6-02-2026, 21:06
Masallıda ağır qəza - Ölən var
Masallı rayonunda ölümlə nəticələnən yol-nəqliyyat hadisəsi baş verib.
Hadisə Masallı şəhərinin Dadva küçəsində qeydə alınıb
Belə ki, 1995-ci il təvəllüdlü Vəli Azər oğlu Hətəmzadənin idarə etdiyi “Mercedes” markalı avtomobil 1947-ci il təvəllüdlü Qardaş Məhərrəm oğlu Fətullayevin idarə etdiyi eyni markalı nəqliyyat vasitəsi ilə toqquşub.
Qəza nəticəsində hər iki sürücü müxtəlif dərəcəli bədən xəsarətləri alıb, onlar Masallı Rayon Mərkəzi Xəstəxanasına hospitalizasiya olunublar. Vəziyyəti ağır qiymətləndirilən Qardaş Fətullayev daha sonra Masallı şəhərində yerləşən özəl tibb müəssisələrindən birinə yerləşdirilib. Həkimlərin səylərinə baxmayaraq, onun həyatını xilas etmək mümkün olmayıb. O, müalicə aldığı klinikada dünyasını dəyişib.
Digər sürücü Vəli Hətəmzadənin müalicəsi isə xəstəxanada davam etdirilir.
Faktla bağlı araşdırma aparılır.
6-02-2026, 19:27
Prezident Saleh Məmmədovu işdən çıxardı - YENİ TƏYİNAT
Saleh Ərşad oğlu Məmmədov Azərbaycan Avtomobil Yolları Dövlət Agentliyi İdarə Heyətinin sədri vəzifəsindən azad edilib.
Prezident İlham Əliyev bu barədə Sərəncam imzalayıb
Digər sərəncamla Vüsal Nəsirli Azərbaycan Avtomobil Yolları Dövlət Agentliyi İdarə Heyətinin sədri təyin edilib.
6-02-2026, 18:41
Rusiya Cənubi Qafqazı tamamilə itirdi
ABŞ-ın tanınmış siyasi analitiki, "Stratfor" analitik mərkəzinin qurucusu Corc Fridman Rusiyanın Cənubi Qafqaz üzərində nəzarətini faktiki olaraq itirdiyini bildirib.
Fridman bu fikirləri "Geopolitical Futures" podkastında səsləndirib.
Analitikin sözlərinə görə, Rusiyanın postsovet məkanındakı təsiri xüsusilə Cənubi Qafqaz və Mərkəzi Asiyada zəifləyib. O, bunu Ukraynadakı müharibədə Moskvanın strateji uğursuzluğu ilə əlaqələndirib. Fridman qeyd edib ki, Azərbaycan, Ermənistan və Gürcüstan müstəqil siyasətlərini gücləndiriblər və hazırda ABŞ-ın siyasi təsiri bu regionda daha qabarıq görünür.
Onun fikrincə, Rusiyanın Qərb istiqamətində “təhlükəsizlik buferi” yaratmaq cəhdləri də nəticəsiz qalıb və bu proses iqtisadi amillərlə daha da dərinləşir. Analitik Hindistanın Rusiya neftindən imtinasını Moskvanın qlobal iqtisadi təsirinin azalmasının göstəricisi kimi dəyərləndirib.
Məqalədə vurğulanır ki, ABŞ-ın iştirakı ilə Azərbaycan və Ermənistan arasında sülh sazişinin paraflanması və TRIPP layihəsi Rusiyanın Cənubi Qafqazdakı mövqelərinin zəifləməsinin nəticələri kimi qiymətləndirilir. Rəsmi Moskva isə regiondan çəkilmək niyyətində olmadığını bildirsə də, proseslərin onun iştirakı olmadan irəliləməsi Kremlin narahatlığını artırır.
6-02-2026, 18:30
İrandan ABŞ ilə danışıqlara dair İLK AÇIQLAMA
İran və ABŞ arasında keçirilən danışıqlar yaxşı başlanğıc olub.
Bunu İranın xarici işlər naziri Abbas Araqçi jurnalistlərə açıqlamasında deyib.
"Məsləhətləşmələrdən sonra qərar veriləcək, amma danışıqların davam etdirilməsi prinsipi ilə bağlı konsensusun olduğu görünür" , - o bildirib.
Qeyd edək ki, Omanın paytaxtı Maskatda ABŞ və İran arasında nüvə danışıqlarının birinci raundu keçirilib.
6-02-2026, 18:16
Azərbaycan Rusiyaya nota verdi - Səfir XİN-ə ÇAĞIRILDI
6 fevral 2026-cı il tarixində Rusiya Federasiyasının Azərbaycan Respublikasındakı fövqəladə və səlahiyyətli səfiri Mixail Yevdokimov Xarici İşlər Nazirliyinə çağırılıb.
Rusiya səfiri ilə görüş zamanı, 5 fevral tarixində Rusiya Federasiyası Dövlət Dumasının MDB, Avrasiya inteqrasiya məsələləri və həmvətənlərlə əlaqələr Komitəsinin sədrinin birinci müavini, hakim “Vahid Rusiya” Partiyasının üzvü Konstantin Zatulinin ölkəmizdə Ermənistan Respublikası vətəndaşlarının məhkum olunması ilə bağlı bəyanatı ilə əlaqədar kəskin etiraz bildirilib və Rusiya tərəfinə müvafiq nota təqdim edilib.
K.Zatulinin uzun müddətdir Azərbaycan Respublikasının suverenliyi və ərazi bütövlüyü əleyhinə çıxışlar etməsi, separatizmə açıq dəstək nümayiş etdirməsi, habelə Ermənistanın Azərbaycan Respublikasına qarşı hərbi təcavüzü nəticəsində sülh və insanlıq əleyhinə cinayətlər, eləcə də hərbi cinayətlər törətməkdə təqsirli bilinərək məhkum olunmuş Ermənistan Respublikası vətəndaşları ilə bağlı məhkəmə qərarlarını təhrif etməyə cəhd göstərməsi və qəbuledilməz ifadələr işlətməsi qətiyyətlə pislənib.
Görüşdə, Rusiya tərəfi bölgədə sülh və sabitliyə, eləcə də Azərbaycanla Rusiya arasında münasibətlərə zərbə vurmağa çalışan Zatulin kimi şəxslərin destruktiv fəaliyyətinə son qoyulması üçün müvafiq tədbirlər görməyə çağırılıb.
6-02-2026, 18:10
Bütün həyatının
qayəsi Azərbaycan
olan dahi
Azərbaycanın görkəmli dövlət, siyasi və ictimai xadimi, istiqlal məfkurəsinin daşıyıcısı, Azərbaycan Xalq Cümhuriyyətinin banisi Məhəmməd Əmin Rəsulzadənin anadan olmasının 142-ci ildönümünə həsr olunmuş tədbir keçirilib. Milli Azərbaycan Tarixi Muzeyində təşkil olunan tədbirin proqramı Varşava Universitetinin müəllimi, universitetin Azərbaycan Araşdırmaları Mərkəzinin rəhbəri Şəhla Kazımovanın “Mühacirətdə - fikir və missiya: seçim yoxsa zərurət?” adlı M.Ə.Rəsulzadənin Avropa mühacirəti dövrünə dair məruzəsi üzərində qurulub.
M.Ə.Rəsulzadənin vətəndən uzaqda fəaliyyət göstərdiyi illəri doğma yurddan qaçış yoxsa şüurlu şəkildə öz müqəddəs ideyaları uğrunda şəxsi rifahından imtina kimi qiymətləndirmək olar? – suallarına cavab axtarılan bu məruzədə 1922-ci ildə aparılan siyasi müzakirələr, həmin illərin siyasi vəziyyəti göz önündə canlandırılıb. M.Ə.Rəsulzadənin Stalinlə olan məktublaşmalarına geniş şəkildə müraciət olunmuş bu tədqiqatda Stalinin çıxışından sitat gətirilərək Azərbaycan, Ermənistan və Gürcüstanın ittifaq daxilində xüsusi mövqeyi onların milli hərəkatlarının gücünün müstəqillik təcrübəsi ilə bağlı olduğu, bu milli ideyanın yalnız daxili inam deyil, rəqib tərəfindən də qəbul edilən siyasi reallıq olduğu qeyd edilirdi.
M.Ə.Rəsulzadənin xatirələri əsasında ərsəyə gələn səhifələrdən də göründüyü kimi, təqdimatla çıxış edən Şəhla Kazımova Rəsulzadənin mövcud şəraitlə barışmaq əvəzinə, ondan şüurlu şəkildə imtina etdiyini vurğulayaraq Rəsulzadənin Moskvadan gedişinin təhlükədən qaçış deyil, siyasi sığınacaq axtarışı deyil, həyatının qayəsi olan ideyasını qorumaq üçün şəxsi seçimi olduğunu bildirdi: “Ona elmi və ictimai sahələrdə vəzifələr təklif olunsa da, Rəsulzadə sistemin daxilində xüsusi rol oynayacağına dair məlumatlandırılsa da mövcud şəraitlə barışmır, ondan şüurlu imtina edir”.
“Mühacirətdə - fikir və missiya: seçim yoxsa zərurət?” adlı təqdimatda periodik olaraq bütün siyasi məqamlara toxunulsa da, Məmməd Əmin Rəsulzadənin mühacirət həyatının və mətbu fəaliyyətinin Polşa ilə əməkdaşlıq sayəsində canlanmasına xüsusilə diqqət yetirilirdi. Bu əməkdaşlığın nəticəsində mühacir mətbuatının davamlılığı təmin edilmiş, siyasi mübarizəyə yeni imkanlar açılaraq Azərbaycan məsələsi beynəlxalq müstəviyə çıxarılmışdı.
Məruzə əsnasında araşdırılan Mərkəzi Avropada Polşa səfirliyinin məxfi raportunun (Ankara) 18.11.1926-cı il tarixli sənədindən də göründüyü kimi, Rəsulzadə Polşaya getmək seçiminin Türkiyə hakim dairələrinin etimadını itirmək bahasına başa gələcəyini anlayırdı. Lakin o şəxsi rifahını deyil, siyasi mübarizəni üstün tuturdu.
“Bolşevik tapdağı altında inləyən səs üçün yol axtarışı” yarımbaşlığında Rəsulzadənin 1926-cı ildə Türkiyədəki fəaliyyətini dəyişən beynəlxalq siyasi vəziyyət, xüsusilə Ankaranın Sovet Rusiyası ilə yaxınlaşan münasibətləri fonunda yenidən dəyərləndirməsindən bəhs edilir. Polşa ilə əlaqələr onun milli ideyalarının yaşaması üçün yeganə çıxış yolu idi. Azərbaycanın müstəqilliyi məsələsində güzəşt olmadığından bu, öz mənafeyi üçün deyil, milli ideyanın qorunması uğrunda verilmiş siyasi qərar idi.
Çıxışında Tadeuş Holüvkonun məruzəsinə müraciət edən araşdırmaçı-alim Şəhla Kazımova Polşa baxışının fərqliliyinin səbəbini də məhz mətbuata ən təsirli vasitə kimi baxılmasında, ukraynalıların, qafqazlıların məqalələrini dərc etmək, eləcə də Polşada baş verən hadisələri işıqlandırmaq qarşılığında “Yeni Qafqaziya” qəzetinin borclarını ödəmək üçün aylıq 150 dollar (qəzetə) vəsait ayrılmasında görürdü. Çətinlikləri gözə alan Məmməd Əmin Rəsulzadə Varşavada keçiriləcək Qafqaz İstiqlaliyyət Komitəsinin Qurultayında iştirak edir. Bu onun Azərbaycan istiqlal ideyasını dərin mənəvi şüurda dərk etməsilə bağlı idi.
Tədbirdə ANS Şirkətlər qrupunun prezidenti Vahid Mustafayevin təqdimatında Məmməd Əmin Rəsulzadənin yaşadığı binaya virtual xatirə lövhəsi – barelyefin vurulması layihəsilə tanışlıq olub, Rəsulzadənin “rasulzademuzeyi.org” virtual muzeyinə ziyarət təşkil edilib.
Tədbirin təşkilatçısı və moderatoru AMEA-nın akademik Ziya Bünyadov adına Şərqşünaslıq İnstitutunun baş elmi işçisi, tarix elmləri doktoru Solmaz Rüstəmova-Tohidi çıxış edərək M.Ə.Rəsulzadənin fərqli düşüncə tərzinə sahib şəxsiyyətindən, bütöv Azərbaycan məfhumunu unutmayan istiqlalçının Güney Azərbaycanı xalqına vəsiyyət etməsindən, həmçinin artıq formalaşmış Rəsulzadəşünaslıq ideologiyasından söz açıb. Beynəlxalq Rəsulzadə qiraətlərinin çap edildiyini xatırladan Solmaz Tohidi Məhəmməd Əmin Rəsulzadənin mübarizəsini antikommunizm və antisovetizm istiqamətində apardığını, ömrünü ideyaları, amalları üçün doğma yurddan kənarda keçirən mühacirlərimiz sırasında öz dəyanəti ilə fərqləndiyini iştirakçıların diqqətinə çatdırıb.
İldönümündə M.Ə.Rəsulzadənin nəvəsi Rais Rəsulzadə, filologiya elmləri doktoru, professor Qulu Məhərrəmli, tarix üzrə fəlsəfə doktoru, dosent Firdovsiyyə Əhmədova və digərləri çıxış edərək ədib, Azərbaycan Xalq Cümhuriyyətinin banisi, Azərbaycan Xalq Cümhuriyyəti Milli Şurasının sədri, ictimai-siyasi və dövlət xadimi Məmməd Əmin Rəsulzadə və onun vətən-millət uğrunda xidmətləri, fədakarlıqları barədə öz dəyərli fikirlərini bölüşüblər.
Tədbirdə, həmçinin AMEA Rəyasət Heyəti aparatının Elmi irs şöbəsinin müdiri, tarix elmləri doktoru, dosent Zemfira Hacıyeva və şöbənin əməkdaşları iştirak ediblər.
Sonda Dilqəm Əhmədin şəxsi kolleksiyasında Məmməd Əmin Rəsulzadəyə aid eksponatlardan ibarət sərgiyə baxış keçirilib.
Gülnar HACIYEVA
AMEA Rəyasət Heyəti aparatının
Elmi irs şöbəsinin baş mütəxəssisi
6-02-2026, 18:00
İki milli park haqqında Əsasnamə təsdiqləndi
"Azərbaycan Respublikasının Axar-Baxar Milli Parkı haqqında Əsasnamə" təsdiq edilib.
Bununla bağlı Prezident İlham Əliyev Fərman imzalayıb.
Fərmanla, həmçinin "Azərbaycan Respublikasının İlisu Milli Parkı haqqında Əsasnamə" təsdiq edilib.
Nazirlər Kabineti və Ekologiya və Təbii Sərvətlər Nazirliyi bu Fərmandan irəli gələn məsələləri həll etməlidir.
6-02-2026, 17:47
Sürücü hazırlığı üzrə təhsil haqqı 50 manata endirildi - FOTO
Azərbaycanda yerli daşıyıcılar üçün sürücü hazırlığı üzrə təhsil haqqı 266 manatdan 50 manata endirilib.
Bu barədə agentlikdə avtomobil nəqliyyatı ilə beynəlxalq yükdaşıma fəaliyyəti həyata keçirən milli daşıyıcılarla keçirilən növbəti görüşdə bildirilib.
Məlumata görə, görüşdə sahənin inkişafı ilə bağlı fikir mübadiləsi aparılıb, iştirakçıların təklifləri dinlənilib. Fəaliyyət zamanı hüquqi öhdəliklərə, düzgün sənədləşməyə və mövcud tələblərə riayət olunmasının vacibliyi iştirakçıların diqqətinə çpatdırılıb.
AYNA tərəfindən milli daşıyıcılara dəstək məqsədilə həyata keçirilən "5000 yeni sürücü" layihəsi də müzakirə edilib. C və CE kateqoriyalı sürücülərin cəlb edilməsində daşıyıcıların rolu və sürücü sayının artırılmasının sahənin inkişafına göstərəcəyi müsbət təsirlər barədə məlumat verilib. Sürücü hazırlığı üzrə təhsil haqqının 266 manatdan 50 manata endirilməsi iştirakçıların diqqətinə çatdırılıb. Bildirilib ki, təlim üçün ödəniş 266 manat olsa da, məbləğin 80%-dən çox hissəsi AYNA tərəfindən qarşılanacaq. Sürücülər cəmi 50 manat ödəməklə təlimdə iştirak edə biləcəklər.
Yük avtonəqliyyat vasitələrinə texniki qulluq və təmir üzrə ustalara yaranmış ehtiyac nəzərə alınaraq texniki təmir sahəsi olan daşıyıcıların layihədə iştirakı imkanları müzakirə olunub. Təlim keçə biləcək müəssisələrin imkanları qiymətləndirilib və tələb olunan peşələrin müəyyənləşdirilməsi istiqamətində fikir mübadiləsi aparılıb.
Görüşdə beynəlxalq daşımaların coğrafiyasının genişləndirilməsi məsələsi də diqqət mərkəzində olub. Xüsusilə Çin, həmçinin Monqolustan və İran istiqamətlərində beynəlxalq yük daşımalarında iştirakın artırılmasının vacibliyi vurğulanıb. Beynəlxalq əlaqələrin genişləndirilməsi istiqamətində milli sahibkarların nəqliyyat-logistika sərgilərində iştirakı məqsədəuyğun hesab edilib. Şirkətlərin yaxın vaxtlarda Çində təşkil ediləcək sərgidə iştirakının mümkünlüyü bildirilib. Təşkilati dəstəyə ehtiyac yarandıqda AYNA-ya müraciət edə biləcəkləri qeyd olunub.
Beynəlxalq yük daşımaları sahəsində fəaliyyət göstərən daşıyıcılarla sahənin inkişafına yönəlmiş tədbirlərin mütəmadi davam etdirilməsi planlaşdırılır.
6-02-2026, 17:41
QHT sədri yol qəzasında ölüb
Masallı Ziyalıları İctimai Birliyinin sədri Qardaş Fətullayev avtomobil qəzası nəticəsində dünyasını dəyişib.
Bu barədə mərhumun yaxınları sosial şəbəkədə bildiriblər.
Məlumata görə, Qardaş Fətullayev yol-nəqliyyat hadisəsindən dərhal sonra xəstəxanaya çatdırılsa da, həkimlər onun həyatını xilas edə bilməyiblər.
Allah rəhmət eləsin!
6-02-2026, 17:32
Baş redaktor həbs edildi: 5 il 6 ay
Hədə-qorxu ilə tələb etmədə təqsirləndirilən "Dəryaz" qəzetinin (deryaz.az) təsisçisi və baş redaktoru Habil Tağıyevin cinayət işi üzrə məhkəmənin yekun prosesi keçirilib.
Bu gün Bakı Ağır Cinayətlər Məhkəməsində hakim Kamil Əliyevin sədrliyi ilə keçirilən prosesdə hökm oxunub. Hökmə əsasən, Habil Tağıyev 5 il 6 ay müddətinə azadlıqdan məhrum edilib.
Habil Tağıyevi Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi saxlayıb. O, ayrı-ayrı şəxslər barəsində ifşaedici məlumatlar yayacağı hədəsi ilə müxtəlif məbləğlərdə pul tələb etməkdə ittiham olunur. Habil Tağıyevdən 10-a yaxın şəxs şikayət edib.
Ona Cinayət Məcəlləsinin 182.2.2-ci (Hədə-qorxu ilə tələb etmə, təkrar törədildikdə) maddəsi ilə ittiham elan olunub. Barəsində həbs-qətimkan tədbiri seçilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!