Türkiyə prezidenti Abdulla Gül Türkdilli Ölkələrin Sammitində iştirak etmək üçün Azərbaycana gəlib. Modern.az türk mətbuatına istinadən bildirir ki, A.Gül bu gün Azərbaycana yola düşməmişdən öncə Atatürk Hava Limanında mətbuata açlıqlama verib.

O, Türkiyə ilə birlikdə Azərbaycan, Qazaxıstan və Qırğızıstan tərəfindən imzalanan Naxçıvan Razılaşması ilə 2010-cu ildə qurulan Türk Birliyinin Türk Dünyası üçün ortaq əməkdaşlıq sahəsində önəmli dönüş nöqtəsi olduğunu vurğulayıb.

Xatırladaq ki,Türkdilli Ölkələrin Əməkdaşlıq Şurasının (TÖƏŞ) Azərbaycanda keçiriləcək III Sammitinin proqramına əsasən nəqliyyat və gömrük prosedurunun sadələşdirilməsi məsələləri Qəbələdə keçiriləcək Sammitin əsas mövzusu olacaq. Sammit ərəfəsində, avqustun 14-də TÖƏŞ ölkələri Xarici İşlər nazirliklərinin yüksək vəzifəli şəxslərinin, avqustun 15-də isə xarici işlər nazirlərinin görüşü olacaq.

Sammit avqustun 16-da keçiriləcək. Təşkilatın katibliyinin mətbuata verdiyi məlumata görə, ötən il ərazində türkdilli ölkələr arasında müxtəlif sahələrdə əməkdaşlığın gücləndirilməsi məqsədilə 20-dən çox görüş keçirilib.

4 ölkədən 15 universitetin daxil olduğu Türk Universitetləri Şurasının yaradılması barədə qərar qəbul edilib, ümumi türk terminologiyasının, o cümlədən türk lüğəti və toponimlər atlasının hazırlanması ilə bağlı Terminologiya üzrə Komitənin toplantısı olub.

TÖƏŞ ölkələri nəqliyyat nazirləri nəqliyyat sahəsində əməkdaşlığın gücləndirilməsi məqsədilə protokol imzalayıblar, tərəflər həmçinin nazir müavinləri səviyyəsində Koordinasiya Şurasının yaradılması barədə razılığa gəliblər. Bundan başqa, gömrük əməkdaşlığı üzrə işçi qrupu hazırda “Bir pəncərə” təcrübəsi əsasında TÖƏŞ ölkələri arasında gömrük prosedurunun sadələşməsi üzərində iş aparır.

Bütün bu qərarlar təsdiq üçün Qəbələ sammitində TÖƏŞ dövlət başçılarına təqdim olunacaq.

***

APA-nın məlumatına görə, A.Gülü Qəbələ hava limanında Azərbaycanın iqtisadi inkişaf naziri Şahin Mustafayev, Qəbələ İcra Hakimiyyətinin rəhbəri Səbuhi Abdullayev, Azərbaycanın Türkiyədəki səfiri Faiq Bağırov və Türkiyənin Azərbaycandakı səfiri İsmayil Alper Coşqun qarşılayıblar.