8-03-2023, 23:12
Etirazçılar Gürcüstan parlamentinə şərt qoydular
Hazırda Tbilisinin mərkəzində "xarici agentlər haqqında" qanunun qəbuluna qarşı etiraz aksiyası keçirilir. Müxalifətçi Giorgi Vaşadze hakimiyyətə qarşı iki tələb irəli sürüb. O bildirib ki, qanun layihəsi parlamentdən geri götürülməli və dünənki aksiyada saxlanılanlar azad edilməlidir. Vaşadze qeyd edib ki, Gürcüstan rəhbərliyinin bu tələbləri yerinə yetirmək üçün bir saatı var, əks halda etirazçılar “başqa addımlara keçəcəklər”. Qeyd edək ki, dünənki aksiyada 66 nəfər saxlanılıb.
8-03-2023, 20:24
İran gizli şəkildə Rusiyaya çoxlu sayda hərbi texnika göndərib
İran gizli şəkildə Rusiyaya çoxlu sayda güllə, raket və minaatan mərmisi verib. Bu barədə "Sky News" qəzeti məlumat yayıb. Nəşrin mənbəsinin bildirdiyinə görə, Rusiya bayraqlı iki yük gəmisi yanvarda İran limanını tərk edərək Xəzər dənizi vasitəsilə Rusiyaya gedib. Təxminən 100 milyon güllə və 300 minə yaxın mərmi daşınıb. Bildirilir ki, gəmilərdə raket, minaatan və pulemyotlar üçün sursat da olub. Qeyd olunur ki, Rusiya Federasiyası sursatların pulunu nağd şəkildə ödəyib.
8-03-2023, 20:17
Zelenski Quterreşlə taxil sazişinin uzadılması razılığına gəldi
Ukrayna və BMT taxıl ixracı təşəbbüsünün davam etdirilməsinin dünya üçün vacib əhəmiyyət daşıdığı barədə həmfikirdir. Bunu Ukrayna Prezidenti Volodimir Zelenski BMT-nin Baş katibi Antonio Quterreşlə Kiyevdə keçirdiyi birgə mətbuat konfransında deyib. "Biz razılaşdıq ki, Qara dəniz taxıl təşəbbüsünün 18 martdan sonra uzadılması bütün dünya üçün zəruridir. Həmçinin Ukraynadan daşınan taxıl humanitar təşəbbüs üçün vacibdir və biz təşəbbüsün bir hissəsi olaraq artıq bunu bacarmışıq”, - deyə Zelenski bildirib. Zelenski əmindir ki, Ukrayna BMT ilə birlikdə həm humanitar təşəbbüsü, həm də taxıl təşəbbüsünü əhəmiyyətli dərəcədə gücləndirə biləcək: "Bu, dünyanın ərzaq təhlükəsizliyinə daha böyük təminat verəcək". Quterreş isə dəniz yolu ilə ixrac infrastrukturundan maksimum yararlanmağa davam etmək üçün Qara dəniz Taxıl Təşəbbüsünün davam etdirilməsinin əhəmiyyətini diqqətə çatdırıb. "Qara dəniz taxıl təşəbbüsü Ukrayna limanlarından 23 milyon ton taxılın çatdırılmasını təmin edib. Bunun sayəsində dünyada ərzaq məhsullarının qiymətlərini aşağı salmaq və inkişaf etməkdə olan ölkələrə dəstək vermək mümkün olub. Bundan başqa, ərzaq qiymətləri indeksi 20 faiz aşağı düşüb”, - deyə Baş katib qeyd edib.
8-03-2023, 20:11
Ukraynadan gürcü etirazçılara dəstək
Gürcüstan öz vətəndaşlarına dinc etirazlar etmək hüququnu təmin etməyə borcludur. Bu barədə Ukrayna Xarici İşlər Nazirliyinin "Facebook" səhifəsində bildirilib. Açıqlamada qeyd olunub ki, Ukrayna gürcü xalqının ölkədə Avropa gələcəyinin qurulmasını davam etdirmək istəyi ilə həmrəydir. XİN “xarici agentlər haqqında” qanun layihəsinə qarşı kütləvi etirazlar fonunda Gürcüstanda baş verənləri diqqətlə izləməkdə davam etdiklərini açıqlayıb. “Avropa İttifaqına üzv olmağa can atan bir dövlət kimi Gürcüstan vətəndaşların əsas hüquq və azadlıqlarına, o cümlədən dinc etiraz hüququna ardıcıl təminat verməlidir”, - məlumatda bildirilib. Qeyd edək ki, martın 7-də Gürcüstan parlamenti birinci oxunuşda Rusiya qanunvericiliyinin analoqu olan “Xarici agentlər haqqında” qanun layihəsini dəstəkləyib. Sənəddə KİV-ə və xaricdən maliyyə alan ictimai təşkilatlara “xarici təsir agenti” statusunun verilməsi təklif edilib.Bundan sonra Tbilisidə qanun layihəsinə qarşı genişmiqyaslı etiraz aksiyaları başlayıb.
8-03-2023, 20:07
Gürcüstanda baş verən hadisələrdən narahatıq - Şarl Mişel
“Gürcüstanda baş verən hadisələrdən çox narahatıq”. Bunu Avropa İttifaqı Şurasının Prezidenti Şarl Mişel twitter hesabında yazıb. O bildirib ki, istənilən dinc etiraz hüququ demokratiyanın əsasını təşkil edir: “Qanunun aliliyinə və insani dəyərlərə sadiqlik Avropa İttifaqı layihəsinin açarıdır”. Qeyd edək ki, martın 7-də Gürcüstan parlamenti “Xarici agentlər haqqında” qanun layihəsini dəstəkləyib. Sənəddə KİV-ə və xaricdən maliyyə alan ictimai təşkilatlara “xarici təsir agenti” statusunun verilməsi təklif edilib. Bundan sonra Tbilisidə qanun layihəsinə qarşı genişmiqyaslı etiraz aksiyaları başlayıb.
8-03-2023, 19:43
İranın XİN başçısı türkiyəli həmkarı ilə görüşüb
Ankarada səfərdə olan İranın xarici işlər naziri Hüseyn Əmir Abdullahian Türkiyənin XİN başçısı Mövlud Çavuşoğlu ilə görüşüb. Görüşdən sonra birgə mətbuat konfransı keçirilib. Görüş zamanı enerji və iqtisadiyyat sahəsində əməkdaşlıq, həmçinin terrorla mübarizədə birgə fəaliyyət müzakirə olunub. Nazirlər Ukraynadakı vəziyyətə də toxunublar. Görüşdən sonra Abdullahian zəlzələnin baş verdiyi Adıyaman bölgəsinə baş çəkəcək.
8-03-2023, 19:41
Rusiya Ermənistanda hərbi təlimlər keçirir
Rusiya Ermənistan ərazisində hərbi təlimlər keçirir. Bu barədə Rusiyanın Cənub Hərbi Dairəsinin mətbuat xidməti məlumat yayıb. Bildirilib ki, Rusiya artilleriyaçıları Ermənistanın Alagöz yüksək dağ poliqonunda təlimlərdə iştirak edəcəklər. Məlumata görə, poliqonda təlim, səhra gəzintiləri və xüsusi taktiki hazırlıq dərsləri həyata keçiriləcək.
8-03-2023, 19:30
Azərbaycan enerji təhlükəsizliyində vacib rol oynayır - Sabiq prezident
Bu il Azərbaycan qlobal arenada, xüsusilə də enerji təhlükəsizliyi, geostrateji baxımdan çox vacib rol oynayır. Bunu Serbiyanın sabiq Prezidenti Boris Tadiç X Qlobal Bakı Forumu ilə əlaqədar martın 8-də keçirilən mətbuat konfransında deyib. O qeyd edib ki, ötən illər ərzində Azərbaycan sürətlə inkişaf edib, bəzi çətinliklərin öhdəsindən gəlib və çox böyük işlər görüb. Xüsusilə də bu il Avropanın enerji təhlükəsizliyində çox vacib rol oynayıb. Azərbaycan olmadan Avropada enerji sabitliyi mümkün deyil.
8-03-2023, 19:23
Gürcüstanda aksiyalar zamanı 50 polis yaralanıb
Gürcüstandakı etirazlarda 66 nəfər saxlanılıb. Daxili İşlər Nazirliyi 50 polis əməkdaşının yaralandığını açıqlayıb. Bildirilib ki, aksiyaçılar dövlət əmlakına, parlamentin binasına və digər obyektlərə ziyan vurublar. Habelə təhlükəsizlik qüvvələrinin əməkdaşlarına qarşı zorakılıq faktları olub. Saxlanılan şəxslər xırda xuliqanlıq və polisə müqavimətdə ittiham olunur. Xatırladaq ki, martın 7-də axşam saatlarında Gürcüstan parlamentinin binası yaxınlığında etirazçılarla Daxili İşlər Nazirliyinin xüsusi təyinatlı dəstəsinin hərbçiləri arasında toqquşma olub. Polis etirazçılara qarşı su şırnaqları və gözyaşardıcı qazdan istifadə edib, buna cavab olaraq etirazçılar onlara və parlament binasına molotov kokteyli və daş atmağa başlayıb. Qeyd edək ki, Gürcüstan parlamentində "xarici agentlər" qanunu ilk oxunuşda qəbul olunub. Burada xarici institutlardan maliyyə yardımı və qrantlar alan qurumların agent elan edilməsindən söhbət gedir. Sözügedən qanun layihəsi geniş etirazlara və iğtişaşlara səbəb olub.
8-03-2023, 19:20
Maaşımdan başqa heç bir gəlirim olmayıb - Akşener
Türkiyənin müxalif İYİ Partiya sədri Meral Akşener "Millət İttifaqı"nı tərk etməsi və daha sonra geri dönməsi ilə müşayiət olunan 2 günlük zaman kəsiyində baş verənlərdən danışıb. "HaberTürk"də jurnalist Fatih Altaylının verilişinə qonaq olan Akşener ittifaqı tərk etməsi ilə bağlı açıqlama verdiyi brifinqdəki nitqinin sərt olmasına aydınlıq gətirib. "Sərt idi və sərt olmalı idi. O mətni mən özüm yazmışam. 28 ildir aktiv siyasətlə məşğulam. Sərt olaraq ifadə edilsə də, konkret olmasına diqqət yönəltdim. Çox konkret idi, bəli. Qədərindən artıq konkretlik insanları əsəbiləşdirə bilər", - deyə o söyləyib. Akşener Kılıçdaroğlunun hiddətlənərək ayağa qalxması məsələsinə də toxunub. "Heç kim ayağa qalxmamışdı. Amma gərginlik yaşanmışdı. Mən fikrimi açıq və net söyləmişdim. Davutoğlu və Babacan araya girib ortalığı sakitləşdirdi. Amma Temel bəyin də "Sizdən çəkdiyimiz bəsdir" deməsi də həqiqətə uyğun deyil. O yaş qrupundan olan insanlar səbr məsələsində peşəkarlaşıblar. Kemal bəyi də səbrli insan kimi tanıyıram... 5 nəfər imzaladı, o formada da elan oluna bilərdi. Sonra bir "nəfəs alaq" dedik. Getdim dostlarla məsləhətləşməyə. Belə qərar çıxdı. Hər kəs üçün ən yaxşısı oldu", - deyə İYİ Partiya sədri ittifaqı tərk etməzdən əvvəlki son toplantının təfərrüatlarını açıqlayıb. (Qeyd edək ki, bu barədə ilk açıqlamasında Akşener Kılıçdaroğlunun onun bələdiyyə sədrlərinin namizədliyinin də müzakirə olunması barədə təklifindən hiddətlənərək ayağa qalxdığını və vəziyyətin gərginləşdiyini demişdi. Ali Babacanın müavini isə onu təkzib edərək bu cür hadisə baş vermədiyini bəyan etmişdi). Partiya sədri CHP-HDP yaxınlaşmasına da münasibət bildirib: "Səmimi deyirəm. Türkiyədə hər partiyanın bir-biri ilə əlaqələrinə digər partiyalar sayğı göstərməlidir. Biz bu günə qədər bunu etmişik. Amma iddia olunduğu kimi guya o masada HDP-nin də var olması gerçək deyil. Dialoq isə başqa şeydir. CHP HDP ilə görüşə bilər, amma bizim olduğumuz masaya əsla gətirə bilməz. Nazir alış-verişi kimi bir məsələ də mümkün deyil. "Sizin səs faizinizlə HDP-nin səs faizi fərqlidir, sizə gülə-gülə, sağ olun" desəydilər, masadan qalxardıq". Akşener Ərdoğana yaxın iş adamlarından pul aldığı üçün ittifaqı tərk etməsi ilə bağlı iddiaları təkzib edib: "Pul məsələsinə gəlsək, əgər mən Ərdoğanın çevrəsindən və ya başqa bir Allah qulundan belə bir məsələ ilə bağlı 1 lirə, 5 lirə pul almışamsa, dünyanın ən şərəfsiz insanıyam. Maaşımdan başqa heç bir gəlirim olmayıb mənim. Hər şeyim də açıqdır. Bu günə qədər Ərdoğan mənimlə danışmaq üçün heç nə etməyib. Mənim də onunla gizli bir görüşüm olmayıb. Hətta zəlzələ vaxtı necə görüşdüyümüzü də televiziya vasitəsilə danışdım".
Qeyd edək ki, İYİ Partiya Kılıçdaroğlunun vahid namizədliyinə qarşı çıxış edərək "Altılı Masa"nı tərk etmişdi. Daha sonra Ankara və İstanbul bələdiyyələrinin sədrlərinin vitse-prezident təyin olunması şərti ilə ittifaqa geri qayıdan Akşener CHP sədrinin namizədliyinə razılıq verib. 6 mart tarixində "Millət İttifaqı"nın toplantısından sonra Kamal Kılıçdaroğlu vahid namizəd elan olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!