45 saylı Abşeron seçki dairəsi Abşeron rayonunun Saray, Mehdiabad, Qobu, Güzdək, Digah, Hökməli, Aşağı Güzdək, Novxanı, Fatmayı, Goradil, Məmmədli, Masazır, Pirəkəşkül, Qobustan bələdiyyələrini və Xırdalan şəhərini əhatə edir. Əməkdaşlarımız seçkilərin gedişilə bağlı material hazırlamaq üçün Mehdiabad qəsəbəsində olublar. Oradakı 4 seçki məntəqəsindən material hazırlanıb.Reyddən fotoreportajı və Ərturan İSMAYILın 30 saylı seçki məntəqəsindən hazırladığımaterialı təqdim edirik:
Baş çəkdiyim Abşeron rayonu Mehdiabad qəsəbəsindəki 45 saylı dairənin 30 saylı seçki məntəqəsində seçki prosesinin uğurla həyata keçirilməsi üçün bütün imkanlar yaradılmışdı. Seçici siyahıları, plakatlar məntəqədə asılmış, komissiya üzvləri məntəqə daxilində onlar üçün ayrılmış yerdə mövqelərini tutmuşdular. Səhər saatları olsa da seçicilər ikibir, üçbir məntəqəyə gəlib əvvəlcə adını seçici siyahısında axtarır, ardınca şəxsiyyət vəsiqəsini təqdim edərək içəri daxil olurdular. Komissiya üzvü onların sol əlinin baş barmağının işarələnib-işarələnmədiyini xüsusi avadanlıqla yoxlayırdı. Əgər seçicinin barmağında heç bir işarə olmurdusa, o, məntəqəyə buraxılırdı. Seçici məntəqədə təkrar şəxsiyyət vəsiqəsini təqdim edir, lazımi qeydiyyat işi aparılaraq onun sol əlinin baş barmağı gözə görünməyən mürəkkəblə işarələnirdi. Yalnız bundan sonra seçiciyə bülleten təqdim edilirdi. Seçici səsvermə otağına keçərək istədiyi namizədlərin adının qarşısındakı xananı işarələyir, ardınca həmin bülleteni qatlayaraq seçki qutusuna atır, məntəqəni tərk edirdi. Beləliklə də səsvermə baş tutmuş sayılırdı. Səsverməni məntəqədə olan müşahidəçilər də maneəsiz izləyə bilirdi.Məntəqə sədri Pənah Babayev seçicilərin seçkidə iştirak etməsi, istədikləri namizədə səs verməsi üçün hər cür şəraitin yaradıldığını bildirdi. Qeyd etdi ki, seçkidən əvvəl məntəqə lazımi avadanlıqlarla tam təchiz olunub: “Məntəqədə seçkiyə çağırış şüarları, seçici siyahıları və sair bu kimi materiallar əvvəlcədən görünən yerdə asılıb. Məntəqədə kamera quraşdırılıb, generatorla təmin edilib ki, hətta təsadüfən işıq sönəcəyi təqdirdə belə, prosesdə fasilə yaşanmasın. Mərkəzi Seçki Komissiyasının tabeliyindəki mərkəz tərəfindən məntəqədə baş tutan seçki prosesi rahatlıqla, canlı şəkildə izlənilə bilir. Bu məntəqədə 1269 seçici qeydiyyatdadır. 13 bələdiyyə yeri uğrunda 41 namizəd mübarizə aparır. Onlar arasında əsasən gənclər üstünlük təşkil edir. Artıq bir saat 30 dəqiqədir ki, seçki başlayıb. İndiyə kimi təxminən 300 nəfərə yaxın seçici məntəqəyə gəlib öz seçimini edib”.
Məntəqə sədri bildirdi ki, səsvermə prosesini 10 müşahidəçi də izləyir. Həmin müşahidəçilər müxtəlif siyasi partiyaları təmsil edən yerli müşahidəçilərdir. Müşahidəçi kimi Mərkəzi Seçki Komissiyasında qeydiyyatdan keçən Azərbaycan Xalq Cəbhəsi Partiyasının üzvü Hafizə Xuduyeva, müstəqil müşahidəçi Ələddin Hökməliyev səhər seçki başlayandan məntəqədə olduqlarını, seçki prosesini müşahidə etdiklərini vurğuladılar. Onlar məntəqədəki hazırlığı, seçiciləri qəbul etmək üçün görülən işləri qənaətbəxş hesab etdilər. Bildirdilər ki, seçicilərə qanunla nəzərdə tutulmuş şəkildə xidmət göstərmək üçün məntəqədə bütün imkanlar var.
Məntəqədə seçicilərlə də həmsöhbət olduq. Mehdiabad qəsəbə sakinləri Gürzalı və Dürdanə İsmayılovlar, Əfsanə Qasımova, Fərman Həşimov səs vermək üçün yaradılan şəraitdən razılıqlarını bildirdilər. Onlar ölkəmiz müstəqillik əldə etdikdən bu günə kimi keçirilən bütün seçkilərdə fəal iştirak etdiklərini qeyd etdilər. Qəsəbə sakini Kamil Qasımov da hər şeyin tam qaydasında və yüksək səviyyədə təşkil olunduğunu dilə gətirdi. O, məntəqədəki nizam-intizamın dərhal gözə çarpdığını, vətəndaşlara qanun çərçivəsində xidmət göstərildiyini söylədi. Dedi ki, hər bir vətəndaş kimi o da qaydalara əməl edib, sərbəst şəkildə istədiyi namizədlərə səs verib.
Seçkilərin gedişi və nəticələr barədə “Bütöv Azərbaycan” qəzetinin növbəti sayında daha geniş məlumat və digər məntəqələrdəki müşahidəçilərin rəyləri dərc olunacaq.


[/center]