ABŞ diplomatlarını Səudiyyə Ərəbistanından çıxarır
ABŞ Dövlət Departamenti Səudiyyə Ərəbistanında fəaliyyət göstərən bəzi diplomatlara və digər dövlət işçilərinə bu ölkəni tərk etməklə bağlı tapşırıq verib.
Bu barədə ABŞ Dövlət Departamenti məlumat yayıb.
"Dövlət Departamenti fövqəladə vəzifələrə aid olmayan tapşırıqları yerinə yetirən ABŞ dövlət qulluqçularına, həmçinin onların ailə üzvlərinə təhlükəsizlik təhdidi səbəbi ilə Səudiyyə Ərəbistanını tərk etməyi tapşırıb", - deyə məlumatda bildirilib.
ABŞ hakimiyyəti daha əvvəl vətəndaşlarına İranın raket və PUA hücumları təhlükəsi səbəbindən Səudiyyə Ərəbistanına səfər planlarını yenidən nəzərdən keçirməyi tövsiyə etmişdi.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.