29-09-2025, 21:22
Netanyahu Qətərə zəng edib üzr istədi
İsrailin Baş naziri Benyamin Netanyahu Qətərin Baş naziri Məhəmməd Əbdürrəhman Al Taniyə telefonla zəng edərək Dohaya endirilmiş zərbəyə görə üzr istəyib.
Bu barədə İsrailin 12-ci telekanalı məlumat yayıb.
Məlumata görə, Netanyahu Ağ Evdən Qətər əmirinə zəng edib. O, hazırda ABŞ Prezidenti ilə görüş keçirir.
Qeyd olunur ki, İsrailin 9 sentyabr 2025-ci ildə Qətərin paytaxtı Dohada yerləşən HƏMAS-ın qərargahına hücumu zamanı ABŞ prezidenti Donald Trampın Qəzza sektorunda atəşkəsə dair son təklifinin müzakirə edildiyi görüş keçirilib.
Məlumata görə, əsas hədəf HƏMAS liderlərindən Xəlil əl-Həyya olub. “Əl-Cəzirə” telekanalı təşkilatdakı mənbəyə istinadən bildirib ki, partlayışlar nəticəsində HƏMAS rəhbərlərindən heç kim ölməyib, lakin Xəlil əl-Həyyanın oğlu və köməkçisi daxil olmaqla beş üzvü həlak olub.
Qətərin Daxili İşlər Nazirliyi isə hücum nəticəsində bir yerli təhlükəsizlik zabitinin də öldüyünü təsdiqləyib. Netanyahu bu hadisəyə görə təəssüf ifadə edib.
29-09-2025, 21:11
Sumqayıtda 350 min manata yol cizgiləri çəkiləcək
Sumqayıt şəhərinin küçə və prospektlərdə yol cizgilərinin çəkilməsi işlərinə sərf olunacaq vəsaitin həcmi açıqlanıb.
Sözügedən işlər Heydər Əliyev, Azərbaycan və Sülh prospektlərini, eləcə də Koroğlu, Bakı, N.Nərimanov, Ş.Bədəlbəyli, S.Vurğun, Z.Hacıyev, Sahil, M.Əsədov, C.Cabbarlı, C.Məmmədquluzadə, Ü.Hacıbəyov, Nizami, P.Həşimov və Bulvar küçələrini əhatə edəcək.
ŞİH yol cizgilərinin çəkilməsi işlərini “Dream Construction Company” şirkətinə həvalə edib və onunla 350 min manatlıq müqavilə bağlayıb.
29-09-2025, 20:50
Ramiz Quliyevin vəziyyəti pisləşib - Oğlu danışdı
Xalq artisti Ramiz Quliyev Mərkəzi Gömrük Hospitalının reanimasiya şöbəsinə yerləşdirilib. Onun müalicəsini Heydər Əliyev Fondu öz üzərinə götürüb.
Məşhur tarzənin oğlu, Əməkdar artist Əyyub Quliyev bildirib ki, Ramiz müəllimin bir neçə gün öncə səhhətində problemlər yaranıb. 1 il əvvəl böyrək çatışmazlığı ilə əlaqədər müəyyən müalicələr alıb.
“Bir neçə gün bundan əvvəl isə səhhətində ciddi problemlər yarandı. Müayinəyə apardıq və məlum oldu ki, kreatinin səviyyəsi kritik səviyyədə yüksək idi”.
O qeyd edib ki, tanıdığı həkimlərə müraciət etdikdən sonra Ramiz Quliyevi təcili olaraq xəstəxanaya yerləşdirmək lazım olduğu bildirilib:
“Mən də Heydər Əliyev Fonduna müraciət etdim. Sağ olsunlar ən qısa zamanda bizə geridönüş etdilər. Hətta Fondun icraçı direktoru Anar Ələkbərov özü əlaqə saxlayaraq bütün detalları öyrəndi. Hər şeyi izah etdikdən sonra bildirdi ki, dövlətimiz və Heydər Əliyev Fondu bizə dəstək olmağa hazırdır. Bizə də bu böyük stimul oldu, çünki çox gərgin dəqiqələr yaşayırdıq. Dərhal Heydər Əliyev Fondunun dəstəyi ilə Ramiz müəllim Mərkəzi Gömrük Xəstəxanasına yerləşdirildi və həmin günün axşamı Anar Ələkbərov və Mədəniyyət naziri Adil Kərimli atamı ziyarət etdilər, həkimlər bilavasitə Ramiz müəllimin vəziyyətini onlara izah etdi. Biz də çox sevindik ki, dövlətimiz ən yüksək səviyyədə Ramiz müəllimin sağlamlığı ilə bağlı bütün proseslərdə iştirak edir”.
“Mən də gündəlik həkimlərlə ünsiyyətdəyəm. Şükür Allaha ki, yaxşıya doğru irəlləyişlər var. Böyrəklər artıq funksiyalarını bərpa edir. Müəyyən xroniki xəstəliklər də var idi ki, onlar da artıq təhlükəli vəziyyətə gəlib çxırdı. Həkimlər onları da müalicə etmək üçün hər gün müxtəlif müayinələr və prosedurlar edirlər” -deyə Ramiz Quliyevin oğlu bildirib.
“İstərdim ki, fürsətdən istifadə edib bizim üçün belə çətin, önəmli anlarda bizi tək qoymayan Prezident İlham Əliyev və birinci xanım Mehriban Əliyevaya təşəkkürümü bildirim. Mənə elə gəlir ki, bir az geciksəydik nəticəsi ağır ola bilərdi. Demək olar ki, Ramiz müəllimi xilas etmiş oldular” - sonda o bildirib.
29-09-2025, 20:41
Əsas məsələ yalnız bilik əldə etmək deyil - Nazir
“Əsas məsələ yalnız bilik əldə etmək deyil, həm də həmin biliklərin ölkənin milli inkişafına çevrilməsi prosesidir”.
Bu sözləri bu gün Bakıda “PAŞA Holdinq”in təşkilatçılığı ilə keçirilən beynəlxalq “INMerge" İnnovasiya Sammitində (INMerge Innovation Summit 2025) “Təhsil-sahibkarlıq boru kəməri: Biliyin milli inkişafa çevrilməsi” mövzusunda təşkil edilmiş panel müzakirə zamanı elm və təhsil naziri Emin Əmrullayev deyib.
Nazir qeyd edib ki, innovasiya və sahibkarlıq yalnız proqramlarla məhdudlaşmamalıdır, bunun mədəniyyət və təhsil sistemi ilə dərin bağlılığı vardır. “Biz, ilk növbədə, yanlış yanaşmalardan uzaq durmalı, düzgün metodları müəyyən etməliyik. Təhsil sahəsində innovasiya yalnız məktəblərə deyil, həm də geniş ictimaiyyətə təsir etməlidir”, – deyə o vurğulayıb.
Emin Əmrullayev əlavə edib ki, ölkədə innovasiya mühiti yalnız texnologiya və proqramlar ilə qurulmur, eyni zamanda gələcək nəsillərin yetişdirilməsi və cəmiyyətin ümumi inkişafına töhfə verəcək mədəniyyətin formalaşdırılması ilə bağlıdır.
29-09-2025, 19:47
Qalib gələcəyimizə əminəm - Paşinyan
Ermənistanın Baş naziri Nikol Paşinyan deyib ki, rəhbərlik etdiyi partiya 2026-cı ildə keçiriləcək parlament seçkilərində növbəti dəfə qələbə qazanacaq. O, buna əmin olduğunu bildirib.
Nikol Paşinyan bu barədə Strasburqda jurnalistlərə açıqlamasında bildirib.
“Dediklərimi sözgəlişi demirəm. Tam əminəm ki, 2026-cı il parlament seçkilərində xalq Ermənistanı idarə etmək üçün bizə verilən mandatı uzadacaq. Çünki bizim həyata keçirdiyimiz sülh gündəliyinin və siyasətin müəllifləri xalqdır”, - deyə Baş nazir vurğulayıb.
29-09-2025, 19:36
Tramp-Netanyahu görüşü başladı
Vaşinqtonda ABŞ prezidenti Donald Tramp və İsrailin baş naziri Benyamin Netanyahu arasında görüş başlayıb.
Tərəflər Trampın Qəzza zolağında müharibəyə son qoymaq üçün təklif etdiyi planı müzakirə edəcək.
29-09-2025, 19:22
Azərbaycanda oktyabrın 1-dən məktəb avtobusları layihəsi başlayır
Oktyabrın 1-dən Azərbaycanda məktəb avtobusları layihəsi başlayır.
Bunu jurnalistlərə açıqlamasında elm və təhsil naziri Emin Əmrullayev deyib.
O bildirib ki, gələn aydan bununla bağlı pilot layihə icra ediləcək:
“Hazırda özəl sektorla bir yerdə təxminən 1200 uşaq var. Layihəyə oktyabrın 1-dən başlanılacaq. Ümumilikdə, bizim üçün də bu maraqlı layihədir. Biz də bu prosesi daha da asanlaşdırmaqla bağlı müəyyən müzakirələr aparırıq ki, bu avtobusların xətlərə buraxılması daha sürətli olsun. Rəqəmsal İnkişaf və Nəqliyyat Nazirliyi ilə bir yerdə işləyirik. Hazırda bu layihə 12 dövlət və özəl məktəbi əhatə edir. Hansı məktəblər tıxaca daha çox təsir edirsə, o məktəbləri cəlb etməyə çalışırıq. Amma bu, valideynlə həmin şirkət arasında olan münasibətlərdir. Bizim işimiz daha çox bunu mümkün etməkdir. Gələn aydan bu pilot səviyyədə tətbiq ediləcək. Amma 1200 uşaq da az deyil. Çünki bunların hamısı şəhərin mərkəzi məktəbləridir”.
E. Əmrullayev əlavə edib ki, dövlət layihənin ilkin mərhələsində müəyyən subsidiya və dəstək mexanizmləri ilə iştirak edəcək, lakin şagird sayı artdıqca ödənişin valideynlər tərəfindən qarşılanması nəzərdə tutulur: “Layihənin əsas məqsədi həm uşaqlar üçün rahat nəqliyyat təmin etmək, həm də tıxacların azaldılmasına töhfə verməkdir. Saylar artdıqca qiymətlər tədricən optimallaşdırılacaq”.
29-09-2025, 16:30
Nazirlik Cabir İmanovun ölümü ilə bağlı başsağlığı verdi
Azərbaycanın mədəniyyət ictimaiyyətinə itki üz verib. Tanınmış aktyor, Əməkdar artist Cabir İmanov sentyabrın 29-da, 49 yaşında vəfat edib.
Bu barədə Mədəniyyət Nazirliyi məlumat yayıb.
“Cabir Qorxmaz oğlu İmanov 22 iyun 1976-cı ildə Bakı şəhərində anadan olub. 1992–2001-ci illərdə “Parni iz Baku” KVN komandasının üzvü olub. 1992-ci ildə KVN çempionu, 1995-ci ildə KVN Yay kubokunun sahibi, 2000-ci ildə isə KVN “Əsrin çempionu” adına layiq görülüb. 2001-ci ildən “Planet Parni iz Baku” KVN Teatrının aktyoru idi.
Bir sıra filmlərdə maraqlı obrazlar canlandıran Cabir İmanovun sənəti dövlətimiz tərəfindən yüksək qiymətləndirilib. O, 2015-ci ildə “Əməkdar artist” fəxri adı, 2021-ci ildə “Tərəqqi” medalı ilə təltif olunub.
Azərbaycan Respublikası Mədəniyyət Nazirliyinin kollektivi Əməkdar artist Cabir İmanovun vəfatından kədərləndiyini bildirir, mərhumun ailəsinə və yaxınlarına dərin hüznlə başsağlığı verir. Allah rəhmət eləsin”,-məlumatda bildirilib.
29-09-2025, 16:16
Metronun 5 stansiyasının qapıları yenilənəcək
"Bakı Metropoliteni" QSC-nin "Nəsimi", "Ulduz", "Koroğlu", "Memar Əcəmi" və "Həzi Aslanov" metro stansiyalarında sıradan çıxmış "M" tipli qapılar demontaj və montaj ediləcək.
Bu işlərin 297 min manata başa gələcəyi gözlənilir.
29-09-2025, 15:57
Cabir İmanov zala daxil oldu, bir neçə dəqiqə sonra yıxıldı...
Cabir İmanov məşq prosesində vəfat etməyib.
Bu sözləri jurnalist Elvin Elxan öz feysbuk hesabında paylaşıb.
“Zala daxil oldu, bir neçə dəqiqə sonra oturdu və yıxıldı. Həyatımın ən böyük travmasını aldım. İlk dəfə birinin ölümünün şahidi oldum. O adam ki, ən gözəl məşq yoldaşı idi. Allah rəhmət eləsin!”, - paylaşımda bildirilib.
Xatırladaq ki, Əməkdar artist Cabir İmanov bu gün vəfat edib. O, idman zalında infarkt keçirib. Aktyorun həyatını xilas etmək mümkün olmayıb.
TƏBİB-dən bildirilib ki, 29.09.2025-ci il tarixində saat 13:38-də Səbail rayonu Üzeyir Hacıbəyli küçəsi ərazisindən əməkdar artist Cabir İmanovun (1976-cı il təvəllüdlü) səhhətinin pisləşməsi (yıxılma) səbəbilə Respublika Təcili və Təxirəsalınmaz Tibbi Yardım Mərkəzinə çağırış daxil olub.
Qeyd edilib ki, çağırış ünvanına dərhal təcili tibbi yardım briqadası cəlb olunub.
Saat 13:50-də briqada tərəfindən əməkdar artistin həkiməqədər ölüm faktı qeydə alınıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!