihəyə görə, ABŞ Ukraynanın bütün təbii sərvətləri, o cümlədən neft və qaz yataqları üzərində geniş nəzarət əldə etmək istəyir. Layihə ABŞ-ın təbii sərvətlərin istismarına aid infrastruktur, dəmir yolları, avtomobil yolları, limanlar, mədənlər və emal zavodları üzərində də nəzarət əldə etməsini nəzərdə tutur.
Ukrayna tərəfi bildirir ki, ABŞ-ın təklifi ölkənin suverenliyinə təhlükə yaradır və Kiyevin Vaşinqtondan asılılığını daha da gücləndirir. Bir neçə Ukrayna rəsmisi ABŞ-ın yeni təklifini "ədalətsiz saziş" və "talan" kimi xarakterizə edib.
Amerikanın təqdim etdiyi təklifə əsasən, Ukrayna təbii sərvətlərin istismarı və infrastruktur layihələrindən əldə etdiyi gəlirin yarısını ABŞ-la birgə yaradılmış xüsusi investisiya fonduna köçürməlidir. Bununla yanaşı, ABŞ fondun bütün mənfəətini və illik 4% gəliri əldə edəcək, bu da ABŞ-ın Ukraynaya göstərdiyi 100 milyard dollarlıq "hərbi borcu" geri qaytarmaq məqsədilə nəzərdə tutulub.
ABŞ Beynəlxalq İnkişafın Maliyyələşdirilməsi Korporasiyası (DFC) fondun idarəçiliyini həyata keçirəcək və beş müşahidə şurası üzvündən üçünü təyin edəcək. Bu isə Ukraynanın fond üzərində nəzarət imkanlarını məhdudlaşdırır.
Həmçinin, sazişə görə, ABŞ Ukrayna təbii sərvətlərini, xüsusən də neft və qazı, digər potensial alıcılardan əvvəl almaq hüququna malik olacaq. Vaşinqton həmçinin Ukraynanın təbii sərvətlərini ABŞ-ın "strateji rəqibləri"nə satmasını qadağan edir.
Ukrayna Prezidenti Volodimir Zelenski isə bildirib ki, saziş layihəsi hələ də müzakirə mərhələsindədir və rəsmi Kiyev ABŞ-la əməkdaşlığa açıqdır. Lakin o, ABŞ-ın hərbi yardımını dayandırmasından və ya kəşfiyyat məlumatlarının mübadiləsini məhdudlaşdırmasından ehtiyat etdiyini qeyd edib.
ABŞ rəsmiləri bildirirlər ki, təklif olunan saziş Ukrayna üçün iqtisadi cəhətdən əlverişli olacaq və iki ölkə arasındakı əlaqələri gücləndirəcək. ABŞ-ın Milli Təhlükəsizlik Şurasının nümayəndəsi Ceyms Hyuitt deyib ki, bu saziş uzunmüddətli sülhün və təhlükəsizliyin təməlini qoyacaq.
ABŞ Maliyyə naziri Skott Bessent bildirib ki, saziş yaxın həftələrdə imzalana bilər. Lakin Ukrayna rəsmiləri sazişin bu formada qəbul ediləcəyinə şübhə ilə yanaşırlar.
ABŞ Prezidenti Donald Tramp isə deyib ki, saziş ABŞ-a Ukraynaya edilən milyardlarla dollarlıq investisiyaları geri qaytarmağa kömək edəcək. Onun sözlərinə görə, Avropa ölkələri Ukraynaya yalnız kreditlər təqdim etdiyi halda, ABŞ ona təmənnasız yardım göstərib.
Ümumilikdə, ABŞ-ın əsas məqsədi Ukraynanın təbii sərvətlərini nəzarət altına almaq və eyni zamanda Vaşinqtona sərf edilən maliyyə vəsaitlərini geri qaytarmaqdır. Lakin bu təklifin Ukrayna tərəfindən qəbul ediləcəyi hələ ki, qeyri-müəyyəndir.
28-03-2025, 21:15
Ağsuda qəza - 8 nəfər yaralandı
Ağsu rayonunda baş vermiş avtomobil qəzası nəticəsində 8 nəfər müxtəlif dərəcəli bədən xəsarətləri alıb. İlkin məlumata görə, yaralılar təcili tibbi yardım vasitəsilə Ağsu Rayon Mərkəzi Xəstəxanasına çatdırılıb.
Onlardan birinin vəziyyəti orta-ağır qiymətləndirilir.
Hadisənin hansı səbəbdən baş verdiyi hələ məlum deyil. İlkin ehtimallara görə, qəza yol hərəkəti qaydalarının pozulması və ya sürücünün idarəetməni itirməsi nəticəsində baş verə bilər
Daxili İşlər Nazirliyinin Şəki Regional Qrupundan verilən məlumata görə, faktla bağlı Ağsu Rayon Polis Şöbəsində araşdırma aparılır.
Hadisə yerində müvafiq ekspertizalar aparılır və qəzanın dəqiq səbəbləri müəyyənləşdirilir.
28-03-2025, 20:05
Ramazanın 29-cu günü - İmsak və iftar vaxtı
Martın 29-u Ramazan ayının 29-cu günüdür.
Sabah imsak vaxtı saat 05:02, iftar isə 19:17-dədir.
İmsak duası:
“Allahummə ğəşşini fihi bir-rəhməh. Vərzuqni fihit-tovfiqə vəl-isməh. Və təhhir qəlbi min ğəyabihit-tuhməh. Ya rəhimən bi-ibadihil-mu-minin”.
Tərcüməsi:
“İlahi, bu gün məni öz sonsuz rəhmətinlə əhatə et! Bu gün mənə qüvvət və ismət nəsib et! Ürəyimi töhmətçilik qaranlığından təmizlə! Ey mömin bəndələrinə rəhmli olan Allah!”
İftar duası:
“Allahummə ləkə sumtu və əla rizqikə əftərtu və əleykə təvəkkəltu. Bismillahir-Rəhmanir-Rəhim. Ya vasiəl-məğfirəti iğfirli!”
Tərcüməsi:
“İlahi, səndən ötrü oruc tutdum, sənin verdiyin ruzi ilə iftar açdım və sənə təvəkkül etdim. Bağışlayan və mehriban Allahın adı ilə. Ey hüdudsuz bağışlama sahibi, mənim günahlarımı bağışla!”
Allah orucunuzu qəbul etsin!
28-03-2025, 18:28
Türkiyədə bələdiyyə sədrinin müavini həbs edildi
Türkiyədə İstanbul şəhərinin Şişli bələdiyyə sədrinin müavini Ebru Özdemir həbs edilib.
Bu barədə TRT kanalı məlumat yayıb.
O, PKK terror təşkilatının "şəhər konsensusu" adı altında fəaliyyətləri ilə bağlı aparılan istintaq çərçivəsində saxlanılıb.
Ebru Özdemir "Silahlı terror təşkilatına köməklik göstərmək" maddəsi üzrə çıxarıldığı məhkəmədə həbs olunub.
28-03-2025, 17:51
Şuşa Müalicə-Sağlamlıq Mərkəzi ilin sonuna tam istifadəyə veriləcək
Şuşa Müalicə-Sağlamlıq Mərkəzi ilin sonuna tam istifadəyə veriləcək. Ora 90 çarpayılıqdır və 6 korpusdan ibarətdir.
Stasionar xidmət sahəsində terapiya, pediatriya, cərrahiyyə, hemodializ və digər şöbələr fəaliyyət göstərəcək. Ambulator xidmət sahəsində isə konsultativ poliklinika, uşaq poliklinikası, şüa-diaqnostika, funksional diaqnostika, fizioterapiya və tibbi bərpa şöbələri, həmçinin klinik diaqnostik laboratoriya yaradılacaq.
Mərkəzin Təcili Tibbi Yardım Stansiyası müasir standartlara cavab verən avadanlıqla təchiz olunacaq.
Şuşa Müalicə-Sağlamlıq Mərkəzinin ərazisində, eyni zamanda, Gigiyena və Epidemiologiya Mərkəzi, yoluxucu xəstəliklər və hemodializ korpusları inşa olunub.
28-03-2025, 17:47
Kralı xəstəxanaya apardılar
Martın 27-də Böyük Britaniya Kral III Çarlz xərçəng xəstəliyinin müalicəsi zamanı yaranan müvəqqəti yan təsirlərlə əlaqədar qısa müddətli xəstəxanaya gedib, müşahidə altına alınıb.
Bu barədə Bukinqem sarayı məlumat yayıb. Bildirilib ki, 76 yaşlı Kral həmin günün axşamı Klarens Haus rezidensiyasına qayıdıb və hazırda dövlət işlərini davam etdirir.
Kralın martın 28-də Birminqem şəhərində planlaşdırılan səfəri və orada keçirilməsi nəzərdə tutulan dörd tədbir, eləcə də üç səfirin etimadnamələrinin qəbulu təxirə salınıb. Saraydan bildirilib ki, Kral Çarlz bu tədbirlərin təxirə salınmasına görə məyusdur və onların yenidən planlaşdırılmasını səbirsizliklə gözləyir.
Bukinqem sarayının sözçüsü qeyd edib ki, bu cür yan təsirlər xərçəng müalicəsi alan xəstələr üçün qeyri-adi deyil və Kralın ümumi müalicə prosesi müsbət istiqamətdə davam edir. Saray mənbələri bu vəziyyəti yolda kiçik bir maneə kimi qiymətləndirib və Kralın səhhətinin çox yaxşı istiqamətdə irəlilədiyini vurğulayıblar.
28-03-2025, 17:29
İmamoğlunun vəkili sərbəst buraxıldı
İstanbul Böyükşəhər Bələdiyyəsinin sədri Ekrem İmamoğlunun vəkili Mehmet Pehlivan sərbəst buraxılıb.
İstanbul Respublika Baş Prokurorluğunun Pulların Yuyulmasına Qarşı Mübarizə Bürosu tərəfindən aparılan istintaq çərçivəsində "Cinayət yolu ilə əldə edilmiş əmlak dəyərlərinin leqallaşdırılması" maddəsi üzrə saxlanılan Mehmet Pehlivanın polis bölməsindəki əməliyyatları tamamlanıb və ifadəsi alınıb.
Pehlivan xaricə çıxış qadağası şəklində məhkəmə nəzarəti tədbiri altında sərbəst buraxılıb.
28-03-2025, 17:23
Yeni filmdə Putini canlandırır - FOTO
Rusiya Prezidenti Vladimir Putindən bəhs edən "Kreml sehrbazı" filminin çəkilişləri başlayıb.
Filmdə Putin obrazını ingilis aktyor Cud Lou canlandırıb.
Filmin çəkilişləri Latviyada aparılır, aktyorun Putinə bənzədilməsi üçün xüsusi saç və makiyaj tətbiq olunub.
Ekran əsəri Giuliano da Empolinin eyniadlı kitabı əsasında çəkilib. Kitab 1990-cı illərdə Vladimir Putinin siyasi strateqinə çevrilən televiziya prodüseri Vadim Baranovun hekayəsindən bəhs edir.
Fransız rejissor Olivier Assayasın çəkdiyi filmdə Cud Lou Putinin prezidentliyinin ilk illərini canlandırır. Filmdə əsas diqqət Putinə deyil, onun köməkçisi Vadim Baranova yönəlib. Kadr heyətində Paul Dano, Alisia Vikander və Zax Qalifianakis kimi tanınmış aktyorlar yer alır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!