9-09-2025, 23:42
Oyunçularım müəyyən qədər təzyiq altında idilər - Ayxan Abbasov
Gözəl oyun üçün futbolçularıma təşəkkür edirəm”.
Bu sözləri Azərbaycan millisində baş məşqçi vəzifəsini müvəqqəti icra edən Ayxan Abbasov DÇ-2026-nın seçmə mərhələsində Ukrayna yığması ilə 1:1 hesablı heç-heçə etdikləri oyundan sonra təşkil olunmuş mətbuat konfransında deyib.
Mütəxəssis matçın komandası üçün yaxşı alındığını söyləyib: “Hesab nə olursa, olsun oyunçularıma təşəkkür edəcəkdim. Onlar müəyyən qədər təzyiq altında idilər. Rəqibdən xal ala bildik. Düşünürəm ki, azarkeşlərimiz sayəsində bunu bacardıq. Sona qədər bizimlə oldular və futbolçuları ruhlandırdılar. Emin Mahmudovun qolu bizi çox sevindirdi. Hətta oyunçular da ondan qol gözləyirdilər. Toral Bayramovun da meydana daxil olması görüşün gedişatına müsbət mənada təsir göstərdi”.
O, rəqibin heyətində texnikalı oyunçuların olduğunu deyib: “Buna baxmayaraq, komandamız mübarizə apardı. Yığmamızın bütün üzvlərində milli ruh və motivasiya görünürdü. Bundan sonra da Azərbaycan futbolunun inkişafı üçün çalışacağıq”.
A.Abbasov Fransa ilə keçiriləcək qarşılaşma üçün gözləntilərindən danışıb: “Fransa ilə oynamaq futbolumuzun inkişafı üçün dəyərlidir. Təbii ki, asan olmayacaq. Bunun üçün bizə vaxt lazımdır. İndidən nəsə demək də düzgün deyil. Çünki AFFA-nın mənimlə bağlı verəcəyi qərarı hələ bilmirik. İndiki durumda gözləmək lazımdır”.
Qeyd edək ki, millimiz seçmə mərhələnin ilk matçında İslandiyaya 0:5 hesabı ilə uduzub.
9-09-2025, 23:06
[b]Makron onu baş nazir təyin etdi[/b]
Fransa siyasi səhnəsində növbəti dəyişiklik baş verib. Prezident Emmanuel Makron rəsmi olaraq Sebastian Lekornu yeni Baş nazir təyin edib.
Bu barədə məlumatı Yelisey Sarayı yayıb. Fransanın keçmiş müdafiə naziri olan Lekornu 2017-ci ildən hökumətdə təmsil olunur və Makronun yaxın müttəfiqlərindən sayılır.
Qeyd edək ki, keçmiş Baş nazir Fransua Bayrun istefa verib.
Yelisey Sarayının yaydığı bəyanatda bildirilir ki, Makron yeni Baş nazirdən parlamentdə təmsil olunan siyasi qüvvələrlə məsləhətləşmələr aparmağı, dövlət büdcəsinin qəbuluna və qarşıdakı aylar üçün vacib qərarların verilməsinə dair razılaşmalar qurmağı istəyib.
Yeni təyinat müxalifət tərəfindən kəskin tənqid edilib.
9-09-2025, 22:48
"iPhone 17" gəlir: Bakıda yenə “qırğın” olacaq - FOTO
"Apple" şirkəti "iPhone 17" mobil telefon seriyasını ictimaiyyətə təqdim edib.
Təqdim olunan modellər arasında "iPhone 17", "iPhone Air", "iPhone Pro" və "iPhone Pro Max" yer alır.
Şirkət yeni cihazların satış qiymətlərini də açıqlayıb:
iPhone 17 – 799 dollar (təxminən 1 350 AZN)
iPhone Air – 999 dollar (təxminən 1700 AZN)
iPhone Pro – 1 099 dollar (təxminən 1 870 AZN)
iPhone Pro Max – 1 199 dollar (təxminən 2 040 AZN)
Qiymətlər ABŞ bazarı üçün nəzərdə tutulub.
Yeni nəsil "iPhone" modellərinin yaxın həftələrdə digər bazarlarda da satışa çıxarılması gözlənilir. "Apple"ın təqdimatında cihazların texniki göstəriciləri və dizayn yenilikləri barədə ətraflı məlumat verilib.
“iPhone 17” seriyası bütün dünyada olduğu kimi Azərbaycanda da böyük maraqla gözlənilir. ABŞ-da qiymətlər açıqlansa da, yeni modellərin ölkəmizdə nə vaxt satışa çıxarılacağı və rəsmi qiymətləri hələ bəlli deyil. Ancaq əvvəlki təcrübə göstərir ki, Azərbaycanda telefonlar ənənəvi olaraq rəsmi qiymətdən 2-3 dəfə baha satılır.
Bakıda ilk satış günləri adətən xüsusi canlanma ilə yadda qalır. İllərdir müşahidə olunur ki, yeni “iPhone” modelləri satışa çıxarılan kimi mobil telefon mağazaları qarşısında uzun növbələr yaranır. Bu dəfə də istisna olmayacaq, xüsusən də gənclər və texnologiya həvəskarları yenilikləri ilk əldə edənlər sırasında olmaq üçün böyük maraq göstərəcəklər.
Ekspertlərin müşahidələrinə görə, “iPhone 17” seriyası ilə bağlı ilk partiyaların yenə də sürətlə satılması gözlənilir. Ən çox tələbat “iPhone 17 Pro” və “iPhone 17 Pro Max” modellərinə olacaq. Çünki bu modellər kamera, batareya və süni intellekt imkanlarına görə daha güclü funksiyalar təklif edir.
Yüksək qiymətlərə baxmayaraq, Azərbaycanda yeni “iPhone” modellərinin populyarlığı dəyişmir. Bunun əsas səbəblərindən biri də telefonun status simvolu kimi qəbul olunmasıdır.
9-09-2025, 21:57
Millimizdən “möcüzə” - Heçə-heçəyə sevindik
DÇ-2026-nın Avropa zonası üzrə seçmə mərhələsində Bakıda keçirilən Azərbaycan – Ukrayna oyunu başa çatıb.
Komandalar Tofiq Bəhramov adına Respublika Stadionunda keçirilən görüşü 1:1 hesablı heç-heçə ilə yekunlaşdırıblar.
Rəqibin heyətində 51-ci dəqiqədə Georgi Sudakov fərqlənib. Azərbaycan yığmasının qoluna isə 72-ci dəqiqədə kapitan Emin Mahmudov penaltidən imza atıb.
Qarşılaşmanı Yunanıstandan olan hakimlər briqadası idarə edib.
9-09-2025, 20:52
İsrailin hücumunda HƏMAS liderinin oğlu ölüb
HƏMAS hərəkatı İsrailin Qətərdə rəhbərliyə məxsus qərargaha endirdiyi hava zərbəsi nəticəsində təşkilat liderlərindən Xəlil əl-Həyyanın oğlu Həmmam əl-Həyya və onun ofisinin direktorunun həlak olduğunu təsdiqləyib.
Bu barədə HƏMAS Siyasi Bürosunun üzvü Sühəyl əl-Hindi “Əl-Cəzirə”yə açıqlamasında bildirib.
O, HƏMAS rəhbərliyin hücumdan sağ çıxdığını deyib. Onun sözlərinə görə, hücumda əsas məsuliyyət ABŞ-ın üzərinə düşür:
“Azad dünya bu məsələdə mövqeyini ortaya qoymalıdır. Biz ABŞ administrasiyasını bu hücuma görə məsuliyyət daşıyan tərəf hesab edirik”, - deyə əl-Hindi vurğulayıb.
Xatırladaq ki, bu gün İsrail ordusu və Şin Bet (ŞABAK) Qətərin paytaxtı Dohada HƏMAS rəhbərliyinə məxsus qərargaha zərbə endirib. Baş nazir Benyamin Netanyahu bu qərarın Yerusəlim və Qəzzada baş vermiş terror hücumlarına cavab olduğunu bildirib.
9-09-2025, 20:30
Nazir mətbuat konfransında huşunu itirdi
İsveçin yeni səhiyyə naziri Elisabet Lann təqdimat zamanı huşunu itirib.
Yeni nazir mətbuat konfransında yıxılıb.
O, salondan çıxarılaraq xəstəxanaya aparılıb.
Yerli media yazır ki, Lannın qan şəkəri aşağı düşüb.
9-09-2025, 20:07
İsrail niyə Qətərə hücum edib?
İsrailin baş naziri Binyamin Netanyahu Qəzzada və Yerusəlimdə baş verən qanlı terror hücumlarından sonra təhlükəsizlik qurumlarına HƏMAS rəhbərliyinin qərargahına zərbə endirmə göstərişi verib.
Bu barədə İsrail hökuməti məlumat yayıb.
Yayılan açıqlamaya görə, müdafiə naziri İsrael Kats da bu qərarı tam dəstəkləyib.
Qeyd edək ki, sentyabrın 8-eə Yerusəlimin Ramot rayonundakı avtobus dayanacağında iki silahlı şəxs insanlara atəş açıb. Onların İordan çayının Qərb sahilindən olduqları bildirilir. Hücum nəticəsində azı altı nəfər həlak olub, 15 nəfər yaralanıb. Silahlılar isə dərhal İsrail hərbçiləri tərəfindən zərərsizləşdirilib.
Hadisədən sonra Netanyahu təhlükəsizlik şurası ilə fövqəladə iclas keçirib. Burada əldə edilən əməliyyat imkanından istifadə edərək Qətərdə yerləşən HƏMAS rəhbərliyinə qarşı hərbi tədbir görülməsi qərara alınıb. Baş nazirin xidməti vurğulayıb ki, qərar bütün güc strukturlarının razılığı ilə qəbul olunub və əmrin icrası bir gün əvvəl verilmişdi.
Məlumata görə, Qətərdə hədəf alınan obyekt HƏMAS-ın yüksək səviyyəli rəhbərlərinin danışıqlar apardığı qərargah olub.
9-09-2025, 17:19
İsrail bu ölkəyə hücum etdi
İsrail ordusu Qətərdə HƏMAS təşilatının vəzifəli şəxslərinin olduğu əraziyə zərbələr endirib.
Bu barədə İsrail Müdafiə Qüvvələri (IDF) və Şin Bet (ISA) birgə bəyanat yayıb.
"İllərdir HAMAS rəhbərliyinin bu üzvləri terror təşkilatının əməliyyatlarına rəhbərlik edir, 7 oktyabr qırğınına görə birbaşa məsuliyyət daşıyır və İsrail dövlətinə qarşı müharibə təşkil edir və ona rəhbərlik edirdilər. Zərbədən əvvəl mülki əhaliyə dəyən zərərin azaldılması, o cümlədən yüksək dəqiqlikli döyüş sursatlarının istifadəsi və əlavə kəşfiyyat məlumatlarının alınması üçün tədbirlər görülüb", - açıqlamada bildirilir.
Mətbuatı yazır ki, Qətərin paytaxtı Dohada bir neçə partlayış qeydə alınıb.
Dohada 10-dan çox partlayışın baş verdiyi deyilir.
9-09-2025, 17:07
"Abzas Media" əməkdaşları barədə qərar elan edildi
"Abzas Media" əməkdaşlarının barələrində hökmdən verilən apellyasiya şikayəti üzrə məhkəmə prosesi keçirilib.
Bu gün Bakı Apellyasiya Məhkəməsində hakim Zəfər Əhmədovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib və hökm qüvvədə saxlanılıb.
Xatırladaq ki, Bakı Ağır Cinayətlər Məhkəməsinin hökmü ilə Ülvi Həsənli 9, Sevinc Vaqifqızı (Abbasova) 9, Məhəmməd Kekalov 7 il 6 ay, Nərgiz Absalamova 8, Hafiz Babalı 9, Elnarə Qasımova 8, Fərid Mehralızadə 9 il müddətinə azadlıqdan məhrum edilib.
Qeyd edək ki, 2023-cü il noyabrın 21-də “Abzas Media”nın direktoru Ülvi Həsənli və baş redaktoru Sevinc Vaqifqızı (Abbasova), noyabrın 23-də direktor müavini Məhəmməd Kekalov, dekabrın 1-də saytın əməkdaşı Nərgiz Absalamova, dekabrın 13-də jurnalist Hafiz Babalı, daha sonra saytın əməkdaşı Elnarə Qasımova barəsində qrup halında qaçaqmalçılıq ittihamı ilə həbs qətimkan tədbiri seçilib.
Onlar barəsində ilkin olaraq Cinayət Məcəlləsinin 206.3.2-ci (qrup halında qaçaqmalçılıq) maddəsi ilə ittiham irəli sürülüb.
İstintaq dövründə Cinayət Məcəlləsinin bir sıra, o cümlədən 193-1.3.2-ci maddəsi (Cinayət yolu ilə əldə edilmiş pul vəsaitlərini və ya digər əmlakı leqallaşdırma, xeyli miqdarda törədildikdə) üzrə yekun ittiham verilib.
9-09-2025, 17:03
“Z nəslinin inqilabı” - 22 nəfər öldü, yüzlərlə yaralı var
Sentyabrın 8-də Nepalda sosial şəbəkələrin bloklanması etirazlara səbəb olub. İğtişaşlarla müşayiət olunan etirazların əsas hərəkətverici qüvvəsi gənclərdir.
İğtişaşlar zamanı 22 nəfər həlak olub, yüzlərlə yaralı var.
Nepalın baş naziri Şarma Oli ölkədə kütləvi etirazların qarşısını ala bilmədiyi üçün istefa verib.
“Z nəslinin inqilabı” adlanan etirazların başlamasına səbəb hökumətin "Facebook", "Instagram", "WhatsApp", "YouTube", "X", "Reddit" və "LinkedIn"ə qadağa qoymaq qərarl olub. Qərarla razılaşmayan gənclər küçəyə axışıb. Lakin etirazçıların əsas tələbləri bununla yekunlaşmayıb, onlar tezliklə korrupsiya əleyhibə şüarlar səsləndiriblər və hökuməti istefaya çağırıblar.
Gənclər uzun müddətdir korrupsiya, siyasi elitanın imtiyazlı həyatı və işsizlikdən narazılıq edirdilər. Sosial şəbəkələrin bağlanması isə stəkanı daşıran son damla olub. Hakimiyyət buna “dezinformasiya və fırıldaqçılıqla mübarizə” adı versə də, gənclər bunu söz azadlığının boğulması kimi qiymətləndiriblər.
Etirazçılar Katmanduda parlament binasına yürüş edərkən polis gözyaşardıcı qaz və rezin güllələrdən istifadə edib. Qəzəblənən kütlə baş nazirin şəxsi evini və bəzi nazirlərin mülklərini yandırıb, dövlət binalarını dağıdıb. Katmandu hava limanı da yaxınlıqdakı yanğınlar səbəbindən bağlanıb.
73 yaşlı Oli prezident Ramçandra Paudelə ünvanladığı məktubda “ölkədə vəziyyəti sakitləşdirmək və siyasi yolla həll tapmaq” üçün istefa verdiyini bildirib. Prezident artıq yeni baş nazirin seçilməsi üçün danışıqlara başlayıb.
Etirazların təşkilatçıları hərəkatı “Z nəsli inqilabı” adlandırır. Onların fikrincə, bu hərəkat korrupsiyaya və hökumətin iqtisadi iflasına qarşı gənclərin üsyanıdır.
Nepalda 2008-ci ildə monarxiyanın devrilməsindən bəri siyasi sabitlik təmin edilməyib. Oli isə son 17 ildə dörd dəfə baş nazir kürsüsündə oturub. İndi isə ölkə yenidən qeyri-müəyyənlik və xaosa sürüklənib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!