AMEA Mərkəzi Elmi Kitabxanasının (MEK) təşkilati dəstəyi ilə AMEA Nizami Gəncəvi adına Ədəbiyyat İnstitutunun təşkilatçılığı ilə “Ədəbi proses-2018” mövzusunda elmi-yaradıcılıq müşavirəsi keçirilib.
Tədbiri giriş sözü ilə açan AMEA-nın vitse-prezidenti, Ədəbiyyat İnstitutunun direktoru akademik İsa Həbibbəyli 2014-cü ildən etibarən “Ədəbi proses-2018” mövzusunda keçirilən elmi-yaradıcılıq müşavirəsinin getdikçə tanındığını, ölkənin ədəbi qurumları və mətbuat orqanlarında maraq yaratdığını bildirib. Akademik qeyd edib ki, hər il məruzəçilərin sayı artır və ədəbiyyatşünaslarla yanaşı müşavirəyə yazıçılar da dəvət olunur. Belə müşavirələr ədəbi prosesin müxtəlif istiqamətlərinin daha dərindən araşdırılmasına təkan verir. İ.Həbibbəyli vurğulayıb ki, ədəbiyyat sərhədsizdir və ədəbi proses haqqında daha dərin və dəqiq araşdırmaların edilməsi üçün tədqiqatçılar dünya ədəbi proseslərini yaxşı bilməlidirlər. Akademik Çin, Pakistan və Hindistan ədəbiyyatını misal çəkərək, həmin ölkələrlə qarşılıqlı əlaqələrin olduğunu xatırladıb. Ölkəmizdə satira və uşaq ədəbiyyatı janrlarının inkişafının vacibliyini xüsusi vurqulayan İ.Həbibbəyli post modernizm, neorealizm, modernizm cərəyanlarına toxunub, onların Azərbaycan ədəbiyyatındakı nümayəndələrini misal çəkib. İnstitut rəhbəri, həmçinin sosial şəbəkə ədəbiyyatı anlayışı haqqında danışıb, bu janra aid məruzənin hazırlanmasının vacibliyini bildirib. Akademik artıq ənənəyə çevrilən müşavirəni ədəbi proses hərəkatı adlandırıb.
Sonra mövzu ətrafında məruzələr dinlənilib. Ədəbiyyatşünaslar ədəbi mənzərə, ədəbi tənqid, şeir, poema, povest, roman, hekayə, və ədəbi gəncliyə aid məruzələrlə çıxış ediblər.
Sonda məruzələr haqqında fikir və dəyərləndirmələr üçün söz yazıçı və tənqidçilərə verilib. Tədbirdə, həmçinin “Ədəbiyyat” qəzetinin, “525-ci qəzet”in, “Azərbaycan” jurnalının Baş redaktorları və Kulis.az saytının rəhbəri çıxış ediblər.
Çıxış edənlər keçirilən tədbirin təşkilatçılarına təşəkkürlərini bildirərək, səsləndirilən məruzələri yüksək qiymətləndiriblər.
Məlumat üçün bildirək ki, “Ədəbi Proses-2018” elmi-yaradıcılıq müşavirəsinin materialları “Ədəbiyyat” qəzetində, “525-ci qəzet”də və Kulis.az saytında çap olunur.