27-10-2025, 17:24
Vilayət Eyvazov sıra baxışı keçirdi
Daxili işlər naziri general-polkovnik Vilayət Eyvazov oktyabrın 27-də respublikanın şəhər, rayon polis orqanları və daxili qoşunlarda xidmət etmək arzusunda olan gənclərin növbəti sıra baxışını keçirib.
Bakı şəhərində keçirilən sıra baxışında Daxili İşlər Nazirliyinə onlayn qaydada müraciət etmiş gənclərdən daha hazırlıqlı olan 189 nəfər seçim turunun növbəti mərhələsinə buraxılıb ki, onlardan da 14 nəfəri Vətən müharibəsi iştirakçısıdır.
Gənclər qarşısında çıxış edən nazir V.Eyvazov seçim turunun digər mərhələlərindən də uğurla keçərək daxili işlər orqanlarında xidmətə qəbul ediləcək gənclərə gələcək fəaliyyətlərində uğurlar arzulayıb, tapşırıq və tövsiyələrini verib.
27-10-2025, 17:16
Ukraynadan daha 30 uşaq Azərbaycana gətirildi
"Ukraynadakı müharibədən əziyyət çəkmiş uşaqların ölkəmizə gətirilərək reabilitasiya xidmətlərinə cəlb edilməsi işləri davam etdirilir".
Bunu Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyinin idarə heyətinin sədrinin müavini Zaur İbrahimov jurnalistlərə açıqlamasında deyib.
O bildirib ki, ƏƏSMN tabeliyində Sosial Xidmətlər Agentliyinin təşkilatçılığı ilə daha 30 ukraynalı uşaq sosial-psixoloji reabilitasiya xidmətləri ilə təmin edilmək üçün ölkəmizə gətirilib: “Bakı şəhərində yerləşən düşərgədə uşaqlar üçün milli rəqs dərsləri və peşəkar psixoloq tərəfindən fərdi konsultasiyalar təşkil ediləcək. Həmçinin onlar İçərişəhər, Qız qalası və Şirvanşahlar saray kompleksi, dənizkənarı bulvar, Atəşgah məbədi, Yanardağ abidəsi ilə tanış olmaq və burada maraqlı vaxt keçirmək imkanı qazanacaqlar.
Növbəti günlərdə onların Bakı və bölgələrimizdə bir sıra qrup terapiyaları, meditasiya və yoqa məşğələləri, eyni zamanda psixo-sosial təlimlər, milli mətbəxlə tanışlıq və digər ustad dərslərinə cəlb olunması nəzərdə tutulur. Düşərgə iştirakçıları Qəbələ və Şəki şəhərlərinin tarixi və görməli yerləri ilə də tanış ediləcək”.
Onun sözlərinə görə, 10 günlük sosial reabilitasiya proqramı çərçivəsində uşaqların emosional vəziyyətlərinin stabilləşməsinə, eləcə də cəmiyyətə inteqrasiyalarının təmin edilməsinə dəstək göstəriləcək.
Qeyd edək ki, ötən dövrdə ümumilikdə 260-dan çox ukraynalı uşaq ölkəmizə gətirilərək sosial-psixoloji reabilitasiya xidmətləri ilə təmin edilib.
27-10-2025, 17:12
Milli Konservatoriyanın 5 əməkdaşı işdən çıxarıldı - 2 departament ləğv edildi
Azərbaycan Milli Konservatoriyasında (AMK) 5 əməkdaş işdən çıxarılıb, qanunsuz yaradılmış 2 departament ləğv edilib.
Bu barədə Milli Konservatoriyasından bildirilib.
Qeyd edilib ki, hazırda AMK-da iş fəaliyyətinin düzgün planlaşdırılması, əmək funksiyalarının təkrarlanmasının aradan qaldırılması və bununla da maksimum effektivliyə nail olunması, həmçinin tədris prosesinin təşkili və tədrisin keyfiyyətinə nəzarət mexanizmində davamlılıq və optimallığının təmin edilməsi məqsədilə struktur islahatları həyata keçirilir: “Ştat vahidlərinin ixtisara salınması və optimal işçi sayının müəyyənləşdirilməsi maliyyə resurslarının düzgün bölüşdürülməsi və ondan səmərəli istifadə edilməsi zərurətindən irəli gəlir”.
Struktur islahatları çərçivəsində AMK-da 5 əməkdaşla bağlanılmış əmək müqaviləsinə xitam verildiyi vurğulanıb.
Əlavə olaraq, mövcud normativlərə görə bir struktur vahidinin (şöbə, sektor, departament və s) yaradılması üçün tələb olunan minimum ştat sayı gözlənilmədən qanunsuz olaraq yaradılan 2 departament - Beynəlxalq Əlaqələr Departamenti (1 ştat vahidi Departament müdiri, 1 ştat vahidi mütəxəssis və 1 ştat vahidi inspektordan ibarət olmaqla) və İnsan Resursları Departamenti (1 ştat vahidi Departament müdiri, 1 ştat vahidi kadrlar üzrə mütəxəssisdən ibarət olmaqla) ləğv edilib.
Optimallaşma nəticəsində müvafiq departamentlərin vəzifə funksiyalarına aid olan məsələlər digər Şöbə və Mərkəzlərin funksiyalarına daxil edildiyi qeyd edilib. Həmçinin AMK-da tələbə sayının azlığını, tədris ili ərzində 2 dəfə (qış və yay sessiyaları) imtahanların təşkil edilməsini nəzərə alaraq, ayrıca fəaliyyət göstərən İmtahan Mərkəzi tədris ilinin digər dövrlərində hər hansı funksiya icra etmədiyinə görə, sözügedən Mərkəz də ləğv edilib. Mərkəzin funksiyaları Tədrisin təşkili və keyfiyyət təminatı şöbəsinə həvalə edilib.
Eyni zamanda bildirilib ki, struktur islahatları çərçivəsində ixtisara düşən ştat vahidlərində çalışan 7 əməkdaşa onların təhsil və iş təcrübələrinə uyğun olaraq, alternativ vəzifələr təklif edilmiş və nəticədə onlar digər vəzifəyə keçirilib.
27-10-2025, 17:01
İlham Əliyevlə Ərdoğan İrəvana dəvət edildi
Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan İrəvana dəvət edilib.
Bu barədə Ermənistanın xarici işlər naziri Ararat Mirzoyan məlumat verib.
O, Azərbaycan və Türkiyə prezidentlərinin gələn ilin yazında İrəvanda keçiriləcək Avropa Siyasi Birliyinin 8-ci sammitinə dəvət olunduğunu açıqlayıb.
Nazirin sözlərinə görə, dəvətlər hələlik şifahi formada təqdim edilib.
“Azərbaycan və Türkiyə prezidentlərinə gələn ilin yazında İrəvanda keçiriləcək sammit üçün dəvət göndərilib. Hazırda bu, şifahi mərhələdədir”, - Mirzoyan jurnalistlərə bildirib.
Qeyd edək ki, Avropa Siyasi Birliyinin növbəti sammiti gələn ilin may ayında İrəvanda keçiriləcək. Hələlik Azərbaycan və Türkiyə tərəfləri bu dəvətə rəsmi reaksiya verməyiblər.
27-10-2025, 16:36
Dövlət başçısı Təbrizdəki konsulluğu geri çağırdı, yenisini təyin etdi - FOTO
Əliyənnağı Mehti oğlu Hüseynov İran İslam Respublikasının Təbriz şəhərində Azərbaycan Respublikasının baş konsulu vəzifəsindən geri çağırılıb.
Prezident İlham Əliyev bu barədə Sərəncam imzalayıb.
***
Taleh Balaşirin oğlu Zöhrabov İran İslam Respublikasının Təbriz şəhərində Azərbaycan Respublikasının baş konsulu təyin edilib.
Prezident İlham Əliyev bununla bağlı Sərəncam imzalayıb.
27-10-2025, 16:24
İlham Əliyev bu ölkələrə səfir təyin etdi - SİYAHI
Fərid Yunis oğlu Talıbov Azərbaycan Respublikasının Yaponiyada fövqəladə və səlahiyyətli səfiri təyin edilib.
Prezident İlham Əliyev bu barədə Sərəncam imzalayıb.
***
Seymur Həbib oğlu Fətəliyev Azərbaycan Respublikasının Meksika Birləşmiş Ştatlarında fövqəladə və səlahiyyətli səfiri təyin edilib.
Prezident İlham Əliyev bununla bağlı Sərəncam imzalayıb.
***
Eldar Nadir oğlu Səlimov Azərbaycan Respublikasının İraq Respublikasında fövqəladə və səlahiyyətli səfiri təyin edilib.
Prezident İlham Əliyev bu barədə Sərəncam imzalayıb.
***
Mütəllim Sabir oğlu Mirzəyev Azərbaycan Respublikasının Səudiyyə Ərəbistanı Krallığında fövqəladə və səlahiyyətli səfiri təyin edilib.
Prezident İlham Əliyev bununla bağlı Sərəncam imzalayıb.
***
Şahin Şakir oğlu Abdullayev Azərbaycan Respublikasının İordaniya Haşimilər Krallığında fövqəladə və səlahiyyətli səfiri təyin edilib.
Prezident İlham Əliyev bununla bağlı Sərəncam imzalayıb.
27-10-2025, 16:19
Ramiz Mehdiyevin Rusiyaya yazdığı məktub üzə çıxdı - FOTO
Prezident Administrasiyasının və Milli Elmlər Akademiyasının sabiq rəhbəri Ramiz Mehdiyevin Azərbaycanda dövlət çevrilişi həyata keçirmək istədiyi və bununla bağlı Rusiyanın müəyyən strukturlarının rəhbərlərinə məktub ünvanladığı barədə mediada məlumat verilib.
Həmin məktubun Azərbaycan xüsusi xidmət orqanlarının əlinə keçdiyi barədə də informasiyalar yayılmışdı.
Bəziləri belə məktubun olmadığını, onun mövcudluğuna inanmadıqlarını iddia etsələr də, təqdim etdiyimiz fakt Ramiz Mehdiyevin, həqiqətən də, xarici ölkənin köməyi ilə Azərbaycanda hakimiyyət çevrilişi planı gerçəkləşdirmək xülyasına düşdüyünü göstərir.
Xüsusi qeyd etmək yerinə düşər ki, belə bir planı həyata keçirmək nə Ramiz Mehdiyevin, nə də onun əlaqə qurduğu dairələrin imkanında deyil. Sadəcə, buna cəhd etmək onun əsl riyakar xislətini nümayiş etdirir.
27-10-2025, 16:13
Emin Əmrullayev qızların təhsilindən danışdı: “Hələ də məhdudiyyət qoyulur”
Qadınlar, gənclərin təhsili yolunda çox yol getməliyik və bu yolun hələ başlanğıcındayıq.
Bu sözləri elm və təhsil naziri Emin Əmrullayev “Gənc qızların təhsilinə dəstək” layihəsi çərçivəsində həyata keçirilən “Hənifə Məlikova-Zərdabi adına təqaüd proqramı 2025”in təqdimat mərasimində bildirib.
O qeyd edib ki, qadının ictimai-siyasi gücü istənilən təhsil sisteminin gücüdür.
"İstənilən təhsil sistemində məhz anaların təhsildəki rolu kifayət qədər böyükdür, xüsusilə də təhsilli anaların. Ali təhsilli, ümumiyyətlə təhsilli anaların təhsildəki rolu birmənalı olaraq uşaqların həyatının növbəti illərində daha uğurlu olma ehtimalını böyüdür.
Nəticələrə baxanda 4-cü sinifin sonunadək qızların nəticələrinin daha yüksək olduğunu, sonrakı illərdə oğlanların nəticələri qızların nəticələrini üstələyir. Bunu savadsızca bioloji faktorlarla ölçsələr də, çox ciddi sosioloji səbəbləri var. Çünki qız uşaqları 9-10-11 yaşa gələndə cəmiyyətin onlar qarşısında məhdudlaşdırıcı təsirləri olduğunu görürük. Biz həmin müsbət fərqin 4-5 il keçdikdən sonra necə dəyişdiyini görürük.
Qadınlar üzərində olan məhdudiyyətlərin istər iqtisadiyyat, istər təhsildə neqativ yöndə irəlilədiyini görürük.
Təəssüf ki, biz poeziyada qadınlarımıza mədhiyyələr desək də, statistikalar qadınların xeyrinə olmur. Bu mənada inandığım ondan ibarətdir ki, gedəcəyimiz çox uzun yol var. Bizim hələ də məktəb və ali təhsil mərkəzlərində məsələlərə münasibət dəyişməlidir. Qadınlar üzərində məhdudlaşdırıcı davranışdan dəstəkləyici və imkan yaradıcı davranışa keçid etməliyik.
Yaxşı xəbərlər ondan ibarətdir ki, ali təhsilli insanlarımızın sayı artır. Bu il 60 min gənc ali təhsil almaq imkanı əldə edir. Bunların arasında qızlarımızın sayı artmaqdadır, xüsusilə mühəndislik və texniki sahəyə yönələn qızlarımızın sayı artır. Bu da o deməkdir ki, biz 2030-2040-cı illərin sonlarında daha fərqli gənclik görəcəyik. Çünki bu gün hansısa qızın təhsili 20 il sonra savadlı nəslin də yetişməsinə səbəb olur.
Son 2-3 ildə rəqəmlərdən gördüyüm və narahat olduğum ilkin məqam oğlanların təhsili və tərbiyəsi ilə olan problemlərdir. Bu gün qızların istər oxu, istər anlamasında müəyyən irəliləmələr olduğu halda, oğlanlarda geriləmələr hiss edirik. Oğlan uşaqlarının davranışlarında daha narahatlıq doğurucu elementlər hiss etməkdəyik. Burada ən asan yol problemi nazirliyin üstünə atıb həll yolu gözləməkdir. Amma burada əsas məsələ valideynlərin məsuliyyətidir və mən bunu xatırlatmağı özümə borc bilirəm".
27-10-2025, 15:54
Ana Vətən Partiyası hazırda fəaliyyətini dayandırıb
Ötən həftənin şənbə günündə Ana Vətən Partiyasının növbədənkənar qurultayı keçirilib. Qurultayda partiyanın sədri Fəzail Ağamalının qızı deputat Günay Ağamalının namizədliyini dəstəkləməsi qalmaqala səbəb olub.
Fəzail Ağamalının oğlu Elçin Ağamalı səsvermə keçirildiyini və sədr seçildiyini bildirib. Fəzail Ağamalı və Günay Ağamalı isə qurultayın müddətinin uzadıldığını deyirlər.
Bu açıqlamalar partiya daxilində yaranmış ikili rəhbərlik görüntüsünü daha da dərinləşdirib. Sosial mediada və siyasi dairələrdə Ana Vətən Partiyasının gələcək fəaliyyəti ilə bağlı müxtəlif ehtimallar səsləndirilməyə başlayıb. Bəzi müşahidəçilər hesab edirlər ki, baş verənlər partiyanın parçalanmasına və hətta fəaliyyətinin tam dayanmasına gətirib çıxara bilər.
Partiya nizamnaməsinə görə, sədr seçkiləri yalnız qurultayın yekun iclasında rəsmiləşdirilə bilər. Lakin hazırkı vəziyyətdə Fəzail Ağamalı ailəsi ilə Elçin Ağamalı arasında fikir ayrılıqları bu prosesi qeyri-müəyyən vəziyyətə salıb. Ekspertlər bildirirlər ki, yaranmış qarşıdurma yalnız şəxsi mübarizə deyil, həm də partiyanın gələcək siyasi xəttinə kimin nəzarət edəcəyi məsələsini gündəmə gətirib.
Beləliklə, Ana Vətən Partiyası hazırda rəsmi sədrin kim olması ilə bağlı aydınlıq gətirilməyən, daxili böhran mərhələsindədir və bu böhranın necə nəticələnəcəyi yaxın günlərdə bəlli olacaq.
Elçin Ağamalı bildirib ki, qurultay başa çatıb və artıq bununla bağlı videomateriallar hazırlanıb Ədliyyə Nazirliyinə təqdim olunacaq:
“Qurultayın qeyri-müəyyən vaxta qədər təxirə salınması qarşı tərəfin iddiasıdır. Qurultay üzvlərinin bir qismi iclası tərk etdi, çoxluq isə qurultayın işini davam etdirdi. Təşkilati məsələlərə baxıldı. Partiya sədri, sədr müavini seçildi. İşimizi başa çatdırdıq. Qurultayın işinin sona çatdırılmasını isbat edən videoçəkilişlər var. Biz sənədlərimizi, videogörüntülərimizi Ədliyyə Nazirliyinə də təqdim edəcəyik. Qurultayın nəticələrinin hüquqi cəhətədən tanınması üçün lazımi bütün sənədləri Ədliyyə Nazirliyinə təqdim edəcəyik”.
E.Ağamalı partiyanın fəaliyyətinin dayandırılacağı ilə bağlı fikirlərə isə belə cavab verib:
“Partiyanın fəaliyyənin ləğv olunması ilə bağlı heç bir müzakirə aparmırıq. Partiyanın fəaliyyətini dayandırması qurultayın səlahiyyətində olan məsələdir. Yeni qurultayın keçirilməsi gündəmdə deyil. Bu məsələnin heç bir ciddi əsası yoxdur”.
Elçin Ağamalının atasının və bacısının partiya üzvlüyündən çıxarılıb-çıxarılmayacağı barədə suala isə belə cavab verib: “Heç kimi partiyadan uzaqlaşdırmaq niyyətimiz yoxdu. Ədliyyə Nazirliyi sənədlərimizi təsdiq etdikdən sonra mən qarşı tərəfə müraciət edəcəm. Lazım gəlsə, mənim əleyhimə səs verən, amma partiya işində çox dəyərli olan şəxslərin də partiya rəhbərliyi işinə cəlb olunub, fayda göstərməsi üçün onlara müraciət edəcəm. Qarşı tərəfə heç bir ədavət güdmürəm. Bu siyasi fəaliyyətdir, fikir ayrılığı ola bilər. Fikir ayrılığını da hər kəs bir cür dilə gətirə bilər. Qarşı tərəf də meydana gələn fikir ayrılığına bu cür reaksiya göstəriblər, bunda da uyğun bilməsəm də hörmətlə yanaşıram. Kiminsə partiyadan çıxarılması,ədavət güdülməsindən söhbət gedə bilməz”.
Fəzail Ağamalı isə hüquqi prosedurların getdiyini, bu səbəbdən hər hansı açıqlama vermək istəmədiyini söyləyib.
27-10-2025, 15:45
Məhkəmə İqbal Əbilovla bağlı qərar verdi[/size]
Xarici ölkənin xüsusi xidmət orqanlarının tapşırıqlarının icrasını həyata keçirməklə dövlətə xəyanət etməkdə təqsirləndirilən İqbal Əbilovla bağlı məhkəmə hökmündən verilən apellyasiya şikayətinə baxılıb.
Şirvan Apellyasiya Məhkəməsində keçirilən prosesdə qərar elan olunub. Qərara əsasən, şikayət təmin olunmayıb. Lənkəran Ağır Cinayətlər Məhkəməsinin hökmü qüvvədə saxlanılıb.
Qeyd edək ki, məhkəmənin hökmü ilə İqbal Əbilov 18 il müddətinə azadlıqdan məhrum edilib.
Xarici ölkədə yaşamış İqbal Əbilov Dövlət Təhlükəsizliyi Xidməti tərəfindən keçirilmiş xüsusi əməliyyat tədbirləri nəticəsində saxlanılıb.
Ona Cinayət Məcəlləsinin 274 (dövlətə xəyanət), 281.3 (xarici təşkilatların və onların nümayəndələrinin tapşırığı ilə dövlət əleyhinə yönələn açıq çağırışlar) və 283.1-ci (milli nifrət və düşmənçiliyin salınmasına yönələn hərəkətlər) maddələri ilə ittiham elan olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!