21-10-2024, 17:26
Moldovada keçirilən referendumun ilkin nəticələri
Moldova Mərkəzi Seçki Komissiyası (MSK) Avropa İttifaqına daxil olmaqla bağlı Konstitusiya referendumunun protokollarının 99,05 faizini işləyib.
Referendum protokollarının ümumi səs sayından 99,05 faizi işləndikdən sonra müəyyən olunub ki, seçicilərin 50,30 faizi respublika Konstitusiya referendumunda “lehinə”, 49,70 faizi isə “əleyhinə” səs verib.
Moldova MSK-ın məlumatına görə, seçkilərdə 1 milyon 546 min 757 seçici iştirak edib ki, bu da seçici siyahılarında qeydə alınmış seçicilərin 51,4 faizini təşkil edir. Onlardan 1 478 958 milyon seçici referendumda bülleten almaq üçün seçici siyahılarında imza atıb ki, bu da 49,81 faiz təşkil edir.
Mərkəzi Seçki Komissiyasının sədri Anjelika Karaman brifinqdə qeyd edib ki, dairə seçki şuralarının protokollarını aldıqdan sonra komissiya seçkilərin nəticələri ilə bağlı Konstitusiya Məhkəməsinə hesabat təqdim edəcək, o da öz növbəsində 10 gün müddətində referendumun nəticələrini öz qərarı ilə təsdiq və ya təkzib edəcək.
21-10-2024, 16:37
Fətullah Gülənin varisi kim olacaq? - Şəbəkə Azərbaycanda da örgütlənmişdi
Uzun illərdir ABŞ-ın Pensilvaniya şatatında yaşayan türkiyəli ilahiyyatçı, FETÖ terror təşkilatının 83 yaşlı başçısı Fətullah Gülən ölüb. Gülənə yaxın mənbələr xarici KİV-ə onun Pensilvaniya ştatında dəfn olunacağını bildirib.
Bu arada xarici media Gülənin yerinə kimin keçəcəyindən də bəhs etməkdədir. Bu da səbəbsiz deyil: “Gülən şəbəkəsi” milyardlarla dollar gəlirə sahibdir və təşkilat bu vəsaiti idarə edəcək şəxsi mütləq müəyənləşdirməlidir.
Məlumatlara görə, “Gülən şəbəkəsi” təkcə Afrikadakı məktəblərdən ildə 250 milyon dollar gəlir əldə edir.
CNNtürk xəbər verir ki, FETÖ təşkilatının ümumi büdcəsi 200 milyard dollara bərabərdir. Adı çəkilən media qurumu hesab edir ki, təşkilat ABŞ qanadı tərəfindən idarə olunacaq.
"Əgər parçalanma olmasa, öz aralarında barışsalar, 200 milyard dollara sahib olan strukturun rəhbəri Mustafa Özcan və ya Cevdet Türkyolu olacaq”, - CNNtürk yazıb.
Fətullah Gülənin ölümündən sonra onun yerinə gətiriləcək şəxslər sırasında örgüt başçısına daha yaxın olan Cevdet Türkyolu (Gülənin katibi), Mustafa Özcan (örgütün "pul kassası"), Osman Şimşek (Gülənin sosial media məsulu), Ekrem Dumanlının (şəbəkənin media məsulu) kimi şəxslərin adı çəkilir.
Fətullah Gülən 2016-cı ildə Türkiyədəki dövlət çevrilişinə cəhddə iştirakda ittiham olunduqdan sonra onun rəhbərlik etdiyi FETÖ örgütü rəsmi Ankara tərəfindən terror təşkilatı elan edilib.
Fətullah Gülənin himayəsilə 2016-cı ilin iyulunda dövlət çevrilişinə cəhd iki gün davam etmiş və həmin qarşıdurma nəticəsində 250-dən çox insan həlak olmuş, 2,2 min nəfər yaralanmışdı.
Ankara dəfələrlə ABŞ-dan Gülənin təhvil verilməsini tələb edib, həmçinin FETÖ tərəfdarlarının sonuncusu məhkəmə qarşısına çıxarılana qədər təqib edəcəyini bəyan edib.
Türkiyədə mütəmadi olaraq Gülən tərəfdarlarına qarşı əməliyyatlar keçirilir.
Hazırda dünyanın müxtəlif ölkələrində “Gülən şəbəkəsi”nin himayəsi altında çalışan məktəblər, universitetlər, media orqanları və digər qurumlar fəaliyyət göstərir.
Xarici mətbuat yazır ki, bu gün 150-dən çox ölkədə Gülən tərəfdarları tərəfindən açılan təxminən 1400 məktəb fəaliyyət göstərir.
Siyasi ekspert Elxan Şahinoğlu Fətullah Gülənin ölüm hadisəsini şərh edib.
Onun sözlərinə görə, bu olay yeni mövzular gündəmə gətirəcək.
“Aydındır ki, örgütün liderinin Türkiyədə dəfn olunması mümkün deyil. Böyük ehtimalla onu yaşadığı ABŞ-ın Pensilvaniya ştatının və ya başqa ştatın müsəlman qəbiristanlığında basdıracaqlar”.
E.Şahinoğlu bildirib ki, ikinci məsələ örgütün fəaliyyətini hansı şəkildə davam etdirəcəyidir:
“Fətullah Gülən ağır xəstəliyi səbəbilə varisini əvvəlcədən seçməmiş deyil. Həmin varis ya onun qohumlarından, ya da Pensilvaniyadakı yaxın ətrafından biri olacaq. Həmin varis şəbəkəni ayaqda saxlamağa və topladıqları milyardlarla dolları idarə etməyə çalışacaq. O, FETÖ içində Gülən qədər populyar olmacayağından örgütdə fikir ixtilafının dərinləşməsi istisna deyil”.
Ekspert düşünür ki, Türkiyənin müvafiq strukturları Gülənin ölümündən istifadə etməklə örgütü ümumiyyətlə çökdürməyə çalışacaqlar:
“Asan olmayacaq. Çünki örgütün ABŞ, Avropa, hətta Afrikada müxtəlif mərkəzləri fəaliyyət göstərir ki, hamısı gəlir gətirir. Vaxtilə Azərbaycanda da örgütlənmişdilər, indinin özündə də Fətullah Güləni “hocamız” deyə qiymətləndirənlər var. Onlarla çox mübahisəm olub, hər dəfəsində də “hoca”nın hərbi çevrilişə cəhddə və nəticədə yüzlərlə insanın həlak olmasında heç bir rolunun olmadığını vurğulamağa çalışıblar. Sanki yadplanetlilər hərbi çevrilişə cəhd edib və insanlara atəş açıblar...”.
20-10-2024, 18:14
İran Əfqanıstan və Pakistanla sərhəddə divar çəkir
İran Pakistan və Əfqanıstanla həmsərhəd olan 5 əyalətdə divar tikintisinə başlayıb.
Bu barədə "Eghtesaad24" İran sərhəd polisinin komandiri, briqada generalı Əhməd Əli Qudarziyə istinadən məlumat yayıb.
O bildirib ki, divar təhlükəsizlik təhdidlərini azaltmaq, arzuolunmaz miqrasiyanın və qaçaqmalçılığın qarşısını almaq üçün lazımdır.
General vurğulayıb ki, Əfqanıstan və Pakistanla sərhəddə divar tikintisi prioritet məsələdir.
20-10-2024, 16:10
Qəzzada hər gün 80-dən çox fələstinli ölür
İsrail qüvvələrinin Qəzza zolağında 24 saat ərzində həyata keçirdiyi əməliyyatlar nəticəsində azı 84 fələstinli ölüb, 160-a yaxın fələstinli yaralanıb.
Bu məlumatı anklavın Səhiyyə Nazirliyi verib.
“Son 24 saat ərzində Qəzzada 84 nəfər ölüb, 158 nəfər yaralanıb”, - deyə idarənin Telegram kanalında dərc olunan xülasədə bildirilir.
Qəzza Səhiyyə Nazirliyinin məlumatına görə, hərbi əməliyyatın əvvəlindən İsrailin təcavüzü qurbanlarının ümumi sayı 42 603 nəfərə çatıb, 99 795 nəfər yaralanıb.
20-10-2024, 14:09
Gürcüstanın xarici dövlət borcu artır - 9 milyard dollar
Gürcüstanın xarici dövlət borcu 9 milyard dolları (ABŞ) keçib.
Bu barədə ölkənin Maliyyə Nazirliyinə istinadən xəbər verir.
Bu, ötən ilin avqust ayı ilə müqayisədə 43,5 milyon dollar və 2023-cü ilin sentyabrı ilə müqayisədə 581 milyon dollar çoxdur.
Gürcüstanın ən çox borclu olduğu qurumlar:
Asiya İnkişaf Bankı – 2,4 milyard dollar;
Dünya Bankı – 2,2 milyard dollar;
Avropa İnvestisiya Bankı – 1,1 milyard dollar.
20-10-2024, 13:52
Fransa Ukrayna hərbçilərinin təlimini davam etdirəcək
Fransa öz ərazisində Ukrayna hərbçilərinə təlim keçməyə davam edəcək.
Bu barədə respublikanın silahlı qüvvələri naziri Sebastyen Lekornu “La Tribune Dimanche” qəzetinə müsahibəsində bildirib.
“Belə bir niyyətim var, onun üzərində işləyirəm, biz “Anna” Kiyev briqadasını tamamlayacaq əsgərlər hazırlamağı bacarmalıyıq” – o jurnalistin “Fransanın öz ərazisində Ukrayna hərbçilərinə təlim keçməyə davam edib-etməyəcəyi” ilə bağlı sualına belə cavab verib.
Fransa hərbçiləri hazırda ölkənin şərqindəki Qrand Est bölgəsində Ukrayna Silahlı Qüvvələrinin təxminən 2,3 min üzvünə təlim keçir. Nazirin sözlərinə görə, Ukraynada onlarla yeni briqada yaradılmalıdır.
20-10-2024, 12:40
Livandan İsrail ərazisinə növbəti hücum
Livandan İsrailin şimalına üç raket atılıb.
Bu barədə İsrail Müdafiə Qüvvələrinin mətbuat xidməti məlumat yayıb.
Onlardan biri İsrail Hərbi Hava Qüvvələri tərəfindən ələ keçirilib, digər ikisi isə yaşayış olmayan əraziyə düşüb. Bundan əvvəl hərbçilər Hayfa şəhəri və ətrafına hava hücumu xəbərdarlığı barədə məlumat vermişdilər.
19-10-2024, 19:34
Fransa Ukraynaya bu tarixdə qırıcılar verəcək
Ukrayna yaxın aylarda Fransadan “Mirage 2000” təyyarələrini alacaq. İlk “Mirage 2000” təyyarələri artıq 2025-ci ilin əvvəlində Ukraynaya təhvil veriləcək.
Bu barədə Fransanın Avropa və xarici işlər naziri Jan-Noel Barro Kiyevdə keçirdiyi mətbuat konfransında bildirib.
Onun sözlərinə görə, Fransa Ukraynaya kömək edəcək və onu dəstəkləyəcək.
“Bizim köməyimiz konkret misallarda özünü göstərir. Müdafiə sektorunda biz Ukraynanı avadanlıq və hərbi texnika ilə təmin edirik. Fransa həm də bütöv bir briqadanın hazırlığı ilə məşğul olan ilk ölkədir, bu, Anna Kiyesvkayanın briqadasıdır. İlk “Mirage 2000” təyyarələri artıq 2025-ci ilin əvvəlində Ukraynaya təhvil veriləcək”, - deyə nazir bildirib.
O əlavə edib ki, Fransa həm də bu təyyarələr üçün pilotlar hazırlayacaq.
Qeyd edək ki, Fransanın Avropa və xarici işlər naziri Jan-Noel Barro oktyabrın 19-u şənbə günü Kiyevə gəlib. Bu, onun XİN rəhbəri kimi Ukraynaya ilk səfəridir.
19-10-2024, 18:20
İŞİD-ə qarşı yeni əməliyyat
Dünən İspaniyanın şimalında İŞİD terror təşkilatına mənsub olmaqda şübhəli bilinən iki şəxs həbs edilib.
İspaniya polisi və Mərakeş Milli Ərazi Nəzarəti Baş İdarəsinin birgə məlumatına görə, şübhəlilər İtsasondo və Avil şəhərlərində tutulublar.
Bu ilin əvvəlindən şübhəlilər ciddi şəkildə izlənilirdi. Onlar əvvəlcə sosial şəbəkələrdə İŞİD-i, o cümlədən zorakılıq və terrorizmi dəstəkləyən mesajlar yazaraq diqqəti cəlb ediblər.
İspaniya polisi Mərakeş Milli Ərazi Nəzarəti Baş İdarəsinin dəstəyindən istifadə edərək artıq bir neçə terrorçunu yaxalayıb.
19-10-2024, 17:32
Sinvarın öldürülməsinin yeni detalları: onun cəsədi İsrailə lazım olacaq
HƏMAS lideri Yəhya Sinvarın öldürülməsi ilə bağlı bir sıra detallar məlum olub.
İsrail Milli Məhkəmə Tibb Mərkəzi bildirib ki, Sinvar başından aldığı güllə yarasından ölüb.
Məlumata görə, Sinvarın bədənində başqa xəsarətlər aşkar edilib.
“Ölümün səbəbi başındakı yara olub. Ağır kəllə-beyin travması var”, - deyə Mərkəzin baş patoloqu Çen Kugel CNN-ə bildirib. Həmas liderinin sağ qolunda və döş qəfəsində qəlpə yaraları da aşkarlanıb. Onun ölümün təxmini vaxtı oktyabrın 16-sı axşamdır.
"The New York Times" nəşri yazıb ki, İsrail ordusu Yəhya Sinvarla təsadüfən rastlaşıb. İsrail hərbçiləri Qəzza zolağının cənubundakı ərazidə patrul xidməti həyata keçirib və burada HƏMAS nümayəndələri ilə qarşılaşıblar. Atışma zamanı dron binada Sinvarın olduğunu müyyən edib və bundan sonra tank onun yerləşdiyi binaya mərmi atıb. İsrail ordusu hadisənin səbəblərini hələ də araşdırdıqlarını vurğulayıb.
Xatırladaq ki, Yəhya Sinvar 2023-cü il oktyabrın 7-də HƏMAS-ın İsrailə hücumunun əsas təşkilatçısı hesab olunur. O, bu ilin avqustunda Tehranda sələfi İsmayıl Həniyənin ölümündən sonra hərəkatın Siyasi Bürosunun rəhbəri vəzifəsinə seçilib.
CNN İsraildəki mənbələrə istinadən yazır ki, İsrail Qəzza zolağında saxlanılan israilli girovların azad edilməsi üçün danışıqlarda Sinvarın cəsədini istifadə edə bilər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!