ANDIN  MÜBARƏK,  AZƏRBAYCAN  ƏSGƏRİ! 

Azərbaycanımız Dövlət müstəqilliyini bərpa edəndən bəri çox hərbi hissələrdə- andiçmə mərasimlərində iştirak eləmişəm, verilişlər, reportajlar hazırlamışam.Duyğulu anlar yaşamışam. Amma bu dəfəki andiçmə mərasimində iştirakımdan  həmişəkindən fərqli bir qürur hissi keçirdim. Çünki ilk dəfə idi ki, doğmalarımdan biri – bacımoğlu Əfran Müstəqil Azərbaycan dövlətinə, Vətənimizə, xalqımıza sədaqət andı içirdi. Mən də bir dayı olaraq o Andın sədasında şərəflənirdim. Bundan daha gözəl nə olardı ki?! 

                 Dövlətimizin himninin səsləndirilməsilə başlanan mərasimdə Azərbaycanın müstəqilliyi, respublikamızın ərazi bütövlüyü uğrunda şəhid olanların ruhu sükutla yad edildikdən sonra gənc əsgərlərimiz Vətənə sədaqətlə xidmət edəcəklərinə and içdilər. Komandirlər əsgərlərə  xidməti uğurlar diləyib valideynlərə gözaydınlığı verdilər. Bu gözəl məqamda diqqətçəkən daha bir qürurverici mənzərənin şahidi olduq. Hərbçi libası geyinərək polkovnik poqonu taxmış  balaca Nuray özündən də balaca qardaşının silahlı müşayiətilə mərasim iştirakçılarına qoşulmuşdu. Bu həm də gündən –günə qüdrətlənən  Azərbaycan Ordusunun gələcək uğurlarının müjdəsi idi. 

                 Bu  şərəfli anların həyəcanını yaşayan valideynlər arasında Əfranın atası Əbülfət Nuriyev də  vardı.  Sovet ordusu sıralarında xidmət edən Ə. Nuriyev doğma Vətəni üçün  bir əsgər böyütdüyünə görə  daha çox fəxr hissi  keçirir.

Tamxil  Ziyəddinoğlu

Fotolar müəllifindir