21-10-2025, 20:32
YURD HƏSRƏTLİ
ƏBDÜL MƏMMƏDOV
Bu gün haqqında söhbət açacağımız Əbdül Məmmədov uzun illər dostluq etdiyim bir ailənin, ocağın ağsaqqalı idi. Qəlbindəki xeyir niyyəti nur çöhrəsinə sirayət etmişdi. Təsadüfi deyil ki, Qərbi Azərbaycanın kameral təsvirlərində xəbər uşağı, xeyir xəbər kimi adlarla qeyd olunublar. Kimdir Əbdül Məmmədov?
Məmmədov Əbdül Yusif oğlu 15 aprel 1941-ci ildə Qərbi Azərbaycanın Vedibasar mahalının Şidli kəndində anadan olub. O, taleyin hökmü ilə bir neçə dəfə köçkünlük həyatı yaşamışdır. Əbdül Məmmədov birinci dəfə ailəsi ilə birlikdə Vedibasar mahalının Şidli kəndindən 1948-ci ildə Ağdaş rayonunun Qoşaqovaq kəndinə deportasiya edilib. Türk düşməni İ.Stalinin ölümnündən sonra 1956-cı ildə yenidən ata-baba yurdu Şidli kəndinə qayıdıb. İkinci dəfə sonuncu etnik təmizləmə zamnı 7 dekabr 1988-ci ildə həyat yoldaşı və 4 övladı ilə birlikdə Naxçıvan Muxtar Respublikasının Babək rayonunun Çalxanqala kəndinə yaşayan erməni ilə evi dəyişərək oraya köçüblər. Bir müddət orda qaldıqdan sonra Şidli kəndinin sakinlərinin böyük əksəriyyətinin Bakı şəhərinə köçməsi səbəbi ilə o da ailə üzvləri ilə birlikdə Bakı şəhərinə köçüb. Üçüncü dəfə 15 may 1991-ci il tarixində Xocavənd rayonun ermənilərdən azad edilməsini və oranın iqliminin Qərbi Azərbaycanın iqliminə oxşar olmasını nəzərə alaraq Xocavəndin Dollanlar kəndində köçmüşdür. Həmin kəndlərdə Ermənistandan deportasiya məruz qalmış azərbaycanlılar məskunlaşdırılmışdır. 02 oktyabr 1992-ci ildə Dolanlar kəndi yenidən ermənilər tərəfindən işğal edildikdən sonra Əbdül Məmmədov Bakıya qayıtmaq məcburiyyətində qalmışıdr.
Mərhum Ə.Məmmədov böyük dövlət adamı Heydər Əliyevin SSRİ rəhbərliyində olmasını özləri üçün güvənc yeri hesab edirdilər. 1987-ci ilin oktyabrında Heydər Əliyevin istefaya məcbur edilməsi xəbəri ermənilər sevincinə azərbaycanlıların isə kədərinə səbəb oldu. Ə.Məmmədov həmin günləri belə xatırlayırdı: “İrəvan şəhərinin mərkəzi meydanda SSRİ KPMK-nin Siyasi Bürosunun üzvlərinin foto stendində Heydər Əliyevin şəkilini “yırtılması”ı Ermənistanda yaşayan azərbaycanlılara çox pis təsir etmişdir. Şərur rayonunda fəaliyyət göstərən fotoqraflar Heydər Əliyevin mülki və general formasında şəkilləri böyüdərək çoxaldıb həmvətənlərimiz arasında paylayırdılar. Həmin günlərdə mən də H.Əliyevin iki şəkilini özümlə Şidliyə gətirərək general formalı şəkili avtomobilinin ön şüşəsinə vurdum, mülki geyimdə olan şəkil isə evin divarına asdım”.
Təsadüfi deyil ki, 1994-cü ilin oktyabr hadisələri zamanı Heydər Əliyevin xalqa müraciətindən dərhal sonra Əbdül Məmmədov ailə üzvləri ilə birlikdə Prezident Sarayının qarşısına gedərək dəstək mitinqində iştirak etmişdir. Əbdül Məmmədov övladlarını vətənpərvərlik ruhunda böyüdüb. Oğlanları Vidadi və İsmayıl Qarabağ müharibəsinin iştirakçısı, Ənnağı isə hüquqşünasdır.
Yurd həsrətli Əbdül Məmmədovun ən böyük arzusu doğulub boya-başa çatdığı Vedibasar mahalının Şidli kəndinə qayıtmaq olsa da o bu həsrətlə Bakıda 10 noyabr 2020-ci ildə vəfat etmişdir. Ruhu şad olsun!
Səməd Vəkilov,
hüquqşünas
21-10-2025, 17:50
Bu yağlar həyatımız üçün təhlükə mənbəyidir - Ekspertdən XƏBƏRDARLIQ
Yerli bazarda satılan bitki və kərə yağlarının keyfiyyəti ilə bağlı ciddi narahatlıqlar yaranıb. İddialara görə, hətta ən bahalı və tanınmış markalı yağların tərkibinə belə süni müdaxilələr olunur. Son günlər dabaq xəstəliyinin sürətlə yayılması isə vəziyyəti daha da qəlizləşdirərək, marketlərdə keyfiyyətli yağ məhsullarının seçimini, eləcə də tapılmasını çətinləşdirib.
Qida mütəxəssisi Fərid Səfərov qeyd edib ki, süni müdaxilə edilmiş yağlar ciddi sağlamlıq riskləri daşıya bilər. Onun sözlərinə görə, saxtalaşdırılmış və keyfiyyətsiz yağların içərisinə daha ucuz yağların qarışdırılması qida saxtakarlığının yayılmış formalarından biridir.
“Bu cür yağlar bəzən təmizlənməmiş, oksidləşmiş və ya təkrar istifadə edilmiş köhnə yağlardan ibarət olur. Belə məhsulların tərkibi dəqiq məlum olmur, qiyməti isə çox ucuz olur və etiketi təsadüfi şəkildə hazırlanır. Davamlı istehlak edildikdə isə, belə yağlar sağlamlıq üçün ciddi təhlükə yarada bilər”.
F.Səfərov bildirib ki, yağların keyfiyyəti yeməkdə əsas təhlükəsizlik və sağlamlıq faktoru hesab edilir:
“Şəffaf və etiketində tam məlumat göstərilən məhsulların seçilməsi də bu baxımdan vacib sayılır. Belə halda, istehsal və son istifadə tarixlərinə diqqət yetirmək lazımdır, çünki köhnə yağlar daha tez oksidləşərək keyfiyyətini itirir. Bundan başqa, yağların açılışdan sonra necə saxlanması qaydası da önəmlidir. Məsələn, yüksək temperatur və işıq yağın keyfiyyətinə mənfi təsir göstərə bilər”.
Ekspert yağ seçimində diqqət yetirilməsi vacib olan bir neçə əsas məqama da diqqət çəkib:
“Çox ucuz qiymət digər oxşar məhsullarla müqayisədə kəskin fərqlənirsə, bu, saxtalaşdırma ehtimalını göstərir. Habelə, etiketdə qeyri-müəyyən məlumatların olması da şübhə doğurur. Bununla yanaşı, yağın qoxusu və dadı da məhsulun təzə olub-olmadığını təsdiqləməlidir. Acı yaxud göyərmiş dad hiss olunursa, həmin məhsuldan uzaq durmaq məqsədəuyğundur”.
Qida mütəxəssisi orijinal və etibarlı brendlərin seçilməsi tövsiyə olunduğunu, mümkün qədər tanınmış və sertifikatlaşdırılmış məhsullara üstünlük verilməsinin vacibliyinə də toxunub:
“Saxlama şərtləri, istifadə tarixi və istehsal yeri barədə məlumatlar da diqqətlə yoxlanmalıdır. Sağlamlığımız müəyyən qədər özümüzdən asılıdır və buna görə ağıllı seçimlər etmək çox önəmlidir. Bu isə mütləq məlumatlılıq və diqqət tələb edir. Keyfiyyətli yağların seçilməsi və saxtalaşdırılmış məhsullardan uzaq durmaq isə sağlam həyat tərzinin əsas tərkib hissəsidir”,- deyə ekspert bildirib.
21-10-2025, 17:44
Sürücülər imtahan verdilər - 313 nəfəri kəsildi
Dövlət İmtahan Mərkəzi (DİM) oktyabrın 21-də sürücülər və beynəlxalq sərnişin və yük daşımaları fəaliyyətinin operatorunun məsul şəxsləri üçün elektron imtahanlar korpusunda növbəti test imtahanı keçirib.
DİM-dən bildirilib ki, taksi sürücülərinin hazırlığının qiymətləndirilməsi imtahanında 1492 nəfər iştirak edib və onlardan 1179-u tələb olunan şərtləri ödəyib. Yük daşımalarını həyata keçirən sürücülərin hazırlığının qiymətləndirilməsi üzrə 41 nəfər imtahan verib və onlardan 22-si uğur qazanıb. Avtomobil ilə beynəlxalq sərnişin və yük daşımaları fəaliyyətinin operatorunun məsul şəxslərinin hazırlığının qiymətləndirilməsi imtahanında isə 28 namizəd iştirak edib və 17 nəfər müvəffəqiyyət qazanıb.
İmtahan nəticələri ilə bağlı Apellyasiya Komissiyası oktyabrın 22-23-də saat 14:00-dan 17:00-dək DİM-in elektron imtahanlar korpusunda (Bakı şəhəri, Binəqədi rayonu, S.S.Axundov küçəsi, 50) fəaliyyət göstərəcək.
21-10-2025, 17:40
İlham Əliyev Tokayevi Azərbaycana dəvət etdi
Prezident İlham Əliyev qazaxıstanlı həmkarı Kasım-Jomart Tokayevi Azərbaycana 2026-cı ildə dövlət səfərinə dəvət edib.
Bu barədə İlham Əliyev Qazaxıstan Prezidenti ilə Astanada mətbuata birgə bəyanatları zamanı deyib.
21-10-2025, 17:32
Baş Prokurorluqdan vətəndaşın iddialarına cavab
Baş Prokurorluq vətəndaş Lalə Ayvazlının müraciəti ilə bağlı açıqlama yayıb.
Baş Prokurorluqdan verilən məlumatda bildirilib ki, bəzi sosial media səhifələrində Ayvazlı Lalə Abbasəli qızının səhhətində həkim səhlənkarlığı nəticəsində problemlər yaranması barədə müraciəti üzrə Yasamal rayon prokurorluğunda qeyri-obyektiv araşdırma aparılmasına dair məlumatlar yayılıb.
Bununla bağlı bildirilib ki, vətəndaş Lalə Ayvazlı Baş Prokurorluq və Bakı şəhər prokurorluğunda rəhbər şəxslər tərəfindən dəfələrlə qəbul edilərək dinlənilib, qanunvericiliyin tələbləri ona ətraflı şəkildə izah edilib, şikayəti üzrə toplanmış yoxlama materialı Baş Prokurorluq və Bakı şəhər prokurorluğunda ətraflı öyrənilməklə, narazı olduğu bütün hallar üzrə əlavə araşdırılması üçün zəruri göstərişlər verilib:
"Belə ki, Nəsimi rayon prokurorluğunda aparılmış araşdırma zamanı bir sıra zəruri prosessual hərəkətlər icra olunub, habelə komisyon məhkəmə-tibb ekspertizası təyin edilərək müvafiq rəy alınıb, 31 mart 2023-cü il tarixdə Cinayət Prosessual Məcəlləsinin 39.1.2-ci maddəsinə əsasən cinayət işinin başlanmasının rədd edilməsi haqqında qəbul edilib.
Həmin qərar L.Ayvazlının şikayəti əsasında 10 may 2023-ci il tarixdə Baş Prokurorluq tərəfindən ləğv edilib və yoxlama materialı üzrə araşdırmanın davam etdirilməsi vətəndaşın müraciətində nəzərə alınmaqla Yasamal rayon prokurorluğuna tapşırılıb.
Yasamal rayon prokurorluğunda əlavə araşdırma aparılan müddətdə material üzrə bir neçə dəfə ekspertizalar, o cümlədən təkrar komisyon məhkəmə-tibb ekspertizası, əlavə komisyon məhkəmə-tibb ekspertizaları keçirilib, L.Ayvazlının və onun şikayətçi olduğu “Kəpəz” Hospitalın həkimlərinin izahatları alınıb, habelə əməliyyat tapşırığı, eləcə də müvafiq sorğular verilərək cavablar alınıb.
Lalə Ayvazlının həm qəbullar zamanı, həm də yazılı müraciətlərində göstərdiyi xüsusatlar toplanmış sübutlar və ekspertiza rəyləri ilə öz təsdiqini tapmadığından, toplanmış material üzrə bir neçə dəfə, sonuncu dəfə isə 30 sentyabr 2025-cu il tarixdə Yasamal rayon prokurorluğunda Cinayət Prosessual Məcəlləsinin 39.1.2-ci maddəsinə əsasən cinayət işinin başlanmasının rədd edilməsi haqqında qəbul edilib.
Bundan başqa, vətəndaş L.Ayvazlının onu əməliyyat etmiş S.Xudiyevanın plastik cərrah kimi “Badam” klinikasında qanunsuz fəaliyyət göstərməsi barədə digər müraciəti araşdırılması üçün aidiyyəti üzrə Səhiyyə Nazirliyinə göndərilib və S.Xudiyeva nazirlik tərəfindən tutduğu vəzifəsindən çıxarılıb".
21-10-2025, 17:24
Nazirlikdəki işindən ayrıldı - Muxtar Babayev yeni vəzifə verdi
Ekologiya və Təbii Sərvətlər Nazirliyinin Ekoloji siyasət şöbəsinin müdiri vəzifəsindən azad edilib.
Faiq Mütəllimov öz istəyi ilə şöbə müdiri vəzifəsindən ayrılıb.
O, Azərbaycan Respublikası Prezidentinin iqlim məsələləri üzrə nümayəndəliyinə təyinat alıb.
Qeyd edək ki, 2013-cü ildən nazirlikdə çalışan Faiq Mütəllimov 2021-ci ildən Ekoloji siyasət şöbəsinin müdiri vəzifəsində çalışırdı.
Xatırladaq ki, Azərbaycan Respublikası Prezidentinin iqlim məsələləri üzrə nümayəndəsi sabiq ekologiya və təbii sərvətlər naziri Muxtar Babayevdir.
21-10-2025, 17:20
Ərdoğan Körfəz ölkələrinə üç günlük səfərə çıxıb
Türkiyə prezidenti Rəcəb Tayyib Ərdoğan həmkarlarının dəvəti ilə Küveyt, Qətər və Omana səfər edəcək.
Bu gün onun Fars körfəzinə üç günlük səfərinin ilk dayanacağı Küveyt olacaq.
Ərdoğan Küveytdə əmirlə görüşəcək.
Ərdoğanın səfərinin ikinci dayanacağı Qətər olacaq. O, sabah Dohada Qətər əmiri Şeyx Təmim bin Həməd Al Tani ilə görüşəcək. Görüş zamanı ikitərəfli münasibətlərdən tutmuş regional problemlərə qədər geniş mövzular müzakirə olunacaq. Qəzzada atəşkəs prosesi və bölgənin yenidən qurulması liderlərin əsas gündəm bəndləri olacaq.
Səfərinin üçüncü günündə Ərdoğan Omana gedəcək və Maskatda Omanın Sultanı Heysəm bin Tariq ilə ikitərəfli görüş keçirəcək. İqtisadi əməkdaşlıqla yanaşı, regional hadisələr də müzakirə olunacaq.
Bu səfərlərin məqsədi müdafiə sənayesi, enerji və investisiya sektorlarında əməkdaşlığın dərinləşdirilməsi üçün yeni addımların atılmasıdır. Əlaqələrin daha da möhkəmləndirilməsi üçün ikitərəfli sazişlərin imzalanması da nəzərdə tutulub.
21-10-2025, 17:07
Gürcüstanla Ermənistanın müdafiə nazirləri görüşdü
Gürcüstanın müdafiə naziri İrakli Çikovaninin İrəvanda erməni həmkarı Suren Papikyanla keçirdiyi görüşdə regional təhlükəsizlik məsələləri müzakirə olunub.
Bu barədə Gürcüstanın Müdafiə Nazirliyi məlumat yayıb.
İrakli Çikovani Gürcüstan tərəfinin regional əməkdaşlığın inkişafına töhfə verməyə hazırlığını təsdiqləyib. O, Azərbaycanla Ermənistan arasında Vaşinqtonda imzalanmış birgə bəyannamənin tarixi əhəmiyyətini vurğulayıb və bildirib ki, saziş Cənubi Qafqazda uzunmüddətli sülh və sabitliyin möhkəmləndirilməsinə əhəmiyyətli töhfə verəcək.
Qeyd edək ki, Çikovani Ermənistanda rəsmi səfərdədir. O, səfər çərçivəsində Ermənistanın Baş naziri Nikol Paşinyanla da görüşəcək.
21-10-2025, 17:03
Bu ölkədə fövqəladə vəziyyət uzadıldı
Macarıstan parlamenti qonşu Ukraynadakı silahlı münaqişə ilə əlaqədar ölkədə fövqəladə vəziyyət rejimini daha altı ay uzadıb.
Bu barədə TASS məlumat dərc edib.
Fövqəladə vəziyyətin 180 gün uzadılmasının lehinə 127 deputat, əleyhinə isə 56 deputat səs verib. Fövqəladə vəziyyət ilk dəfə 2022-ci ilin mayında Ukraynadakı münaqişə ilə əlaqədar tətbiq edilib və o vaxtdan altı dəfə uzadılıb.
21-10-2025, 16:54
Güzəştlər ləğv olunur - Bu avtomobillər bahalaşacaq
2026-cı il yanvarın 1-dən etibarən xaricdən idxal olunan hibrid və elektrik avtomobillərinə tətbiq edilən ƏDV və gömrük rüsumu güzəştlərinin müddəti başa çatır. Sözügedən güzəştlər sayəsində son illərdə ölkəmizin avtoparkında əhəmiyyətli dərəcədə yenilənmə baş verib. Hər il on minlərlə hibrid və elektromobilin ölkəyə gətirilməsi nəticəsində minlərlə köhnə və texniki cəhətdən nasaz nəqliyyat vasitəsi daha müasir və ekoloji baxımdan üstün avtomobillərlə əvəz olunub.
Nəqliyyat eksperti Ərşad Hüseynov bildirib ki, qeyd olunan güzəştlərin ləğvi əslində arzuolunan deyil.
“Çünki bu güzəştlərin tətbiq olunmasında əsas məqsəd Azərbaycanın avtomobil parkını yeniləmək, ekoloji cəhətdən daha təhlükəsiz və müasir texnologiyalara əsaslanan, ətraf mühitə az zərər vuran avtomobillərin ölkəyə gətirilməsinə stimul vermək idi”.
Ə.Hüseynovun sözlərinə görə, hazırda ölkəmizdə avtomobil parkı çox köhnəlib:
“Azərbaycanda istismarda olan avtomobillərin 85 faizindən çoxu 10 ildən artıq yaşı olan nəqliyyat vasitələridir. Avtobus və yük avtomobillərinin vəziyyəti isə daha da acınacaqlıdır. Bu kateqoriyalarda həm avtomobillərin yaşı daha çoxdur, həm də onların texniki vəziyyəti daha bərbaddır. Yük avtomobillərində isə müşahidə olunan vəziyyət xüsusilə narahatlıq yaradır”.
O həmçinin vurğulayıb ki, avtomobil parkının yenilənməsinə ciddi ehtiyac var:
“Bu məqsədlə utilizasiya proqramı da qəbul olunub və artıq qeyd edilən istiqamətdə müəyyən addımlar atılıb. Bir tərəfdən köhnə avtomobillərin utilizasiyası, digər tərəfdən isə elektromobillərə və ekoloji nəqliyyat vasitələrinə tətbiq edilən gömrük və vergi güzəştləri bu prosesi sürətləndirə bilərdi”.
Nəqliyyat eksperti eyni zamanda nəzərə çatdırıb ki, əvvəlki illərlə müqayisədə bu il xüsusilə Çin istehsalı olan avtomobillərə maraq daha da artıb. Onun fikrincə, bu baxımdan güzəştlərin ləğvi müəyyən olunmuş strateji hədəflərin yarımçıq qalması ilə nəticələnə bilər:
“Vurğulamaq vacibdir ki, güzəştlərin ləğv olunmasının birbaşa iqtisadi nəticələri də olacaq. Belə ki, idxal rüsumları və vergilər yenidən tətbiq olunarsa, bu, avtomobillərin idxal dəyərinin artmasına səbəb olacaq. Bu isə istər yeni, istərsə də ikinci əl avtomobillərin satış qiymətinə birbaşa təsir edəcək. Burada fərq etməz, avtomobil hansı ölkədən gətirilib və ya hansı üsulla gətirilib, güzəşt ləğv olunursa, qiymət artacaq. Nəticədə daxili bazarda avtomobillərin əlçatanlığı azalmaqla yanaşı, habelə satış qiymətləri də artacaq”,- deyə Ə.Hüseynov qeyd edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!